• ×

أولاد النيل ومباراة التأهيل


يلتقى عصر السبت 12 سبتمبر الساعة الرابعة والنصف بتوقيت السودان بطل السودان مع فريق سموحة ممثل مصر فى منافسة كبار أفريقيا فى الجولة السادسة للمجموعة الأولى ونتيجة المباراة تمنح الهلال تصدر مجموعته فى حالة الفوز بنقاطها الثلاث وفى حالة التعادل سوف يصعد الهلال للمربع الذهبى بغض النظر عن نتيجة مازيمبى والتطوانى أما فى حالة الخسارة (لا سمح الله ) سوف يكون مصير الهلال مقرون بخسارة مازيمبى من التطوانى بالكنغو ...لذلك مباراة الهلال مع سموحة ببرج العرب بالإسكندرية مباراة مصيرية حيث يلتقى أولاد النيل فى مباراة من العيار التقيل وهى بالنسبة للهلال مباراة تأهيل ...وبإذن الله نشاهد مباراة رفيعة المستوى يكون النصر فيها لبطل السودان وهى مباراة بدون جمهور ويديرها حكم جنوب أفريقيا دانيال بينيت ...وقال أندرزينهو إن تأهل الهلال مسؤوليته الشخصية وقال عنها بشة إنها مباراة موت عدييل كدة وإهتمام نجوم الهلال يجب أن يتبعه إهتمام إدارى ...وخيراً فعلت الإدارة وهى ترسل العقيد حسن محمد صالح مسؤول العلاقات العامة من أجل الترتيب لقدوم بعثة الهلال التى سوف تسافر لمصر يوم الإثنين القادم ، وكما نعلم أن وصول الهلال لمربع الذهب يعنى مواصلة سيد البلد لمسلسل النجاح الأفريقى الذى بدأه الهلال عام 1966 عندما إحتل المركز الثالث للأبطال كأول إنحاز يحققه فريق عربى وسودانى ...وشاهدنا أبناء الهلال عندما شمروا عن سواعد الجد صرعوا مازيمبى العنيد بهدف الشاب أطهر الطاهر مما جعل شاعر الهلال أحمد البشرى يترنم بمسادير جميلة ويقول ود البشرى *** نحن أسياد بلد والعز مأصل فينا ... نحن إن قمنا مابنخيب الراجينا ...ها آ ناس الهلال لعااااب وكورتو متينة ...وإن قنص الأسد معروفة صيدتو سمينة *** أسياد البلد فى الحارة قدلو وحامو ... والكنغولى داك غلبوه بى حكامو ...الراجيك تطير ضاعت خلاص أحلامو ... والموج إن هدر أوعك تقيف قدامو *** إت ملك الشعوب فى القارة إنت عميدا ...حقيت اللقب واثبت إنك سيدا ...يامعنى الجمال يا كل حاجة فريدة ...أحمد البشرى فى ريدتك كتبلو قصيدة ...وأنا حاولت أجارى ود البشرى وجادت القريحة بالمسدار التالى *** إت ملك الشعوب بالسلطة والقانون ...حقيت اللقب قمرك مضوى الكون ...يامعنى الجمال فى الكورة شفنا فنون ...ماك زى الوصيف مضروب عيال هارون ...ويجب على أبناء الهلال فى الداخل والخارج الدعاء بأن ينصر الله هلال الساجدين والناس الصالحين فى مباراة سموحة وغيرها من المواجهات فى الأبطال والدورى الممتاز وكأس الوطن قولوا آمييين يارب العالمين .
*** الأزرق النشوان يلتقى النسور فى كأس السودان
يلتقى بطل السودان هلال العشق الجميل مساء السبت 5 سبتمبر بفريق النسور الأمدرمانى بمقبرة الخصوم فى دور الثمانية لكأس السودان ...من هسه مفروض المشاهد الكريم يجهز مشاعره لسماع المباراة عبر أثير هنا أم درمان لأن قناة النيلين الكسيحة أصبحت أسوأ من إتحاد أبناء العمومة الأحمر ويئسنا من ( خيراً ) فيها كما يئس الكفار من أصحاب القبور ...ومباراة النسور هى البروقة الأخيرة لمباراة سموحة بالإسكندرية والتى سوف يعتمد الهلال فيها على سلاح العكسيات والكرات الثابتة ويجب إحترام فريق الشرطة فهو يلعب كرة جميلة ويجب ألا يغتر الهلال بالفوز بالرباعية على النسور فى الدورى لأن لكل مباراة ظروفها ...وإذا تخطى الهلال النسور سوف يلتقى مساء الخميس 17 سبتمبر بالأهلى شندى فى مباراة نصف النهائى لكأس السودان ...أما فريق المريخ فقد ( رأف ) الإتحاد الأحمر فى حاله وقام بتأجيل مباراته الدورية أمام أهلى شندى من يوم الإثنين 7 سبتمبر لتلعب يوم الإثنين 21 سبتمبر وسوف يلعب المريخ فى كأس السودان مع هلال الأبيض يوم الثلاثاء 8 سبتمبر ...يعنى ناس عنكبة يجوا عايدين لكن صدقونى المرة دى الصفوة دمها فاير لازم فرسان التبلدى يخسروا بأى طريقة !! حتى لو حكم المباراة أسامة عطا المنان لازم المريخ يصل نصف النهائى لكأس السودان عشان يلاقى فريق الخرطوم الوطنى يوم الأربعاء 16 سبتمبر ...عشان كدة نقول هاردلك مقدماً لفرسان التبلدى وخيرها فى غيرها وياعنكبة إنتظر الشقلبة !! إمكن تكون شقلبة مهند الطاهر .
*** المشجع الأحمر سيحة ينخاز للمريخ بإمتياز
قناة السودان الفضائية من المفترض أن تكون قومية ولكن وضح إنحيازها السافر للمريخ فى برنامج عالم الرياضة الذى يقدمه ثنائى المريخ رضا وسيحة والبرنامج فقد نكهته منذ أن فقد الأستاذ عمر النقى ولم يجد الخبير الطاهر محمد عثمان الفرصة وهو القوى الأمين وأصبح فيصل سيحة يرتع ويلعب كما يحلو له وإسم هذا المشجع المريخابى المتعصب هو فيصل ميرغنى أحمد حسين وإسم سيحة ده عشان لما كان حارس النيل الخرطومى كان يجلس فى فرن عمك سيحة فى الخرطوم غرب ( مصنقر فى الفرن الوقت كلو ) وفقرة الإمبراطور التى بقدمها رضا وسيحة لا خير فيها فهى مثل ( كير الحداد ) إما أن تحرق ثيابك وإما أن تجد منها ريحة إنحياز منتنة ..ومن الصعب على المشجع سيحة أن يتعلم الحياد بعد هذه السن المتقدمة ومعروف عن فيصل الإنحياز الأعمى للمريخ والتربص بالهلال ففى أكتوبر عام 2013 قال سيحة إن هدف راجى فى شباك الخرطوم صحيح لم تسبقه مخالفة مع حارس المرمى وإنه يتعجب لإلغاء الحكم لهدف راجى ...وسيحة يأتى لفقرة الإمبراطور وفى عقله الباطن تشويه صورة هلال الملايين فمن الطرائف عندما كان النيل الحصاحيصا يلعب فى الدورى الممتاز كانت له مباراة مع الخرطوم الوطنى وفى لاعب إسمه عبد الله الأمين حاول الإعتداء على الحكم فعندما تم عرض الحالة على سيحة قال بإنفعال ( الحكم مفروض طوااااالى ينذر لاعب الهلال ) فقال له رضا ضاحكاً ( الهلال لم يكن طرفاً فى هذه المباراة !! ) والغريبة أى ضربة جزاء للمريخ سيحة يقول صحيحة ووصل به الحال أن يشيد بالحكم الغانى لاميتى ويصفه بالشجاعة لأنه منح المريخ ضربتى جزاء أمام وفاق سطيف وسيحة عندما أضاعت ركلة جزاء علاء الدين التانية قال غير صحيحة لكن الأولى صحيحة ...وسيحة لم يتجرأ ليقول أن ضربة جزاء المريخ أمام الترجى بالخرطوم غير صحيحة والكل يعلم أن المريخ لولا ضربة الجزاء الحرام لما صعد لدورى المجموعات !! وأم تفة لسه فى جنها !! وسيحة ورضا شبهينا وإتلاقينا ...ولله در القائل *** وتقول لى وتحلف كاذباً ...فأجىء من طمع إليك وأذهب *** فإذا إجتمعنا أن وأنت بمجلس ...قالوا مسيلمة وهذا أشعب ... بالمناسبة فى برنامج الرياضة أمس الجمعة أفتى الإمبراطور ( سحسحونى ) أن هدف عبده جابر فى شباك هلال كادوقلى صحيح ولا أدرى كيف تم نقضه !! أما ضربة جزاء الهلال ضد أهلى مدنى فإنها غير صحيحة !! لذا لزم التنويه .
*** همسة الوداع
حبايبنا الحلوين عندما إتأهلوا لمربع الذهب للإبطال ماصدقوا !! وكعادتهم أصبحوا ينفخوا فى القرب المقدودة وتحدثوا عن جبنة أوكرا وريحة المطار ولقاء برشلونة ولكن عندما إعتمدوا على مقدراتهم الذاتية ظهر التواضع والمستوى الحقيقى فخسروا من الأمل فى عطبرة بثنائية رزاق ياكريم وتعادلوا مع أسود الجبال فى كادوقلى ومع السلاطين فى الفاشر وخسروا من فرسان التبلدى فى بقعة المهدى ...وهنا ترك كبسور الأحمر الهجوم على الحكام وبدأوا مسلسل الشكاوى مرة فى لاعب الأمل عمر عثمان ومرة فى لاعب هلال الجبال طونق وكمان مشوا أبعد من ذلك كونوا لجنة رباعية لمتابعة القضايا العالقة مع الإتحاد وتضم لجنة كبسور عبد القادر همد مهندس الجقور و صديق محمد صالح وحاتم عبد الغفار ومتوكل أحمد على ( معاط السلوك ) ...إنتوا بدل التعب واللجان ممكن الحل يكون بسيط يقوم جمال الوالى يرفع التيلفون ويقول لى معتصم وأسامة ومجدى عايزين كأس الممتاز ( ويادار مادخلك شر ) ...من العجائب كبسور الأحمر لم يقدم شكوى بعد هزيمته من فرسان التبلدى !! وبهذه المناسبة نهمس فى أذن الإعلام الأحمر إنتوا ليه ماتقدموا شكوى فى عدم شرعية راعى هلال الأبيض !! مش مولانا أحمد هارون مطلوب من المحكمة الجنائية الدولية ولا نسيتوا ؟ مجرد سؤال .

امسح للحصول على الرابط
بواسطة : محمد عثمان الجعلي
 4  0  2.0K
التعليقات ( 4 )
الترتيب بـ
الأحدث
الأقدم
الملائم
  • #1
    الكتاااااااحة والتفااااااحة 11-21-1436 06:0
    الشفقة تطير مباراة الهلال وسموحة باقى ليها اسبوع انت مستعجل ليه ؟ ونحن اجعلينا نلقاها من منو قناة الحبلين والا سيحة ورضا والا اتحاد السجم كما يحلو لعمنا الامين عبدالقادر طمنونا عليه غائب ليه فترة طويلة واين هو الان ؟ اها نجى لسيحة قلت لى بقعد فى الفرن تلقاه فى اليوم بقرض ليه عشرين خبزة فى اليوم
    المهم نحن همنا نتصدر مجموعتنا عشان نقابل الجماعة الطيبين ونعمل ليهم (دليفري ) للوالى ونقول ليه امسك الصلاحية انتهت وتانى دور الاربعة تشموه قدحة قال جبنة اوكرا قال
    اها نجي لى والينا قلت لى قال كندكنا كتاحة ان شا الله كتاحة تخلى ليك صلعتك شارع زلط
  • #2
    ابوحسن 11-21-1436 09:0
    لك التحية استاذنا محمد عثمان وانشاءالله يكون النصر حلفينا في مبارة سموحة المصري بس
    اهم حاجة الجدية وعدم الاستهانة بخصم مهما كان وضع الفريق يجب علي لاعبين الهلال
    اظهار القوة من بداية المبارة حتي يرعب الخصم *** وبعدين يا كافي البلاء ناس الصفوة
    ديل مافيهم رجل رشيد للاسف حتي الناس البارزين فيهم ما بخجلو يزات زي فيصل سيحة دا
    هو ومزمل شاربين من ماعون الوالي (مجردسؤال)
  • #3
    منعم ابوناصر 11-21-1436 11:0
    تحياتى جعلينا اولا اديك ماجادة به مشاركات الاسياد تشجيعا لابنهم البار هلال كردفان ونرجوا من الاخ الغالى كتاحه ان يجسد هذه الابيات بما يراه @@@@@@@@@@@@ بعد ماقلت خلاص من الامل توبه @@@شوف الزمن ساقنى مشيت جبال نوووووووووووووبه قابلت لى فتيه فى الكوره موهوبه@@@شالو خلاص فلبى ودرنت باعجووووووووووووووبه يانجمة الوالى الديمه منكوووبه@@@@ناس كردفان جوكى فريد وعنكووووووووووووبه كان الهجوم تعبان ودفاعه راكوبه@@@طار الدرون منك وبقيتى مغلووووووووووووبه @@ طبعا ياجعلى ابدعت كما انت دوما مبدع وماقصرت فى فريق كبسور والقويه شديد انهم يشتكو فى احمد هارون المطلووووب للجنائيه @@
  • #4
    فيصل الاقرع 11-21-1436 03:0
    سلام جعلينا مباراة سموحه صعبه صعبه وما نحن البنتأهل بيد غيرنا لا تطواني لا مازنمبي نحن بناكلها بايدنا برانا عديل نحن ما بنمشي صحبةراكب و بنتمتع بالرحله لكن ما بنخلي القياده لغيرنا . سيحه دا مدفوع الاجر مقدما اليوم جرائدهم ماسكه في كلام سيحه قال ايه ممكن الكوره تكون لمست رأس لاعب الهلال الحلبي الرخيص والهمسه دي مي همسه دي عكاز عديل واحيي ابوناصر علي الابيات المولعه نار في تعليقه والراجل اتحداك ياكتاحه وقال ليك عبر عنها وربنا انصرنا علي سموحه علي شان نقابل الظناطير
أكثر
لا توجد مباريات
لا توجد مباريات
لا توجد مباريات