كمال الهِدي

kamalalhidai@hotmail.com



· ليك حق يا أوتوفيستر ترتبط بعلاقة لصيقة بالوالي.

· البخليك ما تكون حبيبو شنو ما دام لما تكون داير تخلي الفريق وهو على أعتاب آخر مباراة في بطولة قارية بتقول ليه أحسن لي المنتخبات من الأندية لأني طعنت في السن والسفر للولايات عندكم صعب، طوالي يوافق ويرتب ليك كمان حفل وداع وتشتغل الآلة الإعلامية لتصويرك وكأنك بطل حارب من أجل رفعة لواء المريخ مع إنك ما احترمت المهنة.

· ليه ما تكون علاقتك بي جمال وثيقة يا أوتوفيستر طالما أنه يعيدك بعد اعتذارك الما كان ممكن بفيدك لو كان رئيس المريخ غير هذا الجمال..

· تترك الفريق في ذلك الوقت الصعب عشان لقيت ليك عرض مغري من الاتحاد الكاميروني وتضحك عليهو بي حكاية صعوبة تدريب الأندية على زول في عمرك.. وبعد سبع سنوات بالتمام والكمال يعيدك لتدريب المريخ! ليك حق تعتز بيها صداقة.

· يكون المريخ أصبح منتخب ونحن ما عارفين!

· ولا تكون السبع سنوات دي خُصمت من عمرك ونحن ما جايبين خبر!

· ولا إمكن الأعمار عندكم في ألمانيا بحسبوها بالماينص وعشان كده الوالي الفايتنا ذكاء ومفهومية أرادك أن تعود لتدريب ناديه بعد أن صرت أكثر شباباً وحيوية!

· ليه ما يكون الوالي صاحبك وصاحبك شديد كمان يا أوتوفيستر طالما أنك وأمثالك لاقين الجناين المثمرة دي والأموال السائبة التي تُنفق يميناً ويساراً دون أن تحقق شيئاً لجماهير المريخ المخدوعة منذ أكثر من عشر سنوات!

· نعلم أن الوالي حبيبك وصديقك وصديق كل الأجانب الذين تعاقدوا مع المريخ في السنوات الأخيرة.

· قبلك كان الحضري الغجري.

· وسبقك برضو كروجر..

· وده زاتو حريف زيك، كلما يطلبو الوالي الجاري عليهو ما يلحقو عشان عارف انه حا يخم ليهو عُكشة دولارات ويرجع بلدو في أقرب وقت.

· ما أصلو الوالي تخصص تغيير مدربين ولاعبين كمان.

· والقائمة طويلة لمدربين ولاعبين لهفوا الدولارات وخلوا الحال في حالو.. وبرضو ما في زول بزعل ولا بحتج.

· هي القروش تعبانين فيها!

· ما سااااهلة وراقدة زي التراب..

· فهنيئاً لك بصداقة الوالي..

· وكلها يومين تلاثة وحا نسمع بيك مغادر بلدنا وحا نشوف الوالي في وداعك وحا نسمع نفس الكلام القالوهو بعد مغادرة كروجر " إنهاء العقد بالتراضي".

· مش قلت ليك ما في زول بزعل ولا بحتج يا أوتوفيستر!!

نقطة أخيرة:

· يتوقع أن يكون لاعبو الهلال قد أخذوا الراحة الكاسو ليها في مطار أديس وما لقوها وتدربوا استعداداً لمباراة السبت.

· هي مباراة تحتاج لتركيز وثبات وهدوء في التعامل مع الحكم تحديداً.

· دعكم من الحديث عن رشاوي الحكام وتركيز إدارة الملعب المالي على اللعب خارج المستطيل الأخضر، وركزوا مع كورتكم يا لاعبي الهلال وحاولوا بقدر المستطاع إحراج الحكم وعدم منحه فرصة للضغط عليكم.

· اللعب النظيف مع الضغط على حامل الكرة خارج الـ 18 ياردة وعدم الاحتجاج على قرارات الحكم أياً كانت من شأنه أن يعينكم كثيراً في تحييد الحكام.

· المحاضرة التي يقدمها المدرب قبل اللقاء أكثر أهمية في مثل هذه المباريات من التدريبات البدنية.

· وليعلم النابي أن أحد أهم مشاكل مدافعينا تحديداً هي ضعف التركيز في البدايات والنهايات.

· ولتكن الوصايا عشر بل، عشرين أو يزيد حول أهمية التركيز في الدقائق الأولى والأخيرة من كل شوط.

· إن أراد لاعبو الهلال العودة بنتيجة جيدة فأهم ما في هذه النتيجة هو التسجيل في مرمى الخصم.

· كل العشم أن يكون نجوم الهلال على قدر المسئولية ويحققوا تطلعات جماهيرهم بالمضي لمراحل متقدمة في هذه البطولة.