• ×

اللوري القاقا السوا عجاجة حلو القرين كبايتين الجيران ديل الفرااااااااجة


**************************
يبدو من وين ويكتبو شنو ....
معقولة ياشعب المريخ
اخرستم الألسنة ووريتونا الطفاء النور منو ...
نصف مليار جنيه جنيه وشلن شلن
جنيه ينطح جنيه حصيلة يوم ...
وتقولو المريخ محتاج اعضاء شرف وكبار داعمين
اي واحد دفع جنيه عضو شرف
واي واحد ساهم بالحضور يعتبر عضو داعم ..
قروب المشرفين ديل بذرة مجلس الجمهور المريخي الجاي...
الناقصنا شنو نعمل مجلس !!
الدعم مننا
الحضور مننا
الاشراف مننا
الكراسي مننا
بوهية النادي مننا
نظافه النادي مننا
الساوند حق الاحتفال من واحد من الشفوت
بالله تاني الناقص شنو !!
ناقصاكم بدل ياشفوت!!
ماتفرطوا في قروب مشرفي القروبات وازرعوا بذرة مجلس الجمهور وباكر تنبت وتبقي شجرة ظليلة للمجلس الجاي ...

ناس مالية التسيير ريقهم نشف واصابعينهم تعبت من العد...
الناس جات من ارجاء المعمورة من كل مكان ناس كداري وناس برقشة وناس بمواصلات ،،،،
جنيهات الشفوت اتعبت ناس العد واتعبت الاعلام واتعبت ناس كتاااار ...
جنيهاتكم تلخم !!!
**************************
بس الطالب حكايته حكاية ودا عايز ليه كتاب ورواية !!
دا اعطانا احساس انه المريخ بخير
وورانا دروس عشق الكيان
والمهم والاهم ناس الشو والاعلام
ماعرفو يعملوا شنو !!
ربنا يخلف عليك
ابن عمر
لقبوا في القروب بالدون النصرى دفعت خمسة جنيه صدقني تساوي اكتر من خمسة مليار
شكرا قروب محبي المريخ الكيان القدموا الشاب الجميل دا
مالبست بدلة ولا جيت مورنش جزمتك ولا جلست في الكراسي الأمامية..
لكن سحبت البساط من ناس الشو الاعلامي !!
بدل نرفع ليك القبعات اتمنى ترفع صورتك في المدرجات ..
لو لجنة التسيير عندها احساس تشرف ليك وظيفة في الاستاد او النادي او مقر الصحيفة ..
انشاء الله يمسكوك امن الصحيفة !!
غيرتك علي المريخ واصلنا اكتر من ناس كدة عارفين نفسهم ،،،
شكرا الدون النصري
الخمسة جنيه اوصلت دعم النفره الي نصف مليار
**************************
رفعنا لافتات للدعم وغيرنا رفع لافتات للطرد !!!
عرفتوا القاعدين ديل الفراجة
غايتو الزرعتوه في نفوس ناس !!
امس قلنا في ثلاثة ديربي لكن نسينا ديربي العاصمة حقتنا !!!
لكن ديربي القروبات سحب البساط من كل المباريات خاصة ديربي العاصمة السودانية لحدي ناس النيلين مانقلوا ديربي العاصمة!!
ينقلوا كيف و الكاميرات الموجودة في الخرطوم كلها في نادي المريخ!!
ناس منتظرة نتيجة مباراة في الرادي!!!
وناس تعد في المال جوة النادي ..
عرفتوا طعم القريب الكبايتين !!
**************************
شكرا لكل من حضر وشارك شكرا لكل من حول رصيد شكرا لكل من دعم لو بحرف في القروبات شكرا شفوت الزعيم
زمان قلنا الاستثمار في الجمهور دا...
جمهور يسد عين الشمس
جمهورنا دا باكر بخلي الإدارة تحس
انشاء الله الرسالة وصلتكم يا لاعبين
ويا لجنة التسيير !!
**************************
ختاما
من راهن علي الجمهور والشفوت مابقع واطة لانو ضهرو مسنود بصبة وحديد مسلح
**************************
ونحن علي المدرج وفي النادي وحولينا الاستاد وفي الولايات وخارج السودان وفي كل مكان نشجع وندعم ونتفرج ...
نحن شفوت المدرجات
نحن نجوم القروبات
نحن الحولنا الجنيه دولارات
نحن السند للادارات
نحن شفوت نحن اسود
عرفتونا ياسادة
نحن المريخ سكر زيادة
**************************
خارج النص وهمسة اخيره
الجماهير ركزت اركزوا معانا ياناس التسيير!!
والحاصل في الفريق من تأخر وحضور وسفر بالدور مابشبهنا
باقي ليكم شهر انستروا لو بالدين
وماتخلونا نعض اصابع الندم
مباراة مائة وثمانون دقيقة تفصلنا عن المجموعات!!
عالجوا كل المشاكل عشان خاطر جمهور القروبات!!
**************************
الدون النصري الخمسة جنيهات
حتكون عربون دوري المجموعات
**************************
امسح للحصول على الرابط
بواسطة : معاذ ابو مؤيد
 0  0  368
التعليقات ( 0 )
أكثر
لا توجد مباريات
لا توجد مباريات
لا توجد مباريات