• ×

فارس السودان يكسب الرهان

رحيق الختام ...محمد عثمان الجعلى
فارس السودان يكسب الرهان
هلال العشق الجميل عودنا الظهور فى المواعيد الكبيرة وهو يعود بالنقطة الجوية الثانية فى مجموعة الأبطال من ملعب سانية الرمل ومن المغرب التطوانى قاهر الأهلى القاهرى ...إحترم الهلال الخصم ولعب بحذر وإنتهى الشوط الأول بالتعادل السلبى ، وفى الدقيقة 70 تقدم أصحاب الأرض بالهدف الأول بواسطة قائد الفريق عبد العظيم خضروف الذى إستفاد من تمريرة النجم الدولى يونس بلخضر ...وهنا تحركت منصة إطلاق الصواريخ الزرقاء بواسطة نزار ووليد وتعرض نزار للعرقلة فى رأس خط 18 ودخل البرازيلى زينهو فى هذه اللحظة لتنفيذ الضربة الثابتة بديلاً لأطهر الطاهر ونفذ زينهو الضربة الثابتة وسكنت سقف المرمى التطوانى وفشلت معها كل محاولات الحارس محمد اليوسفى وكان هدف الهلال فى الدقيقة 77 والقوون البرازيلى معه رقصة السامبا مفروض يحسبوه لينا قون ونص عشان فوز ومعاه فنجرة !! تخيلوا خلال 7 دقائق فقط قام الأقمار برد الإعتبار حقيقة القادر بسوى ...وتصدر الهلال المجموعة برصيد 5 نقاط متساوياً مع مازيمبى ومتفوقاً عليه بفارق الأهداف حيث أحرز رماة الهلال 3 أهداف وولج شباكه هدف ومازيمبى أحرز هدفين وجاء سموحة فى المركز الثالث برصيد 3 نقاط والمغرب التطوانى طيش المجموعة برصيد نقطتين ...ماشاء الله صدارة بالطيارة وبمهارة وجدارة ...إتصل بى إبن الخال الهلالابى محمد النور حميدة من متمة دار جعل وقال لى مبروك مرتين نقطة الهلال الجوية وإبنك حذيفة دخل كلية الهندسة وباركت بدورى للمهندس الصغير حذيفة وسألته عن شعوره بعد نقطة الهلال الجوية الغالية فأجابنى الحمد لله ( الشمات أملهم مات ) ...الحمد لله ياحذيفة إنتصارمهندسين وأقمار ..الظريف فيصل الأقرع من هلالاب جدة إتصل مهنئاً وقال والله هدف زينهو غطى على أخطاء المباراة كلها والبرازيلى رقص السامبا فى أمان الله وباقى لينا مباراتين فى أم درمان ومباراة سموحة بدون جمهور زى الفى أم درمان ...ورغم غياب كيبى ونيلسون وإصابة جوليام كان الهلال بمن حضر وياهو ده الهلال هيبة وجمال ..والتطوانى قهر الأهلى القاهرى وأنيمبا
ذكرت صحافة المغرب الصباح والإتحاد الإشتراكى والخبر أن التطوانى يعانى من غيابات كثيرة وعن إصابة الطرف اليمين بلال زريوح ...ولكن صحافة المغرب تعمدت ألا تذكر أن بديل زريوح هو يونس بلخضر النجم المغربى والطرف اليمين وهو من صنع الهدف الذى سجله التطوانى وعمره 28 سنة وإحترف فى عدة أندية الرجاء والجيش والعين الأماراتى وأولسن النرويجى والوكرة القطرى ومارتيمو البرتغالى ...كما أعاد التطوانى صانع الألعاب ياسين الأكحل والمهاجم يونس الحواصى بالإضافة للأسبان خوسيوس تاتو ونجم رديف برشلونة خوسى رويدا وسجل التطوانى فيفيان مايبدى مهاجم منتخب أفريقيا الوسطى من الرجاء المغربى ولن يستطع هذا النجم المشاركة الأفريقية لانه شارك هذا العام مع الرجاء البيضاوى أفريقياً ...وأدار المباراة طاقم من شمال أفريقيا عدا المساعد الغينى ...بقيادة حكم الوسط الجزائرى مهدى عبيد شارف يساعده الغينى أبوبكر دومبويا والتونسى أنور حليمة والجزائرى فاروق حواسنية ...ياربى فى إحتمال يكون حكام مباراة الرد مساء الجمعة 7 أغسطس من ليبيا أو أثيوبيا أو مصر أم حقنا ضائع مع التحكيم الأفريقى ، ويطلق على المغرب التطوانى فى المغرب الحمامة البيضاء وبعد هدف زينهو الأقمار أنارت والحمامة طارت وبطل السودان كسب الرهان ...وتقول العرب الحب الصادق يعذب صاحبه والأقمار يعشقون الهلال ويعيشونه فى حركاتهم وسكناتهم ولله در القائل *** والله ماطلعت شمس ولا غربت ... إلا وحبك مقرون بأنفاسى *** ولا خلوت إلى قوم أحدثهم ...إلا وأنت حديثى بين جلاسى *** ولا ذكرتك محزوناً ولا فرحاً ...إلا وأنت بقلبى بين وسواسى *** ولاهممت بشرب الماء من عطش ...إلا رأيت خيالاً منك فى الكأس ...وبمناسبة الكأس نسأل الله رب الناس أن يرزقنا الكأس...يلا ياهلالاب نوموا مبسوطين إنتوا كدة جبتوا نقطتين بالطائرة وجيرانكم جابوا نقطة واحدة عاوزين يعملوا ليها عيد ميلاد ..جابوا نقطة بالطيارة ومعاها خسارة ونحن الحمد لله الخسارة إلا نسمع بيها سمع ساكت عند الجيران ولله الحمد من قبل ومن بعد .
*** الوصيف يضيف نقطة وفاق سطيف
تعادل المريخ وصيف بطل السودان مع فريق وفاق سطيف بهدف لكل فريق وجاء هدف أصحاب الأرض فى الدقيقة 17 من شوط المباراة الأول من تمريرة فارس حاشى لعبد الملك زياية وبعد 5 دقائق عادل للمريخ سولمون جابسون مستفيداً من عكسية الغانى كوفى وأسكن الكرة رأسية رائعة فى شباك الحارس عبد الرؤوف بلهانى وهذه النقطة الجوية سوف تفيد المريخ إن إستطاع أن يكسب بقية المباريات ومنها إثنين على أرضه مع الوفاق والإتحاد على التوالى ومباراة الختام مع العلمة بالجزائر ..ويجب أن يحذر المريخ من المباراة القادمة بأم درمان وسوف يلعبها الوفاق بحارسه الدولى سفيان خضايرية ومهاجمه الهادى بلعمرى وتوفيق زرارة الذين غابوا عن مباراة الذهاب فى سطيف ...كنا نتمنى من إعلام المريخ أن يستعد لقادم المباريات ولكنه عوضاً عن ذلك بدأ يتحدث بالهمز واللمز الذى يجيده الوصايفة من أن فريقهم جاب تار الهلال الذى خسر فى 18 ديسمبر 2008 أمام وفاق سطيف بهدفين لهدف ولم يلعب مباراة الرد فى الجزائر .. مع العلم أن المريخ عام 2007 خسر من وفاق سطيف بثلاثية نظيفة فى الجزائر فى كأس العرب ...يعنى المريخ تار رقبتو ماجابو ....وتحدث الإعلام الأحمر عن العار والشنار وإنسحاب الهلال ولكن بعد إسبوع جلب لنا المريخ فضيحة تسير بذكرها الركبان هى سباعية الوحدات الأردنى مساء الخميس 25 ديسمبر 2008 بالمناسبة ...فى مريخابى إسمه خالد النجيدى عمل مداخلة فى صفحة المغرب التطوانى فى الفيس وقال لهم إن لاعب الهلال سيف مساوى رقم 12 ممكن يعمل ضربة جزاء من أقل إحتكاك وإذا عايزين الشعب السودانى يكون مبسوط منكم أغلبوا الهلال ستة أهداف وماقال سبعة أهداف عشان مايتذكر سباعية الوحدات !! لذا لزم التنويه .
*** رسائل رياضية غنائية من الفنان عثمان حسين
نريد أن نرسل 3 رسائل من أغنية ( حارمنى ليه ) للفنان عثمان حسين وكلمات إسماعيل حسن ...والرسالة الأولى من بكرى المدينة لمجلس المريخ يطلب منهم إستخدام سلطاتهم مع إدارة الهلال والإتحاد من أجل رفع سيف الفيفا المسلط على رقبته ويريد منهم أن يدلوه على درب السعادة مهما كان الثمن لأنه عانى الهم وسهر الليالى وتقول الرسالة *** وين درب السعادة يا الباكين لحالى ...دلونى عليها أنا ساهر ليالى ...حتى لو بعمرى ...لو بالروح ومالى ...والرسالة الثانية من جمهور الهلال لإدارة الفريق التى تخلت عن النجم المحبوب عمر سيدى بيه وضربت بعرض الحائط تعلق الجماهير به وتقول رسالة الجمهور *** ده حرام عليكم ...عارفين حبي ليه ...شايفنو بريدنى والشوق فى عينيه ...ليل الوحدة قاسى وأنا خائف عليه ...يوم تتخلوا عنو ...ياما تقولوا فيه ...حارمنى ليه ..ليه والله بحبو ...والرسالة الأخيرة من الزميل مندوب صحيفة قوون الأستاذ عصام طمل الذى طرده المريخاب من فندق البعثة بالجزائر بل إعتذروا له ليعفو عن بكرى ثم قلبوا الحقيقة وقالوا عصام طمل إعتذر لنا كى نسامحه وبكى!! والإعلام السالب كذاب أشر !! ولم يشفع لطمل حبه للمريخ وتقول الرسالة *** يا الناسين ضميركم وماخائفين عذابو ...يوم الحق هناك يوم واقفين ببابو ...يوم يسألكم الله ياالناسين حسابو ...حارمنى ليه ...ليه والله بحبو.
*** همسة الوداع
حبايبنا الحلوين بعد ماكسبوا نقطة من وفاق سطيف حاولوا التطاول على سيد البلد وكبيرها هلال الملايين فكتب إعلامهم السالب يقول أدينا دين الوصيف وحفظنا ماء وجه الهارب !! العالم دى كان نالوا النقاط التلاتة كان عملوا شنو !! ونقول ليهم الهروب فضلة خيركم !! إنتوا هربتوا مرة قبل كدة !! ( أستغفر الله ) هربتوا مرتين ومن أمام الهلال ....المرة الأول فى يناير 1973 فى مباراة كأس الثورة الصحية وبوجود الرئيس الراحل نميرى عندما أحرز الهلال ثنائية فى أول ربع ساعة بواسطة جكسا وقاقرين وعمل حارس المريخ الطيب سند ضربة جزاء مع قاقرين وقبل تنفيذها أخذ كابتن المريخ سليمان عبد القادر أبوداؤود الكورة وطلع !! يعنى متعوووودة !! والمرة التانية فى يوليو 1996 عندما تقدم الهلال بهدفى جمال سانتو والراحل والى الدين وإحتسب الحكم ضربة جزاء للهلال وتقدم زاهر مركز لتنفيذها !! أنقروا الحصل شنو !! زيكو برضو شال الكورة ومرق !! والله زى ما أقول لكم !! ولا دربى ودربكم ده الكورة مارجعت ...وبهذه المناسبة نهمس فى أذن الإعلام الأحمر إنتوا زيكو ده هرب ولا هاجر ؟ مجرد سؤال .
© 2015 Microsoft Terms Privacy & cookies Developers English (United States)
امسح للحصول على الرابط
بواسطة : محمد عثمان الجعلي
 11  0  2.2K
التعليقات ( 11 )
الترتيب بـ
الأحدث
الأقدم
الملائم
  • #1
    جلابي - الدوحة قطر 10-12-1436 08:0
    تعقيب بسيط علي جزء من مقالك.. الكره التي اتي منها هدف الهلال انت ذكرت بانها عرقلة لاعب الهلال ولكن هي لم تكن عرقله وانما احتسبها الحكم لمسة يد علي لاعب المغرب التطواني.. وهذا دليل علي انك تجاول تزوير الحقائق لانه وبعد الاعاده لم تلامس الكره يد اللاعب المغربي الواقع علي الارض.. وكما قلنا سابقا الدفع الرباعي شغال.. ثانيا بالفعل الان يمكنكم زيارة الجزائر متي ماشئتم فقد فتحنا لكم الطريق... وفريقك العاجبك ده ينفع يكون حراس امن في المستشفيات وليس لاعبو كرة قدم.. وراجع كل مباريات الهلال منذ انطلاقة الموسم داخليا وخارجيا تجد انه ليس بفريق وانه يتلقي العون دائما وغير مقنع.. الي متي ؟
       الرد على زائر
    • 1 - 1
      فيصل الاقرع 10-12-1436 12:0
      ما رديت علي الهروب يا جلابي الفاول دفع علي نذار يا معلم واللاعب الواقع علي الارض هو من قام بالفاول ركز مع العالمي مالك ومال حراس امن المستشفيات الالي الان ما انهزموا لا في المحلي ولا المجموعات التي انتم مستجدين فيها_ جلاااابي الي مزمز دور بلغة العسكر
  • #2
    محمد الزين 10-12-1436 09:0
    والله بسطتني يا الجعلي وختيت النقاط علي الحروف والمريخاب عاملين ذاكرتهم بتنسي الاحداث الشينة البتخصم انا هروب 1973 أول مرة اسمع به وهو حصل قبل ولادتي بعام لكن لم يذكرة احد من قبل فشكرا لك .
  • #3
    فيصل الاقرع 10-12-1436 10:0
    اولا السلام للجعلي الصغير الباشمهندس حذيفه مقرون بالتهنئه القلبيه الصادقه ثم الي ابو الباشمهندس جعلينا ونقول لي شد حيلك المصاريف كترت اسأل مجرب
    المقال دا شكله بايت علي شان كدا مسبك زي طبيخ الباميه البايت باقي الباميه وكت تبيت بسبك بلحيل ماشاءالله فصلت لينا لعيبة التطواني مفصل مفصل وبعدين بلخضر دا لاعب كوره والا ابن بطوطه كل يوم في بلد وحبايبك ناسيين تاراتهم وهرولاتهم وكايسين تارنا هلا هلا اما الرسائل مفصله تفصيل علي اصحابها لك التحيه ومجرد سؤال ودخالك محمد النور اكلته في البشاره والا حولتها مجرد سؤال
  • #4
    منعم ابوناصر 10-12-1436 11:0
    تحياتى ابوعثمان وكل سنه وانت طيب وانشاء الله نحتفل قريبا بالكأس الافريقيه وتهانينا للابننا المهندس حذيفه وانشاء الله من الموفقين دوما وكذالك نحمد الله على النقطه الجويه وان كنا نطمع فى الاكتر ولكن العافيه درجات والفادم احلى وفعلا الحب الصادق يعذب اهله كما نحن معذبين الان بحب سيد البلد وحلوه الابيات الشعريه والاحلى الرسائل الرياضه وفعلا حارمنى ليه@@@وذى ماقال ابننا المهندس حذيفه ياشمات املكم مات @@@ بس الامل عطبره موجود ومنتظركم
  • #5
    ابوحسن 10-12-1436 04:0
    لك التحية استاذنا محمد عثمان اول نبارك اليك الفرحتين فرحة قبول المهندس حذيفة يحفظة الله ويرعي والفرحة الثانية عودة ابو الهل بنقطة الغالية من ارض المغرب العربي نعم انها مفخرة لكرة السودانية علي الاداء البطولي مهما كانت الاخطاءاو الامكانيات عند اللاعبين علي قول بعض الحاقدين من بعض اهل الصفوة اللذين لايسرهم اي نصر الي الهلال مثل المدعو خالد النجيدي ولكن ماذا نقول لمثل هذه العقول والقلوب السوداء ونتمني النصر الي ابو الهل في المباريات المتبقية انشاءالله
  • #7
    عبدالباسط عمر السيد 10-12-1436 06:0
    اولاً تشكري وتقديري للاخ أبوالهندسة محمد عثمان الجعلي على له منا التحية والتقدير والتهاني والتبريكات للباشمهندس حذيفة والتهاني أيضاً بنتيجة الهلال التي اثلجت صدورنا وأود في هذه السانحة أن أن ضيف لما ذكره ابوالهندسة أن زيكو لما مسك الكورة قال لو جاء أبوي ما بديها ليهو حسب قول أخونا الرياضي المطبوع الزبير عبدالله " كركوج " . كما لا يفوتنا أن أُهنئ الأخ جلابي على الشارة الدولية التي منحت لهو بدولة قطر " الدوحة " ألف مبروك وتوقع أن يتم اختيارك للتحكيم في كاس العالم القادم بالقطر . كما الفت انتباه الحكم الدولي جلابي أن الدفع الرباعي دي نحن لا علم لنا به وشكلك بتعرفه جيد من خلال مسماك " جلابي"وأتمنى أن نشاهدك من خلال بث مباريات كأس العالم القادم ان شاء الله
  • #8
    منعم ابوناصر 10-12-1436 06:0
    ياجعلى تجيب فى المحن جنس الاسماء دى من بتلقط فيها من وين شى جلابى وشى نجيدى ومزمز وشيبه ابوخيبه وراعى الباسطه ديل كلهم بسببك الناس عرفتهم واذا هم لم يعرفو هروب المريخ وهزائم المريخ فتلك مصيبه ولو يعرفو وخجلانين فالمصيبه اعظم@ بعدين قول للجلابى حراس الامن انشاء الله يسجنوك بس خلى جلابيتك بيضاء ومكويه عشان يظهر فيها شعار ابو الهل بس اناخائف ماتكون عندك جلابيه وتكون داقى سستم شوف وين نخت ليك الهلال
  • #9
    سيف الدين خواجة 10-13-1436 02:0
    عزيزي الحبيب الف مبرووووووووووووووووووك مهندسنا حذيفه وعقبال الدكتوراه وما تقول تعبت ابن الوز عوام !!!!!!!!!!!!
  • #10
    ibrahim 10-13-1436 07:0
    الجعلى عليك الله لا تحرمنا من دررك و انت السم القدر ناس مزمز و جماعتو ( الضحاك و أبو جلحات و المضروب ). الهلال كان طلع أحسن من المريخ و كان إستمر وجع قلوب. و الله يا جعلى أنا أقترح أن يكون الإتحاد الأفريقى حكام للوصيف عشان يريحنا من نقةأبو شيبة الكتيرة دى و عشان المريخ كل سنة يلعب فى المجموعات . الجماعة مستجدين نعمة و ليهم حقى الفرحة ما بدوم ممكن تانى عشرة سنة ما يشمو ريحة المجموعات.
  • #11
    ود عابدين 10-14-1436 02:0
    ياخى ديل جنس حقدعليهم مادايرين يريحونا دفعوا لكلتشى اول حاجه عشره الف دولار ويشوت الكوره بره القون دى اخلاق رياضه وطفشوا قودوين مننا تعرفوا الحقد طوالى انقلب عليهم ومابيقيف منهم خالص الا يصفوا نيتهم ويوضحوا الحقائق وشالوا لعيبتنا كلهم وكل مره يشيلوا مننا لاعب عشان يقولوا ينتهوا مننا ويخلقوا لينا فى المشاكل واى لاعب راح مننا معناها ماشبه الهلال وكل الراح جاتوا صاده كلتشى ليس كلتشى الكان مع الهلال وتدهور مستواه وقودوين بعد فات مننا ماخلا الخليج ومصر وليبيا بقى زى خطوط الطيران كل مره فى حته وعلاء بعد لقى نفسو فى الكنبه قال احسن العب مدافع وقعد يشلت لكن بيلقى ليهو حكم مابيعرف رحمه ويكرتوا طوالى وهيثم مشى ليهم وفرحان وماقدر الجمهور الاحتجب جوه النادى عشانو ومشى وقع ليهم ولكن لدغوهو بى كلمه وطيروا ليهو الكوره من راسو ولو كان فكر كان مايوقع ليهم وينتظر كان الكاردينال رجعوا لكن توقيعه للمريخ وعدم تقديروا للجمهور هو السبب وبكرى المخلوع دا بقى جارى زى المجنون وحاتطير ليهو بعد شويه وجمال الوالى ماحصل اوفى بى اتفاقيه مع الهلال سجل كل لاعبى الهلال وهم فى كشف الهلال يفاوضهم ويغريهم بالمال عشان كده اصلو مابيتقدم مع المريخ وكل مره يقول يستقيل زى الشفع يتشاكلوا ويتصالحوا اخلاق رياضيه مافى ومبادى وخرق اتفاقيات وعشان كده الا سيكافا بس وحتى لعيبتنا البيمشوا انديه تانيه مابيخلوهم ومهند حايجى يسجل معاهم الموسم الجاى وحتى حموده ممكن يسجلوهو واصلو عبده جابر نحنا شطبناهو ونجهونا فى كاريكا لما نزل مستواهو وكمان قالوا عايزين نزار تشموا قدحه هو وكاريكا لما تموتوا حتى سيدى بيه قالوا ليهو اظن تشطب منهم بنسجلك معانا لكن جماعتنا عرفوها وشالوا منو الجنسيه وراحت عليهم ههههههههههه واسى هم بتكشفوا المباراه الجايه والوفاق عندو بلعميرى دا حا يفركا ليهم عديل خطير ومابيقصر حايكسر ليكم الرد كسر تشوفوا وانا فى مابتتستروا والله يجيب 7/8 او ماعارف 9/8 او وسطهم والجرسه والبكاء حا يقع ومن اسى الفراش حايكون وين معقوله انتو تتطلعوا وفاق سطيف دى تبقى عوجه ناس ماشين بالدفره وتامناها دفر وشلاليت ساكت ومسيك والله انتو شكلكم لاوفاق لا الاتحاد مابتقدروا عليهم الاتنين حايغلبوكم فى استادكم اما العلمه المعلمه الله بتغلبوها وحلال عليكم نقاطه مابتسوى ليكم حاجه يكون الاتحاد والوفاق خلاص باى باى لقطوا اللحمه وفاتوا تانى مابتحصلوهم ومن اس مادايرين بكاء فضائح التحكيم والتنجيم وعبرت وماعبرت دا قايلونو الاتحاد المحلى والمحاباه ويامعتصم شوف لينا طريقه الممتاز دا مره نشيلو ونشوف فلاحتكم يوم 8/8 او 9/8 وخليتكم بعد دا لكن اتذكروا كلامى الهادى بلعميرى وفاق وبلايلى الاتحاد ياخى دا خلا امير كمال يربع يدينو وراهو والله قعدتا اضحك ليه مزمز مااتكلم عن دى فوتها ليهو وقال لاعب كبير خافوا الله يامزمل يامطبلاتى تيمك واطه ساكت ماشى بالتيله لكن قربتا خلاص المباراه قربت ومن اسى تبكوا ضغط المباريات وشنو وشنو شوفوا كيف ناس الهلال المساكين يلعبوا هنا وهنا وتحرشوهم علينا عشان مانجيب كاس لكن برضوا بنلعب وكلهم بنلقطهم منكم رغم ناس الاتحاد والمحاباه والظلم وتسجيل لعيبتنا وتعملوا لفرتكه فريقنا لكن اى ظالم ليهو نهايه ياجمال الوالى وحاتجيك فى رقبتك مش مبارى الهلال دا كده ويحرشوا فيك والى لقاء
أكثر
لا توجد مباريات
لا توجد مباريات
لا توجد مباريات