• ×

أحبك مكانك صميم الفؤاد


عندما يترنم وردى برائعة محجوب شريف ( وطنّا ) والتى تقول بعض مقاطعها *** .أحبك بتضحك وأحبك عبوس ...بحضرة جلالك يطيب الجلوس ...مهذب أمامك يكون الكلام ...لأنك محنك عميق الدروس *** مجيد المهابة مديد القوام ...شبابك تشابك شديد الزحام ...أراهم وراهم غبار الحياة ...مدائن تعاين كأم العروس *** تهلل تكلل جبين الإمام ...رزازاً يبلل أغانى الخليل ... عندما نسمع هذه الكلمات يذهب الخيال مباشرة لهلال العشق الجميل الذى نحبه وهو يضحك ونحبه وهو عبوس ...لأنه كيان طيب ...والكيان الطيب مثل قلم الرصاص تبريه العثرات ليكتب بخط أجمل ..وهذا هو بطل السودان الذى عاد لمواصلة مشواره الميمون فى دورى الوطن الممتاز ونازل أسود الجبال عصر الإثنين العاشر من أغسطس وتعادل معه لهدف لكل فريق حيث أحرز هدف الهلال الشاب صهيب عز الدين الثعلب فى الدقيقة 53 وأحرز هدف هلال كادوقلى عز الدين حامد فى الدقيقة 95 وأدار المباراة حكم إسمه عادل مختار ولعب الكوكى بتشكيلة الصف الثانى ...الكابتن جمعة جينارو فى حراسة المرمى وفى الدفاع كانوتيه ومالك وسيسيه ومحمود أم بدة وفى الوسط محمد مختار (بشة الصغير ) وعماد الصينى ووليد علاء الدين وصهيب عز الدين ( الثعلب ) وفى الهجوم وليد الشعلة وصلاح الجزولى ودخل بدلاء كل من نزار وكاريكا وبشة الكبير ، وهذه فرصة طيبة لتجهيز صلاح الجزولى وكانوتيه والصينى ومالك وجينارو ووليد علاء الدين للتنافس الأفريقى خاصة أننا إذا وصلنا مربع الذهب بإذن الله سوف يعود للمشاركة كيبى ومحمد عبد الرحمن وربما عاد فى قادم الأيام جوليام ، ورصيد بطل السودان 44 نقطة فى موقع الصدارة بفارق نقطة عن وصيفه ولا نقول إن للوصيف مباراة مؤجلة لأن إتحاد الفشل الذريع لو كان حازماً لنفذ توصية لجنة الإستئنافات العليا وخصم نقاط الأمل العطبراوى ووقتها يصبح رصيد المريخ 40 نقطة ويتحكر فى مقعد الوصيف اللائق به ولكن المريخ هو إبن الإتحاد المدلل ( وعتود المك منو البقولو تك ) كما يقول مثلنا السودانى ...أعجبنى موقف معظم كتاب الهلال الذين إمتصوا صدمة هزيمة التطوانى ونظروا للمستقبل نظرة تفاؤل لأن فارس السودان الأزرق مازال فى قلب المعركة ولو فاز على مازيمبى بأم درمان وتعادل مع سموحة بالإسكندرية سوف يدخل مربع الذهب أما إذا فاز على سموحة فى المباراة المقامة بدون جمهور سوف يتصدر مجموعته ...وعودنا الهلال أن يسمو فوق الجراح وعودنا فريق الأقمار بالعودة لسكة الأنتصار... دعونا نتعامل بالإحترافية بعيداً على النظرة العاطفية التى كنا نغير فيها المدرب كما نغير قميصنا ...هؤلاء الشباب هم مستقبل الهلال وهلال المستقبل ...ويبقى حب الهلال بين الحنايا والضلوع وقت النصر أو فى ساعة العسر ، وحبنا للهلال حب صادق ولقد أعجبنى شاعر بادية المتمة عثمان حوبة عندما نظم مسدار شعر يحكى عن حب الأنصار لفريق الأقمار ويقول ود حوبة فى مسداره *** هلال الملايين ضمن الكبار ترتيبو *** يوم الجمعة الفوز ما إنكتب فى نصيبو *** تخسر ولا تربح حبك إحنا مابنسيبو *** معروف كل فارس ليهو سهماً يصيبو ، ونسأل الله النصر المبين لهلال الملايين فى كل الميادين .
*** منتدى كوورة مغربية يشيد بالجماهير الهلالية
إنقسم جمهور الكرة المغربية لقسمين بعد فوز التطوانى على الهلال بهدف حيث يؤيد فريق نهج التطوانى فى قتل المباراة واللعب على الأعصاب وتضييع الوقت ويرى هذا الفريق أن المغرب منتخباً وأندية قد شرب من هذا الكأس مراراً وقالوا كنا على الدوام الأفضل ولكننا كنا نخسر !! والمباريات تعترف بالنتيجة والتاريخ لا يحفظ إلا من فاز ...ويطلب هذا الفريق من المغاربة أن يتعلموا من تطوان ليغيروا عقليتهم لأن ماما أفريقيا غابة موحشة لا يعيش فيها إلا المكرة والثعالب ...الأداء مطلوب نعم ولكن ليكن فى المرحلة الثانية بعد النتيجة ...ويقول أحد قدماء المدربين المغاربة عندما سألوه لماذا لا يقدم فريقك الأداء الجيد !! أجابهم لماذا لا تسألونى لماذا لا يخسر فريقى !! وأضاف علىّ أن أتأهل ثم أفكر فى الأداء إن كان لى وقت ...ويرى فريق آخر أن فريق تطوان عندما عمد للخبث الكروى وإضاعة الوقت أعطى إنطباع سالب للإخوة السودانيين عن الكرة المغربية رغم أنها ليست من عاداتنا وربما تكون من عادات دول الجوار الشقيقة ...ولكن أجمع الكل على أن السودانيين متسامحين ولم يضغطوا على الحكم كما يفعل التوانسة والمصريون والجزائرون وأن جمهور الهلال الغفير كان مسؤول وحفظ الأمن بل إن نجوم الهلال بعد نهاية المباراة مباشرة توجهوا لغرفة التبديل لا مناوشات ولا إستفزازات ... وأضافوا هاردلك الهلال وماشاء الله على الروح الرياضية وهذا يدل على مدى إحترامهم للكرة الراقية والأنيقة ...إنتهى كلام كرة مغربية ونشكر الإخوة المغاربة على هذه الإشادة ونقول لهم إن الأقمار نالوا من الكاف حسن السلوك شهادة ...وهذا هو الهلال روعة وجمال على الدوام .
*** مباراة الوصايفة والسطايفة المشهورة وتمساح أبو قبورة
عندما فاز الوصايفة على السطايفة بثنائية علاء الدين وأوكرا باركنا بكل روح وطنية لأصدقائنا المريخاب لأن الوطن لدينا كحل على العين وتاج على الرأس ...ولكن مارس الإعلام الأحمر هوايته المحببة للإنتقاص من قدر سيد البلد وبطل السودان ...مع العلم أن المريخ لم يتأهل بعد والهلال مازال فى قلب المنافسة ...ويريد الإعلام السالب أن يجبرنا على الرد بالمثل ...فهم مستجدين نعمة ودى تانى مرة فى حياتهم يصعدوا لدورى المجموعات الأولى عام 2009 وكانوا طيش المجموعة وهذه المرة ورغم الضجة لم يتصدروا المجموعة ...ولكن ناس المريخ ( كديستهم جمل ) حاجتهم يدوها أكتر من حجمها وحاجة الناس يبخسوها ...فنجد السيكافاب ناس كابو وعزام ... المريخ عملهم أبطال أما عندما وجدوا الترجى ووفاق سطيف يحتضران عملوا من فريقهم ريال مدريد ...مع العلم أن الهلال عام 2007 عندما وصل للمربع الذهبى هزم الأهلى بطل القرن بثلاثية نظيفة دعك عن بطل العام وهزم الترجى بثنائية وتعادل مع الترجى فى رادس وكان الموضوع بالنسبة للأقمار عادى ...أما المريخ عندما هزم الترجى بضربة جزاء علاء وخسر بثنائية لهدف فى تونس وصعد بقاعدة الهدف الإعتبارى ( إنتوا براكم عارفين إعلام المريخ عمل شنو ) والترجى الآن طيش مجموعته فى الكونفدرالية ... وكما نعلم أن بطل أفريقيا للعام السابق وفاق سطيف يعانى هذا العام فخسر فى أرضه من إتحاد العاصمة وفاز على العلمة بهدف نيران صديقة وخسر من المريخ بمساعدة صديق ...برضو شوفوا إعلام الوصايفة عمل شنو فى فوزه على السطايفة وبراااااكم أحكموا ...لا أدرى لماذا تذكرت قصة تمساح ود أبوقبورة فى واحدة من مسرحياته عندما حكى لصديقه إنه لقى تمساح عشارى ممدد جنب قيفة البحر وشال السيف وقفز لى فوق مترين وقطع يد التمساح اليمين وتانى قفز مترين وقطع كراع التمساح الشمال وكل مرة ينط مترين ويقطع فى أطراف التمساح لحدى ماخلى التمساح ( عضيرة ) فسأله صديقه ...طيب ليه ماقطعت رأس التمساح !! فأجابه أبوقبورة بعفويته المحببة ( مالقيت الرأس مقطوع !! ) يعنى زولكم ده من قبيل ينط مترين منفوش فى جتة تمساح !! زى الجيران لقوا وفاق سطيف مهيض الجناح والحكم أداهم لزة وعملوا فريقهم أفضل من هلال الساجدين والناس الصالحين ... نطلب من إدارة الصفوة ترسل لينا رغم حساب الحكم الغانى لامبيتى عشان نشوف رصيده وصل كم !! من أجل مصلحة ديوان الزكاة والضرائب السودانى !! بالمناسبة فى عملات صعبة كتيرة خارج الوعاء الضريبى !! لذا لزم التنويه .
*** خاتمة قبل الوداع
إنتقل لجوار ربه الصحفى الهلالى الأستاذ داؤود مصطفى صاحب عمود ( على ضفاف المزاج ) والموت نقاد ويختار الجياد ..نسأل الله أن يدخله فسيح جناته مع الصديقين والشهداء والصالحين وحسن أولئك رفيقاً ، وإنا لله وإنا إليه راجعون .

امسح للحصول على الرابط
بواسطة : محمد عثمان الجعلي
 20  0  3.0K
التعليقات ( 20 )
الترتيب بـ
الأحدث
الأقدم
الملائم
  • #1
    فاضل حسن البشير 10-26-1436 12:0
    الانسان المحبط ممكن اقول اي حاجه وممكن انتحر كمان وممكن اضر ماحوله... الله يشفيك
  • #2
    الرايق 10-26-1436 12:0
    خليك في فريقك ولا تبخس انتصارات المريخ بان الترجي ضعيف ووفاق سطيف اضعف منو وقبل كده قلت فرحنا لانتصار المريخ اشك في ان مثلك يفرح لانتصارات المريخ حتي ولو لعب ضد إسرائيل فالذي في القلب في القلب وبلاش تضحك علي نفسك وعلينا فالاهلة الوطنيون معروفون وانت وصحفيو الاسياد لستو منهم ولن يضر ذلك المريخ بشيء شفاك الله من داء الحسد
  • #3
    الدابروى 10-26-1436 01:0
    يازول قول قلنا للزعيم مبروك لانهم اخذوا بتاركم من الشرده المكربه؟ بلاش لى الحقائق يا ابو مسمار .قالوا نقلتوا العزاء كادقلى حاك الكمبله دا كخ كخ كخخخخخخخخخخ
  • #4
    Elfatih braem07 10-26-1436 01:0
    والله كلكم مشجعين ،،وليس لكم علاقة لا بالصحافة ولا بالرياضة،،،ومن شر حاسد اذا حسد ،،،قال أداها لزة ،،،يا لزيز يارايق انت ،،،خليك مع الحمام من سموحة لمازنبي والتطواني ،،باع هدافه وهداف البطوله منذ اول مباراة له في المجموعات ،،،ومازمبي ،،هو شبح لمازنبي البنعرفوا ا وأنتو ذاتكم حمام ،،من آمو ،،،يلا ،،،والحشاش يملأ شبكتو ،،،ظلمنا نهارا جهارا ،،،واجتهدنو يومها اكثر ،،اسامه أنور عكاشه ومحمد عثمان دخيل الله ومن كل الزوايا لإثبات ان الكرة طلعت أوت ،،،والآن جاي تقول لي أعلام الأحمر ،،،وبصراحة تنسونا من حكاية الوطنيه والوطن ،،في العالم كله ليس هناك فريق ند يفرح لنديده بان يحرز كاس او يفوز ببطوله ،،،فدعونا من الكذب ،،،ولنكن صريحين وواضحين ،،،بلا لمه ،،،،كادوقلي نَفَر ،،،والسفر ،،،وابقو رقاق ،،مازمبي جاي والست سموحة في الانتظار ،،،
  • #5
    فوكس 10-26-1436 04:0
    مفروض التعامل بإحترافية من أجل هلال المستقبل وأرى إشاعات المريخاب التى تتحدث عن إاقلة الجهاز الفنى ولو حدث ذلك يبقى غباء إدارى والهلال يحتاج الآن لمساندة جميع أبنائه وسيروا وعين الله ترعاكم ونحن من خلفكم
  • #6
    عبد الباسط عمر السيد 10-26-1436 05:0
    الهلال هو الهلال أحبك بتضحك وأحبك عبوس بعزة جبااك ترك الشموس وبإذن الله النصر لنا والهلال يكسب نقاطه بالحلال أما الجماعة ناس الدفرة فهم صنيعة إعلامية وقريباً سةف نسمع إنكسر المرق وإتشتت الرصاص ونريد تصحيح الأخطاءونتمنى عودة جميع المصابين وقصة تمساح أبوقبورة حلوووووووى
  • #7
    سيف الدين خواجة 10-26-1436 08:0
    يا حبيب مجلس وفريقه محارب حرب لا هوادة فيها والسبب للمجلس نفسه له نصيب بضعفه وصمته وتحركه ايدي خفية والهلال اسوأ ما فيه ابناؤه الكبار كحال ساستنا يختلفون حتي الهدف اعدي اعداء الهلال ابناؤه وهنا تكمن المصيبة وما يحدث للهلال مؤامرة كبيرة حبيثة اضف الي اخطاء الادارة في التسجيلات منها الخاطي ومنها المرتبك يشطب سيمبو اللاعب ويبقي كانوتيه ثم يشطب سيدي بيه بعد التسجيلات لظل خانته شاغره ووليد الشعلة موجود اضافة الي جلطات الكوكي في مباراة التطواني وقلنا سلفا انها عنق الزجاجة تشكيل خاطئ تبديلات عبيطه من اجل التبديل فقط دون فعاليه وعلينا الالتفاف حول الفريق خاصة قدامي لاعبي الهلال في حين المريخ حدد هدفه مقدما لذلك تراجع الوالي عن الاستقاله وعاد عبد الصمد وسكتت المعارضة لذلك فوزهم مسالة وقت ليس الا اما نحن خرجنا من باب التطواني مازيمبي في ملاعبنا تاريخه سيئ معنا فوز ووحيد وهزيمة وتعادلات الله يكضب السينة لا افريقيا لا ممتاز ولا كاس اسوا سنة !!!
  • #9
    فيصل الاقرع 10-26-1436 10:0
    ان لله وان اليه زاجعون اللهم ارحم داؤو واسكنه فسيح جناتك والهم اهله ومحبيه الصبر الجميل
    سلام جعلينا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟اه
  • #10
    حمام الوالى ياطائر 10-26-1436 10:0
    ستة مسادير من شعراء الهلال أحمد المجذوب وأحمد البشرى بعد تعادل الهلال فى كادوقلى ترفع الروح المعنوية لأبطال الهلال للفوز فى المباريات الجاية والعبد لله عمل مسدار سابع عشان ياصديقى يا السادات تفتكر سباعية الوحدات
    1/ أحمد البشرى
    رغم الكان وكان برضو الفريق عاجبنا
    تشجيع الهلال بنشوفو من واجبنا
    مرحلة وإنتهت والجاية مااا بتغلبنا
    وإن شاء الله الهلال يرجع سريع ويطربنا
    2/ أحمد الجذوب
    ويبقى هلالنا ساكن حبو جوة قلبنا
    مازى الفريق عاشق صفائح الجبنة
    أكبر ياحمام بعدين تعال خاطبنا
    عينك ياالوصيف مابتعلو فوق حاجبنا
    3/ أحمد البشرى
    معروف ياهلال فى القارة إنت كبير
    ونحن وراك ياسيد البلد بنسير
    دا القادم صعب مابنقبل التقصير
    دحين ختوها واطة وبطلو التنظير
    4/ أحمد المجذوب
    معروف الهلال أزرق جميل ونضير
    فى السودان عموم مافى نادى ليهو نظير
    شن جاب الحديد لى معدن القصطير
    وشن جاب القرش ياصاحبى يوم للصير
    5/ أحمد البشرى
    ينبوع الهلال لا قطّ يوم لا جف
    يمرض عادى لكن عمرو مابتوفى
    ياصاحبى الهلال باكر بقود الزفة
    والخيل الأصيلة تظهر دوام فى اللفة
    6/ أحمد المجذوب
    أصبر يا أخوى دم الوصيف بتصفى
    بكرة بننبسط بمزاج نقود الزفة
    الوزن التقيل بلقى الضعيف وإتشفى
    وزن الريشة ذاتو النجمة منو أخف
    7 / مسدار العبد لله
    المستقبل معروف يا أخوى لى هلال العزة
    نقدل بى مهل مابتعرف نفوسنا الهزة
    عشان الضعيف أنا عندى ليهو معزة
    لورى الوصيف لازم ياخد من الحكم لزة
  • #11
    هجام 10-26-1436 11:0
    ياستاذ الجعلي . مستجد النعمة ضايق. الطيشاب نسوا او تناسو سبب وجودهم في الأبطال هو بسبب تصنيف سيد البلد ولولا ذلك لكانوا في الكنفدرالية وربما قد طاروا منها. والمثل بقول الحسنة في المنعول زي السراية في القندول.
  • #12
    بلادي 10-26-1436 01:0
    الحمامة البيضاء تلقط الحبة الزرقاء ( مزمزم ) موتوا بغيظكم قلنا لكم لو لم تتركواالظلم الواقع على أندية الدوري الممتاز يااا فريق الحكام ويااا أصحاب الكرة المحلية والله لم تتقدموا خطوة واحدة إلي الأمام وتحقيق إنجاز خارجي كأس بطولة الدوري الممتاز مفصلة تفصيل للهلال وأخرها نقاط فريق الخرطوم الوطني
  • #13
    بابكر عوض الشيخ 10-26-1436 01:0
    بارك الله فيك ياالجعلي على رفع الروح المعنوية لدينا وهذه المباراة ليس بنهاية المطاف فقد عودنا الهلال العودة القوية لمكانه الطبيعي ليكون حادي الركبان وغرة الفرسان
  • #14
    منعم ابوناصر 10-26-1436 05:0
    تحياتى اخى ابوعثمان نحيى فيك الروح الرياضيه السمحه ودوما كنت عونا لنا ومخفف علينا تمتص كل الصدمات التى تمر على سيدالبلد وهذا هى كورة القدنم ونحنا على يقين اننا انشاء الله فى المسار الصحيح بس نرجوا من كل الاسياد كتاب ومشجعين بالصبر وماقصرت ياجعلينا وليك التحيه مره اخره على هذا المقال الرايع الذى وضعت فيه النقاط على الحروف المقال الذى اراحنا كثيراوتحياتى اليك وانت تهنى اخواننا فى المريخ شى الذى مفقود عند كثير من كتابهم@@@ كم انت كبير ومبدع وكذلك هم الاسياد دوما وكما قال الشاعر ليس زعيم القوم من يحمل الحقد @@@ وفعلا احبك مكانك صميم الفؤاد @@@ تحياتى
  • #15
    الكتاااااااحة والتفااااااحة 10-26-1436 10:0
    image


    ده راس التمساح بتاع ابو قبورة لكن اكان هو راجل خليه يجى للعشاري ده



    image

    image
  • #16
    آابو محمد 10-27-1436 01:0
    انت يا كتاحة لابت هنا مالك ... امرق جاي للصفحة العامة وورينا شطارتك يا جبان ...!
  • #17
    ابوحسن 10-27-1436 08:0
    لك التحية استاذنا محمد عثمان ياسلام عليك اول نشكرك علي الروح الرياضية والكبير كبير مهما حصل الهلال هو سيد البلد وبعدين ناس الصفوة مخلوعين من فريقم وما مصدقين هم في حلم ولا يقظة هههه
  • #18
    آابو محمد 10-27-1436 09:0
    تعال العام يا كتاحة .... امرق من جحرك وما تخجل ... يا ابو لسان طويل ... لابت هنا مالك ...؟ امرق للصفحة العامة ورينا شطارتك .... الرجال منتظرينك يسألوا عليك ... امرق يا جبان ....!
  • #19
    kabashi 10-27-1436 10:0
    لك التحيه استاذنا الجعلي
    عندي عدة نقاط داير اعقب فيها :
    1/الاعلام في السودان عاما سالب كان اعلام المريخ ولا ناس فاطمه شاش كلهم بيتكلمو عن النادين التقول السودان كلو مافيهو غير هلال مريخ دا المضيع الكورة السودانيه ومرجعنا لي ورا تلقا الفريق اتغلب يمسكو ليك في الشماعه الثابته التحكيم والحكم عمل لينا وطرد مننا وعمل ..............؟
    2/انتو ي ناس زريبه العيش لا يعجبكم العجب ولا الصيام في رجب ياجماعه الله المريخ دا غلب حمار عين عديل كدا ماتبخ

    سو من فوزنا علي الوفاق اتفق محللي البي ان اسبورت علي صحتي ركله الجزاءفي شنو تاني المحروق يروق ...........
    3/دعنا من التعصب الرياض وخلينا وطنين نشجع اي فريق لاعب بي اسم السودان .

































    ز
  • #20
    جعفر صالحين 10-27-1436 04:0

    * (أوكرا و علا.. سبب البلا.. مريخ جميل.. كامل الحلا.. باي باي وفاق.. تم الجلا.. مريخ حبيب.. فوق العلا.. إنت الوحيد.. فرح الملا.. نجم السعد.. حلق علا.. فوق الأفق.. ناير تلا.. سفر الفرح.. والزلزلة.. كل القلق.. راح إنجلا.. فينا الأسود.. بر و خلا.. فينا البريق.. أوكرا و علا)..
أكثر
لا توجد مباريات
لا توجد مباريات
لا توجد مباريات