المشهد الاول :

لا يختلف اثنان ان هيثم مصطفي قد فقد بريقه الكروي بعد انتقاله لنادي المريخ

ولا يختلف اثنان ان هيثم قد بدأ يصارع كبر سنه ليثبت انه مازال قادرا للعطاء

ولا يختلف اثنان ان هيثم كل همه كيد اهل الهلال والبرير لانهم شطبوه

ولا يختلف اثنان ان الخلاف ما بين الارباب والبرير هي احدي مسببات حالة هيثم

ولا يختلف اثنان ان هيثم مصطفي سجل للمريخ مكايده للبرير

ولا يختلف اثنان ان اعلام المريخ قد وجد ضالته في هيثم لتوزيع الصحف الفاقده للشعبيه

قالوا عنه في مباراة القمه الاخيره :

انه منع زملائه لاعبي المريخ من مصافحة نجوم الهلال الذين حلوا عليهم ضيوفا باستاد المريخ قبل انطلاقة المباراة في حضور مندوب سوداني التي قامت بتقديم احتفالية رائعة في المباراة

وقد تحفظ نجوم الهلال علي هذه الخطوة غير الانسانية وكانت الدافع لهم لتحقيق انتصارهم الداوي

ثم قالوا عنه انه هو من سجل الهدف الثالث في مباراة الخرطوم الاخيره

وصفقت له جماهير المريخ طويلا

وكتبت عنه الاقلام المريخية باسهاب

في حين ان الكره قد اصطدمت بالقائم ثم ببطن العارضه ثم سقطت خارج خط المرمي ليكملها باسكال داخل المرمي

وقد تردد الحكم في الاشاره لدائرة السنتر

واول مره في حياتي اشوف كوره ما دخلت قوون يحسبوها

وبركاتكم يا بدر الدين وباقي الحكام الحمر

ووينك يا ابوشيبه يا رئيس هيئة كبار المظلومين من التحكيم

وسلملي علي سيحه القولوا عليهو خبير تحكيمي

ومازالت الاقلام الحمراء العمياء تصف ذلك الهدف بالاسطوري في حين انه لم يدخل المرمي الا بعد شوطة باسكال

اهم ما في الامر ان يلمع الاعلام المريخي هيثم مصطفي لغرض في نفس يعقوب

والبوبار وشوفوا يا ناس الهلال كيف هيثم في المريخ

لكن العاقلون من اهل المريخ يصفون هيثم باللاعب تقيل الحركه والغير مقاتل

خاصة بعد تدني مستويات وسط المريخ في مباراة القمه وبطء امير كمال واصابات فيصل موسي

والرغبه ملحه في الاتجاه نحو الشباب

بصراحه هيثم مصطفي خلاص كبر وليهو تسعطاشر سنه

وراح منه عمر الزهور وعمر الغرام وعمر المني

ولقد بدت عليه الشيخوخه الكرويه

فلم يعد هيثم هو ذلك الذي كان يصول ويجول في الهلال ١٧ عاما

ولم يعد هيثم هو ذلك الذي كانت تهتز له المدرجات الزرقاء با هازيجها سيدا سيدا

هيثم الان لاعب يحتضر

وفي نهايات مشواره الكروي

وشمس هيثم بدأت في الغروب

وما تنبهروا بذلك الهدف الذي لم يكن

خوفي ان تشرع ادارة المريخ في احراج هيثم واقتلاعه كما اقتلعت فيصل العجب

ورحم الله العملاق وردي :

قلت أرحل ..

أسوق خطواتي من زولاً نسى الإلفة

أهوِّم ليل

أساهر ليل

أتوه من مرفى لي مرفى

ابدل ريد بعد ريدك(حبك)

عشان يمكن يكون اوفي

رحلت وجيت

في بعدك لقيت

كل الأرض منفى

عيونك زي سحاب الصيف تجافي بلاد وتسقي بلاد

وزي فرحاً يشيل مني الشقا ويزداد

وزي كلمات بتتأوّه.. تتوه لمن يجي الميعاد

وزي عيدا غشاني وفات عاد عمّ البلد أعياد

وزي فرح البعيد العاد

وزي وطناً وكت اشتاقلو برحل ليهو من غير زاد

بدون عينيك بصبح زول بدون ذكرى وبدون ميلاد

رحلت وجيت

في بعدك لقيت

كل الأرض منفى

زمان الفُرقة والتجريح بسِيبُو عشان تشيلو الريح

بسيبو عشان صحيح الذكرى بتّوِّه عمرنا صحيح

وانتِ معايا لا بندم ولا بقضي العمر تبريح

أصلو العمر شوقا ، حزنا كان وصبرا كان فسيح وفسيح

أصلو العمر كان دربا مشيتو كسيح

وكان غرسا سقيتو بكى وقبضت الريح

رحلت وجيت

في بعدك لقيت

كل الأرض منفى



المشهد الثاني:

لا اظن ان جنرال الهلال الرائع صلاح محمد آدم قادر علي وضع خارطة طريق هلال ٢٠١٤

ففي الاخبار ان ادارة الهلال في انتظار التقرير الفني للاحلال والابدال

الجنرال يا اخوانا وبجرة قلم داير يشطب كل المحترفين الاجانب

وحتي سيدي بييه قال انه ما بيعرف كوره

وتراوري قال عليهو انه غير متعاون مع زملائه

لماذا ياخوانا لا تكون ادارة الهلال لجنه فنيه من كبار لاعبي الهلال القدامي ويتم شطب او اختيار المحترفين

لماذا الاعتماد علي السماسره زي بتوعن العده اللي بيجوا في البيوت ونشتري منهم طوالي

لا يمكن ان يسجل البرير المحترفين

ولا يمكن ان يسجل ود ملاح المحترفين

ولا يمكن ان يسجل الكاردينال المحترفين

شاوروا الفنيين

واتركوا الخبز لخبازه

عندكم محمد حسين كسلا وعندكم مصطفي النقر وعندكم شوقي

وعندكم فوري التعايشه وعندكم امين زكي وعندكم علي قاقارين

لماذا لا نستعين بهؤلاد الافذاذ

الآن الهلال بصدد شطب كل المحترفين

ليه ادارة الهلال تدخل في الحته دي وهي عارفه الظروف الاقتصاديه السيئه والتي تعصف بالانديه وبالسودان كله

كذلك يجب علي ادارة الهلال ان تجيد صياغة عقود المحترفين وان تضمن كل الشروط الجزائيه بالعقود

من قبل اتقرصنا كتير في عقد هوت وعقد كامبوس وفي الطريق عقد غارزيتو الذي في الفيفا

كذلك يتفاجأ النادي كثيرا باصابة بعض المحترفين ويخسر

يااخوانا متي سنرتقي بالهلال ونجنبه الاخطاءالفرديه من فنيه واداريه والسستم وعك خزامه وغيره

والله يا اخوانا كل خسارات الهلال في البطولات الافريقيه كان سببها الاخطاء الاداريه والفنيه

لا نملك اخوتي الا ان نقول يارب تفرحوا جمهور الهلال العظيم ولو مره واحده بتسجيلات مكتمله وحقيقيه تمكن الفريق من الفوز ببطوله افريقيه



نجمات الختام :

*** اهلي مدني والاتحاد قد ينسحبا من الدوري بسبب التحكيم السيئ و اهلي شندي تضرر من التحكيم السيئ والامل تضرر من التحكيم السيئ والهلال تضرر من التحكيم السيئ

وده كله كوم وحركات الجكومي في مباراة النيل وتأثيره علي الحكام

يا اخوانا الراجل ده خميرة عكننه لكل الرياضه السودانيه

في زول مذكر ميدان الامم المتحده والبرير

ويا صلاح احمد محمد صالح كل الفرق تتضرر من التحكيم الحكايه شنو يااخي ما تفرض شوية عقوبات يا اقلب وجهك



*** مساكين جماهير المريخ مخدوعين بالديمقراطيه الكضابه وصفوف في النادي وشكل وتشنج وفي النهايه جمال الوالي هو الرئيس طوالي

طيب ليه معذبين نفوسكم

اقعدوا في البيت وجمال الوالي يجييكم رئيس طوالي

*** حتي الآن لم ينطق اتحاد المريخ في شكوي اهلي شندي والظاهر ان جمال الوالي يملك تحت يده هذا الفايل وناس معتصم صور ساكت ويمكن قال لمعتصم جمدوا الموضوع حتي يقابل عديله صلاح ادريس ويعقد معاه صفقه اسريه

اراهن ان المريخ لن يخسر هذه النقاط

ده فريق الحكومه يا اخوانا بلا اهلي شندي بلا كلام فاضي



محمد حسن شوربجي