• ×

إن شاء الله في ميزان حسناتك يا هلال!!

* الثورة التي أسقطت البشير ونظامه أحيت فينا كثير من القيم.
* وأبرز هذه القيم (فضل الظهر).
* ولفضل الظهر أجر عظيم في الدنيا قبل الآخرة .
* خلال أيام الثورة كانت العلاقة بين جميع أهل السودان فيها كثير من المحبة والتقدير.
* وقد ظهر هذا بشكل واضح في (فضل الظهر).
* يعجبك منظر العربيات الخاصة وهي تتوقف دون توسل، تتوقف وترفع الشباب والشابات وكبار السن والأطفال.
* ماشي قدام ؟اااي، أركب.
* (لو ماشي قدام أركب) كلمة يرددها صاحب كل عربة خاصة.
* كلنا في تلك الأيام كنا أهل.
* كنا أحباب أبرزنا قيم التكاتف والحب.
* في تلك الأيام مستحيل تلقي ليك عربية خاصة قاطعة الكبري وهي فاضية.
* لازم تكون مليانة ناس.
* بوكس، كورولا، دبدوب، توسان، برادو، ترلا، قلاب، ركشة واتوس.
* كل العربيات تحت خدمة كل الناس.
* كلنا أهلنا.
* فضل الظهر أجره عظيم والروح الكانت بينا يارب نحافظ عليها.
* إحساس جميل إنك ترفع ناس ما بتعرفهم في عربيتك.
* نفس إحساس الهلال البيرفع معاهو المريخ كل سنة في دوري أبطال أفريقيا.
* ما نفعله نحن مع المريخ هو أيضاً (فضل ظهر).
* فضل ظهر (رياضي).
* هذا فضل ظهر لا أجر له في الآخرة ولكن يجب أن يكون له أجر في الدنيا.
* كل سنة نتعب ونسافر ونتمرمط في المطارات والمريخ بكل بساطة يطير من التمهيدي ويجي يركب معانا (صحبة راكب).
* الحاجة دي والله مزعلاني جداً.
* المريخ من التمهيدي، أول مباراتين يطير والسنة الجاية يلقى نفسه في الأبطال بفضل الهلال.
* حاجة بتزعل والله.
* يفترض يكون في أجر للهلال مقابل الحاجة دي.
* المفروض ناس المريخ يدفعوا لينا.
* أو يتكفلوا بمعسكراتنا على أقل تقدير.
* أو اكتبوا في (تشيرتاتكم.. هذا المريخ برعاية الهلال).
* لأنو الخدمة البنقدمها للمريخ، المريخ لن يستطيع أن يقدمها لنفسه وهو الذي أدمن الطيران السنوي من التمهيدي.
* عموماً.. ده واجب الهلال، واجبنا نشيلكم (فضل ظهر)، واجبنا تكونوا معانا (صحبة راكب).
* المهم.
* تأهل الهلال عن جدارة واستحقاق.
* حقق الفوز وقطع لسان مدرب إنيمبا.
* مدرب إنيمبا الذي لم يقرأ التاريخ جيداً.
* أكثر من أسبوع ومدرب إنيمبا بتفاصح.
* لسانو طويل.
* في الفيسبوك يصرِّح، في الواتساب يصرِّح، في الصحف يصرِّح.
* في التلفزيون، في الإذاعة في كل الوسائل صرِّح.
* ركز في التصريحات واستفزاز الهلال.
* وجا ودخل الجوهرة وبقت ليهو مقبرة.
* لحمنا مر.
* ده الهلال وكفى.
* حضرت الروح العالية والقوة والإصرار والجمهور فكان من الطبيعي أن يظهر الهلال.
* نعم، هو ليس الهلال الخالي من اليوم ولكن مشرف ومفرح.
* لعب الهلال شوط أول فيه كثير من (الجديد المفيد).
* نقل الكرة من لمسة، الحركة بالكرة وبدونها، الانتشار والنقلات الجميلة.
* أظهر الهلال ملامحه القديمة في الحصة الأول بفضل حيوية النجم بشة الصغير والنجم دراج والنجم القادم موفق صديق.
* وكانت لتحركات أطهر الطاهر والضي إيجابية كبيرة أيضاً.
* حسم الهلال المباراة في الشوط الثاني الذي جاء أقل فنياً وبدنياً من الشوط الأول.
* حسمها بهدف بذل فيه محمد موسى مجهوداً مقدراً بعد أن ضاع أكثر من هدف خلال المباراة.
* لعب جمهور الهلال العظيم دور بارز وهو يحتل المدرجات ويقدم كل ما يملك.
* سعدنا كثيراً لأننا كنا في شوق لمثل هذا الانتصار الغالي والمهم.
* اشتقنا للمجموعات واشتقنا نشوف الهلال وهو يلعب بهذه الروح والقوة.
* وقد أثبتت المباراة أن بشة الصغير هو لاعب كبير وكذلك دراج.
* دراج يفرض نفسه بقوة الآن ويقدم جهداً كبيراً.
* كل نجوم الهلال اجتهدوا من أجل تحقيق الفوز.
* وأكثر ما أعجبني أن الهلال دخل أرض الملعب وليس في باله الكونفدرالية.
* لم يضع الهلال الكونفدرالية خيار.
* هذه الثقة والروح هي من صفات الفرق الكبيرة.
* الآن ما مضى هو الأسهل والجاي صعب.
* نشد حيلنا ونكمل النواقص ونخت أيدينا فوق بعض ونعبر بالهلال لبراحات أرحب.
* وأصلاً في الهلال الفرح قاعد يوحدنا.
* نبارك لنجوم الهلال هذا الفوز والتأهل.
* ونبارك للجهاز الفني بقيادة صلاح آدم وهيثم مصطفى وعمار مرق والسادة.
* ونبارك لرئيس الهلال أشرف الكاردينال وأعضاء مجلسه.
* ونسأل الله أن نشاهد (هلال من غير علة).
* حباب القرعة وحباب المجموعات.
* طبعاً نبارك للمريخ (فضل الظهر).
* وإن نشاء الله في ميزان حسناتنا.
* فضل الظهر البيعملو الهلال تجاه المريخ إن شاء الله في ميزان حسناتنا.
* في ميزان حسناتك يا هلال.
* ونركب صافنات ونجيبه (أفريقية) وأصلو الزول بيموت والذكرى تفضل حية.
* و..و..
* كده رضا.
امسح للحصول على الرابط
بواسطة : محمد الطيب الامين
 1  0  504
التعليقات ( 1 )
الترتيب بـ
الأحدث
الأقدم
الملائم
أكثر
لا توجد مباريات
لا توجد مباريات
لا توجد مباريات