• ×

محبوب الجمهور يهزم النسور

الهلال الجمال والجمال هيلنا والهلال فى المطار هيبة زى نيلنا ...جمهور الهلال الذواق يعشق النصر مقروناً بالأداء الجميل ورغم أن الهلال تصدر مجموعة الأبطال إلا أن الأقمار قالوا نريد التفوق الأصيل ومعه الأداء الجميل ...ونحن بيننا وبين نفسنا قلنا ( إتنين لى النعامة ما إتلقن جرى وطيران ) لكن ماشاء الكوكى قال هلال 2015 هلال الشباب هلال المستقبل فى إمكانه أن يعمل ماعجزت عنه النعامة !! ونحن قلنا مستحيل ...لكن ماشاء الله وتبارك الله من هلال العشق الجميل ...تأملوا هذه الأسماء جيداً الحارس ماكسيم وسيف مساوى ومالك وسيسيه وفداسى والشغيل وبشة ونزار ووليد علاء الدين وكاريكا وكيبى ...دى مش تشكيلة الهلال الأساسية ومباراة النسور مباراة مصيرية ليتساوى سيد البلد مع وصيفه فى النقاط !! أها الكتيبة الإنتحارية دى كلها مافيها زول لاعب !! والله زى ما أقول لكم ...عن إذنكم نطلع فاصل إعلانى ... وأشرب موية زمزم وأظبط الرأس بى كباية شاى بالهبهان والقرنفل فى أنصاص الليالى ...عدنا ليكم ياحبايبنا أول حاجة لو عايزين تعرفوا تشكيلة الهلال التى هزمت النسور برباعية مقابل هدف ...لازم تقولوا ماشاء الله وتبارك الله وتجيبوا معاكم بخور تيمان ولبان ضكر ...فى حراسة المرمى جمعة جينارو وفى الدفاع أتير وسليمان كانوتيه ( أيوة كانوتيه كابتن منتخب أولمبى مالى الذى تعافى بحمد الله ) والطرف اليمين أطهر والشمال محمود أم بدة وفى الوسط الصينى وصهيب عز الدين ( الثعلب ) وفيصل موسى ومحمد مختار ( بشة الصغير ) وفى الهجوم الجزولى ووليد الشعلة ، وتقدم الهلال بالهدف الأول من ضربة جزاء أحرزها الموسيقار فيصل موسى فى شباك الحارس أبوعشرين وأضاف الثعلب الهدف الثانى من صاروخ عابر للقارات فى الدقيقة 28 وفى الدقيقة 33 أحرز النسور هدفه الوحيد بواسطة المحترف أوكيكى وإنتهى الشوط الأول بهذه النتيجة وبدأ الشوط الثانى وأضاف الشاب الثعلب الهدف الثالث لكن المرة دى برأسية رائعة وفى الدقيقة 87 ختم وليد الشعلة بهدف صاروخ توماهوك وخرج أطهر ودخل الشاب معتصم عبد القادر وخرج فيصل موسى ودخل نيلسون وخرج صاحب الثنائية صهيب الثعلب وكان البديل هو العائد بعد غيبة عبد اللطيف بوى ...وأدار المباراة بإقتدار حكمنا الدولى الفاضل أبوشنب وتساوى سيد البلد مع المريخ فى رصيد النقاط 43 نقطة لكل منهما ونال المريخ نقاطه من 13 فوز وتعادل 4 مرات وهزيمة مرتين وأحرز رماة المريخ 39 هدف وولجت شباكه 7 أهداف ونال سيد البلد نقاطه من فوز 12 مرة وتعادل 7 مرات وأحرز رماة الهلال 27 هدف وولجت شباكه 5 أهداف والهزيمة الحمد لله إلا نسمع بيها سمع ساكت عند الجيران ( حوالينا ولا علينا ) وماعندنا مانع يحكم المباراة حكم من الخرطوم أو الولايات .
*** لابد من التشفير لمباريات الثعلب وبشة الصغير
عينى باردة على هلال المستقبل الذى قال عنه نجم مصر أحمد شوبير إنه يتوقع أن يحرز هلال السودان كأس أفريقيا لأنه يضم نجوم مثل الحارس مكسيم ونزار حامد ...ونقول لى شوبير تقول شنو لو شفت صهيب الثعلب وبشة الصغير ...الهلال هو مستودع الجمال لكن بنخاف على أولادنا من العين الحمراء وشرارة ومفروض مباريات هؤلاء الشباب تكون مشفرة ...أكيد الحكم الفاضل أبوشنب يكون نام مبسوط من إبداعات شباب الهلال ...وهلال الشباب ياحلو يامستطاب ...ونطلب من جماهير وإعلام الهلال أن يخلوا الطابق مستور ومافى داعى تانى يقولوا عايزين الإمتاع والإبداع ...الحمد لله شفتوا إبداع شباب الهلال لكن حركة زى دى تانى ماتكرروها !! أعرفوا إن فريقكم به مواهب ولله الحمد لكن العين الحمراء وشرارة بتكسر الحجر ...ويجب على إدارة ونجوم وجهاز فنى الهلال الإستعداد لمباراة المغرب التطوانى مساء الجمعة القادم ...وإياكم والغرور فإن الغرور مقبرة النجاح ...ويجب التفكير فى الوصول لمربع الذهب وتصدر المجموعة الأفريقية وأكل العنب حبة حبة ومشوار الميل يبدأ بخطوة ...ونسأل الله النصر المبين لهلال الساجدين والناس الصالحين .
*** أبو القنفد تعرفى محل تعضى أخو
قلنا من قبل أن دورى الوطن الممتاز تحسن وأن فرق الولايات أصبحت نداً قوياً للقمة والدليل أن الهلال تعادل مع هلال الأبيض قبل أن يعود ويفوز عليه بثلاثية مقابل هدف حيث نال الهلال الأب 4 نقاط من الست وترك نقطة للإبن ، والعكس تماماً حدث للمريخ وإبنه مريخ الفاشر حيث نال الإبن 4 نقاط وتركوا نقطة وحيدة للأب ...وكما نعلم نال الإبن نقاط البقعة كاملة بهدف حسن كمال وتعادل فى النقعة رغم الغيابات الكثيرة التى ضربت صفوف سلاطين الفاشر حيث غاب الكابتن فيصل العجب وكرنقو ومحمد جياد وحسن كمال كما غاب المدرب شرف الدين أحمد موسى وحل مكانه مدرب مؤقت هو نايل آدم كرم الدين ...ورغم ذلك فشل مريخ جنوب العرضة فى حصد نقاط المباراة بل يعتبر المريخ محظوظ وهو يعود بنقطة الطائرة الجوية من الفاشر ...وتألق من جانب السلاطين الحارس جاهد محجوب ومشرف زكريا وعماد عبد الله فى الدفاع كما تألق معتز نانى ومحمد موسى وديفيد ألينا ومحمد جياد ومصعب العلمين وغيرهم من النجوم ..ورغم أن المريخ شارك بكل نجومه بكرى وأكرا وكوفى وديديه ومصعب عمر وراجى وأيمن سعيد وضفر ورمضان عجب وأمير كمال ولقد حاول أمير أن يهدى السلاطين نقاط المباراة فى الكرة التى صوبها نحو مرماه لولا براعة المعز محجوب الذى أنقذ الشباك الحمراء من قذيفة طائشة ، ولعب السلاطين كرة جميلة ولم يلعبوا بعنف كما أن نجيلة ملعب النقعة تحسنت كثيراً وقفل أبناء الفاشر كل أبواب الحيل والمراوغات أمام مريخ العاصمة وكما يقول أهلنا الكرام فى دارفور فى مثلهم الشعبى ( أبو القنفد تعرفى محل تعضى أخو ) ...وقدم أبناء الفاشر خير هدية لعجوز فرنسا غارزيتو بإكتشاف نقاط الضعف قبل مباراة وفاق سطيف مساء الأحد القادم ...ولقد أرسل لى فيصل الأقرع 4 مسادير جميلة من منتديات الهلال بمناسبة درون الوصايفة وتقول المسادير ***
جابو لنا الشمار من فاشر أبا زكريا...
قالوا الكورة كانت بدررررى فى العصرية ...
والتيم الحريف بى لمستو السحرية ...
زنق أب نجمة وراهو النجوم ضهرية ***
زنقوا أب نجمة وروهو الدفاع الشامل ...
الهجمات منظمة والوسط متكامل ...
الحكم الغتيت الليلة كان متحامل ...
شاف كم غلطة وأداهن أضان الحامل ***
غارزيتو العجوز صرصر عديل قدومو ...
كورك وإنفعل منفوخة ديمة جضومو ...
زعلان بالدرون والعبرة فى حلقومو ...
عاد كورة الوفاق زادت عليهو همومو ***
راحن نقطتين قطعن خلاص أنفاسك ...
وإن زادت دحين ورينا كيف إحساسك ...
مريخ السلاطين شايفو زعزع ساسك ...
جاييك الوفاق من هسه بلبل رأسك ...
بالمناسبة عندما تعادل الوصايفة مع السطايفة حاول الإعلام السالب النفخ الكاذب فزعم أن ( الزعيم ) يمكن أن يهزم منتخب من فرق الأبطال السبعة مجتمعة بينما على أرض الواقع فشل فى هزيمة السلاطين فى أستاد النقعة !! لذا لزم التنويه .
*** همسة الوداع
حبيابنا الحلوين عند الزنقة تسمع منهم طرائف غريبة فقد كتب مامون أبو شيبة يوجه غارزيتو بأفكار عجيبة وطلب منه أن يشرك كوفى وأوكرا فى مباراة وفاق سطيف عشان يقدروا يتفاهموا مع الحكم الغانى لاميتى ( بلدياتهم بالرطانة ) على الأقل عشان مايظلم المريخ !! تخيلوا إلى هذا المنحدر هبط بنا الإعلام السالب !! وماعلموا أن الإخوة فى الجزائر عرب ويمكن أن يقرأوا مثل هذه الفضائح وسبق لصحيفة الهداف أن إتهمت المريخ بالرشوة ...والطريف أن صحيفة الصدى ذكرت أن غارزيتو وجد خاتم من الدهب الخالص مدفون فى ملعب الفندق فى الفاشر وإستبشر خيراً بأنه سوف يفوز بكأس أفريقيا لأنه عندما كان يدرب مازيمبى ووصل مازيمبى مربع الذهب وجد غارزيتو خاتم شبيه بهذا الخاتم وبعدها نال مازيمبى كأس الأبطال ...تخيلوا هذه الخزعبلات والأوهام من ( فكى غارزيتو ) تنشرها الصدى التى كنا نحسب أنها وقورة !! ولو نشرتها صحيفة الزعيم كان الموضوع يكون عادى ...وبهذه المناسبة نهمس فى اذن الإعلام الأحمر إنتوا خاتم المنى اللقاهو غارزيتو ده خاتم سيدنا سليمان ولا شنو ؟ مجرد سؤال .

امسح للحصول على الرابط
بواسطة : محمد عثمان الجعلي
 10  0  2.1K
التعليقات ( 10 )
الترتيب بـ
الأحدث
الأقدم
الملائم
  • #1
    oaltahir 10-19-1436 08:0
    وبهذه المناسبة نهمس فى اذن محمد عثمان الجعلي إنت خاتم المنى اللقاهو غارزيتو عمل بيه شنو ؟ هل رجعه لادارة الفندق لاعادته لصاحبه أم راح في خبر كان؟ مجرد سؤال .
  • #2
    يف الدين خواجة 10-19-1436 08:0
    امس ومنذ عقود ينوم الواحد مرتاح للعرض والنتيجة هؤلاء قدموا كرة قدم حقيقية امس فيها كل انواع الابداع والامتاع حد الثماله وهذا هو الهلال الذي نريده ...وعد الكاردينال في طريقه للتحقق ان هلال 2017بدون محترفين بهؤلاء الفتية مع الصبر الحكاية حتولع من جديد فقط نسال الله التوفيق في قادم المواعيد ما قدرت اكتب من خمرة هوانا!!!
       الرد على زائر
    • 2 - 1
      فيصل الاقرع 10-19-1436 10:0
      نوم العوافي يااستاذ الحكايه دايره الصبر
  • #3
    ابوحسن 10-19-1436 08:0
    لك التحية استاذنا محمد عثمان والتحية ايضا الي المدرب الشاب القدير الكوكي وهو يدفع بشباب في هذه المبارة المهمة ويعلن بطريقة زكية الي الفريق المغربي التطواني ان ابو الهل جاهز في الموعد انشاءالله ونسال الله العظيم بفوز في هذه المبارة المهمة جدا
    واللي يا الجعلي ناس الصفوة وقعو في شر اعمالم هههههه بعدين خاتم غارزتو دا ما كان يخلصم من مريخ السلطان ولا يكون لقوا بعد المبارة (مجرد سؤال)0
  • #4
    ابو تسنيم 10-19-1436 09:0
    لك التحية والتقدير استاذى العزيز ابو عثمان والى كل الاخوان فى المهجر . حقيقة ان للشباب طعم ونكهة جميلة بلأمس كل مرة لقول ياربى دا الدورى الاوربى ولالالالالالالالالالالالالالالالالالالالا شنو ماشاء الله تبارك الله وربنا يوفق الشباب فى المشوار الافريقى .
  • #5
    فيصل الاقرع 10-19-1436 09:0
    سلام جعلينا عيشتنا جو المباراه من جديد وبطريقتك الممتعه لكن مباراه زي دي مفروض اكتبوا عنها نا س عثمان مش ناس ابوعثمان عشان دي مباراة شباب امس لعب الهلال بالعيال ودي بتذكرني طرفه حدثت في الحواته ريفي القضارف وهي بها حي الجزارين وحي الفلاته والجزارين سرقوا بقرة الفلاته وجوا الفلاته قالوا للجزارين دا بقرتنا ونحن ما دايرين حاجه غير ثمن بقرتنا الجزارين سلوا سكاكينن ونهروا الفلاته الفلاته دخلوا الغار والبيوت كلها قطاطي واشتغلوا والنار اشتعلت في بيوت الجزارين اطفوها هنا تولع هناك الحمامه تنقل النار بضنبها من من قطيه لقطيه الجماعه مشوا للفلاته وعملوا صلح دفعوهم تمن البقره 7مرات والنيران همدت لكن الجزارين أكون ماشي ساي النار تولع في جيبه رجعوا لشيخ الفلاته ياناس فضحتونا نحن ما اصلحنا واتفقنا الشيخ قال ليهم معليش امكن ديل العيال يلعبوا . حالتو لعب عيال يا جعلينا
  • #6
    الكتاااااااحة والتفااااااحة 10-19-1436 10:0
    image

    يا خاتم المنى لو نلقاك هنا
    تسعد همنا وتدينا الهنا
    يا خاتم المنى
    ما تقول لينا لا لا ما بنحملها
    لو شفتوا الحلا
    حتقولوا الصلاة ما تغيب مننا
    نور شمعتين وامسح دمعتين
    لو جانا الحبيب نفرح مرتين
    وندور غنا
    في عيون القمر بتحلي السمر
    ولطافة السير
    للزول الندر غاب مننا
    يا خاتم المنى لو نلقاك هنا

    (مع الاعتذار للبلابل )
  • #7
    منعم ابوناصر 10-19-1436 11:0
    تحياتى جعلينا وفعلا اتنين للنعامه ما اتلقن لكن سيدالبلد انشاء الله سوف يجدن تلاته صداره خارجيه وداخليه و تيم بهذا الجمال والروعه والرابعه خليها بينى وبينك لكن انشاء الله نراها قد دنت مع هذا المدريب الغدير والشى العملو امس دا يدل على شغل المدرب وعدم تدخل الاداره@@@@بعدين ياجعلى حررررام عليك عز النشوه بهولاء الشباب تفوم تجيب لينا كلام ابوخيبه دا وقتو يارجل@@@@تحياتى للاخ الاقرع ومساديرو الجميله وبقول ليهو الجزارين دفعوا حق البقره 7 مرات ديل جزارين ولا فريق الوحدات الاردنى مجرد سؤال
  • #8
    البابا 10-19-1436 11:0
    شباب الورد يكفيهو شر العين
    سالتو غلبو كم... قال 2 و 2
    سد سنار الولع الخرتوم
    كهارب الليل الحمتنا النوم
    شباب صغار أكلوا النسور
    اولاد كبار واقفين طابور
    حمامة المغرب راجيها الدور
    تشوف الشافو غربان وصقور
    الجعلي وبين يغنو دهور
    والقمري يقوقي فرح وسرور
  • #9
    طيارة الوالي وخاتم غرزة 10-19-1436 03:0
    الهلال متصدر والمريخ لديه مباراة معااااااااااااادة قانونيا إذن لديه 40 نقطة إلى حين إنتاء مباراة الأمل بالفوز أو التعادل أو الخسارة وسيد البلد عندو 43 نقطة حلااااال لا شق لا طق يعني هو المتصدر وليس متساويا مع وصيف السنيييييييييييييين يا الجعلي
  • #10
    بابكر عوض الشيخ 10-19-1436 03:0
    ياهو ده الهلال شباب وجمال كتيبة تنهي المحال أولاد صغار بروا أخوانهم الكبار وقالوا نحن في المسار بر جو نهد الجبال يامزمز ورينا القرار والله نحن في حيرة وإنبهار ياهو ده الهلال الله على الجمال ويحفظه المتعال
أكثر
لا توجد مباريات
لا توجد مباريات
لا توجد مباريات