• ×

يوم الاشباع الكروي للمنتخبات


والبي ان اسبورت اظهرت ملاحظات
**************************

امس قنوات البي ان اسبورت حيلها انهدا من نقل المباريات ونفسهم قام والرموت ذاتو غيرنا حجارتو مرتين من شدة ماشغالين نقلب ....
اشباع حتي الامتاع من مباريات المنتخبات تلاشت تمام انتماءات الأندية وظهرت الروح الوطنية...
من الظهر وانت طالع للمساء مباريات تشغل المتابعين ...
نبارك للجماهير المصرية الحضور المشرف للمدرجات اصلا عندى عشق اسمو الجماهير والمدرجات حتي الامارات ذاتها مدرجاتها اتملت ....
وجماهيرنا كانت في الميعاد حضرت وشجعت وتلاشت الميول داخل الاستاد
لكن في القروبات التعصب كان حاضر وكل طرف منتظر الهفوات !!
**************************
الجماهير ملح المباريات ومباراة جمهورها تعبان معناه فول ساااادة من غير اي مكملات لاجبنة لازيت سمسم لاشمار تاكل وتبلع بليلية بس......

اصلو وجود شفوت المدرجات يزبط ليك اي مباراة حتي لو كانت تعبانة ومباراة كأس جيم للاطفال متعتها وفرحتها انطلقت من المدرجات !!
والله الشفوت والجمهور في البلاي استيشن عندو شكل وطعم ....
عشان كدة ياشفوت مباراة سطيف عايزنها فول مصلح ومعاه شية ضان يعني الاستاد يكون مليان والشفوت يكونوا طابقين شفت شايل شفت ...،
**************************
الواحد من كترة المباريات ماعرف يركز وين وحتى لون عيونا بقي اخضر خواجات بس من شدة مابنعاين للنجيلة بتاعة الاستادات!!!
لكن فجاءة الساعة تسعة عيونا طششت القلعة الحمراء لقيناها ماقلعتنا والاستاد والنجيلة عايزات شغل كتير قبل مقبل المباريات وخاصة مباراة وفاق سطيف .....
نبداها من نجيلة الاستاد اسه لو خليتو ناس ستموني تمو شغلهم كان ماشفنا اي حتة مصلعة !!!
والمضمار ذاتو عايز شغل ودهان الغبشهة ماحبابها
سمعتني يابتاع المنشأت الشكروه
وسمعنا انك مانع الشفوت من صيانة الاستاد !!!
من اسه افتح اضانك كويس يا تصين الاستاد يا تفتح الباب للقروبات ...
قصة المنع دي شيلها من حساباتك والصورة في القناة الناقلة مابتشبه المريخ يالحبيب
الاستاد اسمو القلعة الحمراء
احساس الادارة والانفراد بالراي والتعنت حاول غير منها .....
**************************
اها ياناس النيلين والقنوات العندها رغبة في نقل المباريات شفتو النقل كيف بتقنية HD
شفتو توزيع الكاميرات وعددها شفتو وزن الالوان في الكاميرات عرفتو شغل السسيو والوايت بلنس بين الكاميرات.....
شفتو تشبع الالوان مريح كيف للنظر والعيون !!!
شفتو شغل الجرافكس و نتيجة المباراة عشان ماتملوا لينا الشاشة باللوقو والسي جي مالي نص الشاشة!!
عشان كدى امس قلنا ليكم يالجنة التسيير قبل ماتتفقوا مع قناة اشترطوا الجودة قبل المال ولو في طريقة اتفقوا مع نفس الشركة النقلت للجزيرة وبيعوا شارة المباراة للقنوات...
لو اتفقتوا مع الشركة وبعتوا الشارة تكسبوا اكتر لانكم حتقدروا تبيعوها لاكتر من قناة تكسبوا الجودة وتضمنوا المال والبيع حيكون بسعر مناسب للجميع وممكن بيعها لكل القنوات تدفع تاخد إشارة...
**************************
مابنحب ندخل في التحليل الفني للمباريات وحمدان حمد ماقصر في الاستديو
شكرا لكل لاعب في المباراة علي تضحياتكم نحن عارفين البئر وغطاها وشايفين الاهمال للمنتخب واصل وين
جزيتم خيرا علي مجهودكم وهاردلك علي النتيجة ومبروك علي الاداء
وياكوتش الموازنات في الرياضة والمنتخبات مابتنفع ....
اشرب كأس الشجاعة مرة في العمر!!
**************************
ختاما
اهتموا بالمنتخب لو بشعار جديد يليق باسم السودان !!!
المنتخب الوحيد لاعبيه مايبدلو شعارهم مع الخصم !!!!!!
*************************
ونحن علي المدرج نشجع ونتفرج ومدرج المنتخب امس ماشاء الله مليان وماقصروا الجماهير ومباراة سطيف عايزين قدر العدد دا مرتين يعني بصريح العبارة وبالمثل السوداني (العميان شايل المكسر)
مامحتاجين وصية ياشفوت المدرجات....
خارج النص:
وتااااااني التحكيم الافريقي ماشي بالنازل .....
نضف السبورة ياولد
مباراة سطيف علي الابواب!!!!!
ويامسئول المنشات ماتنسى كلامنا الفوق ويكون التنفيذ من اليوم قبل باكر .....
امسح للحصول على الرابط
بواسطة : معاذ ابو مؤيد
 0  0  497
التعليقات ( 0 )
أكثر
لا توجد مباريات
لا توجد مباريات
لا توجد مباريات