• ×

فرقتنا قوية ونقطتنا جوية

رحيق الختام .....محمد عثمان الجعلى

من نعم الله الكتيرة علينا وجود نهر النيل وشعبنا المضياف النبيل وهلال العشق الجميل !! لك الله ياهلال وأنت ترسم على وجوهنا لوحة الفرح فى لحظة أحوج مانكون فيها للإبتسامة ، نعم وسط ركام الإحباط السياسى والإقتصادى والرياضى كان قمر الهلال يبدد الظلام ويرسم الإبتسام وكما قال الشاعر الفاتح إبراهيم بشير *** ياغنوة فى وترى الحزين ... ياضحكة فى الزمن الصعب *** ياواحة فى عز الهجير ... ياراحة من بعد التعب *** يانسمة هبت فى الدغيش ...عزفت على الوتر العصب *** يارحمة من رب العباد ... مكبوبة فوق خلق الله كب *** إحترت فى وصفك أنا ... وحارت معاى كل الحروف *** مرات بشوفك يامناى ... ياقوتة فى قلبى الولوف *** مرات بشوفك ضى أمل ...دبّج خطاى رغم الظروف *** مرات بشوفك جارية نيل ...أمواجو عانقت الجروف ، نعم إنها كتيبة أبو الهل الإستراتيجية التى تحدت الظروف وعادت بنقطة الطائرة الجوية من باماكو عاصمة مالى عندما أحرجت فريق الملعب وإنتزعت منه تعادل غالى بين أرضه ووسط جماهيره ... ورغم أن الأفارقة مارسوا حربهم النفسية القذرة ضد بعثة الهلال حتى إحضار مياه الشرب عانينا فى إحضارها حيث منحونا بص ( لساتكو ضربت فى الطريق ) وأحضرنا مياه الشرب بالمواتر لنجوم الفريق !! لن نطلب من إدارة الهلال أن تجهز لفرقة الملعب بص من بصات الديوم ويحوم بهم شرق النيل وعد حسين والكلاكلات وأبو آدم وغرب الحارات وضواحى سوبا ويجيبهم الفندق ( مبتبين وراقدين سلطة ) لأن ذلك ضد الأخلاق السودانية الأصيلة وإنما سوف نكرمهم ويكون الرد العملى داخل الميدان بصواريخ ماركة الغزال وكاريكا ... وتواصل مسلسل الظلم للهلال داخل الملعب وخارجه حيث منح الحكم ضربة جزاء ظالمة تصدى لها الفتى الأبنوسى جمعة جينارو وأفسد مفعولها ( وياعناقيد العنب المساكين ليها رب ) فالتحية للمدرب القدير النابى والتحية لرئيس البعثة الدكتور عبدالله البشير الذى أعلن قبل المباراة أنه يثق فى مقدرة أبناء الهلال فى العودة للخرطوم بنتيجة إيجابية والتحية لأبطال النصر بداية من الحارس الأمين جمعة جينارو ومروراً بترسانة الدفاع أتير ومساوى وسيسيه وإن كان بوى يحتاج لبعض الشغل كما قال إستاذنا فيصل عبدالمنعم أما خط الوسط ففيه المعلم وسيدى بيه والشغيل ونزار وكان كاريكا يساند الدفاع والهجوم فالتحية لكل أبناء الهلال الأوفياء والهلال هيبة وجمال كما قال أستاذنا أحمد الفكى ...قلت للأخ بابكر الهرع من هلالاب الرياض إن الملعب المالى أصبح أسماء فى حياتنا وأن المرحوم كان راجل طيب فأجابنى عبدالمنعم عبدالمنان أن ملعب مالى مازال فى غرفة الإنعاش !! إنعاش شنو يامنعم سوف ندفن الملعب مساء الأحد القادم بإذن الله التاسع من مارس ... بالمناسبة سوف ينتهى العزاء بإنتهاء مراسم الدفن !! وفى الحتة دى بالذات نحن أنصار سنة ياعلاء محمود !! لذا لزم التنويه .
*** آرسنال شندى عاد بروح التحدى
رغم خسارته بهدف من جمعية رواندا فى كيجالى إلا أن نمور السودان سوف تهزم جمعية كيجالى هزيمة تسير بذكرها الركبان عندما يلتقى الجمعان فى شندى العزيزة
وبإذن الله ناس كيجالى يأكلوا سمك فى فندق الكوثر الجميل على النيل فى شندى ويرجعوا للدورى المحلى فى كيجالى ، وأخوان حمودة والدعيع قادرون على قلب الطاولة وإعادة الأمور لنصابها وتصحيح المسار حتى يشق أهلى السودان طريقه لدورى 16 فى كأس الإتحاد الأفريقى بإذن الله ، والغريبة فى الأمر أن فريق الآرسنال أحرز هدف نقضه الحكم وهذه مشكلتنا مع التحكيم الأفريقى الظالم .
*** لى حبيبنا التهانى مستمرة
لو قلت ليكم مافى هلالابى ما نام مبسوط ماتصدقونى ... فقلت توالت الرسائل والإتصالات من أبناء الهلال بمختلف مدن المملكة ومن طيبة الطيبة كان جلال صالح وعبدالدائم وخالد محجوب والظريف عزالدين أحمد سعيد الذى قال ...هلال الساجدين لادفع دولار ولامليم وعاد مرفوع الجبين ومن الهفوف كان المهندس محمد جعفر الذى قال لى قبل المباراة إن النتيجة تعادلية ومن مكة أدروب بكرى عيسى حمد والدكتور محمد على الكوارتى من الرياض والأستاذ محمد عبدالفتاح ومن حائل أستاذنا أحمد الفكى وخلف الله بلة من مريخاب خيبر لهم الشكر الجزيل ومن حقنا أن نغنى *** قضينا ليلة ساهرة ...تضمنت محاسن ...من كل روضة عينة ... ومن كل عينة زهرة *** رأينا حفلة ساهرة تتوجت قياصر ... تلألأت كواكب من أطيب العناصر *** الروضة لابسة حلة ... من الزهور طرائق *** بيها المكان تجلى ...والجو نسيمو رائق ...والغيم نشر مظلة *** ما أحلى ديك مناظر... فيها الجمال تجلى ...بين مسفرات أهلة ...ونخبة عرب أجلاء *** ناس عليها فرحة... وناس طريحة جرحى ( قطع شك ديل الجيران !! ) فى قلوبنا إستغل ... و( نجم ) السعود تدلى ...والحظ كتب مجلة ...منشور بيانو مرة ...لى حبيبنا ولى قريبنا ...التهانى مستمرة ...وأسمحوا لى بإسمكم جميعاً أن نرسل التهانى للزميل الأستاذ محمد الفاتح كتاحة بمناسبة الشفاء بعد الوعكة الصحية التى ألزمته السرير الأبيض عدة أيام بمدينة دبى وماتشوف شر ياحبيبنا كتاحة .
*** همسة الوداع
طبعاً حبايبنا الحلوين كانوا مجهزين مشاعرهم للشماتة ( إلا مارحم ربى ) وأكيد الإعلام الأحمر كان مجهز عناوين الشماتة وترديد بعض الأغانى مثل أغنية ...أنا مالى والهوى أنا مالى ...وغيرها من الأغانى لأنهم كانوا متوقعين الهزيمة بخمسة أهداف أو نص دستة !! واحد من الصفوة قال لى يوم السبت بعد تطيروا من الملعب المالى أنا جهزت ليكم جوز حمام ملون بالأبيض والأزرق !! تخيلوا !! وبهذه المناسبة نهمس فى أذن صاحب القلم الأحمر هسة جوز الحمام ده كان عملتوه شوربة لى شيم لص ماكان جاب ليكم قون فى فريق البلدية ؟ مجرد سؤال .
امسح للحصول على الرابط
بواسطة : محمد عثمان الجعلي
 13  0  3.7K
التعليقات ( 13 )
الترتيب بـ
الأحدث
الأقدم
الملائم
  • #1
    Mustafa Mohammed Ali 05-01-1435 11:0
    بتخيلك يا الجعلي مشجع جالس في المدرج .................. الله يشفيك
  • #2
    عبد الله بلل القرياتي 05-01-1435 11:0
    جعلينا لك التحية ، وقلت : وناس طريحة جرحى ( قطع شك ديل الجيران !! ) احسن الظن إنا بعد الظن أثم ، والله وقفنا معاكم لكن ، لكن استفزازكم وفرحكم بالتعادل .. كأنكم غلبتموهم 2 / صفر ، حبيبنا لازال الجماعة عندهم مباراة معاكم يوم الأحد القادم ، ونتمناها للهلال بكل صراحة وللأهلي شندي أن يرد الصاع بصاعين ، ويجب على نادى الهلال أو جمهور الرياضة السودانية عامة بمختلف ألوانه الرياضية أن يعامل فريق الملعب المالي بمثل معاملو به فريق الهلال ، بصراحة يالجعلى طبعنا وخصائلنا الجميلة بتخلى الغير يستقلها ويعاملنا بالسيئة ، لكن يالجعلى على الطلاق ضربة الجزاء لو كان دا المنبرش المعز ، أكان هسع خشمك ملح ملح ، وعبركم نقول لحبيبنا وصديقنا كتاحة ما تشوف شر ياحبيبنا وكفارة ليك وأجر وعافية أن شاء الله ( ويالجعلى الوصية قالوا بتعطش خلف الله قالك حمبرا قابض الطير هههههه )
  • #3
    عثمان الحكيم 05-01-1435 11:0
    حبيبنا الجعلى دى البدايه والجاى احلا انشاء الله وحبايبنا الحلوين خليهم فى نفسهم استقالات ومشاكل وشكلهم لافين صينيه وماعا رفين يعملو شنو
  • #4
    ودست الدار 05-01-1435 11:0
    اخي الجعلي تحياتي والف مبرووك وعقبال ام درمان وعليك اللة اديها صنـــــــــــــــــــــــــة نحن لسع في القيدومات والحنة عايزة ليها طبقة بس روق المنقة لانو السوط لسع ف قطرانو وداسنو يا الجعلي اخوي وانت ناسي الما بيصلوا علي النبي يس ساعدنا بام الحسن وينو الحسن وخليهم عايشين علي كدة وعاش ابو........................................ وكفي
  • #5
    هلالابى- أزرق دمو 05-01-1435 01:0
    لك الشكر الجزيل .. أخى العزيز الجعلى مقالك فشه غبينتنا..يالجعلى.. ياللروعة والجمال.. قضينا ليلة ساهرة ...تضمنت محاسن ...من كل روضة عينة ... ومن كل عينة زهرة *** رأينا حفلة ساهرة تتوجت قياصر ... تلألأت كواكب من أطيب العناصر *** الروضة لابسة حلة ... من الزهور طرائق *** بيها المكان تجلى ...والجو نسيمو رائق ...والغيم نشر مظلة *** ما أحلى ديك مناظر... فيها الجمال تجلى ...بين مسفرات أهلة ...ونخبة عرب أجلاء *** ناس عليها فرحة... وناس طريحة جرحى ( قطع شك ديل الجيران !! ) فى قلوبنا إستغل ... و( نجم ) السعود تدلى ...والحظ كتب مجلة ...منشور بيانو مرة ...لى حبيبنا ولى قريبنا ...التهانى مستمرة .. تقولى برضو ..عالمى.. أمشى ياولد ألعب بعيد..(ياتمهيداب يادلاقين ان شاء الله تطرشقو ... والماعاجبو ..يمشى يلعب تمهيدى: هههههه ههههههه هههههههههههه هههههههههههههههههه هههههههههههههههه ....)
  • #6
    ابوحسن 05-01-1435 01:0
    التحية لك يا الجعلي والف الف الف مبروك علي هذة النتيجه المشرفة لفريق الهلال والكورة السودانبة بصورة عامة مثل ما ذكرت يا جعلي يوم امس كان يوم سعيد لكل من يعشق الهلال علي هذا المستواء البطولي وليس غريب علي الهلال ان يفغل اكثر من ذلك ولا نريد من الاعلام التدخيم مثل ما قال المدرب القدير النابي حتي نصبح ذي الصفوة بعدين تجينة الكفوة وايضا التحية موصولة الي الاستاذ الظريف كككككككككككتتتاححححة ونقول لهو ماتشوف شر واجر وعافية ربنا يديك الصحة والعافية
  • #7
    محمد علي يحيي 05-01-1435 02:0
    أخوي الجعلي روق المنقة شويه لسع في شوط وأحذر العين الحمراء.. مع تحياتي للخلوق ابو رونق
  • #8
    سيف الدين خواجة 05-01-1435 03:0
    اخي الجعلي كنت عايز اوصيك هاتفيا لكن القلوب عند بعضها من ناحية ومن ناحية ازمة برد عاضة منعت صوتي منك والان التحسن بدا مع نسمات التعادل والقادم اصعب لكنه احلي خلي بالك الرد صعب جدا وكرب كرب كرب العنقريب ولي لقاء عبر الهاتف اذا تحسنت الاوال الجوية باتلحبال الصوتية لدي ومبروك الف مبروك فقط كما قال النابي بوعي شديد علينا الا نفرح اكثر من اللازم لان العودة صعبة شديد والكرة ما عندها كبير غير الجهد والتركيز والانضباط واتركوا الافراح شوية ما زال المشوار في البداية وحولوا الفرح لعمل بحب من اجل الكيان
  • #9
    كتاااااااااحة 05-01-1435 04:0
    شكراً استاذي والشكر موصول لكل من سأل عنى فمعينات الشفاء كانت اتصالكم وسؤالكم الدائم عنا .. انتم الاصل متعكم الله بالصحة والعافية واليوم ماشاء الله السحارة ماتسحرك (طبعا انت عارف السحارة منو ؟!!) اشوفك اليوم متجلى تب والله يدينا من رحمته المكبوبة فوق خلق الله كب .. وبالمناسبة الحمام نحن طيرناه زمااااااان انت عملته شوربة يا خي حرام عليك وكمان جات حمامة جديدة الا تطلع منها كوارع عشان لحمها معصعص عمرك سمعت بكوارع حمام ؟ مجرد سؤال ..
    الحمام انواع شوف الحمامة دي مكتوب على جناحيها الله ومحمد عليه الصلاة والسلام - صلوا عليه ياجماعة - سبحان الله

    image


    image


    image


    وحمامة ديمة عليها طائرة من التمهيدي



    image

    جابوا ليهم واحد عجوز يعلم الفروخ الطيران

    image





    وهذه لاتحتاج تعليق


    image







    هاك شوربة الحمام دي



    image


    image

  • #10
    منعم ابوناصر 05-01-1435 05:0
    تحياتى اخى الجعلى ونشكرك على هذا الرحيق الجميل والكلمات العذبه المموسقه0 بعدين اقول لناس على الطلاق ابوالهل خيب ظنكم الاحمر بس الحمد لله انكم انشغلتوا باغنية مالى والهوى لكن خاب فالكم ومن الان بقوليكم ا حسن ترددو من الخرطوم سلام الى الهلال الرفع التمام وكان احسن من الضاربو الحمام واخيرا اقول لناس على الطلاق وقفتكم معانا معروفه من مالى والهوى التى تتقنوا بها قبل المباره وذكرت ليكم بان الهلال بخيب ظنكم وقد كان ولكن انتم لسه املكم فى المالى ونا اقول ليكم البياكلو الاسد اخيرلو من الضبعه
  • #11
    هلالابى- أزرق دمو 05-02-1435 12:0
    ﻧﺤﻦ ﺍﺳﻴﺎﺩ ﺑﻠﺪ ﻧﺤﻦ ﺍﻟﻔﺮﻳﻖ ﺍﻟﻐﺎﻟﻲ ﻧﺤﻦ ﻣﻤﻴﺰﻳﻦ ﺇﺳﻜﻮﺭﻧﺎ ﺩﺍﻳﻤﺎ ﻋﺎﻟﻲ ﻧﺤﻦ ﻛﻼﻣﻨﺎ ﻣﻘﺮﻭﻥ ﺑﺎﻟﻌﻤﻞ ﻃﻮﺍﻟﻲ ﻧﺤﻦ ﺭﺟﺎﻟﺔ ﺟﺒﻨﺎﻫﻮ ﺍﻟﺪﺭﻭﻥ ﻣﻦ ﻣﺎﻟﻲ ﻧﺤﻦ ﺍﺳﻴﺎﺩ ﺑﻠﺪ ﻗﻤﻢ ﺍﻟﺠﺒﺎﻝ ﺑﻨﻄﻮﻻ ﺗﺤﺖ ﺃﻗﺪﺍﻣﻨﺎ ﺷﻮﻑ ﻋﻴﻨﻲ ﺍﻟﻨﺠﻮﻡ ﻣﺬﻟﻮﻟﺔ ﻧﺤﻦ ﻟﻌﺒﻨﺎ ﺧﻠﻰ ﺍﻟﺪﻧﻴﺎ ﺟﺖ ﻣﺬﻫﻮﻟﺔ ﻛﻌﺐ ﺍﻟﻄﺎﺭﻭ ﻗﺒﺎﻝ ﻣﺮﺣﻠﺔ ﺳﻨﺔ ﺃﻭﻟﻰ ﻧﺤﻦ ﺍﺳﻴﺎﺩ ﺑﻠﺪ ﻛﻞ ﺍﻟﺪﻭﻝ ﺧﺎﺑﺮﺍﻧﺎ ﺑﻨﻘﻮﺩ ﺍﻟﺮﺳﻦ ﻋﻘﺐ ﺍﻟﺒﻠﺪ ﺗﺒﺮﺍﻧﺎ ﺑﺮﺓ ﻭﺟﻮﺓ ﻧﻀﺮﺏ ﻏﺎﻳﺘﻮ ﻣﺎ ﻫﻤﺎﻧﺎ ﻣﺴﻜﻴﻦ ﺍﻟﺒﻘﻮﻝ ﺭﺍﺟﻴﻨﺎ ﻓﻲ ﺍﻟﺤﺘﺎﻧﺔ ﻭﻧﺤﻦ ﺍﺳﻴﺎﺩ ﺑﻠﺪ ﻧﺤﻦ ﺍﻷﺳﺎﺱ ﻓﻲ ﺍﻟﻜﻮﺭﺓ ﻧﺤﻦ ﺷﻔﻮﺕ ﻋﺪﻳﻞ ﻣﺎﻓﻴﻨﺎ ﺯﻭﻝ ﻣﺎﺳﻮﺭﺓ ﺑﻨﻐﻠﺐ ﺍﻟﺮﻳﺎﻝ ﺑﻨﺤﻄﻢ ﺍﻱ ﺍﺳﻄﻮﺭﺓ ﻧﺤﻦ ﺍﻟﺠﻦ ﻋﺪﻳﻞ ﺳﺒﺒﻨﺎ ﻟﻴﻬﻮ ﺧﻄﻮﺭﺓ منقول....
  • #12
    ابو تسنيم 05-02-1435 12:0
    [
    SIZE=4]التحية والتقدير الاستاذ الجليل ابو عثمان اجمل الاشياء فى بلادى الهلال والاجمل جمهوره والاجمل انتصاراتة والاجمل فى الحمام طيرانة المبكر عشان يتعلمو ثقافة المنافسة والصبر والنفس الطويل [/SIZE]
  • #13
    الامين عبد القادر 05-03-1435 08:0
    التحية والسلام اخوى الجعلى والتحية والسلام لاخوتى كتاحة وسيف خواجة وبعد الشر عليكم واجر وعافية ان شاء الله لكما امنياتنا للهلال واهلى شندى بالترقى لدور 16 وهذا ليس بغريب لابناء دار جعل واما هلال الملائين تسعدنا هز الشباك فى شيخ الملاعب رغم علاته والدفن هذه المرة خارج المقبرة واسألوا اتحاد السجم العام من علل ملاعبنافى بلد انعم الله عليه باعظم الانهار وملاعبنا بلاط وموكيت اخضر(نجيل صناعى ) مجازا والا الحرقة فى الحشى من الحالة التى وصلت اليها ملاعبنا والمصيبة متسمرين فى كراسيهم رغم العواصف التى عصفت بهم والسياط التى انهالت عليهم وهم لا حراك لهم ليكم يوم **** شكرا ابورونق شكرا ودبلل واتمنى ان يعى كل السودان دور الوطن والوطنية التى تتوجب علينا احترام علمنا الذى نقف اجلالا له والهلال واهلى شندى يمثلون الوطن وليس انديتهم ياسادة **** ودمتم للوطن والهلال فى حفظ الرحمن
أكثر
لا توجد مباريات
لا توجد مباريات
لا توجد مباريات