• ×

شكرا لاتكلمني


**********
المرحوم خوجلي عثمان يغني ويقول
كل ما اقول قربت ليك
تلقاني بادي من الالف
الالف هنا هي شكرا!!!!!!!!
من امس قلنا الجبل سيتمخض ويولد فار !!!
لكن فار السبت طلع ام سيسي ولاطلع فار سمين ومدغلب
فار يطمن !!!
دا فار ماعندنا ليه رقبة ...
والجماهير في عهدكم قربت تكون من المراحيم
والمرحوم الفنان خوجلي عثمان ترك وراه اغنيات
ونحن سنترك ورانا للاجيال كشف تبرعات وكشف مساعدات
مش كشف وخطاب تشكرات!!!
بالله دا وقت شكر ولا مناقشة وضع صحيفة المريخ ؟؟
معقولة بس!!
الناس في شنو وانتم في شنو
طيب انتو الصحيفة دي ماعندها مجلس ادارة ومجلس الادارة برئاستكم ماتعملوا اجتماع خاص بالصحيفة !!!!
سارحين بينا معاكم مالكم....
نحن منتظرين قرارت تهم الشارع المتوتر والمشحون !!!!
تطلعوا لينا بقرارات مافيها اي مضمون!!!
وين مدير الكرة؟؟
وين المدرب العام؟؟؟
وين الاستعداد للمباراة ووين الاهتمام؟؟
اسه بالله دا كلام........

*********
تشكروا في ناس المنشأت هو الشغل عملوه ناس القروبات
شاكرين ناس المنشأت
وبعد ماشكرتوهم اها كدى حال الفريق حينصلح؟؟
ومرتبات الناس حتندفع؟؟
وحنصعد للدور القادم
المشكرين ليها شنو.....
يعني نستنكر انتظار الناس لي لقاء الضيف والمذيع والبحث عن الضحكة؟؟
تجي قرارتكم عايزة ليها حلقة؟؟ ياميرفت بالله الخميس الجاي جيب لي كراسي واستضيفي الجماعة عشان نكمل باقي ضحكات الاسبوع الفات!!!
وفي ختام الحلقة اتقدمي انتي بالشكر ليهم واتلي خطاب الشكر حقهم
شكروووووووووه
بوزن عادل امام
خللللللللوه
في حد فاهم حاجة ياجدعان
ومالكم خجلانين تورونا تجهيز الحفل الخيري وصل وين !!!
حفلتكم دي فيها كتمة ولاشنو ...

**************
تتقدم جماهير المريخ بالشكر الي حضرتاكم علي الشكر الموجه لحضراتنا وحضراتنا يثمن شكركم لقطاعات النادي والقطاعات تشكر حضراتكم وحضراتكم مبسوطين من الشكر
وشكر لي شكر
نحن نشكركم علي شهور العذاب ونشكركم علي تحمل الصعاب
ونشكركم علي كل اجتماع وكتابة خطاب...
طيب ماتكتبوا خطاب الاستقالة عشان نشكركم بالطريقه الصاح
شكر ومعاه موسيقى وفرقة حسب الله !!!!
وممكن نجيب ليكم علي كبك يديكم فاصل

********
ناس عاملة نفرات
وناس عاملة اجتماعات تشكرات
والمحصلة تململ في القروبات
انتو ماعندكم زول بنقل ليكم (شمارات) القروبات ويوريكم نبض المدرج
الناس قالت ( وااااي )
وفاق سطيف باقي ليه اقل من اسبوعين انتو عارفين كدة
عارفين انو الوفاق كان لاعب في الدوري؟؟
وكلمتوا الجهاز الفني!!!
راقبتوا المباراة
شفتو نقاط الضعف ؟؟
ركزتوا علي الخصم ؟؟
ولا شكرا لاتكلمني.....

********
ختاما جيبو لينا خطاب شكر الوزارة علي مجهوداتكم تكونوا ماقصرتوا
خطاب نهاية مجلسكم وتحديد انتخاباتكم
يمثل الحلم الجماهيري.....

********
ونحن علي المدرج ونشجع ونتفرج وحنغني ليكم قريب
متشكرين ومقدرين......
متشكرين يالجنة التسيير
انا شخصيا اشكركم وخطاب شكري حيوصلكم بس اعطونا صورة من خطاب وزارتكم
والوفد الماشي
امسح للحصول على الرابط
بواسطة : معاذ ابو مؤيد
 0  0  418
التعليقات ( 0 )
أكثر
لا توجد مباريات
لا توجد مباريات
لا توجد مباريات