يا زول يا فريد

شعر عثمان الحاج الأمين صحوة شجن..

في رثاء الأستاذ عبدالمجيد عبدالرازق..!!
مضي الصحفي والكاتب الإنسان عبد المجيد عبدالرازرق إلي رحاب ربه مرضيا عليه بإذن الله تعالي,نسأل الله الكريم أن يغمده برحمته الواسعة ويتقبله قبولا حسنا,أعزي نفسي وأياكم في فقده الجلل,ولا نقول إلا ما يرضي الله (إنا لله وإنا إليه راجعون).
قصيدة في رثاء عبدالمجيد

يا زول فريد
في طبعو كان أجمل صفات
كان ملهم الناس البشوفو بعيد بعيد...
كان الأصالة,والمعاني,والقيم
كان السماح والطيبة في عبد المجيد....
يا خير مشتت بالبقاع
يا سكة الفرح البتدخل بالمزيد...
يا زول وحيد...
في الناس وكت يغباها ريد...
يا زول جميل
يا خير مديد...
في موكب الحرف البتمدد سماحاتو وتزيد...
يا أبونا في الراي السديد...
يا قيمة يا عبد المجيد...
يا زول جميل مالينا ريد...
يا طيبة ستفت المعاني بلا وعيد...
يا غنية في الزمن العنيد...
يا لوحة في باب الزمن مرسومة بالصبر المديد...
يا عيد يجي وأحزان تفوت
يا صوت هتاف حد المعاني الداخلة في المغزي السعيد...
ما نحن ما بنتشابي ليك لا لينا ايد...
نسلك محطاتك معاك
في موكب الفرح الوراهو سفر جهيد...
يا طيبة ستفت المعاني بلا وعيد...
وسماحة في دنايا بالعمر المديد...
يا غنية في الزمن العنيد...
يا أبونا يا عبد المجيد...
يا زول فريد...
في طبعو كان أجمل صفات
كان ملهم الناس البشوفو بعيد بعيد..!!