المشهد الاول :

قلبي يحدثني ان البرير صار بعيدا عن الهلال

وانه ربما يكون قد ترك رئاسة نادي الهلال منذ فتره

البرير يا جماعه هو رمز الهلال

ويجب علينا احترامه

الايام دي الناس بيقولوه الماقاله بأنه لن يترك رئاسة نادي الهلال وان تركها مكروها سوف يذهب لتشجيع المريخ

قلت مستحيل الراجل يقول كلام زي ده

الحكايه شنو

الحصل شنو لرؤساء كل واحد فيهم لامن يزعل يقول ماشي المريخ

الارباب قال ماشي المريخ

والبرير يقولوا ماشي المريخ

للامانه والتاريخ لم اكن في يوما من الايام مع هذا او ذاك

ولم تستهوينا الشلليات او الزفات

ولا الحفلات ولا القعدات

لم اكن بريريا او اربابييا

ولم اكن من الذين يتحلقون علي الفتات

وكنا نمقت كثيرا كل تلك التسميات

والهلال عندنا هو كل العشق وكل نكران الذات

ورغم كل هذا كنا نشيد احيانا بكثير نجاحات البرير

وكنا نذكر دائما اخلاص الارباب

وكنا نفرح حين كان ينتصر الهلال

وقلنا زمان لا يجوز ان للبرير ان يحكم النادي بالرموت كنترول

حيث انه وكما كانوا يقولون نادر التواجد في نادي الهلال

وان كانت هذه هي حال الكثير من قياداتنا في العالم العالم العربي

لا اظن لهؤلاء الرموز ان تطأ ارجلهم نادي المريخ

الفريق طارق عثمان قال ان مكان صلاح ادريس فى مجلس الشرف محفوظ

وده كلام فارغ

لا يمكن ان يعشق هؤلاء نادي غير الهلال



المشهد الثاني :

اخيرا بسط سيدا كل سيطرته علي نادي المريخ

وتربع وخت الرجل علي الرجل

واصبح سيد بيت

حين انتقل الي المريخ اشفقنا عليه كثيرا

وتوقعنا له مصير هيثم طمبل

ولكنه حمل صولجان الملك

والذي قال عنه د. مصطفي محمود :

لو ادرك الحكام ان صولجان الملك قبس من جهنم لما تسابقت اليه الايدي

اشفقنا عليه احيانا

وقد كان ملئ قلوب اهل الهلال

لكنه تجاوز وبسهوله كل محطات العشق الازرق

لينتقل الي عالم احمر شديد الحراره

ولا ندري كيف يحتمل نار جهنم

بدأ البرنس يعانق ذلك الكيان مجبرا

رغم السبعة عشر عاما التي قضاها في الهلال

ودفء كل الاحضان الزرقاء

لا اظن ان البرنس يحب المريخ من جوا قلبه

لان جماهير المريخ لا تحب البرنس بقدر رغبتها كيد اهل الهلال

وهناك من يطبل له ويرقص ويسميه الامير الساجد

وده كل من طرف اللسان وممكن احلف



المشهد الثالث :

قال لي : هل تصدق ان هناك من يتصل على مزمل ابو القاسم لكى يطلق عليه لقب ( ولدنا) ويرتفع اجره

قلت : كيف للاعب فى اكبر نادى سودانى وهو الهلال يتمنى ان يطلق عليه الاعلام السالب هذا اللقب السخيف

قال : المريخ تعود تسجيل اي مشطوب هلالي وحتى لو كورتو مطرشقه

قلت : هو ما بس المشاطيب ديل لو لقو طريقه يسجلوا كل مشجعي الهلال قال : صدقني المريخ عندو اللاعب الهلالى افضل بكثير من كل محترفيي افريقيا

قلت :هل تعلم ان الكثير من لاعبي المريخ هم من الهلال

قال : كلاتشي الباشا اكرم علاء الدين هيثم

قلت : نصف الفريق

قال : عشان كده المريخ علي طول سيبقي وصيفا للهلال حتي لو فاز بالدوري بالطرق الملتويه

قلت : هل تعلم ان ناس المريخ مشاكلهم الماليه اكبر من الهلال وقد ظهرت علي حقيقتها عندما استقال الوالي

قال : المريخ بصراحه بيغلى من جوه وظهر ذلك في انتخابات المريخ

قلت : قوة الوالى وثروته هي التي تطغي علي كل ديون النادي

قال :ولا حديث يعلو علي حديث الوالى

قلت : حين يرفع احدهم صوته عاليا يسكته الوالي بالتلفون من فداسي او جده

قال : نتمنى ان يتوقف كتاب المريخ عن السخريه و التهكم بمشاكل الهلال

قلت : هو مزمل ما حيبطل عادتو

قال : اعلام المريخ كله فصيح ساي

قلت : وبيقولوا همشري داير يسجل لينا الباشا ونصدق نحن في الهلال ما دايرنو

قلت : وهم جاريين ورا كاريكا ومساوي

قال : وماذا عن الجنتلمان

قلت : الله يرحمها



ختام المشاهد :

لو عايز تضحك علي الاسمر لبسه احمر

وانا بكره اسرائيل وبحب عمرو موسي





محمد حسن شوربجي