عفاف الصادق تكتب لزوجها ابوعركي

كفرووتر/ الخرطوم/ الراحلة المقيمة عفاف الصادق
تكتب لزوجها ابوعركي


عفاف الصادق حمد النيل طيب الله ثراها
أمراة سودانية من الزمن الجميل رحلت فى السادس من يناير ٢٠١٨
كتبت أبياتا من الشعر لزوجها الفنان أبوعركي البخيت.. عندما حانت لحظة سفره خارج البلاد في فترة ضاقت عليه السبل بالبلاد..
كتبت عفاف قائلة :-
يوم تقول لي داير تسافر
بستف الحب بين ملابسك
شان يلامسك
كل هدما ترتديهو
تلاقي فيهو
قليبي حارسك
ولما تهدأ فوق وساتك
تلقي روحي ملت جوانحك
ولما تغمض رمش عينيك
أبقي في نومك أزاحمك
ولما تبقي أمام مرايتك
تلقي صورتي كست ملامحك
وكل موقف من مواقفك
أبقي قدرك
وأبقي فيهو أنا البشابهك
ولما تمرق لي صحابك
وكل زول بشوق يسالمك
تلقي في أيديهو إيدي
ولمحة من عيني تصابحك
حتي في نغمة كلامو
تلقي صوتي مزج سلامو
وتحس بي، أنا البصافحك

*********
وين تسافر مني تمشي
وين تقبل مني تبري
ياني فيك أنا أمتزجت
بمزج النفس البيطلع
مرة شهقة... ومرة زفرة
أكون الدم في عروقك
وأمشي في شريانك أبري
مسلك الحب في وريدك
فيه بغرق ومنه بروي
ياني ندك.. وليك نديدك
عنك أكتب ومنك أقرأ
*******
وإلتزاما بالقضية
والتمسك بالمبادئ
والمبادئ هي الحقيقة
والحقيقة العندي هي
لا مساومة لا مساومة
في المقاومة
بي مداومة
وإلتزاما حق تمام