• ×

هلال الكبار يسعد الأقمار


حمدان شاعر الناظر حاج محمد إبراهيم فرح ( ناظر عموم الجعليين ) لديه مسادير جميلة فى مدح الناظر ونريد أن نأخذ فقط مثالين يقول الشاعر حمدان مخاطباً الناظر حاج محمد *** سمعت بيك وشكروك لى وعجبتنى شكرتك *** صمد الصافنات الصف تهدو نترتك *** الشنب المبرم شوفتو ليك إتفرتك *** وا أسفى الشديد من بدرى ماعاشرتك ***كفات بالشمال أسد الكدادة القارح *** الحجّر غابتو من البفر والسارح *** من نظرتك الفارس يحيض والداّرّة تصبح طارح *** قمر السبعتين ماهو الهلّ ود البارح ....عندما نسمع هذه المسادير الجميلة يذهب الخيال مباشرة لهلال العشق الجميل الذى فاز على مازيمبى قاهر الأبطال بهدف الشاب أطهر الطاهر فى الدقيقة السابعة من عمر المباراة وإرتفع أبو الهل برصيده إلى 8 نقاط ...وأصبح مازيمبى آخر مرحوم بمقبرة الخصوم ...نسر السودان الأزرق يلتهم الغربان ...والله يا أخوان ( من الفرح والبسط ) ماعارف ذاتو أبدأ من وين !! أول حاجة نقول يارب لك الحمد كما ينبغى لجلال وجهك وعظيم سلطانك ...ماشاء الله وتبارك الله ...مكسيم يحرس العرين الأزرق وفى الدفاع العميد مساوى والشاب مالك وفى الوسط بشة ونزار وأندرزينهو والشغيل وفى الهجوم كاريكا وأطهر ...وللهلال رب يحميه فى هجومنا الشاب أطهر بسبب غياب الرباعى محمد عبد الرحمن وكيبى وجوليام والجزولى ...طبعاً بالأطراف بوى وسيسيه ورغم خطورة أسالى فى الطرف اليسار إلا أن سيسيه كان فى الموعد والشاب مالك عوض غياب أتير وغاب فيصل موسى وكان الهلال بمن حضر ...وحتى الشباب وليد علاء الدين وعماد الصينى منحناهم الفرصة أمام مازيمبى ...رغم أن مازيمبى مدجج بالنجوم الحارس كديابا وكيم واكى وساماتا وإدجى واسالى وكوليبالى وديار ا وغيرهم ...والهلال أودع نقاط المباراة كاملة فى رصيده فى بنك أفريقيا الدولى ...أنا من شفت إستعدادات الهلالاب شيباً وشباباً ...عرفت مازيمبى أيامو إنتهن ...عندما ينتصر الهلال يبتسم الأطفال وتتفتح الأزهار وتطرب عذارى الحى ....إنه هلال الساجدين والناس الصالحين ...تخيلوا إبن الهلال وإبن السودان البار المشير عمر أحمد البشير رئيس الجمهورية ورئيس البلد يتصل بالرئيس أشرف الكاردينال ليطمئن على نجوم الهلال ويطلب منهم تخطى عقبة مازيمبى ...رئيس البلد يسأل عن سيد البلد والناس مقامات والأندية مقامات ...بالمناسبة هلال الحركة الوطنية يحفظ مقام رئاسة الجمهورية عشان كدة إحنا إعتبرنا هزيمة مازيمبى بمثابة القرار الجمهورى !! ناس تهزم المتصدر وناس تهزم طيش المجموعتين !! لذا لزم التنويه .
*** لى حبيبنا التهانى مستمرة
عندما ينتصر فريق الجماهير الأول فى البلد الجو يكون نسيمو رايق والغيم نشر مظلة ...وصلتنى العديد من رسائل التهانى من هلالاب الرياض محمد حسن الزين وإبراهيم بين وعبدالله التوم والمريخابى الأخ معز سعد الأغبش الذى أشاد بمكسيم ومالك ومن الدمام بدر الدين حسن ملاح ومن المدينة بابكر عوض الشيخ وجلال صالح ومن خيبر أحمد قاسم أبوزيد ومن جدة فيصل الأقرع ومن محافظة المتمة إبن الأخت محجوب على أبو جكون والإبن عثمان محمد عثمان ...والله بصراحة كل رسائل الهلالاب كانت ظريفة وكانوا مبسوطين لكن نذكر ليكم رسالة واحدة من فيصل الأقرع قال قبيل السكرى ماعارفه كم !! لكن هسه نزل والنفس بقيت مفتوحة وجعت كمان والشاب أطهر حسم الموضوع ...ومادام الأقمار مبسوطين 24 قيراط عايزين نعمل ليكم 4 مسادير هدية بمناسبة الإنتصار من الشاعر أحمد المجذوب *** مكسيم البطل مجهودو ليه نثمن ...والإبداع أكيد جوة البطل متمكن ...يكفيك إفتخار تحرس شباكنا تأمن ...والجمهور أكيد فى حضرتك متطمن *** فى خط الدفاع بنحيى أخوان مالك ...إبداع فى النزال مساوى وهو كذلك ...عاد لينا الأمل بعد الظلام الحالك ...وياباقى الفرق خلى الهلال فى بالك *** كل نجومنا ليهم منى ألف تحية ...أبداً ما إنحياز وأقمارنا مية المية ...لكن ياصحاب تبقى الحقيقة جلية ...مكسيم يستحق بالجملة والكمية *** فى خط الهجوم ماتنسى ناس كاريكا ...يا أطهر أخوى رب العباد يحميكا ... الليلة الهلال عزف الفنون مزيكا ...مازيمبى العنيد مسحوهو بالإستيكة ...مجموعة الهلال هى المجموعة الحديدية لأن التطوانى بعد أن هزم سموحة بهدفين لهدف أصبح رصيده 8 نقاط أيضاً متساوياً مع الهلال ومازيمبى وفقد سموحة الأمل فى التأهل وبإذن الله نقاط الإسكندرية لصالح بطل السودان ...تخيلوا مجموعة الموت بها 3 فرق كل واحد رصيده 8 نقاط وحتى الجولة الخامسة مافى فريق ضمن التأهل ومجموعة حبايبنا الحلوين لو رصيدك 7 نقاط فقط ممكن تضمن التأهل .
*** مريخ السودان يدرك ما أنجزه الهلال قبل نصف قرن من الزمان
فى عام 1966 تأهل لمربع الذهب لأبطال أفريقيا فريق عريق من أرض النيلين فريق كان يحرس شباكه العملاق سبت دودو ووزير دفاعه الصنديد أمين زكى أما منصة إطلاق الصواريخ الزرقاء كان على قيادتها الأسطورة نصر الدين جكسا ...طبعاً كلكم عرفتوه ...نعم إنه هلال السودان وكان هذا أول إنجاز لفريق عربى سودانى فى مربع الذهب لمنافسة الكبار ...وبحمد الله مازالت قافلة النور تسير ومازالت مسيرة الخير ماضية وتكرر هذا الإنجاز عدة مرات آخرها عام 2011 ، كما ذهب الهلال أبعد من ذلك ووصل نهائى الكأس أكثر من مرة ...والحمد لله الآن سرت روح التألق والطموح فى بعض الأندية السودانية حيث وصل المريخ مربع الذهب للأبطال هذا العام ...صحيح أن المريخ أدرك ما أنجزه سيد البلد بعد نصف قرن من الزمان وصحيح أن المجموعة الثانية التى يلعب بها المريخ بها مفارقات حيث نجد فريق الإتحاد الجزائرى جمع الدرجة الكاملة 15 نقطة من 5 مباريات بينما مولودية العلمة جمع صفر نقاط من 5 مباريات ...ونبارك لمريخ السودان هذا الإنجاز وهو يسير بنجاح ويتبع خطى سيد البلد ...ولأن تصل متأخراً خير من ألا تصل ...ونتمنى أن يكون النهائى سودانى خالص فى بقعة المهدى ... من موازنات المجموعة الثانية العجيبة أن المريخ تأهل من الجولة برصيد 7 نقاط قبل أن يلعب مباراة العلمة ، ثم فاز المريخ على متذيل دورى المجموعات بثلاثية مقابل ثنائية...وإنتهى الشوط الأول بثنائية نظيفة للعلمة رغم أن العلمة هبط للدرجة الثانية ويفقد معظم نجومه المهاجم شنيحى ووليد درارجة وبن طيب وغيرهم من النجوم ...وبدأ غارزيتو بخرمجة غريبة حيث ترك كوفى فى دكة البدلاء وترك أوكرا فى الخرطوم ...وغارزيتو خدمته الظروف رغم سياسة حرب النجوم التى يتبعها ولله در القائل ( ماقضاى غروض لكن الظروف خدمنو ...سيف البالة مابقطع قدر ماتسنو ) ... وأحرز ثلاثية المريخ أمير كمال هدف وبكرى المدينة هدفين أحداهما من ضربة جزاء ..وأحرز ثنائية مولودية العلمة قادرى يونس وعبد الملك عباس الذى إستغل الخروج الخاطئ لحارس المريخ ... وكان يحرس شباك المريخ جمال سالم وليس المعز محجوب .
*** همسة الوداع
حبايبنا الحلوين مستجدين نعمة عشان كدة الفرح الهستيرى الذى أصابهم بعد الوصول لمربع الذهب للأبطال ( ظروفه مقدرة ) لكن الجيران عندهم تناقض غريب زمان كانوا يسخروا من مشية العقرب لبكرى المدينة عندما كان يلعب فى الهلال وكانوا يقولوا ...إنه يمشى مكباً على وحهه ...والآن أصبحوا يرددوا أتشقلب ياعقرب !! حتى لو إتشقلب أمام طيش المجموعتين وبى ضربة جزاء برضو خير بركة ...المريخ محظوظ فى الإستعانة بصديق ومحظوظ فى ضربات الجزاء !! هل تصدقوا المريخ فى التمهيدى عندما فاز على عزام منحه الحكم ضربة جزاء ولكن أضاعها أوكرا وفى دورى 32 فاز على كابو والحكم منح ضربة جزاء وأضاعها وانغا وفى دورى 16 الحكم منح ضربة جزاء وأحرز منها علاء الدين هدف الفوز على الترجى والآن فى دورى المجموعات الحكم منح برضو ضربة جزاء أمام العلمة وأحرز منها بكرى هدف الفوز ... ضربات الجزاء الكنيرة دى معقول تكون مابلغت النصاب عشان تطلعوا منها زكاة !! وبهذه المناسبة نهمس فى أذن الإعلام الأحمر إنتوا (غمتة !! ) آسف ...زكاة ضربة الجزاء كم دولار ؟ مجرد سؤال .

امسح للحصول على الرابط
بواسطة : محمد عثمان الجعلي
 18  0  4.4K
التعليقات ( 19 )
الترتيب بـ
الأحدث
الأقدم
الملائم
  • #1
    إبراهيم دفع الله 11-09-1436 01:0
    و الله يا الجعلى أنا عافى منك ساى فى الله وربنا ينصر الأزرق الصافى و الوافى للتأهل لمربع الكبار و بعدين يكون فى كلام تانى !!!!!!!!!!!!!!!
  • #3
    محمد مصطفى 11-09-1436 05:0
    صدق لو كنت خصصت عمودك دا كل يوم عن أراضي المغتربين في الوادي الأخضر كان أحسن
  • #4
    صلاح محمد حسن الشيخ 11-09-1436 05:0
    اولا التهنئه لهلال السودان ولجماهيره المخلصين اما انت لا اهلا والا سهلا لانك من الناس الحاقدين ومباركتك للمريخ بخستها وهدا دليل انك جاهل 10 نفاق بالنمام والكمال و13 فى الرد كتل وكان احسن لك بان نصب فى تحليل المياراة المثيرة والمليئه يالايداع واللعب الرجولى ووفقه الجمهور الوفى ولم نجد شىء تزكر غبر الهرج واى كلام وتبخيص الاخرين بالله عليك انت عامل نفسك صحفى اه والله اه بازمن كله من هب ودبه بقى مسخره للصحفى النزيه يالله عليك لمادا طبق ضربات الجزاء فى المنظومه الكلام ليك يا سخفى اخر الزمن اليست حلا بنيل كاس عالمى وادا كنت تدى فتلك مصيبة وان كنت لا تدرى فالمصسية اعظم المريخ اول نادى سودانى فى لوحة الشرف والهلال حتى الان صفر والسبب انت وامثالك الحاقدين اتركو الهلال فى حاله اتركوا الهلال لابنائه المخلصين الوطنيين الدين يعرفون التنافس الشريف فيما بين العملاقين اما انت وامثالك هلالاب مريخاب الى اوشخ مدبله موجودة فى تاريخ البشريه وامة سيدنا وحبيبنا محمد صلى الله عليه وسلم برىء منكم الى يوم الدين اتركونا ولاتفسدوا روح المحبة والاخاء يامفسدين ياعنصريين مامحتاجين لارائكم ولا لتحليلانكم الكريهه والفاظكم البزيئه المخدشة للحيا كرهتونا الكوره وكل ما هو جميل فى بلدى ... بسم الله الرحمن الرحيم قل اعود برب الفلق من شر ما خلق ومن شر غاسق ادا وقب ومن شر النفاثات فى العقد ومن شر حاسد ادا حسد..صدق الله العظيم .......... والصحافة امانة اقسمنم عليها واين الامانة فى هدا الزمن الاغبر ...,فال تعالى -- يايها الدين امنوا اتقوا الله وفولوا فولا سديدا --وقال تعالى انا عرضنا الامانة على السموات والارض والجبال فابين ان يحملنها واشفقن منها وحملها الانسان انه كان ظلوما جهولا..... وفوله قول معروف ومغفرة خير من صدقة يتبعها ادى والله غنى حليم ..صدق الله العظيم ...ربنا يهدى الجميع الى مافيه خير تسوداننا الحبيب الهم اجمع شملنا ووحد كلمتنا وابعدنا من الفتن ملظهر منها وما بطن وانعم علينا المحبة ولاتفرقنا وتامين لامين واخر دعوانا ان الحمد لله رب الغالمين
  • #6
    الكتاااااااحة والتفااااااحة 11-09-1436 08:0
    طمنونا على اخونا فيصل الاقرع وبامر الطبيب ممنوع عليه حضور المباراة الاخيرة لاسباب صحية والجعلى عليه ان يذهب به الى اقرب حديقة اثناء المباراة .. ان شاء حديقة حبيبي مغلس .. وبعد انتهاء المباراة قولوا ليه النتيجة
  • #7
    يف الدين خواجة 11-09-1436 08:0
    اخي الحبيب وعدناك ووعد الحر دين عليه وهكذا جندلنا الغربان طار من العش ما قال كش واصبح الحساب ولد والكلام من الان لسموحة القموحة لابد من الفوز اغرب مجموعة في تالريخ البطولة !!! الحمد انجزنا والوعد والقادم احلي
  • #8
    الوليد ابراهيم عبدالقادر ابراهيم 11-09-1436 09:0
    صراحة كدا يا الجعلي حقااااااااار..ههههههه
  • #9
    ابوحسن 11-09-1436 09:0
    لك التحية استاذنا محمد عثمان ونبارك الفوز المستحق الي جمهور الهلال الوفي الصابر
    المصابر وهو يقف وراءهذا الفوز الذي اثلج صدورالملايين من محبين هلال العشق النبيل
    خارج وداخل السودان وايضاالتهنئة الي الجهاز الفني والادارين وكل من ازرا ابو الهل
    في هذه المبارة الكبيرة بعد الخسارة من المغرب التطواني لكن الحمدولله الهلال في الموعد وحاضر مع الكبار دايمن ونسال الله التوفيق في القادم انشاءالله * وبعدين يا الجعلي
    لااخفيك سر العقرب حقت بكري بقت مسيخه وثقيلة ما زي لمن كان في الهلال هههههه لاانو فيها طعم اهل الصفوة هههههه
  • #10
    البابا 11-09-1436 10:0
    كديابا حارس التابا
    الضفيرة دليل خيابا
    ضرب الشافع دون اسبابا
    وفش غبينتو في القام دابا
    عفارم أطهر طهرت عجوز غربان
    ادبت الكنغولي واسعدت بني سودان
    دكيت حصون مازيمبي ورفعت الراية بيان
    وردمت الجثث في مقبرة ام درمان
  • #11
    الكتاااااااحة والتفااااااحة 11-09-1436 10:0
    image



    ابو قنبور كديابا ( ماعارف قمبور ولا قنبور )



    كديابا ود التابا
    سففناه الترابة
  • #16
    فيصل الاقرع 11-09-1436 12:0
    سلام هلال سلام جعلينا اتعشينا بسط وبالرحيق نفك الريق
    اولا الحمدلله بعدد خلقه وبرضي نفسه وبعدد خلقه وبمداد كلماته له لفضل والمنه من قبل ومن بعد
    امس بسط شديد وسكتنا الخشامه لكن يا جعلينا شاعر ناظرنا مالو سفيه كدا ودا ناظر دا والا قنبله ذريه افرتك الشنب مجرد سؤال الجماعه بالسبعه من 15 اتـأهلوا بالرغم من انها اعد في الاملاء اقل من خمسين بالمائه ونحن فوق الخمسين للمائه وللان ما اتأهلنا وزي ما بقول استاذنا ابراهيم عوض في عموده الشريان فرق يا مزمل المهم يا الجعلي الجماعه ديل لوطلعوا الذكاه حقة البلنتات نا قصه ذنبهم في رقبتك وباثها علي من عاسها ان اسقط بلنتين من النصاب بكسر النون بلنتين قدام الوفاق واحد سجله علاء والتاني ضيعه علاء مخير شيل شيلتك
    وفي الختام الهنئه الحاره لكل هلالابي وكذلك لكل مريخابي معجب باداء ابناء الهلال في المريخ مع التحيه والاحرام
  • #17
    بابكر عوض الشيخ 11-09-1436 12:0
    نبارك لهلال الملاين النصر المبين والتأهل الحصين وجمهور الهلال شعب الصين الهلال أبدع وأجاد وأتى بالمعجزات لم يعتمد على الغير بل بعرق الجبين ومدفع من نوع مكسيم وسيف سيف السنين في طهر أطهر الطاهر طهوراً إلى يوم الدين أما بكري وشقلبته مكباً على وجه كانت في هلال الساجدين وصار الآن مدبراً إلى أعلى في المريخ الهجين وسلامي للمعز وود بخيت وود جابر وكل رديف الهلال أجمعين
  • #19
    محمد علي يحيي 11-10-1436 07:0
    مبروك أخونا الجعلي...
    والله حكاية انك تتاهل ب 7 نقاط أو أقل دي ذكرتني ايام الدراسة زمان يعني في الامتحان من الاوسطي الي الثانوي لو جبت 50 بدخلوك مدرسة أهلية.. اها ناس قريحتي راحت ديل فرحانين بالسبعة نقاط.. شوف بالله فرق المستوي بين المجموعتين ز برضو زي زمان المدارس القوية الفرق بين الاول والطيش يكاد يكون نمر معدودة.. يعني لو كنا في المجموعة الثانية كان ادونا الكاس وقالوا بلاش ..
أكثر
لا توجد مباريات
لا توجد مباريات
لا توجد مباريات