• ×
السبت 15 مايو 2021 | 05-14-2021

خليل فتحي يكتب ..ثقافتنا السودانية جد سمحه

خليل فتحي يكتب ..ثقافتنا السودانية جد سمحه
كفرووتر/الخرطوم/ خليل فتحي يكتب ..ثقافتنا السودانية جد سمحه
اخترت لكم
#الشبال# .....من طقوس الافراح السودانية......
وزمان في الحفلات الشبال له وقعه الخاص حيث كانت المراة تمشط شعر راسها بطريقة منمقه...وجميلة ويحلي المشاط بالسكسك...الرخيمي والودع ويدهن الشعر الممشوط بالزيوت المعطرة
الشبال حركة تلاقي رأسين في لحظات فرح و سرور بين رجل وأمراة في الحفلات والأعراس .. لا ادري من اين اتت الفكرة وماذا تعني ولكن الشبال ما بتاخدوا ساي بتشيلو من البتعجبك و بتديهوا للبعجبا وبكون ونسة ما بعد العرس فلان شال شبال من فلانة و فلانة ادت فلان شبال
تغني له الشعراء وتراهن عليه الشباب و لودالرضي قصة ملهمة مع الشبال عندما اعجبته فتاة في حفل فقالوا له البشيل منها شبال ينجلد بالسوط فأشعر في ذلك وقال :
عام مع الصفقة
والمعاصم صب ماها منصفقة
راجي شبالة وراضي بي صفقة
اي انه راضي بي انه ياخد ( كف ) مش سوط عندما قال راضي بي صفقة ويقول ليك فلان صفقوا كف .. ثم قال :
الكتوف واقعة
والعيون يا ناس مويتن ناقعة
الوجن قادحات في الظلام فاقعة
راجي شبالة وراضي بي صاقعة
وهنا تطور الأمر من الرضا بالكف للرضا بي انه تضربوا صاقعة مش ينجلد بالسوط .. فشكلوا ملهمتنا تستحق هذا الحديث و ودالرضي راهن علي اخد الشبال
اختفي الشبال عند الجيل الحالي واختفت معه ملامح الجمال في الحفلات والاعراس وللاسف بعض ابناء وبنات الجيل الحالي لا يعرف ماذا تعني كلمة شبال ... والشبال زمان كان بداية الحنك مع المحبوبة هسة الحنك بقي يبداء في زقاق تعليق في الفيس .. صلحوا الحال واعيدوا زمن الشبال
عومي يا جدية البراري
نسفي الديس ياخداري
عومي في الدارة وتعالي
اديني ( شبال ) يطفي ناري
في الصورة اشهر شبال للرئيس السابق نميري
زمن الناس بسيطة ولا تحمل الأشياء أكثر مما تحتمل
خليل فتحي
امسح للحصول على الرابط
 0  0  1986
التعليقات ( 0 )
أكثر

جديد الأخبار

لبي نداء ربه الفريق بحر الامين العام لنادي الهلال متأثرا باصابته بكورونا اسرة كفرووتر تتضرع للمولى عز وجل ان يسكنه فسيح جناته مع الصديقين والشهداء..

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019