من انجولا جانا الخبر السعيد
ومن اهلى شندى سمعنا الزغروده من بعيد
برافو اخوان حموده ونادر والدعيع الصنديد
وانتصر اخو الهلال الصغير
وجندل ناس الانتر جوا انجولا وخلاهو حلوهو يطير
واياك اعنى واسمعى يا جاره
وضرب السوط بيشح وان ما قدرو زح يا جناى...مانى دايرة ولدى يوح
وانت جعلى حر وما بيهاب المر
واللييييييييله يا ناس طاخ طيخ
واللييييييله يا ناس الشلاليت
والليييييله يا ناس ثورة الحجاره
والليييييييله يا ريكو
و ليه فكيت الشنط ؟
ما كت تخليها مربطه
وقالوا لينا انهم حاجزين ليك يوم 1/9/2012 لريوديجانيرو بالقطريه
والمك نمر حالفين ليك وعاقدين النيه
ونار الجعليه لسه مولعه
والحكم قالوا صاحب حماده شديد
والارباب عاجن وخابز افريقيا
وشطه عبد المنعم صاحب الارباب
وحتمشو وين
انتو ما غلبتو الانتر بطلوع الروح
و المك نمر غلب الانتر بدرقه
وفى الدقيقه ثمانين
والليييييله يا ليما و امانه ما جاك يعقوبو
والليييييله يا ضفر
ونحن حنشجع الاهلى
وحنشجع اخونا الصغير
ونحن جمهور راقى
و ما بنكسر الكراسى
وما بنقلع النجيله
وما بنرفع الجزم لفوق
ونحن اولاد ناس
واهلنا ربونا
ومن خشمنا ما بتطلع الشينه
وباي باي مريخ الجرسه
وبصراحه الكاف زعلان شديد
وممكن يمنع المريخ
واللعب حيكون فى شندى
والدخول قالوا بالسوط
واللى بتحمل الجلد ليهو تذكره
والسوط شايلو الارباب
والتذاكر مع العمده
والمعتمد قالوا مافى
وما فى استقبال خرافى
وشن لمه السمرى مع القمرى
و ما فى جرسه فى شندى
وما فى لولوه فى شندى
وما فى حركات ناس اكرم فى شندى
وما فى قلة ادب للصعايده
وناس شندى ما بيحبو كفر البطيخ
وما فى تعادل فى شندى
وما فى سيره و زغاريد فى شندى
وما فى طموح لناس المريخ فى شندى
والحضرى قالها من زمان
ومن وين حتجيبو الطموح
وازاى انا العب ضد عشرين
وخوفوا كلو من النيران الصديقه
وناس ضفر ما يطمنو
والكوكى زول غتيت خلاص وصعب
وجاهز للمريخ حتى لو لعب العجب
وممكن لو لعبتوها فى شندى ما ترجعوا بيوتكم
والوالى خلاص زهجان
وداير يتخارج لكنو خجلان
وما فى حوافز دولاريه
وما فى باسطه بطه ولا فى شعيريه
وياريت تخلو الكوره لاهلها
وياربى تخشوا عديل الخلا
و شغلة الدهب قريبه من شندى
وخلو الكوره للهلال
وخلو الفن كلو للهلال
وخلو احترام الحكام للهلال
وخلو الاخلاق للهلال
وخلو الصفوه لجمهور الهلال
وخلو احترام الكاف للهلال
ونحن ما حصل اشتكينا من حكم
لا هنا لا بره حتى لو كان فى ظلم
ووصلنا قمة افريقيا كتير
وما بكينا زى ناس بطه
ومع اهلى شندى شفتو براكم الحكم والكروت
لكن يبقى الحكم سيد الملعب
وده شعار الهلال
ودى ثقافة الهلال
ودى الكوره الحديثه
واكيد تيم المريخ مرضان
واكيد ادارة المريخ موهومه
واكيد اعلام المريخ سبب كل البلا
واكيد جمهور المريخ طيب لكنه ضحيه
وبيمشوا وراء مزمل وسلك زى القطعان
وماسكين ليك عقدة التحكيم
وقبل المباراه كل التحكيم عندهم فاشل
وبيتفقوا على ارهاب الحكام وبيحبوا المشاكل
والحكم الممتاز فى رأيهم هو البيقيف مع المريخ
واي وقعه عندهم بلينتى
والعنف والشليت فن كوره
وما فى زول بيسألهم لو ضربو ايكانقا فى ركبتو
و الكاف كاشف كل الاعيبهم
و العقوبات جاهزه بالقانون
ويمكن يستبعدوا المريخ
ويعتبروا مهزوم فى المقبره
ويمكن يلعب مع الاهلى بدون جمهور
و المريخ ما داير نظام الكروت
لا كرت صفراء ولا كرت حمراء
ودايرين الفيفا تسمح ليهم بالعنف والتكسير
ودايرين كوره بدون فيفا وبدون كاف وبدون قوانين
المريخ دايرها كورة قرون وسطى
والمريخ بيحبها مصارعة نوبه
وياريت الحكام يكونوا مزمل وسلك وحسن محجوب وابوشيبه
وانا بقول ليه تصنيف الهلال هو الافضل عالميا
وعشان كده الهلال ضمن افضل فرق افريقيا والعرب
وعشان كده المريخ طيش فرق القاره
فلا مكان اخوتى للعنف المفرط فى عالم اليوم
ولا مكان اخوتى للاحتجاجات المبالغ بها ضد التحكيم فى عالم اليوم
ولا مكان اخوتى لرعاع المشجعين فى عالم اليوم
قال أمير المؤمنين (عليه الصلاة والسلام) :... يا كميل !.. احفظ عني ما أقول لك : الناس ثلاثة : عالمٌ رباني ، ومتعلمٌ على سبيل نجاة ، وهمجٌ رعاع أتباع كل ناعق ، يميلون مع كل ريح ، لم يستضيئوا بنور العلم ولم يلجأوا إلى ركن وثيق
محمد حسن شوربجى
