دبابيس ودالشريف  هلال الفاشر استحق التقدير والاحترام

-

دبابيس

ودالشريف

هلال الفاشر استحق التقدير والاحترام

================

** انتصر الهلال علي هلال الفاشر بهدف صدفة احرزه المحظوظ رؤوف واحتفظ بالمركز الوصيف في دوري النخبة واستحق هلال الفاشر التقدير والاحترام لانه لعب بقوة وبمبدأ التنافس الشريف وكاد ان يدرك هدف التعادل ولكن رفضت الكرة معانقة الشباك في اكثر من محاولة وظهر هلال ام درمان متعبا مرهقا وحصل علي ثلاث نقاط اوانطة

** ..المريخ انتصر علي هلال الساحل بخلع الضرس وبعد ان تلاعب باعصاب جماهيره الي الدقيقة 67 وحتي بعد احراز الهدف الوحيد بقدم المدافع ساغوبا تراجع الاداء وسيطر الهلال وهاجم واقترب من مرمي جرس كافي المستهتر والذي تناسي القانون وامسك الكرة في يده اكثر من خمسة ثواني وكاد أن يتسبب في هدف…. ..ويبدو أن التغييرات الكثيرة التي اجراها المدرب الصربي اثرت في الاداء ونام خط الهجوم علي الخط بعد ان احرز اهداف بالجملة خلال المباريات السابقة

** حصل المريخ علي الثلاث نقاط ليدخل مباراة الاربعاء أمام وصيفه بفرصتين ليتوج بطلا الا اذا كان لاتحاد الفشل رايا اخر

** مهاجم هلال الساحل اعتدي علي مدافع المريخ بصورة وحشية خلال الشوط الثاني حالة خطرة واستحق البطاقة الصفراء وهلالاب الميديا قلبو الآية وقالو المدافع هو المعتدي والغريبة رسلو لي اللقطة كلهم ما عارف ليه .وقالو مدافع المريخ يستحق الطرد وفي واحد هدد و قال حناخذ حقنا بايدينا . ..غايتو الهلالاب غريبين وعجيبببن وبتابعو المريخ اكثر من فريقهم

** الحكم صبري محمد الامين وهو حكم دولي ادار مباراة المريخ والساحل تعرض لسيل من الشتائم والاساءات وقلة الادب لانه لم يطرد داودا مدافع المريخ وبرضو كالو الشتائم لرجل الراية لانه احتسب ثلاث حالات تسلل اوضح من الشمس لهجوم الساحل وقالو صبري اكل وشرب في بورتسودان بعد اندلاع الحرب ولم يحترم بورتسودان …..والله ده كلام غريب وعجيب ..يعني احترام بورتسودان مرتبط بهزيمة المريخ

** مساكين كتاب الهلال وجماخيره بتباكون علي التحكيم

** هدف ساغوبا في شباك الساحل ادخل جماهير الهلال في نفسيات وكانو مؤمليين علي الساحل يعطل كبير السودان ليدخل فريقهم المتهالك لقاء الاربعاء بفرصتين

** الخوف والرعب من المريخ يجعلهم يفعلون اكثر من ذلك

** نعرف جيدا تفاصيل هزيمة المريخ امام الهلال بالاربعة الموسم السابق بالدامر .. والان المريخ مطالب بالثار ورد الاعتبار والخصم فريق اكثر من عادي حوله هالة إعلامية ضخمة

** عاملين هيصة لإصابة الصغيرون المو كبير فلمو وكأنه اول لاعب يصاب في الدنيا

**بيان هزيل من هلال الساحل عقب الهزيمة من المريخ والبيان لم يدين سلوك مهاجمهم تجاه مدافع المريخ ..وقالو فتحو بلاغ في المدافع ودي اول مرة نسمع بيها

** عشرات اللاعبين كسرت ارجلهم في الملاعب ولم نسمع ببلاغ

** بعد ثلاث سنوات يعود لقاء المريخ ووصيفه الي استاد الخرطوم واخر لقاء بالاستاد العتيق كان قد انتهي بفوز الاحمر بهدف رمضان عجب الصاروخي واحتج لاعبو الهلال وجمهورهم علي هدف ثاني

** الاهلي مدني وهلال الساحل يفتتحان ملعب الخرطوم غدا وطبعا المريخ ووصيفه لازم يتدربو بهذا الملعب لان اللعب في النجيل الصناعي الجديد صعب .

** لجنة الانضباط اوقفت مدرب الاهلي مدني فاروق جبرة لمدة عام بتهمة سؤ السلوك مع الحكم وقبل مضي 24 ساعة. علي العقوبة جاءات لجنة الاستئنافات ورفعتها عنه وسمحت له بممارسة نشاطه ….ودي ما غريبة علي الاتحاد الفاشل

** يا حليل شداد رجل القانون

** جبرة كان قد اعترض علي قرارات التحكيم الظالمة خلال مباراة فريقه أمام الهلال

** في ظل الارهاب الذي يمارسه اعلام الهلال وجمهوره ضد التحكيم …من يدير مباراة الاربعاء ….. اخشي ان يعتذر كل. الحكام عن إدارة المباراة ….ده ارهاب شديد ..ده شيتا اصلو ما شفنا …يعني الحكم لو غلط ولو في ضربة ركنية يوم الاربعاء حقو راح

** اذا تقدم المريخ بهدف فى مباراة الاربعاء لن تكتمل المباراة لأننا نعرف جمهور الهلال جيدا … ما بتحمل وما بصبر ويحصب الملعب بالحجارة والحجارة الايام دي راقدة جنب استاد الخرطوم

** واحد من عباقرة الهلال طالب بطاقم تحكيم من دولة قريبة ارتريا او اثيوبيا وما طالب بحكام من مصر وهي الاقرب

** المريخ ما عندو مانع ….ممكن يكون السوباط حكم وسط والعليقي والفاضل التوم رجلي راية وعاطف النور حكم رابع ومحمد عبد الماجد مراقب للحكام

** تلفزيون السودان ينقل لقاء الاربعاء ليؤكد للعالم اجمع أن الخرطوم آمنة وان الحياة عادت لطبيعتها بس عايزين نقل بدون قطوعات وصورة واضحة وصوت واضح ومعلق محترم

** واحد من صغار الكتاب اكد ان لاعب الهلال عبد الرؤوف اعظم لاعب انجبته الملاعب ….وفطعا ده ما شاف قرعم ولا طلب مدني ولا صديق منزول ولا برعي ولا ابراهومة الاصلي ولا جكسا ولا كمال عبد الوهاب ولا سامي عزالدين ولا فيصل العجب

** كيف اكتمل عقد لاعبي الفلاح في مبارانه أمام حي الوادي التي خسرها

صفر …….3

**, ثمانية أندية من أندية الدوري التاهيلي تصعد الدرجة الممتازة ملح والفريق الوحيد الذي صعد بجدارة وبعد اداء مميز و انتصارات داوية هو الرابطة السليم والتحية لمجلس إدارته ولمدربه كابتن عادل جلال وقد نحت الصخر وبني فريقا مهابا محترما والتحية للاعبين الأبطال وللجماهيرالوفيه والبعض منهم كان يزحف من السليم الي الخرطوم لمؤازرة الفريق وقطعا البقاء في القمة اصعب من الوصول اليها والامنيات ان تبقي الرابطة بالدرجة الممتازة للابد وترفع اسم وعلم الشمالية عاليا خفاقا

** طالما صعدتو التسعة أندية من الدوري التاهيلي للدرجة الممتازة اوقفو بقية المباريات وريحو الأندية من الصرف

** منتخب السيدات السوداني تلقي هزيمة ثقيلة

17 ….صفر.. في ذهاب تصفيات اولمبياد لوس انجلوس .. من منو من منتخب جزر القمر وليس منتخب نيجيريا او مصر او المغرب وبرضو اتحاد الفشل قاعد ولم يتخذ أي قرارات ولم يعلق علي الهزيمة الفضيحة التي تحدثت عنها كل الفضائيات

** يعني لو لاقينا منتخب المغرب مثلا كانت الهزيمة

50….صغر

** بدلا من تقديم استقالته .. برهان تيه مدرب منتخب النسوان برر الهزيمة الفضيحة بوجود 9 محترفات في منتخب جزر القمر يلعبن في اوروبا وقال.. نشاط المنتخب لن يتوقف وبعد مباراة الإياب أمام جزر القمر سيلعب في بطولة سيكافا تحت 17 سنة …..يعني كل اللاعبات تحت 17 سنة .

** هذه الهزيمة كفيلة بذهاب اتحاد الفشل.. لكن نقول لمين

** 33 نادي في الدرجة الممتازة ….خلاص كملو الناقصة وصعدو الزومة وودنوباوي وتوتي ومريخ الابيض واتحاد مدني وكملوها 40 نادي يا ما بتخلجو وما تستحو وما بتحترمو القانون

** يتردد ان كل عضو من اعضاء مجلس إدارة اتحاد الفشل قبض اكثر من مليار بعد الاجتماع الفاشل الذي خرج بقرارات ضد مصلحة كرة القدم

** اكثر من مليار يا مفترين …ليه عملتو شنو .. اكتشفتو الذرة ……..الغريبة هنالك واحدين ما فتحو فمهم في الاجتماع وقبضو

** الغاني الفاشل كواسي ابياه يبحث عن لاعبين جدد للمنتخب الوطني

** كبوتش ده وارد وين يا معاوية وبكتب وين

** ابناء الوطن بمدينة حائل السعودية ودعو بروف علي شمو اروع وداع وهو يستعد للعودة لارض الوطن .بعد ان نهبو منزله وحرقو مكتبته التوثيقية

** الرحمة والمغفرة للفنان الاحمر اللون عبد الوهاب الصادق صاحب انشودة بالطول والعرض سودانا يهز الارض

** اغلب الفنانين مريخاب وللاسف المعلم محمد وردي كان هلالابي

** مرة اسرح ومرة افرح ومرة تغلبني القراية ..

ولمن اكتبلك وداعا قلبي ينزف في الدواية

** اخر دبوس

** التحكيم سيكون الشماعة التي ستعلق عليها هزيمة الهلال عصر الاربعاء