• ×

هلال الأبطال وحسن الفأل


أغنية الحقيبة ...قضينا ليلة ساهرة ...من روائع الشاعر محمد بشير عتيق والتى تقول بعض كلماتها *** قضينا ليلة ساهرة ...تضمنت محاسن ...من كل روضة عينة ...ومن كل عينة زهرة ...رأينا حفلة ساهرة ...إتوجت قياصر ...وإتلألأت كواكب من أطيب العناصر *** الروضة لابسة حلة ... من الزهور طرائق ...بيها المكان تجلى ...والجو نسيمو رائق ...والغيم نشر مظلة ...ما أحلى ديك مناظر ...بيها المكان تحلى ...بين مسفرات أهلة ...ونخبة عرب أجلاء ...ناس عليها فرحة ...وناس طريحة جرحى ... عندما نسمع هذه الكلمات الجميلة يذهب الخيال لهلال العشق الجميل وحوار النجم محمد أحمد بشة لصحيفة عالم النجوم حيث قال بشة ...عندما ينتصر الهلال الجو ذاتو نسيمو يكون رائق ...هذه كلمات صادقة من نجم خلوق وصادق ...والحمد لله حب الهلال هبة من السماء للأقمار ...والهلال يستاهل الحب وهو يجود علينا بالإبتسامة فى وطن الأجاويد عندما يحتاج الوطن للإبتسامة وحب الأقمار للهلال حب صافى ونلاحظ أن الهلال عندما يتعثر يمتص الصدمة ويعود سريعاً لسكة الإنتصار ...وهلال الجود كأنما عناه الشاعر عندما قال *** جعلت الجود لآلاء المساعى ... وهل شمس تكون بلا شعاع *** ولو صورت نفسك لم تزدها ... على مافيك من كرم الطباع ....ونجوم الهلال هم الأبطال ساعة الجد وشاهدنا تصميم أبناء الهلال قبل مباراة مازيمبى الأخيرة التى نالوا نقاطها بالعزيمة والإصرار ، والآن يقول النجم الخلوق بشة ( إن مباراة سموحة ) موت عدييييل كدة ...وأبناء الهلال أهل فعال وبإذن الله مباراة سموحة مربوحة خاصة بعد عودة بعض النجوم مثل الصنديد بوى والفنان محمد عبد الرحمن ( جكسا ) ولقد تحدثت مع العديد من نجوم الهلال عن سر الحب الصادق لفريق الجماهير الأول فكانت إجاباتهم واحدة تقريباً وهى أن هذا الحب ( هبة من ربنا ) سألت مرة بشة ماشعورك عندما تحرز هدف فأجابنى مش مهم بشة يحرز هدف المهم الهلال يفوز !! لكن الهدف يحرزه كاريكا أو الجزولى أو الشغيل أو مساوى كلو واحد لأنه يصب فى مصلحة الهلال ... ولقد إستحق المهندس بشة هتاف الجماهير المحبب ( روقت المنقة يابشة ) ...أما اللاعب الفنان كاريكا فقال عندما نشاهد حب الجماهير للهلال وخاصة المغتربين نشعر كأنهم بيننا فى المدرجات ويهتفون لنا وقال الغزال الأسمر مهند الطاهر إن من عاش بين صفوف الهلال لا يمكن أن ينسى هذه الأيام الجميلة وقال نصر الدين الشغيل عندما سألوه عن سر تألقه مع الهلال أجاب ...وجدت البيئة الصالحة للإبداع والإمتاع ...وهذا هو هلال الساجدين والناس الصالحين ومحبوب الملايين .
*** صدارة الأقمار جوة وبرة الدار
سيد البلد فريق الأقمار تربع على كرسى الريادة الوطنية وقاد المقدمة فى ساحة التنافس الوطنى وتصدرها برصيد 53 نقطة وأحرز رماته 35 هدف وولجت شباكه فقط 7 أهداف كأقوى خط دفاع فى البلد ويجلس بطل السودان فى الصدارة وبفارق 6 نقاط عن أقرب وصيف ...كما يشارك صدارة المجموعة الحديدية فى الأبطال برصيد 8 نقاط مع مازيمبى والتطوانى ولديه فرصة صدارة المجموعة الأولى فى الأبطال إذا تخطى فريق سموحة بملعب الإسكندرية مساء السبت 12 سبتمبر ويدير المباراة حكم أفريقيا الأول الجنوب أفريقى ( دانيال بينيت ) وكما نعلم أن سموحة سوف يقاتل بشراسة من أجل رد إعتباره ويضم الفريق المصرى فى صفوفه الحارس المخضرم مهدى سليمان وفى الدفاع ياسر إبراهيم وعثمانو وفى الوسط عمر المنوفى وأحمد تمساح وفى الهجوم هانى العجيزى وحسام باولو وغيرهم من النجوم ...ويجب على المدرب الكوكى إحترام الخصم واللعب بتشكيلة متوازنة حتى نتصدر المجموعة الأولى ...ونعلم أن الهلال لديه الكثير من الكروت الرابحة وأن بطل السودان قد خبر دروب التنافس الأفريقى وأبو الهل قوة برة وجوة ...بس عايزين الدعوات الصادقة بأن ينصر الله هلال الملايين فى كل الميادين .
*** مريخ الدولار يرسب فى الإختبار
العم ميرغنى المنقورى ( هلالابى على خفيف يشجع فقط هلال الزمن الجميل ) ومن ظرفاء المتمة بالرياض لديه مقولة مأثورة بأن كديسة أوربا ( قولة بس مابتنهرها ) وتعاين ليك قوى فى وشيك !! فقلت له... حكمة الله كديسة أوربا قالوا مابتاكل الفأر ...يقدل قدامها زى عنكبة فى شارع على عبد اللطيف ( آسف ) شارع على جعفر تقاطع شارع السيد على ( أستغفر الله ) شارع الريح على ، فأجابنى ميرغنى المنقورى ...كديسة أوربا لاقية اللحوم والجداد المحمر مالها ومال معيط ( السلوك ) ( sorry ) معيط الفئران ...لا أدرى لماذا تذكرت قصة كديسة أوربا ونحن نشاهد لعيبة المريخ وجمال الوالى يحفز كل لاعب بخمسة آلاف دولار فى المباريات الأفريقية ولن يجدوا 500 دولار فى الفوز بمباريات الدورى المحلى !! طيب يتعبوا ليه ومباريات الدورى المحلى ماجايبة حقها !! ياجمال الوالى التسوى بى إيديك يغلب أجاويدك !! لعيبة الأهلى القاهرى عندما فازوا بكأس أبطال أفريقيا كل لاعب إستلم 400 دولار وإنت تقوم تدفع لى ناس ضفر وشيبون خمسة آلاف دولار عشان غلبوا العلمة !! أها خم وصر ...ماشاء الله على الإبن البار هلال التبلدى الذى سار على خطى الوالد وهو يجندل المريخ فى أستاده بهدفين لهدف وأحرز الثنائية فريد محمد نجيب ومحمد عبد المنعم عنكبة وأحرز يتيمة المريخ كوفى ...والحكم الجيلانى أبو الحسن ماقصر مع أصحاب الأرض حيث منحهم المصروف اليومى ...ضربة جزاء ولكن عبده جابر أضاعها والحكم أنذر حارس التبلدى حافظ أحمد بينما جامل عبده جابر ...والغريبة إعلام المريخ يتحدث عن أن الهدف الأول نتج عن مخالفة من عنكبة مع دفاع المريخ وينسى هذا الإعلام أو يتناسى أن قبل هذه المخالفة هناك مخالفة لفرسان التبلدى صرفها الحكم ...إحنا قلنا نطلع ( تيست ) بالزبون فكانت المباراة السابقة مع إبننا هلال كادوقلى وكانت النتيجة تعادل وعندما جاء الدور على فرسان التبلدى قالوا للعم الأحمر الأمدرمانى بلهجة الواثق الكردفانى وهم يذكرونه بتعادله مع هلال الجبال ويقولون للمريخ ( كان مشيت لى محمد أخوى نار عديييل كدة وكان جيتنى أنا أحسن ترجع لى نارك ) طبعاً مدرب هلال التبلدى هو الوطنى شرف الدين أحمد موسى الذى تخصص فى إنتزاع تقاط المباراة كاملة من عجوز فرنسا غارزيتو وسبق للمدرب الناجح شرف النيل أن إنتزع نقاط المريخ كاملة عندما كان يقود سلاطين الفاشر بهدف حسن كمال الشهير ومن الرد كاسل أيضاً ...العم أبو الفاروق ( محمد حسن الزين ) من هلالاب الرياض عاتبنى على عدم كتابة الرحيق بالأمس وقال لى ...يعنى قون عنكبة ده ماعاجبك ولا شنو !! ونقول للهلالابى الأصيل أبو الفاروق إحنا ذاتو فكرنا نجيب وصيف بمواصفات معينة عشان وصيف العرضة جنوب طلع خازوق مش ممكن فريق يلعب 5 مباريات متوالية فى الدورى ومن 15 نقطة يكون رصيده فقط 5 نقاط يعنى التلت ومعناها رسوب واااااضح ...ونعلن للإخوة فى الخرطوم الوطنى والأهلى شندى ونخاطبهم بلهجة من سيربح المليون ( جورج قرداحى ) ... بدنا وصيف يازلمى والبدوا يشارك يوضب حالو ...بالمناسبة قرن شطة قال ...المريخ بيلعب كورة برشلونة مابلعبها !! طبعاً ياقرن شطة البرشا مافيها أولاد جابر ( بلة وعبده ) لذا لزم التنويه .
*** همسة الوداع
حبايبنا الحلوين رجعوا لى حسابات اللولوة ...عشان نفوز بكأس الممتاز لازم نكسب الشكاوى أو ينهزم الهلال أو يتعادل مرتين !! كبسور الأحمر بقى زول محاكم عديل كدة !! إنتوا ليه ماتقدموا إسترحام لى سيد البلد وقولوا ليه نحن عايزنك تتنازل لينا عن الدورى ...وفى حاجة تانية صدقونى إتحاد معتصم مابتلوم معاكم إحتمال كبير يعيد لكم مباراة الأمل بتاعة رزاق كريم ويمنحكم نقاط هلال كادوقلى عشان طعنكم فى نجم هلال الجبال الجنوبى طونق حسب مزاعم مريخاب الرنك ...طبعاً الإعلام السالب مابقدر ينتقد غارزيتو لكن ممكن ينتقد الحكم وسوء أرضية الملعب وممكن ينتقدوا ثنائى العالياب ( على جعفر والريح ود على ) ...بالله عنكبة ده عنده ذوق !! إنت براك شايف المريخ راكوبة خريف وجنازة بحر تقوم تعمل كدة ياود ياعنكبة !! وأفرض غارزيتو إستغنى منك !! إنت ناسى إنو غارزيتو إستغنى من تراورى وآلان وانغا ومدرب الحراس الجزائرى حكيم السبع !! وبهذه المناسبة نهمس فى أذن الإعلام الأحمر إنتوا لما عنكبة شق فى دفاعكم طريق ...ليه جمال سالم فتح الزاوية اليمين !! هل فاكر عنكبة لسه لاعب فى الفريق ولا شنو ؟ مجرد سؤال .


امسح للحصول على الرابط
بواسطة : محمد عثمان الجعلي
 11  0  2.0K
التعليقات ( 11 )
الترتيب بـ
الأحدث
الأقدم
الملائم
  • #1
    سيف الدين خواجة 11-19-1436 10:0
    الليلة المنقه رايقه بعد المنعنع انت ما طلعت تيست بل رقصت الكلمات توسيت وبعدين جماعتك اخر الدوري لو لعبوا وست معانا يلحقوا (الله معانا ) !!!
    سموحة ما زالت نتيجتها بتتمرجح ارمي قدام مع الطواري وشاور تفاحة يكتح الجماعة !!!
  • #2
    فيصل الاقرع 11-19-1436 10:0
    سلام جعلينا نحن ذاتو ياجعلينا بقينا لما نقرأ الرحيق وخاصه ابيات الشعر الفي المقدمه نقول يا ربي الجعلي قاصد ياتو هلال لانه تشابهت علينا الاهله الي نصل الي التوقيع((هلال العشق الجميل))حتي نفرزوا ياتوهلال وبعدين فارق السته نقاط دا قبل المحلي ما يصل شندي ماعارف بعد اصل شندي انزلوا منو كم نقطه اقصد كم نفر وبعدين واحد من الاخوان كان متابع معاي الكوره من التلفون قبل ما يصل البيت وكان هلال الابيض متقدم 1 صفر قال لي قالوا عنكبه خائن ولما عنكبه جاب التاني اتصلت عليه قلت لي الخائن جاب التاني ضحك جنس ضحك كما ضحكت انا في المثل( كان مشيت لى محمد أخوى نار عديييل كدة وكان جيتنى أنا أحسن ترجع لى نارك ) ها هاها
    علينا ان نعمل الف حساب لسموحه وهو الهم واكان اتصدرنا امانه ما........ طط بلد ولك التحيه ولي قراء الرحيق الجميل
  • #3
    عاشق الهلال 11-19-1436 10:0
    دورى شنو يا الجعلى ، على الطلاق جماعتك همهم كلو يحافظو على الوصافة التى يتربص بها الخرطوم الوطنى وعيال دار جعل ،،، اهم ما لاحظته فى اليومين الماضيين ان مقالات سامرى المريخ مزمل ابو القاسم خلت تماما من ذكر الهلال لا بالخير ولا بالشر وهو امر لا يحدث عادة الا اذا كان الرجل فى محنة ،، واشغلهم ربى بانفسهم عجل بالنصر وبالفرج
  • #4
    منعم ابوناصر 11-19-1436 11:0
    تحياتى جعلينا وتأخرت علينا كتير يعنى حتى ناس الابيض سألوا منك ولافارش مع ناس مزمز وابوخيبه وكابو المشاطه وناس الجلابى ياخى حررررام بعنى تظهر بعد رفع الفراش طبعا ناس البكاء موجودين بعدين ياخوى حبايبك الحامضين بقو بس الميناء البرى الفاشر شندى عطبره واخيرا فتحو خط الابيض والله يستر من شندى داخل الديار @@ حلوه تقاطعات على جعفر والريح على شوارع عايزه صيانه لوسمحت كلم مهندس الجقور بدل ينتقد غرزه خلى يشوف شغلو@@@ مسكين ابوجريشه قالو عليه كج حرام مع تحيات
  • #5
    بابكر عوض الشيخ 11-19-1436 12:0
    يسلم قلمك ثقافة وفن ماهو زناطير وفناطير وهزائم بالقناطير
  • #6
    محمد علي يحيي 11-19-1436 01:0
    يا الجعلي انت نسيت خاتم المني والا شنو.. خاتم المني ده خاتنوا للبطولة الافريقية أصلو الممتاز ده الخواجه ما دايره قال الخاتم للبطولة الافريقية.. سلك في سلك
  • #7
    محمد علي يحيي 11-19-1436 01:0
    يا الجعلي انت نسيت خاتم المني والا شنو.. خاتم المني ده خاتنوا للبطولة الافريقية أصلو الممتاز ده الخواجه ما دايره قال الخاتم للبطولة الافريقية.. سلك في سلك..
    حرم يا الجعلي مقدماتك بتاعت الحقيبة دي ذي الرميات زمان قبل الاغنية الله يديك العافية
  • #8
    محمد علي يحيي 11-19-1436 01:0
    امانا ما تلومت ا الجعلي تظهر بعد الدفن.. ورفع الفراش
  • #9
    Hassan 11-19-1436 03:0
    يا الجعلي يا اخوي عنكبة عمل ( شق الديار) في شوارع العرضة جنوب ذي حسن كمال الثانية قالوا ناس الاتحاد عندما كثرت الشكاوى المريخية وصلوا لتسوية خارج المحكمة بشطب شكوي الامل في المريخ مقابل شكوي المريخ في الامل وقبول شكوي المريخ في هلال كادوقلي يعني نقطتين فقط للمريخ وذلك نسبة لكثرة الشكاوي
  • #10
    ابوحسن 11-19-1436 04:0
    لك التحية استاذنا محمد عثمان ههههههه وحلوه كديسة اروبا والتحية الي اخونا مرغني المنقوري الرجل الظريف والله يا الجعلي ناس الصفوة اليومين دي تقول واقعة فيهم حيطة
    جابوالي نفسهم الكوج هههههه عشان يخلوطول اللسان والفصاحة بتعتم دي والتصرحات قالو
    الزعيم كمان ****
  • #11
    تفااااااحة 11-19-1436 07:0
    اليوم الاسم الحركى تغير الى تفاااااحة فقط حتى تتم المشاورات التى اشار اليها استاذنا الخواجة فى تعايقه وبعد ذلك لنا كلمة فى حكاية كندكنا كتاحة وايضا روعة المشهد التى جسدها المقال وحتى تنسجم الروعة مع الابداع تم تأجيل الكتح والكتااااحة
    والتفاااااحة والكتاااااحة .. انت التفاحة وخلى علينا نحن الكتاااحة امانه ما نعميهم ونرمد خشومهم رماد وطبعا اصل الحكاية هم رماد عشان كده الكتاحة لازم تشتغل ونعمل ليهم حاجة اسمها (ذر الرماد ) فى العيون وحاةت سيدي الشيخ الا نخليهم شوفوا طشاش طشاش ونخليهم يشوفوا النهار ليل بس انت والخواجة شيلوا الصبر لكن اكان جيت للنصيحة وحياتك ياغالي اخير ليهم نار امحمد اخوي المشكلة قلوبهم مييييته راقدة دكوة غايتو مرة البطن تفور عليهم ومره نقول اولاد امى كنينة الوكت داك اديهم الجري وباكر يقولوا ليك الجري ده ماحقي حقي ال .........
    وانا عجبني الشوارع الضربتك فيها اللخبطة ... التلخبطهم لخبطة انا ضحك لين وقعت على قفاى والحالة الكديسي اللت بريطانيا شكيتها على الله جنس كديسي ما باقي ليها الا تشرب السجار وتنفخ وتنفخ ان شاء الله ينفخهم نفخ زي مالجزار بنفخ الخروف ويوقفهم قربة قول معاي امين
       الرد على زائر
    • 11 - 1
      بابكر عوض الشيخ 11-19-1436 10:0
      صدقت يالفاتح بس حرمتنا من إبداعاتك يا خي جيب لينا بس تبلدية فيها قنقلزتين بس
أكثر
لا توجد مباريات
لا توجد مباريات
لا توجد مباريات