المشهد الاول :

علينا جاي علينا جاي

مشاطيب الهلال واحد + واحد مجانا

قرب يازول قرب جاي

يلا يا ناس المريخ يا حلويين

يا زبائن السوق الدايمين

قولوا لجمال الوالي وطارق واللوردات والباقين

عندنا مساوي وعندنا تراوري وعندنا بهاء الدين

وعندنا وليد والمامي و سنكارا و خليفه لو دايرين

وكمان عندنا ود البرير الامين

علينا جاي علينا جاي

الهلال خلاص داير يشطب خمسه لاعبين

والمريخ طبعا منتظر الفرصه دي كل ساعه وكل حين

وطبعا هو متخصص في لاعيبة الهلال وكل المشطوبين

وعشان كده قعد يوهم جماهيره ويوعدهم باحلي المحترفين

وسمعنا عن دروغبا سيد الاسم وبرضه ما خايفين

والغريبه انهم رجعوا تاني وقالوا نحن آسفين

غلطنا في حرف الراء وما قاصدين دروغبا سيد الاسم ما جاي يا مساكين

تصدقوا غيروا الصوره بلاعب تعبان وفي الحين

وقالوا اسمه دوغبا وما لاقي حجز ولا في سيارته شوية بنزين

ولحد حسع لا جاء دروغبا ولا جاء دوغبا ونحن منتظرين

وقالوا جاي بكره وماشين المطار جهزوا الفنانين

مسكين جمهور المريخ هو الضحيه ودا حرام يا مسلمين



المشهد الثاني :

لقد اصاب اخونا الاستاذ عبد الله القاضي حول رتابة برامج العيد

واضم صوتي لصوته فقد عودتنا كل شاشاتنا السودانيه بالتكرار ولا جديد

والله كرهتونا

ما هذا الكم من البرامج الغنائيه

وما هذا الكم الهائل من الفنانين واشباه الفنانين والغوغائيه

وما هذا الكم الهائل من الاغاني الهابطه وتقليد الفنانين الكبار والفوضويه

لا جديد في التلفزيون السوداني غير ٣ او ٤ شخصيات ومعاهم فنان

واحاديث وحكاوي و شخصيات وسير ذاتيه وكلام في الفاضي والمليان

وانا دفعتي فلان وقريت مع علان

في خور طقت و وادي سيدنا وامدرمان

وحديث عن النفس وليس عن الوطن

اين اخوتي البرامج التي تهم الراى العام سواء كانت اجتماعية , اقتصادية , او سياسية او ترفيهية

ولماذا العمل علي افساد الامة السودانيه عقب عشر ايام فضليات من حج وعرفات

ولماذا إلهاء النفس السودانيه عن ما تعيشه من ضنك في العيش

وشغلها بالبرامج والحوارات الممله والهشك بشك

يا اخوانا الشيئ اذا زاد عن حده ينقلب ضده

ما ممكن ترفع ليك حجر وتلقي ليك فنان جديد

سؤال برئ :

ياربي كم عدد المطربين والفنانين في السودان

هل من احصائيه ام ان من يريد ان يكون فنانا يمشي للسر قدور وياخد تصريح وخلاص

وياريت فنانين يفتحو النفس لا كلمات ولا لحن و لا لبس ولاواستغفر الله العظيم

اللهم لا نسألك رد القضاء



المشهد الثالث :

كما قلت من قبل فان جنرال الهلال الرائع صلاح محمد آدم لا يستطيع لوحده ان يضع خارطة طريق هلال ٢٠١٤

ففي الاخبار ان ادارة الهلال ستعتمد علي تقرير السيد الجنرال

وفي الاخبار كذلك ان ادارة الهلال سوف تقوم بشطب عدد كبير من اللاعبين

الجنرال يا اخوانا قال وبكل سهوله انه لا يريد كل المحترفين الاجانب

وحتي سيدي بييه الفنان قال انه ضعيف البنيه و لولا الضغوط التي مورست عليه

وتراوري طبعا طينها شديد ورايح رايح

والمامي وسنكارا وكلهم

يعني الشطب بالجمله

وكذلك سمعنا ان بعض الوطنيين سيتم شطبهم بهاء الدين ووليد ويمكن خليفه

طيب الرايح رايح وما بهمنا كتير

لكن ماذا عن القادم الجديد

ياريت ما نبدأ نصفق ليهم من حسع وبمجرد نشر اسماذهم في الصحف

فقد نتفاجأ بمواسير بلاستيكيه رصاصية اللون

وبعدين مين هو البيعذب جمهور الهلالباستجلاب انصاف المحترفين

السماسره ام الامين البرير لوحده

صلاح محمد ادم ام ود ملاح وخزيمه

لماذا ياخوانا لا تكون لجان فنيه من كبار لاعبي الهلال والقدامي للاشراف علي شطب و تسجيل المحترفين الجدد

لماذا الاعتماد علي السماسره وتجار الرياضه

لا يمكن ان يسجل البرير المحترفين بتلفون من سمسار

ولا يمكن ان يسجل ود ملاح المحترفين بسيره ذاتيه من النت

ولا يمكن ان يسجل الكاردينال المحترفين لانه عضو شرف

شاوروا الفنيين ومعاهم الجنرال

واتركوا الخبز لخبازه

عندكم كسلا وعندكم النقر وعندكم شوقي

وعندكم فوري التعايشه وعندكم امين زكي وعندكم قاقارين

عليكم الله دايرين شنو

ديل يا اخوانا ما دايرين قرش وممكن يخدموا الهلال لانه عشقهم

ليه ادارة الهلال تدخل في حته التخصص دي وتفشل وتشطب وتخسر

الظروف الاقتصاديه مطينه بطين

كذلك يجب اجادة صياغة عقود المحترفين الجدد

قبل كده اتقرصنا كتير في عقود هوت و كامبوس وغيره

كذلك قد يتفاجأ النادي ببعض اصابات المحترفين

يااخوانا متي سنرتقي بالهلال ونجنبه الاخطاء الفرديه فنيه كانت واداري

صفقة اتوبونج الفاشله مازالت عالقه في اذهاننا

نتمني من الله ان يوفق الهلال في قادم التسجيلات



ختام المشاهد :

الليله الليله ٧ انديه دايره تنسحب من الدوري والظاهر الدوري حيطير من الجماعه



محمد حسن شوربجى