• ×

اسبوع طويل وخالي مباريات


وفي ناس ذيادة عدد في القروبات
**************************
الاسبوع دا اسبوع ركود في نقل المباريات في القنوات الفضائية الا مباريات قليلة للمنتخبات
طيب ياناس بدل نحرس قروبات الواتس اب نمشي ننجز نفراتنا في النادي ...
النادي فيه كل شبكات الاتصالات يعني من النادي تقدر تدخل القروبات
الناس بدل تنفر من بيتها احسن النفرة تكون نص الناس
والقروبات في النادي تتنافس مابينها
صدقوني الحماس حيكون مختلف هناك وكل الخدمات متوفرة
الناس من عصرا بدري تمشي للنادي وممكن تحضر تمارين الزعيم وتحفز بعضها للنفرة
واصلو موت الجماعة عرس
تعال ومعاك اخرون النادي يشيل من الحبايب الف ولو النادي ما شال كم ممكن تتدخلوا للاستاد وتقعدوا في المدرجات.....
****************
وبمناسبة الاستاد الالتراس شغالينا بروفات
بروفات عديل ذي حقة الفنانين ديل مش ياهم الشباب المحاربين بالله عليكم الما عارف قيمة الالتراس يمشي الاستاد بعد المغرب يشوفهم في نفس مكانهم
تشوفهم تقول المباراة شغالة والدقيقة الاخيرة من زمن المباراة
ديل هم شفوت المدرج
يديكم العافيه ياشفوت والماحضر البروفة معاكم نص عمرو ضايع
والناس البعيدة الفيديو موجود ولافي في القروبات
تعظيم سلام يا التراس.....
اجتماعات الالتراس مخرجاتها احسن من مخرجات لجنة التسيير ...
*************************
سمعنا حفلة الدعم يوم السبت نصيحة للقائمين علي الامر يوم السبت الجاي دا غيروه السبت مليان مباريات اهمها كلاسكيو برشلونه وديربي جدة
انتو عايزين الحضور وعايزين الدعم
الشباب ينتظرو مباريات الكلاسيكو من سنة لي سنة والعالم كلو منتظر مع الشباب
شوفوا ليكم يوم تاني عشان تضمنوا الحضور وتضمنوا الجنيهات!!!
**************************
نشكر اي شخصيه عامة متواصلة مع الشفوت في القروبات اعلاميين او اداريين او لعيبة سابقين نشكركم لاحساسكم بنبض المدرج
لكن في ناس كدة شايفين نفسهم علي المريخ والقروبات
وفي ناس وجودهم حجز خانة ونوع من البرستيج وشوفونا
وناس من اضافوهم اصلا ماقروا الرسائل
ياجماعة انتو نجوم وجودكم في القروبات لدعم عجلة النفرات المريخية
ابوالهول شارك المصريين ثورتهم شاركونا نفراتنا لو بالدعم بالكلمات
شارك عزيزي النجم الاعلامي او الاداري شارك لو بارسال رموز تعبيرية
عزيزي النجم
انضمامك للقروبات لاذم تكون اضافة للمجموعة ذي المحترفين
ماتكون حبيس دكة الاحتياطي وفي الدكة ونائم.....
اصحوا معانا حبة
وياريت اعضاء لجنة التسيير الاسبوعين ديل تنضموا للقروبات وتحسوهم للمشاركة !!!!

*************************
ختاما
ماتشغلكم نفرة الدعم عن الاهم
والاهم هنا الحضور للمدرجات
مباراة سطيف مباراة نكون او لانكون
نكررها للمرة المليون
مائة وثمانون دقيقة تنعش خزينة النادي وتنعش امالنا واحلامنا للبطولة
************************
ونحن علي المدرج نشجع ونتفرج المدرج ذاتو بشجع معانا يوم تشطيف سطيف
والمدرج من شدة ماتعود علي الالتراس قدم طلب الانضمام ليهم وداقي جرس عايز ليه ادوات التراس
مدرجنا ينتظركم
ودعمنا ناقص مشاركتكم
الحمل ذاد عليكم ياشفوت وانتو قدرها
نجتاز الاسبوعين ديل والقادم اجمل
ياجماعة شدو الهمة ومشرفين القروبات كل واحد عايز يشوف القروب في مقدمة الداعمين ....
*************************
خارج النص
تعال للنادي عشان علي الاقل نشوف وجوه جديدة وتنشيط الدماء كل شي متوفر...
تعال عشان النادي والمريخ محتاج تواجدكم
همسة اخيرة
اجلنا موضوع ابحلقوم وابجضوم عشان القادم محتاج التكاتف
نشطف سطيف ونجي نحميكم لانو خنقتونا !!!!
امسح للحصول على الرابط
بواسطة : معاذ ابو مؤيد
 0  0  370
التعليقات ( 0 )
أكثر
لا توجد مباريات
لا توجد مباريات
لا توجد مباريات