• ×

هزمنا الأنيق والأحلى فى الطريق


هلال العشق الجميل عودنا أن يمتص الصدمات بسرعة فائقة ويسمو فوق الجراح فهلال الأبطال من طينة الكبار لأنه يعلم أن الحياة مليئة بالأحجار فلم يتعثر ويتوقف عن مواصلة مسيرته الظافرة بل جمع هذه الأحجار وجعل منها سلماً يصعد به نحو النجاح ، وشاهدنا الهلال خسر من المغرب التطوانى بهدف وتعادل مع أسود الجبال بهدف لهدف ...ولكنه عاد ليلة الخميس عندما إستقبل الأنيق الكسلاوى بمقبرة الخصوم وهزمه بثلاثية نظيفة أحرزها البرازيلى أندرزينهو مستفيداً من تمريرة كاريكا فى الدقيقة الخامسة من إنطلاقة اللقاء وأضاف مساوى الهدف الثانى برأسية فى الدقيقة 40 مستفيداً من عكسية أطهر الطاهر وإنتهى الشوط الأول بهذه الثنائية وأضاف الشاب أطهر الهدف الثالث فى الدقيقة 90 وأضاف بشة الرابع ولكن الحكم نقضه بحجة التسلل ، طبعاً الأقمار يحترموا رأى قاضى الجولة ... وأصبح هلال الملايين فى الصدارة برصيد 47 نقطة والمريخ فى مركز الوصافة السمحة وقيافة برصيد 43 نقطة ولديه مباراة مؤجلة مع أهلى شندى وعليه مباراة لم تتم إعادتها مع أمل الحديد والنار رغم أن لجنة الإستئنافات العليا أوصت بإعادة هذه المباراة ، طبعاً الهلال لعب 21 مباراة فاز فى 13 مباراة وتعادل فى 8 وأحرز رماته 31 هدف وولجت شباكه فقط 6 أهداف والمريخ لعب 20 مباراة فاز فى 13 مباراة وتعادل فى 4 وخسر 3 مباريات وأحرز رماته 39 هدف وولجت شباكه 9 أهداف ...تخيلوا قبل مباراة الهلال مع الأنيق والمريخ مع الفهود كان فرق صافى الأهداف بين الهلال والمريخ 10 أهداف ولكن فجأة تقلص لخمسة فقط !! وأهم مكسب لمباراة أنيق كسلا وأنيق أم در هى عودة الطرف اليسار عبد اللطيف بوى وثبات المدافع مالك أحمد محمد الذى سوف يلعب مباراة مازيمبى مساء الأحد 23 أغسطس بدل أتير الموقوف ...وبإذن الله القادم أحلى لمحبوب الملايين وفارس السودان الأزرق ...والأقمار تعشق هلال الكبار بالليل والنهار وثبتت محبته فى القلب كما ثبتت الأصابع فى الراحتين ...ولله در القائل *** نهارى نهار الناس حتى إذا بدأ ...الليل هزتنى إليك المضاجع *** أقضى نهارى بالحديث وبالمنى ...ويجمعنى بالليل والهم جامع *** لقد ثبتت فى القلب منك محبة ...كما ثبتت فى الراحتين الأصابع .... إنه هلال الساجدين والناس الصالحين الذى مازال يشارك فى مجموعات كبار أفريقيا بينما إنفرد بصدارة دورى الوطن الممتاز ورفع شعار ...تمتع بالرحلة ودع القيادة لنا .
*** العقرب داير يتشقلب قام إتكهرب
الهلال هو المجدد والوصيف هو المقلد ...بطولة الكبار سبر أغوارها الهلال ووصل مربع الذهب منذ عام 1966 كأول فريق عربى وسودانى ... وجاء المريخ متأخراً وأراد أن يتخطى رقاب الناس ويجلس فى الصف الأول ولم يجد من عقلاء الصفوة من يقول له ...إجلس لقد آنيت وآذيت ... لا أدرى لماذا تذكرت أغنية حسين شندى ( قطار الشوق ) والتى تقول بعض مقاطعها *** نسائم عطبرة الحلوة ...تهدينا وترسينا ...نقابل فيها ناس طيبين !! فراقهم كان مبكينا ( خلى بالكم ديل ناس الطاهر حماد ومرتضى حسن ) أعذرونى طلعت (برة الشبكة ) نرجع للهلال ... لعب الهلال بالصف الثانى فكسب وتعادل وأراد الوصيف التقليد فلعب بفريق ( نص إستواء ) أمام فهود الشمال فى عطبرة وكانت التشكيلة تضم الحارس المعز وفى الدفاع سيلا وأمير كمال والريح على وأبوعلوة ( على جعفر ) وفى الوسط أوكرا ( سيد القهوة والجبنة ) والمعلم عمر بخيت وراجى وسالمون وفى الهجوم بكرى المدينة وديديه ...وفى الشوط الثانى دخل عبده جابر ومصعب عمر وإبراهومة بدلاء للثلاثى أوكرا وعمر بخيت وعلى جعفر ...إنتوا مسؤولين من الخير وين الثلاثى أحمد الباشا ومجدى عبد اللطيف وبلة جابر ( يخيل لى بلبل ده أصبح أسماء فى حياتنا ) ...معليش ياشباب سرحنا مع مريخ العجائب ونرجع للثنائية ...وأحرز الأمل الهدف الأول بواسطة رزاق كريم وأضاف الهدف الثانى بواسطة رزاق كريم ( مرة بالرجل ومرة بالرأس ) وشوارع دفاع المريخ تساعد على إنسياب المرور أكتر من شارع الجمهورية ... تخيلوا الأمل قهر ( قاهر الترجى والوفاق !! ) لكن بينى وبينكم الأمل ذاتو مقهور أكلوا منه 3 نقاط ( أوانطة ) ورغم أن لجنة الإستئنافات العليا أمرت بإعادة المباراة لكن مريخ جمال ( قال ستين يمين ) طبعاً الإتحاد العام الكسيح ( تعيشوا إنتوا ويدوم خيركم ) ...وإعلام المريخ وعد الصفوة بأن العقرب سوف يتشقلب فى عطبرة لكن العقرب المسكين إتكهرب مع ناس كاوندا وعمر حسن وسيكو وجيمى أولاغو ورزاق كريم ( حالتو دى الطاهر حماد دخل فى آخر الدقائق بديلاً لرزاق ) !! طبعاً دى ما أول مرة المريخ يخسر بثنائية فى عطبرة عشان قبل 5 سنين إتكرر نفس الفيلم وفى الدورى الممتاز عندما فاز المريخ بثنائية حسون وصالح الأمين فى أغسطس 2010 ، إنتوا ناس المريخ ديل الحاصل عليهم شنو !! الناس ديل يوم فى السماء ويوم فى الواطة ...وغارزيتو ده فاكر نفسه نبيل الكوكى ولا عنده فريق رديف فيه صهيب الثعلب وبشة الصغير والصينى وغيرهم من الشباب ...بالمناسبة ثبت بما لا يدع مجالاً للشك أن ( شهيد عطبرة ) لن يتقدم فى التنافس خارجياً أو داخلياً إلا بمساندة التحكيم !! لذا لزم التنويه .
*** رسائل غنائية رياضية من الفنان مصطفى مضوى
إخترنا فنان عطبرة بالذات مصطفى مضوى عشان الأملاب عندما فازوا على المريخ بثنائية ( الود رزاقو ) إختار فريقهم الزى الأزرق بينما إختار المريخ الزى الأحمر والداير يتألق يلبس أزرق والداير يخسر يلبس أحمر ... الرسالة الأولى من غارزيتو الذى يبدو أن عده التنازلى بدأ وإذا خسر المريخ من العلمة وتعادل مع إتحاد العاصمة سوف يودع جدو غارزيتو مقرن النيلين ويقول غارزيتو مخاطباً محسن سيد *** مسكين أنا ...مكسين أنا ...ياحليلو مشوار السنين ...حليلة قصة حبنا ... والرسالة التانية من جماهير الهلال للإخوان فوزى المرضى وأمين زكى وخالد بخيت تذكرهم بإن سيد البلد عاد للإبداع والإمتاع خاصة بعد تألق صهيب الثعلب وبشة الصغير ولابد من تحصين نجوم الهلال من العين الحمراء وشرارة وتقول الرسالة *** لوحة جمال فنان بديع يتأملة ...إحتار وقف قال الصلاة ...ريحة دعاش ...زمن الرشاش ...عمّ البنادر والخلاء ...ماسيد بلد ...ماروعة جد ...ماتقولوا قل هو الله أحد ....والنازعات والبسملة ...والرسالة الأخيرة من جمال الوالى وهو يهدد بالإستقالة ( البائنة بينونة كبرى ) لأنه دفع دم قلبه وإنتظر أن يفوز على الأقل بكأس الممتاز الذى أصبح حكراً للند التقليدى الهلال ويعتقد جمال أن هزيمة الأملاب لفريقه فى عطبرة قد حطمت عرش أحلامه وسببها الجهاز الفنى واللعيبة وتقول الرسالة *** غيمة سواد ...تعلن حداد ...ظلت سمانا وأرضنا *** طوفان جراد وكت الحصاد ....أفنى وأباد محصول سنة ...قلبى إنجرح ...بعد الفرح ...ونزيف غزير من دمنا .
*** همسة الوداع
حبايبنا الحلوين مستجدين نعمة دى تانى مرة يصلوا مجموعات الأبطال ورغم ذلك أسرجوا خيل الخيال وقالوا أنهم سوف ينالوا كأس أفريقيا وبعدها كأس السوبر وبعدها كأس العالم للأندية !! لكن المشكلة فى لقاء برشلونة !! تخيلوا !!..... والكاف أرسل للهلال والمريخ 920 ألف دولار بمناسبة الوصول لدورى المجموعات ...طبعاً دولارات الهلال ممكن تدخل فى تجهيز الجوهرة الزرقاء والهلال يكمل عليها زيادة لكن ناس المريخ بعملوا شنو بالدولارات دى !! وكما قال صاحب القلم الرزين الأستاذ محمد كامل سعيد إن الوالى دفع لكل لاعب من المريخ خمسة آلاف دولار بمناسبة تخطى عزام بينما لعيبة الأهلى القاهرى نال كل لاعب فقط 400 دولار عندما فازوا بكأس أبطال أفريقيا ..طيب المريخ إستلم من الكاف بس 410 ألف دولار عشان الوصول لدور المجموعات ...وبهذه المناسبة نهمس فى أذن الإعلام الأحمر إنتوا الزكاة بتاعة دولاراتكم دى بتمشى وين !! معقول تكون بتمشى لطاقم التحكيم بإعتبارهم من العاملين عليها ولا شنو ؟ مجرد سؤال .

امسح للحصول على الرابط
بواسطة : محمد عثمان الجعلي
 8  0  2.1K
التعليقات ( 8 )
الترتيب بـ
الأحدث
الأقدم
الملائم
  • #1
    ابوبكري 10-30-1436 07:0
    اعقدوا اتريقي في المريخ لمن مازيمبي يعملها فيكم بعد كده تقعدوا فراجه
       الرد على زائر
    • 1 - 1
      الكتاااااااحة والتفااااااحة 10-30-1436 12:0




      image




  • #2
    سيف الدين خواجه 10-30-1436 08:0
    يا حبيبنا امسكوا الخشب من القادم ولو لعب الهلال علي طريقة ورق البكرا لكسب الرهان لكنه اراد نصف النهائي مباشرة بتشكيلة غريبة وتبديلات لا تقدم ولا تؤخر ومباراة مازيمبي تحتاج ل11مقاتل بانتظام واحترافية علينا وليست لخمة كيوم التطواني !!!وان شاء الله مربوحة
       الرد على زائر
    • 2 - 1
      الككو الفجخ الطين 10-30-1436 01:0
      يا خواجة الفيك اتعرفت من مقالك اليوم
  • #3
    ابو الانقار الكسلاوى 10-30-1436 09:0
    كم انت رائع و حديثك خفيف و ظريف و مهضوم فلك التحية و سر للامام .؟.الله الوطن الهلال
  • #4
    الكتاااااااحة والتفااااااحة 10-30-1436 12:0




    image


    [FONT=Arial]-- ياحاج عبدو بصراحة انا قاعد فى زاوية تعبانة
    -- وحتعمل ايه يا حاج محمد
    -- قررت اروح عطبرة
    -- اشمعنى عطبرة بالذات يعنى عندك ( امل ) فى عطبرة
    -- سمعت فى واحد اسمه رزاقو يقولوا
    العصرة دبل وبدل مسمار مسمارين بسم الله
    لخبطنى ياحاج عبدو اقصد
    بدل جنيه جنيهين
    [/FONT]
  • #5
    بابكر عوض الشيخ 10-30-1436 01:0
    كم أنت عظيم يا هلال الملايين أنجبت لنا فطاحلة يدافعون عنك بالفكر والمنطق يستنطقون الصخر العصي بتجرد ونكران ذات ليقول أنا الهلال أنا الرجال بدون من أو أذى أو تجريح أو تشميت متعك الله يا جعلينا بالصحة والعافية وجعل حسناتك أكثر من مداد حروف كلماتك الرصينة الرزينة التي لا تخرج عن السلوك الإنضباطي والسلوك هنا بالتأكيد ليس جمع سلك والفرق واضح بين السلوك والسلك فأنت السلوك وغيرك سلك والمعنى واضح
  • #6
    ابوحسن 10-30-1436 01:0
    لك التحيةاستاذنا محمد عثمان اول نحمد الله علي عودة حلاوةالنصر الي ابو الهل ولكن الجاي اصعب مع مازمبي لكن انشاءالله الهلال يزفر بنصر في هذه المبارة المهمة جدا وهي
    تحدد مصير الهلال وووو بعدين ناس الصفوة جاين يعملو تجاربم الفاشلة مع الامل العطبراوي واتفاجوبهزيمة وناس عطبرة قنوليهم اغنية ( المحلي داخل عطبرة *** يا بلالي
    ليل لي انا *** الكشافة يا قطر المسا *** يابلالي ليل لي انا*** ههههه يستاهلو عشان
    تاني ما يحاكو ابو الهل في اي حاجة
  • #7
    فيصل الاقرع 10-30-1436 03:0
    سلام جعلينا يعلم الله اكلنا الاقاشي وانفشينا غنيمتين في يوم واحد نحمد الاه علي فيض نعمه (رزاق كريم )وشايف ابوشيبه قبل علي غارزيتو والاتحاد الافريقي ظالم معقول الرواد اديهم زي الاولاد ؟المستجدين في الجيش معقول رواتبهم تكون ذي القاده وايوم مقالك كله من عطبره الحكايه شنو ؟نسايم عطبره ومصطفي مضوي باقي ليك حسن خليفه المهم شكرا علي الكلام الجميل الزي البيبسي بعد الشبع (عااااع )الحمدلله المشكله الحكم مايكون شال مبلغ الكاف بصمتو وطار استاهل طرد وضربتييين جزاء
       الرد على زائر
    • 7 - 1
      بابكر عوض الشيخ 10-30-1436 08:0
      يا أستاذ فيصل ما تنسى مصطفى مضوي في مريخناالضيف غرقتنو كيف جيبوا لي هدوموا الراقدة فوق القيف خلوني النمنح بالقرعة والسيف طبعاً القرعة والسيف (إتنين)ذي المسمارين ، ناس مريخنا جو والدامر ملو مشوا للإستاد والدايرنو ما لقو وا سواد أمو بكري وين ودو طبعاً الوالي زعلان من غارزيتو الطلع زيتو واللاعبين وقال ليهم ترجعوا بي قطر البضاعة
  • #8
    أبو تسنيم 11-01-1436 01:0
    لك التحية والتقدير استاذى العزيز محمد عثمان الجعلى متعك الله بالصحة والعافية وجعلك الله عوناً لهلال الساجدين والناس الصالحين (زى مابتقول ) يجلس بجوارى الاستاذ محمد النور حميدة وهو حريص على متابعة المقالات أول بأول . نسأل الله الفوز فى المعركة القادمة
أكثر
لا توجد مباريات
لا توجد مباريات
لا توجد مباريات