• ×

يامجلس الإدارة سلموا الشفوت الراية وماحتندموا




⭐⭐
هوي ياناس خلاص نحن في عرفنا المريخي الفرحة ما بتتجاوز الأربعة وعشرين ساعة وفي حالات استثنائية ثماني واربعون ساعة ومباريات الدور الاول دا من ضمن الأربعة وعشرين ساعة

اها نحن بعد دا قفلنا باب الفرحة بالمفتاح عايزين نشوف الاهم والمهم والاستعداد ليوم الخمسين الف شفت ليله الترقي للدور القادم

⭐كل شفت مننا مفروض يعرف دوره شنو وخلونا من ونسة الواتساب ونظرية مدربي القروبات وحاملين رخصة التدريبC
نحن دورنا المدرج دا

⭐عايزين نملاهو بالشفوت وبالحناجر وادوات التشجيع والمتفرجين ساكت ديل خليكم مع الرادي والتلفزيون وادو الفرصه لاصحاب الحناجر
ومدربي المدرجات البكوركو في التشكيلة وبصفرو في المدرب واللاعبين شوفوا ليكم رادي اسمعوا منو عشان المباراة محتاجه حناجر للهتاف مش للنقد

⭐السبت سبت الشفوت والجمهور ماعايزين اي متخاذل وسطينا عايزين من مدرجنا دا نسمع نيجيريا صوتنا

⭐لو لجنة التسيير عايزة تنقذ نفسها وتجمل فترتها تسلم المباراة دي للشفوت والجماهير من بيع التذاكر لحدي النهاية الشفوت ديل احرص من الجميع علي الكيان وبراكم شفتو وقفتهم معاكم دعم وتجميل للنادي يعني ما عايزة ليها شرح

⭐شوفوا ليكم كم شفت من الناس القلبها علي المريخ يكونوا شباب ذى الورد من ناس النفرات ديل مسكوهم بيع التذاكر ومسكوهم الدخول وابعدونا من ناس الاتحاد ديل مافي شي مضيعنا غيرهم وبعدين حتشوفوا الفرق كيف
ابعدو من مافيا التزاكر والدخول ضرت مجالس كتير قبلكم واتستفيدوا من التجارب


⭐عايزين مباراة السبت تكون خمسين الف شفت بالتمام شفت جنب شفت عشان سببين

السبب الاول الدخل ممكن يشيل من كاهلنا الدخل المحجوز دا ويفك الدين
والسبب التاني عايزين نعدي للدور الثاني
وكل مباراة عايزنها نهائي مبكر
امس قلناها لا عذر عندنا الا للمريض او العلي سفر او المتخازل والمتفرج ساكت والمنظراتي والمصلحجي

⭐استرجعوا شريط عزام وارفعوا التمام وخطوات تنظيم لكل المدرج
عايزين نشوف المدرج دا احمر واصفر
والجلاليب البيضاء والالوان التانية دي يوم السبت تكون في إجازة لو عايز تجي بيها شوف ليك قماش متر لونه احمر او اصفر واعملو مريلة
والفكرة دي ممكن ينفذها قروب من مبلغ النفرات العندهم بقروشهم يشتروا ليهم بالات قماش احمر واصفر ويقيفوا جنب الاستاد ويبيعوا بي المتر ومقصهم معاهم وبدل مبلغ الدعم يكون مليون ممكن يذيد خلو عقلياتكم تجارية حبة
راس مالكم باله قماش احمر واصفر ومقص وعمل المريلة ساهل في نص المتر اعمل فتحة دائرية عشان تتلبس
⭐⭐
و بمناسبة الاستثمار دا ابقوا عشرة علي شريط مباراة نيجيريا وسوقوه بطريقة صحيحة القنوات الابت تمشي دي خلوها تدفع التمن صاح وما تجاملوا اي زول
العايز المباراة كاملة بثمن والعايز ملخص المباراة بثمن
والعايز الاهداف بثمن براهو شوفوا ليكم بتاع مونتاج يزبط الشريط وبعد داك بيعوه براحتكم يدخل ليكم قروش وقصة المعرفة والعلاقات ماتنفع النادي مفلس و اي مصدر دخل امسكوا فيه قوي سوقو لشريطه المباراه بالطريقه الصاح تكسبو ملايين

⭐خلونا مفتحين وماعايزين غير المدرج بلونيين احمر واصفر والالوان الاخرى لاتلذمنا

⭐️ختاما⭐️
وحدوا الدعوات وهيا الي المدرجات

ونحن علي المدرج نشجع ونتفرج بالوانا الزاهية
وياناس الالتراس اعملو بروفاتكم من اسه ووحدو الهتاف وخلونا من كل التراس يغني براهو وممكن الناس تتفق كل ربع ساعة لاالتراس في الاهازيج والباقين يغنوا معاهم عشان الطاقه والمجهود مجتمعنا مجتمع متفق في كل شي خلو هتافنا زاتو يتفق معانا
الهدف واحد هو الكيان

خارج النص
⭐️⭐️
ياناس التسيير اجتمعوا بمدراء القروبات دي واختاروا اخيرهم وسلموهم امر المباراة وماحتندموا
جربوا مرة واحدة الاعتماد علي شباب النادي الشباب ديل وقفوا معاكم وقت الحارة ووقت الزنقه
واللجنة الكونتوها دي خلوها للاشراف والمتابعة وتسهيل مهمة الشباب

⭐الشفوت ديل هم الخير والبركه وفيهم شباب قلبهم علي الزعيم وقلبهم حار ⭐
امسح للحصول على الرابط
بواسطة : معاذ ابو مؤيد
 1  0  864
التعليقات ( 1 )
الترتيب بـ
الأحدث
الأقدم
الملائم
أكثر
لا توجد مباريات
لا توجد مباريات
لا توجد مباريات