هلال الشعب :
بصراحه حين شاع ان القصر الجمهوري ورئيس الجمهوريه قد دعا كل من البرير وهيثم مصطفي للتوفيق بينهما في الخلاف الذي نشب بينهم في 2012 كنت اكثر الناس تبرما وضيقا من محاولات الحكومه في حشر انفها في النادي الذي نحب والحمد لله فقد ثبت للعيان ان الهلال لم يكن سوي نادي للخريجين وفريق للشعب فلم يكن الهلال في يوم من الايام متسولا في ازقات الحكومه تقام فيه حفلات تكريميه تمنح فيها اوسمة النيلين او ابن السودان البار
============================================
مريخ الحكومه :
يقول الاخ اسامه من الامارات سائلا الاخ ابراهيم عوض :
نريد إجابة عن هذا السؤال ياسيد إبرهيم وهو لماذ تحاول حكومتنا بكل ما أوتيت من قوة المال والرجال في دعم فريق المريخ لخلق واقع جديد يكون فيه المريخ متفوقا في كل شيئ على جميع الأندية السودانية بما فيها نادي الهلال صاحب الأغلبية الساحقة !! هل تصدق أن وزير الإستثمار مصطفى عثمان إسماعيل يجوب الأرض من أقصاها الى أدناها مستعملا قروش الدولة في تنقلاته من تذاكر ونثريات ووقت هو ملك لهذا الشعب المغلوب على أمره فقط من أجل عيون المريخ بالأمس كان في القاهرة يتفق مع الأهلي المصري للعب مع المريخ قصاد 200 ألف دولار تدفع من دماء المساكين والمحرومين واليوم في قطر يجتمع برابطة أهل المريخ , وغدا لا ندري أين سيكون , هل هو وزير للمريخ أم وزير الإستثمار لجمهورية السودان بكل طوائفه انتهي
حقيقه الموضوع خطير وجد خطير ان تجند حكومة السودان كل طاقاتها لمناصرة فريق المريخ وقد كان ولمدة عشر سنين كان فيها جمال الوالي رئيسا للمريخ وكان المريخ فيها اشبه بنادي خليجي يستجلب المحترفين بمبالغ خرافيه تحدث عنها ائمة المساجد مستهجنين ذلك التصرف البذخي الارعن والذي لم يحدث في تاريخ السودان في وقت تعاني اجزاء كبيرة من بلادي من فقر مدقع وتعيش غالبية سكانه تحت خط الفقر آلان عادت الحكومه للمريخ في ثياب لوردات ضم في جنباته جمال الوالي العضو البارز في المؤتمر الوطني ومصطفي عثمان اسماعيل المستشار والوزير السابق والمسئول عن كل استثمارات بلادي الفقيره ووزراء ومدراء بنوك كلهم تحت تصرف المريخ ورهن اشارته
الحكايه شنو يا اخوانا فمن المفترض ان تصب كل معينات الحكومه دعما لكل الرياضه لا ان ينحصر
ذلك في دعم المريخ دون غيره ومالو مثلا هلال حلفا او موردة القضارف او البطل كاكي لماذا لا ينالوا ما يناله مريخ الحكومه حتي منتخبنا المتهالك نجده يشتكي لطوب الارض وهو في حاجه ماسه لدعم حكومي مفقود جله يحول بطرق ملتويه الي مريخ الوالي ويقولوا دي اموال خاصه بالوالي والحكايه كملت ودخل عبد الباسط الثري المحسوب علي الانقاذ طرفا في دعم نادي المريخ ووعود بتحويل نادي المريخ الي شركة شآنها شآن الخطوط السودانيه والاقطان ومشروع الجزيره والسكه حديد
الهلال التعبان حفيت رجول رجاله عشان تحن عليهو الحكومه وتديهو شوية دعم ولكن ولانه نادي الشعب والخريجين والديمقراطيه رفضت الحكومه دعمه وليذهب هو وناس الدوري الممتاز الي الجحيم
مع ان الهلال هو اكبر نادي من حيث الجماهير
الغريب والعجيب ان المريخ وبكل هذه الاموال ظل وصيفا للهلال ومازال
ويأتي السؤال ما فائده ضخ كل هذه الاموال في فريق ادمن الوصافه
كيف تتطور الكوره في بلادي بهذه الطريقه يا حكومه ؟؟؟؟؟؟
======================================================
والله احترنا ما بين المريخ والهلال ياتو المريخ وياتو الهلال
كل يوم ناس المريخ يلقطوا في لعيبة الهلال
خلاص نتفق يا نحن نقفل نادي الهلال ونجي نشجع معاكم المريخ
يا انتو تجو ونسجل ليكم حتي ناس خليفه واطهر
ما ممكن فريق المريخ بقي جاري حتي ورا مساوي في اثيوبيا
وجاري ورا سادومبا
وعندهم كلاتشي
وعندهم هيثم
وعندهم علاء
وعندهم الباشا
وعندهم اكرم
وعندهم حتي جمال الوالي
وجاهم كمان عبد الباسط الهلالابي والذي رشح من قبل في مجلس ادارة الهلال
والله مسختوها شديد
وطلعتوا عين الهلال
وبصراحه المريخ الان وكما قال اخونا الرائع محمد عبد الماجد بقي تحت السيطره الهلاليه الكامله
وخوفي ان يرفض اللعيبه حتي لبس فنايل المريخ الحمراء واستبدالها بفنايل الهلال الزرقاء الجميله
======================================================
محمد سيد احمد راجل بيحب الشووو والاكشن وحركاته كلها عشان يدخل مجلس ادارة المريخ لكن الشروط صعبه جدا يا جكومي لان الناس اللي المجلس مرطبه شديد
و اللوردات ديل بصراحه انت ماحتنفع معاهم
انت ما بينفعوا الا ناس عصام الحاج لان الجيوب متشابهه
اللوردات ديل حسع لو قالوا كل واحد يدفع مائة مليون انت حتسوي شنو
والله كنت حتخش في اضافرينك
احمد ربك انك ماسك وظيفة الحالات السالبه
ودي زاتها كتيره عليك
اخير ليك سيب الهلال في حاله لانك خلاص راجع الحصاحيصا
واياك ترجع الخرطوم الا بتصريح من الاسياد
والله زودتها خالص ولازم نرجعك للماضيجننتنا كل يوم البطوله العربيه وانك رفعت اسم المريخ والهلال ما حيمشي
من انت كما قال القذافي
=====================================================
مبروك مسبقا لنادي المريخ فوزه بكاس البطوله العربي
ومبروك انتصاره علي كل الابطال العرب
وانتصاره علي الوحدات الاردني
وناس شلبايه
وعامر شفيع
مبروك مسبقا لجمال الوالي والذي امر اتحاد معتصم بتجهيز بطوله للمريخ تعوضه الخروج الافريقي المبكر
مبروك مسبقا للجكومي وهو ينفذ تعليمات الوالي بحذافيرها
مبروك للعجب وهيثم وهذه الوداعيه اللورداتيه ( رغم انها غير لائقه)
ويا كباتن لو سمحتوا اريحوا واستريحوا بارك الله في رحل اراح واستراح ما قصرنا كرمناكم
======================================================
والله الحيدوسي ده مضايقني شديد و
وشايفو زي الكوكي بالظبط
وكروجر خانقني شديد
وهو زي غرزيتو والعن
والاتنين ما منهم فايده
واحد هرب
والتاني كان بيدرب الوصيف وما فلح
والله اخير من الجوز ده ناس الفاتح النقر وعافيه
ويا اخوانا عايزين مدرب فيهو فايده
نصوم ونفطر علي بصله ارحمونا
====================================================
الختام الازرق :
الفريق بحر ارغي وازبد وهدد الاتحاد العام ان لم يشارك الهلال في البطوله العربيه وان الهلال ربما ينسحب من الدوري وكتب كتاب الهلال وكملوا الحبر ولم تصان كرامة الكيان فلقد اثبتت ادارة الهلال ضعفا غير عادي في هذا الموضوع رغم اننا كهلالاب لا نريد المشاركه العربيه اصلا ولكن انها الحقوق والكرامه المهدرتان
ذهب الذين نعيش في اكنافهم وبقي الذين حياتهم لا تنفع
====================================================
محمد حسن شوربجي
