• ×

هلال الشباب يفترس الذئاب



واصل هلال الخير والجمال السير فى طريق النور وهزم الرابطة كوستى بثنائية نظيفة فى أول نصف ساعة حيث أحرز الهدف الأول بشة فى الدقيقة 12 وأضاف نزار الهدف الثانى فى الدقيقة 30 وإنتهت المباراة بهذه الثنائية وأضاع الهلال مهرجاناً من الأهداف أولها ركلة جزاء أضاعها فيصل موسى كما صد القائم كرة الشاب أطهر الطاهر وحرم القائم أيضاً الطاهر سادومبا من هدف ...ويوم الاثنين 31 أغسطس لعبت غير مباراة الهلال 4 مباريات وكانت معظم نتائجها بهدفين حيث فاز الخرطوم الوطنى على الأمل فى عطبرة بثنائية أمين إبراهيم وقلق وفاز الأهلى مدنى بالعاصمة على أهلى الخرطوم بثنائية نظيفة وفاز مريخ السلطان بالفاشر على النسور بهدفين لهدف وفى شندى فاز الآرسنال على هلال الجبال بهدف عماريه ....ومباراة الهلال والرابطة غلب عليها العنصر الوطنى ولم يشارك من الأجانب إلا مكسيم وشارك المهاجم أبوبكر كيبى فى الدقيقة 82 بديلاً لفيصل موسى ودخل محمد عبد الرحمن بديلاً للشعلة ونال الشعلة كرت أصفر مجانى وهو ( يتمحرك فى التغيير ) ودخول جكسا زاد من حيوية هجوم الهلال ولكن الهلال أضاع الكثير من الأهداف لأن شباك الحارس روى قلواك عندما إستقبلت الثنائية كان لسان حالها يردد ( هل من مزيد ) ولكن رماة الهلال بخلوا وكانت فرصة لهم لتقليص الفارق بينهم وبين الند التقليدى المريخ حيث يتصدر الهلال برصيد 53 نقطة وأحرز رماته 35 هدف وإستقبلت شباكه 7 أهداف بينما المريخ فى المركز الثانى برصيد 47 نقطة وأحرز رماته 41 هدف وولجت شباكه 9 أهداف ومباراة المريخ يوم الثلاثاء الأول من سبتمبر مع هلال الأبيض فى بقعة المهدى ومباراة المريخ القادمة مع الأهلى شندى فى أم درمان مساء السابع من سبتمبر ، وإذا رجعنا لمباراة الهلال والرابطة نجد أن الشاب صهيب الثعلب حلً بديلاً فى الشوط الثانى وقدم عرضاً طيباً كما أبدع الأنيق وليد علاء الدين وتعرض للعنف القانونى وغير القانونى ونال الصاعقة نزار حامد نجومية المباراة كما لعب فيصل موسى بمزااااج ... وكانت نقطة ضعف الهلال فى المدافع أتير ( الذى كان يترتر ) معظم زمن المباراة وغاب عن مباراة الرابطة مساوى وكاريكا والجزولى وأندرزينهو وجوليام ونيلسون وسيسيه وفداسى وكما قال فيصل الأقرع من ظرفاء هلالاب جدة ( البلدى طااااااعم ) ...مش ملاحظين أنا ماذكرت تشكيلة الهلال التى لعبت المباراة !! عشان الناس ( شالوا حالنا ) ضحكت وأنا أقرأ مقال الأستاذ محمد الفاتح ( كتاحة ) عندما إحتج على حكاية الزناطير وهى من منتجات الإعلام السالب وأضاف ( كتاحة التفاحة ) هناك فى كفر ووتر أعمدة جميلة زى لدغة عقرب والشارع الرياضى وبهدوء ورحيق الختام وأوتاد ونحو المدى فثار أحد ظرفاء المعلقين وإسمه ( أبو أريج ) وقال لكتاحة حرام عليك تقارن محمد عثمان الجعلى بالأساتذة نعمان ودسوقى وصاحب رحيق الختام لا يكتب غير هلال العشق ويذكر تشكيلة الهلال !! أها يا أبوأريج الليلة ماذكرنا تشكيلة الهلال ولا ذكرنا هلال العشق الجميل ( بس إن شاء الله تكون إنبسطت !! ) صراحة إنت ومعك الكثير من القراء نجد تعليقاتهم تنتزع الضحكة من الأعماق ولك العتبى حتى ترضى ...وصلتنى رسالة من الكردة بمحافظة المتمة من الهلالابى محجوب على أبوجكون وهو يعلق على هزيمة الهلال للرابطة ويقول هلال الشباب يفترس الذئاب وفريق الأقمار يسعد الأنصار ويتربع على الصدارة بجدارة وبدون خسارة ويترك مقعد الوصافة للناس القيافة ...بالمناسبة يا محجوب يا إبنى ...مازال شعار سيد البلد المرفوع تمتع بالرحلة ودع القيادة لنا !! لذا لزم التنويه .
*** مريخابى من الزمن الجميل يقدم أروع تحليل
الأستاذ الزميل سليمان محمد سليمان ( سوليمون ) لاعب وسط المريخ فى ستينات وبداية سبعينات القرن الماضى رجل رياضى أصيل وخفيف الظل كان ينتقد لعيبة كرة القدم فى هذا الزمن ويقول إن الإحترافية جعلت كرة القدم مهنة تجارية وأفسدت فنيات وجمال كرة القدم ولاعب هذا الزمن ( يوم تلقى مستواه فى السماء واليوم التانى فى الواطة ) وضرب بمثال بهلال مريخ مع هلال كادوقلى حيث تعادلت القمة مع أسود الجبال رغم أن الهلال فى الأبطال هزم مازيمبى والمريخ هزم وفاق سطيف ...ويضيف سوليمون لعيبة زمان مستواهم ثابت يعنى جكسا ياهو جكسا وبشارة ياهو بشارة وقاقرين ياهو قاقرين وبشرى وهبة ياهو بشرى وهبة ...ويقول أن الإعلام الرياضى فى الماضى كانت المناكفات مقبولة لجمهور الفريقين فمثلاً نجد المناكفات الظريفة بين المريخابى الحاج حسن عثمان والهلالابى أبو آمنة حامد وهى لطائف مقبولة لجمهور الفريقين ...ويقول سوليمون لكن النصيحة إنتوا جيلكم ده عنده وطنية أكتر مننا يعنى نحن زمان زول المريخ يشجع المريخ وبس وكذلك زول الهلال مستحيل يشجع المريخ حتى لو كان يلعب أفريقياً لكن فى زمنكم شفنا الهلالابى جمال فرفور وهو يغنى فى حفل المريخ عندما أحرز المريخ كأس سيكافا الأخير ...ويضيف الأستاذ سليمان بأن زول الرياضة يمكن أن ينجح فى كل مجالات الحياة ويضرب مثال بالسفراء عبد المحمود عبد العليم وعبد الرحمن سر الختم وعلى قاقرين ...ومن طرائف زمان قال الأستاذ سليمان ...كان فى مريخابى متعصب شغال بنشرجى فى طلمبة أحمد المصطفى فى شارع الحرية وعنده عربية ( كركعوبة ) كلها نجوم ومضروبة لون أحمر وكل ماتمشى شوية تحتاج لى دفرة وبعد ده كلو كاتب عليها ( سوليمون ) قلت ليه يا أخى حرام عليك بهدلتنى بهدلة شديدة ...ويتمنى الأستاذ سليمان أن يكون نهائى الأبطال لهذا العام بين هلال مريخ والحشاش يملأ شبكته .
*** السودان والجابون واللعب على المضمون
يلتقى السودان يوم السبت الخامس من سبتمبر منتخب الجابون فى ليبرفيل وكما نعلم أن مباريات منتخب الجابون تعتبر نتائجها ودية لأنها مستضيفة البطولة وكما نعلم أن المجموعة التاسعة لنهائيات أمم أفريقيا 2017 تضم بجانب السودان والجابون ساحل العاج وسيراليون...والمطلوب متصدر واحد فقط ... والسودان وضع أول 3 نقاط فى رصيده الأفريقى عندما هزم سيراليون بالخرطوم منتصف يونيو الماضى بهدف رمضان عجب ...ويدير مباراة صقور الجديان والجابون الحكم الزامبى جانى ساركوزى ( مستر جلاكسى ) وإختار مازدا عشرين لاعباً 6 من المريخ هم المعز ورمضان عجب وأمير كمال وضفرومصعب وعبده جابر و6 من أهلى شندى هم الحارس ياسين يوسف وفارس وعبد الباسط شريف وعماريه ومحمد كوكو وخطاب فيصل ومن الهلال 3 هم مالك ونزار وصلاح الجزولى ومن الخرطوم الوطنى أمين إبراهيم ووصلاح نمر ومن هلال الأبيض مهند وعنكبة ومن الرابطة كوستى الطاهر سادومبا ...بالتوفيق لصقور الجديان أبطال السودان النصر وتصدر المجموعة .
*** همسة الوداع
حبايبنا الحلوين كانوا يسخروا من لجوء الهلال للقانون لحسم تظلماته وكانوا يطلقون عليه لقب ( كبسور ) لكن هم بعد أن توالت عليهم الهزائم فاتوا الوراهم والقدامهم وأصبح كبسور الأحمر كل يوم فاتح قضية عند الإتحاد العام فبعد ثنائية الأمل فى عطبرة إشتكوا فى لاعب الأمل عمر عثمان وقالوا قبل سنة ضرب حكم فى القضارف ( إنتوا المنكم عندو لسان ينضم فى ضرب الحكام كمان !! ) الله يجازى محنك يارزاق كريم ده كلو منك !! وتانى كمان بعد ما إتعادلوا مع هلال الجبال قالوا يشتكوا فى لاعب الجبال معاذ عمر عشان بيانات الجنسية السودانية التى إستخرجها تختلف من بيانات جواز سفره الصادر من أفريقيا الوسطى ...حاجة غريبة كل الشكية بتاعة المريخ فى أولاد عمر فى الأمل عثمان عمر وفى أسود الجبال معاذ عمر !! وبهذه المناسبة نهمس فى أذن الإعلام الأحمر رأيكم شنو بعدين لما يغلبكم الهلال تشتكوا الشغيل عشان لعب مباراة مازيمبى وهو موقوف وإنتوا من مزانبة السودان !! و الشغيل مش إسمو نصر الدين عمر ؟ مجرد سؤال .

امسح للحصول على الرابط
بواسطة : محمد عثمان الجعلي
 9  0  2.0K
التعليقات ( 9 )
الترتيب بـ
الأحدث
الأقدم
الملائم
  • #1
    محمد علي يحيي 11-17-1436 08:0
    أخي الجعلي ..سلام
    لو لم تكتب سوي عمود واحد في الرحيق لكفاك.. نٍال الله أن يسدد خطاك
  • #2
    ابو هشام 11-17-1436 08:0
    لله درك يا لجعلي وبارك الله فيك اتحفتنا بكتاباتك الشائقة
  • #4
    kabashi 11-17-1436 09:0
    استاذنا الجعلي لك التحيه
    وتحياتنا للكابتن سليمان محمد سليمان التحليل الحللوة كلو حاصل فرق كبير بين الكورة زمان وهسي اسردنا واتحفنا بي حوارتك مع الاستاذ سليمان
    حبينا الجعلي لسه الدوري باقي فيهو كزا جوله الخيل الاصيله بتظهر في اللفه الاخيرة
  • #5
    بكرى النحاس 11-17-1436 10:0
    حتى تقوم الساعة طول ما مازدا ده ماسك بزمام المنتخب القومى ماح نمشى لقدام لان اختياراته عشوائيه ويغلب عليها الخوف والمجاملات ممكن اسأل سؤال برى اين هداف السودان الاوحد وهداف افريقيا كمايطلق عليه الاعلام السالب بكرى عمد على عدم اختياره لاراحته واين بوى وكاريكا طالما اخذ احتياطى المريخ لكى ياهلهم والله ماعندى اى غضاضه فى مريخ او هلال ولكن اردته ان اوضح عقلية مازدا ولاتحاد الذين لايهمهم السودان بمقابل مصالحهم عشان كده نحن ماح نتقدم شبر..انت رايع ياجعلى الهلال.
  • #6
    فيصل الاقرع 11-17-1436 12:0
    سلام جعلينا الشاعر قال صاحي كالنعسان لكن انت نعسان كالصاحي لانه دا ما مقال نعاس الحمدلله الهلال وعيني بارده اصبح بمن حضر فعلا وليس اعلاميا والحمدلله ابواريج منعك من ذكر التشكيله كان العين الحمراء اخدتنا والتحيه لسولمون الظريف ولعلمك ياجعلي وليد الشعله اخد الكرت عمدا وهو عنده كرت سابق واصلا المباراه الجايه هو ما لاعب لانه حيكون مع المنتخب لك تحياتي ومافي احلا من البلدي لكن لابد من الشوكه والسكينه مستوردات
  • #7
    ابوحسن 11-17-1436 03:0
    لك التحية استاذنا محمد عثمان اول نبارك الفوزالي اهل القبيلة الزرقاءوانشاء الله تستمر فرحة الانتصارات خارج وداخل والحمدولله اتفكة عارض بشة ونزار كما نتمني الفوز
    لصقور الجديان والظهور بمظهر يشرف الكورة السودانية
  • #8
    بابكر عوض الشيخ 11-17-1436 03:0
    كالعادة أبدعت وأجدت يا جعليناوبمناسبة كورة زمان والكورة الحالية تذكرت المقابلة الإذاعية مع لاعب المريخ السابق ود الشايقي وقد كان خفيف الظل حيث ذكر اللاعب سلمون أن إحترافية كرة القدم صارت مهنة تجارية قائمة بذاتها في هذا الزمان وقال ودالشايقي في المقابلة أنهم كاتوا يسجلون في الفرق مقابل مبالغ زهيدة ولو كان المبالغ التي تدفع للمحترفين حالياً تدفع لهم زمان (وقد دعم كلامه بالطلاق) علي الطلاق المدافع من بيته ما يخرج خلي يخرج مني في المباراة
  • #9
    بكرى النيلين 11-18-1436 06:0
    الاخ الغالى والنفيس ...محمد عثمان الجعلى

    تحيه قلبيه بى شوقى مرويه

    ناسف للانقطاع ...والغيبه الطويله والسبب اجازه فى الوطن الحبيب

    وطبعا مع انتصارات الهلال الداخليه والخارجيه والتربع على الزعامه كالعاده

    لكم جميعا التحيه والاشواق حتى الملتقى....والف مبروك...
أكثر
لا توجد مباريات
لا توجد مباريات
لا توجد مباريات