المحطه الاولى:

الوزير عدو الهلال



** الهلال يا اخوانا عايش فراغ اداري شديد والبرير ما عارفنو رئيس والا ما رئيس والحكايه جايطه والحرب علي الهلال بأمر الحكومه



** يعني المشكله في الهلال ما فنيه بل هي اداريه بأمتياز ونجوم الهلال وشبابه قادرون علي قهر كل الصعاب ويمكن يفوزوا بالدوري والكاس والافريقي اذا هيئنا لهم جوا مثاليا خاليا من كل المنغصات



** وبصراحه سيادة الوزير اكد بما لا يدع للشك انه وزير فاضي وما عنده شغله وانه مريخابي علي السكين و انه في خدمة جمال الوالي ذلك الرجل الغني والنافذ في الحكومه والمؤتمر الوطني



** والحكايه ظاهره وقد جعل الهلال يغلي بهذه الطريقه السيئه ودربكه وحقوق محترفين وفيفا ومحاكم

** سيادة الوزير زولا جاي من الغرب والظاهر ما حيسر القلب والظاهر ان ضاع في بلد تحكمه هوامير و تماسيح وكيزان



** والظاهر ما عندو اي خبره رياضيه ولا اداريه وما سمعنا بيهو قبل كده



** والظاهر الجماعه رموه في البحر وهو ما بيقدر يعوم وهو مطالب بتظبيط الهلال وجندلته حتي يفقد كل نقاط الدوري نقطه نقطه واحد اتنين تلاته اربعه خمسه زي الزير وما زال العرض مستمر



** والظاهر الخطه المريخيه ثلاثيه الابعاد والي - وزير - مصطفي اسماعيل

** الراجل يا اخوانا حالته تحنن وهو في وش المدفع والتعليمات امسح الهلال اكسح الهلال قش الهلال

** ولازم تستمر الازمه الهلاليه ويخسر الهلال كل مبارياته الدوريه

** و الوزير دوره المرسوم ليهو انو يؤجل التسيير ويؤجل التصريف ويؤجل الاستقرار ويعلق الهلال بين السما والارض

** ومستحيل وزيرنا الهمام يدفع قرش للهلال ولا لهوت او تراوري

** الوزير ده يا اخوانا سايب كل مشاكل السودان الشبابيه والرياضيه وسايب المدينه الرياضيه وملاعب حلفا والجنينه وطوكر وشغال بالهلال وبرير الهلال

** الوزير ده يا اخوانا سايب شبابنا هايمين علي وجوههم في بلدان العالم وشغال بالهلال

** الوزير ده يا اخوانا سايب وزارته وداقي خيمه في العرضه شمال

** والوزير ده يا اخوانا عامل فوضي خلاقه بين جماهير الهلال

** والوزير ده يا اخوانا ما قادر يخلصنا من البرير ولا قادر يجيب لينا لوردات

** الوزير ده يا اخوانا قراراته سريعه في استقرار المريخ

** والوزير يا اخوانا قراراته سلحفائيه في حق الهلال

** يا اخوانا الوزير ده مطنش حتي كلام رئيس الجمهوريه والذي طلب بعدم التدخل في شئون الرياضه

** يا اخوانا الوزير ده ما عارف قيمة نادي الهلال وماذا يمثل لشعب السودان

** يا اخوانا الوزير مسكين وما عارف ان 75 في الميه من السودانيين هلالاب



المحطه الثانيه :

الجكومي عدو الهلال



** الجكومي بصراحه عدو صريح للهلال



** الجكومي بصراحه لا شغل له الا الهلال



** الجكومي وبصراحه لا يفكر الا في هزيمة الهلال



** الجكومي هدف بشه بوظ اعصابه طلع بحجة مباراة مريخ الحصاحيصا



** الجكومي خسر المعركتين



** الجكومي يعتقد ان في الحصاحيصا ملعب كوره



** الجكومي لا يعلم ان دي حواشه من حواشات مشروع الجزيره



** الجكومي اكيد حيقع في شر عماله لانه يواجه الهلال واعلام الهلال



** الجكومي قد يعلق في ميدان الامم المتحده بأمر جماهير الهلال



** اعلام الهلال مطالب باسكات هذا الجكومي وش مدفع الدلاقين والشايل وش القباحه



اخر الكلمات :

إن عجبت لشيء فعجبي لرجال تنمو أجسامهم وتصغرعقولهم. الاحنف بن قيس



محمد حسن شوربجي