• ×

مريخنا من غير تدريبات وداخلين الغريق!!!!


والجميع مبتعد عن المدرج والفريق؟؟؟


فريق الكرة وصل يوم الجمعة من المغرب !!
والتسجيلات خلصت يوم الجمعة!!
ماقي اي حركة ومافي اي كشكة،،،
لاتدريبات
ولاجهاز فني
ولاقطاع رياضي
والايام ماشة ونحن واقفين
غيرنا يتمرن ونحن ساكتين!!!
والسكين سارقه الناس
والكل مشغول بشتلات العرضه شمال!!!
وعندنا بعد ايام مباريات من العيار الثقيل في الخرطوم والولايات!!!
مافي ود حلال كده يحرك روميو من قبرو !!!
وااااااه يامريخنا ماعندك وجيع؟؟؟

ياناس القطاع الرياضي لقيتو خليفه لجون سينا؟؟
اها جهزتو للقادمين الجدد سكن وجلسه مريحيه؟؟
معظم المنضمين من الولايات
وفيهم من خارج السودان؟؟
اخطرتوهم ببداية التدريبات!!
اعطيتهم لائحة الانضباط في النادي؟؟
وضعكم كيف ؟؟
المباريات القادمة علينا دي لو ضاعت نقنع من خير في الممتاز!!
الاجازه دي حتطول!!
وضع النادي كل يوم يزرع فينا الخوف!!!
مقسوم علينا السهر والتعب من أجل الكيان،،،
كل واحد يغني
سهران الليل نناجى النجمه
وليلنا حلا ونوم عينا قلة
سالنا الله تروح مننا العلة،،،،
وآاااه يامريخنا الماعندك وجيع؟؟؟

الملف التدريبي الي اين؟؟
المدرب راجع ولا حارس الوالده في الحد علي روح الوالد!!
في مساهد مدرب او مدرب وطني جاي؟؟
ولا الملف دا ننساهو ساي!!
هل الجهاز الفني مكتمل ولا الشغلة جايطه ؟؟
عندنا امل في تحضيرات ولا نقنع من موسمنا دا ونفكر في الجاي!!!
الجمهور جاتو جلطات دماغية
ومصران عصبي
وقولون
وناس السكري والضغط ماليهم حد
وبعدين يامريخنا؟؟؟

مسك الختام
لاسيرتونا ولا خليتونا نغرق
لارجعتونا مكان ماكنا نفرح
استفدتوا شنوا بالله عليكم
يعني الايام الباقيه دي حتطول ليكم عمركم !!
ولا عندكم رغبة تقتلوا ليكم كم زول وتحرقوا روما بالفيها؟؟
وبعدين يامريخنا؟؟

ونحن علي المدرج ندعم ونشجع ونتفرج
الدعم الجاي عليكم في الولايات ناس كادوقلي وشندي
تشجيعنا عايزنوا يتواصل
في ناس نفسها المريخ ينهار
عشان مايشارك العام القادم في الابطال!!
دعمنا لو وقف نحن ضعنا،،
وتشجيعنا لو وقف دوري الاولى محمدنا!!!
الناس تركز مع القادم وتنسي عاجل وحصري
ومافي شي ضيعنا غير الشتل والحصري
ونصيحه لمشرفي القروبات
اي شخص ينزل خبر شتله لمده ثلاثه مرات يغادر من غير مناقشات!!
نصيحة ليكم عشان قروبتنا تنضف شويه من الشتلات!!
العندو رغبة في نشر خبر عاجل يرسلوا للمشرف في الخاص،،
للتاكيد والاطمئنان،،،
وبعدين يامريخنا وياقروباتنا؟؟

همسة اخيرة
المريخ يعاني والجمهور مشغول
القروبات اصبحت طاردة
والجميع سارح بعيد ومنتظر صاحب الحظ السعيد!!
منتظرين الرئيس صاحب المال
والسؤال نحن قدمنا ليه شنو ولا مجهزين ليه شنو!!!
البيئة الرياضيه اصلحت طارده
فلنجعل منها نحن الجماهير بيئه جاذبة،،،
الجميع مربع يدينو ومنتظر الانقاذ!!
والمريخ منتظر مننا الانقاذ!!
ماعايزين القروبات تفقد قيمتها الفنية والمعنوية والمالية!!!
وبعدين يامريخنا وياقروباتنا؟؟

خارج النص
التسيير شكلها منتظره يوم اربعة من الشهر الجاي للمخارجة
ونحن منتظرين يوم اربعة عشان نتنفس!!
بس ماذا اعددنا للرئيس القادم!!
التسجيلات خلصت
لكن ملفات الجهاز الفني لم تخلص
معقوله نعمل المهم ونترك الاهم ؟؟
العام دا غايتو للنسيان
عام ايامو ماشه بالدفرة
والتخبطات حتكون للزكري،،
ملف التدريب والقطاع الرياضي ودائرة الكرة لاتقل اهمية عن التسجيلات ولاتقل عن رئاسة النادي!!!
لو ماعينتو مدرب عام ومدير كرة معناها تعب تسجيلاتكم راح مع الهواء !!!
مع علمنا التام انكم ماتعبتوا ولا اجتهدتو الي في لاعبين !!!
وبعدين يامريخنا وقروباتنا؟؟
ملف الديون للنادي حيتعبنا كتير وربنا يفرجها من عندو
الملف دا حيطير النوم من عيون ناس كتاااااار!!!
الخوف نلحق اتحاد جده السعودي وقدر مانسدد تطلع لينا مديونيات جديده؟؟؟؟؟؟
ملف حنتناولوا في مقبل الايام كونوا معنا،،،،
ورئيسنا القادم من الشباب باذن الله
وادارتنا حتكون شابة،،،،
الايام الجاية حتكون مليئه بالمفاجاءت !!!!
بمناسبة المفاجاءت
نبارك لحلفاء المريخ من الاندية الصديقة
نادي اللخويا بطلا لامير قطر
ونادي البايرن بطل لكاس المانيا
كلهم حلفاءنا في الحلوه والمرة
والكاس دائما حليفنا
فتناكم عافية،،،،،،،،،

تغريدات مرورية
القيادة الامنة راحة لك وللاخرين
والطريق ملك للجميع
لاتنسوا حزام الامان
وانسونا من الموبايل والرسائل
اتصالك مهم
وحياتك اهم واهم
لاتتصل الا حين تصل
نتمني السلامة للجميع

للتغريدة نقاط واراء اقبل منها ماشئت وارفض منها ماتشاء
تغريدة بصوت مسموع تعبر عن اراء الكثيرين منقوله ومربوطة بنبض المدرج،،،،،،،،،،
امسح للحصول على الرابط
بواسطة : معاذ ابو مؤيد
 1  0  717
التعليقات ( 1 )
الترتيب بـ
الأحدث
الأقدم
الملائم
  • #1
    ابو مازن 08-15-1437 11:0
    "في ناس نفسها المريخ ينهار عشان ما يشارك العام القادم في الابطال" انت لسه مؤمل تشارك العام القادم في الابطال..مع عقوبات الكاف المنتظرة يمكن اربعه سنين او عامين على الاقل لن تشارك لا في الابطال ولا اي منافسة قارية..ولو شاركت تعال قابلني..
أكثر
لا توجد مباريات
لا توجد مباريات
لا توجد مباريات