قالوا : ليه انتو يا ناس الهلال فرحانين بالتعادل مع المريخ
قلنا نحن فرحانين عشان ضمنا الدورى
قالوا سانييه لاعب اعتيادى كبره الاعلام الازرق
قلنا سانييه لو لاعب اعتيادى يجيب هدف بعين واحده ويدخل بصمة العين فى السودان
قالوا ماذا جرى لمريخنا وهو يسقط صريعا بسيف سانييه
قلنا انه الغرور والتعالى وجبروت الوالى الرئيس طوالى
قالوا مال لمريخنا ولاعبى الهلال يمرون بسهولة تحت اقدام لاعبينا ليوجهوا سهامهم نحو مرمى المريخ
قلنا انه عدم احترام الخصم وما حدث من تعالى بعد مباراة الخرطوم واعلام الضل وتكبير الماسورة الى 2 تربيع
قالوا الحضرى لا يستفز لاعبى الهلال
قلنا ليه طيب الجماهير قلعت ليهو سنونو
قالوا فريقنا احسن فريق فى السودان وافريقيا والعالم العربى
قلنا ده هو جنون العظمه والعنطزه الفاضيه ونشوف مين يشيل الكونفدراليه ومن يضحك فى الآخر
قالوا المريخ مفروض يطلع غالب للهلال فى القمتين
قلنا انتو ما بتلعبو كوره انتو فاضين من تحريض الجماهير على تحطيم كراسى الاسياد ولو كان لعبتو كوره صاح ما كان حصل الحصل
قالوا جماهير الهلال كسرت طابق شاخور
قلنا الجزاء من جنس العمل ولو انتو قدمتو اعتذارا لادارة الهلال لما كانت الكارثه
قالوا الحكم ابوشنب هو سبب كل البلاوى الحصلت
قلنا انتو ما فى حكم فى الدنيا عاجبكم وفوبية الحكام مرض فى دمكم ايه رايكم تختاروا انتو الحكام فى اى مباراة للمريخ
قالوا مريخنا ما بيلعب بعنف بغيض وما بيلعب على الاقدام
قلنا عدو عدد الانذرات وتعرفو العنف - انكم تطبقون نصيحة خواجه كان مدرب عندكم وتقول النصيحه ( أي فريق يلعب كره نظيفه ضد الهلال سوف يهزم فاذا اردتم الانتصار علي الهلال فالعبوا ضده بعنف شديد )
قالوا ان الشرطه هى من ساعدت جماهير الهلال على تدمير ملعبنا وان كل ضباط الشرطه ساعدوا ناس الهلال
قلنا يعنى شرطة السودان كلهم طلعو هلالاب الحمد لله
قالوا ان مجلس ادارة المريخ استقال احتجاجا على الاحداث
قلنا ليس احتجاجا بل خوفا وفشلا وهروبا من محاسبة جمهور المريخ
قالوا معقول سانييه بعين واحده يعمل لينا زلزال فى المريخ
قلنا والله صاح شيئ استقالات جماعيه وشيئ تكسير لسيارة ريكاردو وناس تقول حنقابل وزير الداخليه وناس تقول حنمشى الامم المتحده
قالوا جمهورنا كسر سيارة ريكاردو
قلنا مسكين ريكو لكن هو باق بامر الوالى ورغم انف الجماهير والشرط الجزائى ضخم جدا والله يعينك يا والى وكشكش جيبك لو داير تخلص من ريكو
قالوا طيب نحن خايفين من وارغو يطلع لينا ريكو
قلنا بتبالغوا فى البذخ وبديتو تشتغلوا تقشف وقفلتو البوفيه المفتوح وبطه اشترت ليكم بنابر وشدت الحلل مكان البوفيه بس باسطه ونسكافيه مافى بس عندها شعيريه وشاهى مدنكل
قالوا معقول بابكر سلك قدس الله سره هو من اثار الفتنه حين قال لجماهير المريخ فبل مباراة تكسير كراسى الهلال : يا الشفوت يا نتشفتن يا نتبشتن
قلنا نعم هو بعينو وصلعتو وكمان حرض الاولتراس قبل مباراة شندى فكانت الاصابات والاحداث الموسفه الراجل هو مثير الفتن
قالوا الجاكومى حياخد لينا حقنا فى طابق شاخور
قلنا انه شخصيه ساديه لم تظهر الا فى زمن الغفله ولم نسمع به فى عهد شداد واذا فيهو فايده يصلح استاد الحصاحيصا التعبان اول
قالوا الراجل صوتوا عالى ومخيف ويا ويلكم منو
قلنا ناس الهلال ما بيخافوا من عشره زيو وقد جاء فى زفة معتصم جعفر وكان شايل الرتينه وحيرجع كدارى للحصاحيصا
سؤال :
من قائل هذه الجمله التحريضيه لجماهير المريخ:
ياشفوت : يا نتشفتن يا نتبشتن
الجواب :
بابكر سلك
ارفع صوتك بالاجابه :
بابكر سلك
الصوت ما واضح قلت مين :
بابكر سلك
اجمل ما قالوا فى الهلال : مـن خلقنا عـرفنـا الله ... الـوطـن ... بـعـدو الـهـلال
زاهي فوق كل النجوم ... مكسي بي لون الجمال
تـاريـخ مـرصـع بـالـدرر ... في وصفه أبدع من خيال
دا الـزعيم سـيد الـبلد ... قاهر المحن قاهر الرجال
صيته ذائع في البلد ... في الجنوب أو في الشمال
وكل بلاد الله اجمع ..... ما بتصوم من غير هلال
والهلال لو ما سطع ...... يبقى برضو العيد محال
والعريس يوم جرتقو .....فوق جبينو تشوف هلال
ولو مشينا على المساجد ....فى القبب تلقى الهلال
آخر الحروف: ما زال نادر التوم يواصل تحريض جماهير المريخ للقصاص فى مباراة الهلال واهلى شندى
مجلس ادارة المريخ يصر على المشكله قد بدأت فى مباراة القمه الاخيره
برافو علم الدين هاشم (مريخى اصيل ) وكلمة حق فى وجه سلطان جائر
علم الدين يطالب اعتذار مجلس ادارة المريخ لادارة الهلال لحل المشكله عين العقل
نتمنى ان تهدأ كل النفوس والخواطر وان تعف كل الالسن وتزول كل الاحقاد وتعود الجماهير الرائعه لسابق عهدها تشجع الكره ولا شيئ غير الكره
محمد حسن شوربجى
