فضيحة النسور

وشوشنى العبير فانتشيت

انه حقا عبير الهلال وقد عطر دنيانا

بخماسيه رائعه في مريخ الغرب

و الذي ظن انه كبيرا مع الكبار

وقد تم فطامه مبكرا

شكرا هلال الجمال

شكرا هلال كاريكا

شكرا هلال بكري

شكرا هلال الشباب

اليس غريبا ان يبدع الهلال وهو بلا اداره

اليس غريبا ان يمتع الهلال وهو بلا هويه

همشري طلع همشري نزل

البرير رايح البرير جاي

الوزير صاحي الوزير نايم

تسيير تيسير تدمير

لن يفلح اعداء الهلال في النيل منه

وصح لسان من قال :

ومن خلقنا عـرفنـا الله ... الـوطـن ... بـعـدو الـهـلال

زاهي فوق كل النجوم ... مكسي بي لون الجمال

تـاريـخ مـرصـع بـالـدرر ... في وصفه أبدع من خيال

دا الـزعيم سـيد الـبلد ... قاهر المحن قاهر الرجال

صيته ذائع في البلد ... في الجنوب أو في الشمال

و كل بلاد الأرض أجمع ... ما بتصوم من غـير هـلال

و الـهـلال لـو مـا سطع ... يبقى برضـو العـيد محـال

و الـعـريس يـوم جرتقو ... فوق جبينو تشـوف هـلال

لو مشينا على المساجد ... في القبب تلقى الهلال

مبروك



عشنا وياما حنشوف

قالوا ان لجنة الحالات الطارئة في إتحاد كرة القدم السوداني ستعاقب 11 مسؤولا إداريًا في نادي النسور بالإيقاف, وذلك في الواقعة التي تعتبر الأولى في تاريخ كرة القدم بالسودان, حينما انسحب من المباراة التي حل فيها ضيفًا على فريق الأهلي شندي في شمال السودان في الدوري الممتاز بعد بداية شوطها الثاني, ورفض العودة إلى الملعب, وكان حينها خاسرًا للنتيجة 0-3, بل وأصر على رفع شكوى ضد حكم الوسط عماد عبد الله لدى شرطة مدينة شندي بحجة أنه كان في حالة سُكر، وهو يدير المباراة, وهو ما لم يثبته التقرير الطبي الذي أجري رسميا على الحكم

اين هو هذا العقاب

وعشان ما يحصل اللي حصل من ناس النسور

وعشان ما نعيش ارهاب المخابرات والشرطه والمرور

وعشان ما تتأهل فرق الامن والمخابرات و الدبابات والطابور

يجب ابعاد الفرق المدعومه امنيا ومخابراتيا عن اتحادنا العام

ويجب ابلاغ الفيفا بخطورة ضم مثل هذه الفرق في الاتحادات العامه

يا اخي اعملوا ليكم اتحاد زي ناس القوات المسلحه

واعملوا ليكم اتحاد عربي للرياضة العسكرية

زمان ناس الرياضه العسكريه كان عندهم مبني في شارع الجمهوريه

وشاركوا كتير في البطولات الدوليه

قدموا ليهم اوراقكم وخلونا في حالنا

اعملوا ليكم اتحاد زيهم و فارقونا وريحوا بالنا

حنسوا اصحابكم العساكر

مصلحتكم اكيد واحده

زي ما القهر عندكم واحد

والديكتاتوريه عندكم واحده

وزي دباباتكم دايما جاهزه

وفي كل دوائر الحكومه ناس الامن اول

وما بتقيفوا بالصفوف زينا

وممكن يدوكم شقق في الابراج

خلونا في حالنا

وخلوا لينا كورتنا وريحوا بالنا

والله اول مره نسمع حكم يسوقوهو بالقوه عشان يكشفوا عليهو سكران او ما سكران

بصراحه دي فضيحه سودانيه

سيتحدث بها الركبان

وستضحك علينا فيها العربان

وكيف لنا ممارسة كرة القدم في هذا الجو القهري وبدون امان

نطالب رفع الامر للفيفا ولو لزم للامريكان

وبراءة الحكم ما كفايه

ومحاكمة اهل النسور ما كفايه

وتدخل الاجاويد ما كفايه

واطفوا الموضوع ما كفايه

ولموا القضيه ما كفايه

الفيفا جنها وجن التدخل الحكومي في الرياضه

معقول الحكومه تدخل دار الرياضه بجيوشها وطياراتها

وزمان قالها شداد : العساكر لا يتقبلون الهزيمه





قالوا ان اعمار لاعبي الهﻼل :

محمد عبدالرحمن 19 عام

محمد احمد 20 عام

مالك 20 عام

اتير 23 عام

سيدي بيه 25 عام

على النور 21عام

كاريكا 27 عام

جمعة جينارو 24 عام

مروان الحرية 19 عام

مهند الطاهر 27 عام

عمر بخيت 30 عام

وقالوا ان اعمار لاعبي المريخ :

الحضري 45 عام

هيثم 44عام

اوليفية 38 عام

غاندي 37 عام

بلة جابر 35 عام

كلتشي 37 عام

بسكال 35 عام

راجي 34 عام

موسى الزومه 33 عام

سليماني 40 عام



ابراهومه : لعبنا بكرات قدم غير قانونيه تسببت في هبوط الاداء

صلاح احمد آدم : النجيله كانت طويله وتسببت في هبوط الاداء





محمد حسن شوربجي