• ×
الإثنين 1 يونيو 2020 | 06-01-2020

آلو منو ..عبدالمنعم شجرابي ندى القلعة فنانة مجاملة .. طباخة ماهرة .. حلوانية فاشلة سائلة الله حجة ..!

آلو منو ..عبدالمنعم شجرابي  ندى القلعة فنانة مجاملة .. طباخة ماهرة .. حلوانية فاشلة سائلة الله حجة ..!
كفرووتر/ الخرطوم/ آلو منو ..عبدالمنعم شجرابي
ندى القلعة فنانة مجاملة .. طباخة ماهرة .. حلوانية فاشلة سائلة الله حجة ..!
× آلو .. منو؟
= أنت عاوز منو ..!
× عاوزك انتي دي ندى القلعة معاك شجرابي يا ندى؟
= أهلاً وسهلاً شجرابي حبابك .. عزاز علينا..
× عزاز علينا دي وحدة من أغنياتك خلينا شوية من الأغاني اسمك بالكامل منو؟
= ندى محمد عثمان حامد حسين..
× والقلعة دي جات من وين؟
= القلعة.. الكلاكلة القلعة.. بديت فني هناك وظهرت هناك وناس القلعة شجعوني وكبروني.. يا سلام وفرصة عشان احيي واسلم على أهلي هناك.. ويا ناس القلعة انا بحبكم كلكم.. ربنا يحفظ القلعة بالفيها والجاييها ..!
× يا ندى أولادك الحلوين وصلوا وين في التعليم؟
= وائل توجه من إدارة أعمال إلى طيران .. وقريب ان شاء الله تشوفوه كابتن طيار والصغيرة ود في الأساس..
× ذكرتيني البنية الحلوة "ود" دي قبل كده قالت في التلفزيون انها ما بتسمع أغنيات سودانية وبتفضل الغناء الغربي؟
= ايوة.. اصلها هي بتقرأ مدارس إنجليزية.. وكانت كده بتحب أغاني غربية.. واشتغلت معاها غسيل مخ نضيف وشرحت لها الكثير في أغنيات الحماسة والتراث والفن السوداني بصورة عامة و دلوقت بتسمع محمد وردي وبتسمع وحافظة أغنيات أمها..
× ووائل كيف؟
= وائل زول حماسة.. عربي عديل بجلابية وتوب وجبة وصديري وسيف وسكين ..!
× يا ندى عندك صورة في الواتساب وانتي قاعدة في المصلاية وفاتحة المصحف.. ده تمثيل ولا شنو؟
= ياخي خاف ربك واستغفر الله انا فاتحة المصحف يومي وأقرأ ما تيسر من القرآن والحمد لله بصلي الصبح حاضر
× وبرضو حايمة ليك صورة وإنت محجبة....القصة شنو ؟
= ايوة كنت جاية من حولية ابونا شيخ الصادق وطبيعي امشي الحولية محجبة ....!
× بإختصار كده عاوزة تقولي لي تبتي ؟
= اتوب من شنو انا قاعدة ما اعمل حاجة بطالة .. عشان أتوب ..!

× معليش نستبدل كلمة تتوبي دي بكلمة اعتزلتي؟
= اعتزل شنو
× تعتزلي الغنا يعني حتعتزلي الكورة؟
= اعتزل ليه وعشان شنو انا عبر الغنا بخدم المجتمع وبقدم النصائح للرجال والنساء للمحافظة علي القيم والتقاليد وبقدم نصائح للازواج والزوجات عشان يحافظوا علي حياتهم الزوجية.... انا بغني.... انا ما قاعدة اعمل حرام.....!
× عليك الله ما تكوركي وما تجوطي تاني حاجة حاولي تقنعيني وتقنعي الآخرين بالمنطق ؟
= اقول ليك انت والمعاك خلوني لي ربنا وربنا عارف نيتي .... عليكم الله خلو الخلق للخالق والله غفور رحيم..
× انت يا ندى حجيتي عشان اقول ليك يا حاجة ندى ؟
= ابداً ما حجيت وسائلة الله صباح ومساء بديني حجة..
× انا برضو سائل الله يديني حجة وبالمناسبة دي انا ما عندي بيت وانت قالوا عندك فيلا ؟
= الحمد لله عندي بيت عادي وفيلا يارب ألقاها في الجنة....
× بس بيتك دا مشهور بتاعين الركشات وأصحاب الدكاكين والقراب والبعاد عارفينو كيف يكون بيت عادي وما فيلا؟
= الناس عارفة ندى القلعة يعني عارفة ست البيت ما البيت زاتو ..!
× طيب سايقة شنو ؟
= سايقا كارو يا أخ انت مالك ومالي..!
× الكارو بتاعك جاز ولا بنزين ..وموديل كم ؟
= كارو بالطاقة الشمسية وموديل ١٩٠٠ عندك كلام تاني ..!
× روقي شوية ما تزعلي ..يا ندى بتحبي شنو من الألوان؟
= ما زعلانة لكن انت غياظ وبتحب تكره الناس وتعكر دمهم.. وانا وبحب اللون الأبيض شديد وبرتاح نفسيا وانا لابسة ابيض ..!
× و في الكورة بتشجعي الأزرق ؟
= يشجع الهلال بحماس وفي الحتة دي انا ما ملك نفسي انا ملك جمهوري من الهلالاب والمريخاب والمورداب وغيرهم انا هلالابية وفنانة لكل الفرق الأخرى..
× يا ندى القلعة بالجد جد كدا ها انتي راضية عن فنك وراضية عن لبسك وراضية عن نفسك
= الما بخليني أرضا شنو .. فني تراث وحماسة وما عندي غنا هابط ..ولبسي محتشم ونفسي حافظاها وبصلي الحمد لله صلواتي الخمسة ديني كويس ..انت داير تحاسبني عشان شنو ...يا اخوانا عليكم الله خلوني لي ربي الخلقني..!
× ما تزعلي اقول ليك ممكن تزعلي شوية لو اسإلتي بتزعل .. والعاوز اقولو انو اغاني الحماسة تجاوب الرجال معها أكتر من النساء ؟
= كيف يعني
× يعني الرجال بتعرض وترقص وبنات الزمن دا ما يعرفوا يرقصوا رقبة ويا حليل زمن الشبال..؟
= شوف اغاني السيرة ..سروال وعراقي ودا ما ممكن تكون معاه كرفتة .. وعمومً في ناس بتطرب وترقص في دواخلها بدون ما يقومو من الكرسي والحكاية في الاخر احساس ..
× يا ندى تعرفي عندي عادة والعادة ببساطة اشوف اي فنان اقول ياربي العداد بتاعو كم مع ان تسعة فنانين مشهورين غنوا ملح في عرسي .؟
= أنت تستاهل والفن بالنسبة لي اكل عيش وانا باختصار شديد بجامل من يستحق المجاملة..!
× انا عارف انو ندوية مشهورة جدا في جنوب مصر ؟
= دا فعلاً حاصل ومشهورة واغنياتي منتشرة في اسوان لكن شهرتي الأكبر في اثيوبيا وكل الفنانين الاثيوبين بغنو غنية (عزاز علينا) ..ياخ الاثيوبين حلوين ورائعين وانا بحبهم وبحبوني ..!
× وندى القلعة بتغني في بيتها وقدام المراية لي منو من الفنانين؟
= ندي القلعة يا سيدي بتحب عثمان حسين وعبد العزيز داوود والكابلي ومحمد وردي وبتغني لا وحبك ومساء الخير يا أمير واغلي من عيني وقطر الندى واسم ندى زاتو جاي مع الاغنية دي ..!
× بتعرفي تغني لكن ما بتعرفي تطبخي مش كدا ؟
= ال قال ليك منو انا طبيخي زي غناي ..يعني زي السيرة..وشاطرة جدا في المفروك والاكل البلدى..
× اها العصاير والحلويات ؟
= بحبها شديد وما بقدر اقاوما فاشلة في صنعها ..
× جديد ندى شنو من الأغاني؟
= كتير ..منها ..ما قلت ليك احسن تشوف مستقبلك .. الفيهو البخور بينشما ..واغنية لجمهوري بتقول ..جمهوري العظيم ليك تعظيم سلام ..ليك يا حب يا لذيذ كل الاحترام وعموما الأغاني الجاية بكلمات الشعراء السفير معاوية وبشري ود البطانة وهيثم عباس وعلي الهمشري والكوباني شعرا ولحنا
× واصحابك الجد جد من الفنانين منو؟
= كل الزملاء من الفنانين والعازفين لهم مني كل الاحترام والتقدير واصحابي شديد .. حسين شندي وكمال ترباس ومحمد النصري ..
× نسيت اسألك بتعملي بروفاتك وين ؟
= في مكتبي بالقرب من عفراء وكل ارتباطي وتقاعداتي بيتم هناك والبيت للزيارات الاجتماعية فقط..!
× البيت ولا الفيلا؟
= الراكوبة..تاني عندك كلام ..؟
× بيني وبينك يا ندى انا امبارح ليك جواز سفرك في وكالة سفر بتاعت واحد صحبي انتي مسافرة .. ولو مسافرة مسافرة وين؟؟
= ايوة مسافرة واسرتي كلها في اجازة لمصر والإمارات وماليزيا وجايزة أصوم رمضان خارج السودان لو ربنا مد في الأيام ..!
× ندى لو سمحتي عايز اقول ليك مع السلامة الباب بخبت شديد اظنه
سيد اللبن؟
= اذنك معاك وانا شاكرة ليك كتير .. كتير .. كتير وعبرك وجريدة المستقلة المتطورة جدا اقول للناس كلهم عافية منكم و اعفو مني نتلاقى ساعة خير وأنشأ الله و تصوموا وتفطروا علي خير .
امسح للحصول على الرابط
 0  0  2178
التعليقات ( 0 )
أكثر

جديد الأخبار

أكد الألماني يورجن كلوب مدرب ليفربول أنه يجهز لاعبيه بالفعل للموسم المقبل، حيث يتوقع أن يبدأ موسم 2020 - 2021 ببطولة الدوري الإنجليزي الممتاز، بمجرد..

للمشاركة والمتابعة

جميع الأوقات بتوقيت جرينتش +3 ساعات. الوقت الآن هو 07:0 الإثنين 1 يونيو 2020.

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019