-
- للسمحين معاك ما خليت سماحة 💙💙
زمان لما كانت الدنيا بخيرها كانوا (سواقين اللواري) محل ما يمشوا بلد بعرسوا فيها .
والله صحي .
(سواق لوري) بكون شاحن (ملح) من بورتسوان وماشي كوستي .
أول ما يصل السوق الشعبي وينزل شحنة (الملح) تسمع بيهو بعد يومين عرس في كوستي .
(بتاع جامبو) بشحن (بلح) من دنقلا إلى الأبيض .
لما يصل وينزل (شحنة البلح) بعد أسبوع تسمع بيهو عرس في الأبيض .
(وسواق بطاح) جاي من نيالا شاحن خرفان ماشي كسلا.
يصل ينزل (الشحنة) ويعرس في كسلا .
هذا الذي يفعله (سواقين اللواري) يفعل مثله الآن نادي الهلال العظيم.
الهلال في فترة الحرب دي محل ما مشى شال كأس .
محل ما مشى عرس .
والله صحي .
أي بلد مشى ليها شال فيها كأس .
وعمل (نسب ومصاهرة رياضية).
السنة الفاتت الهلال مشى دولة مورتانيا شال الكأس .
بقوا نسابتنا .
رجع السودان شال كأس (نخبة الدامر) .
واصلاً ديل أهلنا .
(غطينا قدحنا) في الدامر .
وقبل ما يغادر السودان توقف في بورتسودان شال كأس السودان .
ثم غادر إلى رواندا وبرضو شال الكأس .
وبقوا نسابتنا برضو .
هسه الليلة العصر وفي الشمس دي الهلال رجع السودان وبرضو شال كأس (نخبة البي العصر مرورو).
إتخيل .. ستة كأسات في تلاتة سنوات .
بواقع كأسين في السنة .
غايتو الحرب نفعت مع الهلال أكتر من تجار الأزمات .
ستة كأسات وفيها (سابقة ما حصلت في تاريخ العالم) .
ما في نادي في العالم شال تلاتة كأسات من تلاتة دول في سنة واحدة .
كأس من موريتانيا .
وكأس من السودان .
وكأس من رواندا .
حاجة زي دي ما حصلت في تاريخ كرة القدم .
تلاتة كأسات في سنة ، وستة كأسات في تلاتة سنوات .
ستة .. مع إنو الهلال محللات ليهو أربعة .
الهلال شال كل حاجة .
شال (الريد) وشال (ودو) وشال نفحات عبير وردو.
حبيبنا إسحاق الحلنقي في أغنية (نجمة نجمة الليل نعدو) التي غناها الراحل إبراهيم حسين قال : (للسمحين معاك ما خليت سماحة) .
والحلنقي ذاتو في أغنية (يا حنين) التي غنتها عافية حسن قال : (يا الشلت حلاة كل الحلوين ما سبت وراك زول يتحب).
شكلو حلنقي كتب الكلام دا في الهلال بــ(إعتبار ما سيكون) .
الحلنقي عندو بعد نظر .
الهلال شال حلاوة كل الحلوين وما ساب وراهو نادي يتحب).
ما فعله الهلال خلال فترة الحرب يحتاج لدراسة وتأمل ومراجعات .
دا شي فوق عقل التصور .
عمل حاجات (فوق قدرة مهارات إحتمالنا).
مبرووووك للهلالاب هذه الإنجازات التي ضمدت كثير من الجراحات .
و…و…
وأنت ما عارف عيونك لما تسرح وين بودو ؟؟
#محمد_الطيب_الأمين
