• ×

هلال الصمود يروّض الأسود

واصل هلال العشق الجميل مسيرة الخير والنور وفاز على أسود الجبال بثلاثية نظيفة ، مع العلم أن الهلال لم يكن جيداً فى شوط المباراة الأول خاصة خط الوسط المكون من المعلم ونزار وسيدى بيه وأنقذ جينارو مرماه من هدف محقق فى الشوط الأول بعد خروجه الخاطئ وإبعاد الكرة برأسه وكان ثنائى الهجوم كوليبالى والشاب محمد عبدالرحمن فى إنتظار الإمداد من خط الوسط الغائب الحاضر وكان خط الدفاع بقيادة مساوى وأتير وبوى وخليفة مهزوزاً بعض الشئ ، لم يتعلل أبطال الهلال بعدم توفر الأمن فى كادوقلى كما فعل حبايبنا الحلوين من قبل وإنما ثبتوا وصمدوا صمود الجبال ، وفاز النابى على ماو فى شوط المدربين الثانى حيث تعمد دفاع أبناء الجبال عرقلة المزعج كوليبالى خارج خط 18 وتصدى للضربة الثابتة الجنرال عبد اللطيف بوى بصاروخ كاتيوشا بعيد المدى سكن شباك الحارس فيصل حسين ... وأجرى النابى تغييراً موفقاً فى الشوط الثانى قضى بخروج سيدى بيه الذى تأثر بإيقاف الحكم الظالم وديدى الفاتح ودخل مكانه بشة وخرج نزار ودخل الشغيل وخرج الشاب جكسا ودخل الشاب وليد علاء الدين وبدأ الهلال فرض السيطرة وتحرك كاريكا بإيجابية وأرسل قذيفة لم يكن أمام المدافع محمد حامد غير أن يكمل مسيرتها داخل الشباك برأسية لا مناص منها وختم الثلاثية الدكتور بشة مستفيداً من تمريرة نجم المباراة المهندس مدثر الطيب كاريكا ... والغريب فى الأمر أن المدرب ماو لم يهاجم التحكيم ويزعم أنه قد ظلم فريقه لأن هلال العشق لا يعتمد على هدايا وإنما يحرز النصر خدمة يمين وعرق جبين ... ولقد قام المدرب ماو إن الهلال تفوق عليه بسبب فارق الإعداد وغياب بعض النجوم ، وسوف يلعب سيد البلد مباراته القادمة مساء الأثنين أمام الأهلى الخرطوم ويوم الثلاثاء يغادرنا فى حفظ الله ورعايته هلال الملايين لمالى ليلعب فى أول مشواره فى دور 32 ضد الملعب مساء السبت ... ومباراة الرد الأفريقية بمدينة كريمة الكريمة ...بالمناسبة المريخ فاز على السلاطين بثلاثية مقابل هدف أحرزها راجى وواوا و أوليفيرا وقال محسن سيد إن ضربة جزاء راجى وهمية والحكم ظلمنا !! لذا لزم التنويه .
*** هلالابى جديد لنج بالمدينة المنورة
إتصل بى الأخ جلال صالح من هلالاب المدينة المنورة وقال عندنا مريخابى تحول لتشجيع هلال الملايين وظننت أن الأمر مناكفة بين جمهور الفريقين وجاءتنى رسالة من الأخ على عبد الحى من هلالاب طيبة الطيبة ليؤكد لى نفس الموضوع وقال إن هذا الأخ إسمه عثمان محجوب السيد وأرسل لى رقم جواله ...وإتصلت على الأخ عثمان محجوب وأجريت معه حواراً ظريفاً بإعتباره هلالابى جديد لنج ووجدته داخل الحرم النبوى والرجل صاحب منطق قوى وخفيف الظل وفى أوقات كثيرة كنت أوقف الحوار لأنى لا أتمالك نفسى من الضحك وكما يقول مثلنا السودانى سمح الغناء فى خشم سيدو ... بس عن إذنكم ( نظبط الرأس بى كباية شاى كاربة ) سألت البطل الهلالى من وين فى الأهل !! فأجابنى من الشمالية منصور كتى ( قرية دقيرن كتى ) وأشجع المريخ منذ عشرين عاماً والأخ محجوب يعلق فى منتدى كوورة سودانية بإسم ( عالى النجوم ) وأضاف عثمان محجوب إخوتى مريخاب وهلالاب والمريخاب هم محمد والسر وأبوالقاسم والهلالاب حسن والسيد وعندى خال مريخابى فى البلد أحترمه جداً هو عثمان عبدالله وكذلك صديقى المريخابى الدكتور محمد أحمد عبدالرحمن ( الفيل ) بالمدينة فمازحته طيب يامحجوب مادام عندك الناس ديل وبحترمهم ليه تركت تشجيع المريخ !! فأجابنى حبوب الضغط والسكرى يعنى رخيصة !! يا أخى أنا المريخ يكون غالب وأكون عائش على أعصابى لأنه ممكن فى أى لحظة ننغلب !! عكس الهلال يكون لاعب أفريقياً ويكون مهزوم ورغم ذلك يقلب الطاولة فى أى لحظة وينتصر !! وسألت الأخ محجوب أكيد الصفوة هاجموك !! قال لى يازول !! ده كلامك !! ماخلوا لى صفحة أنقلب عليها ... واحد قال لى يعنى إنت بتشجع المريخ عشان الإنتصار بس !! قلت ليه يعنى إنت بتشجعه عشان إنهزم بس !! وقال لى آخر نحن بحثنا فى فيشك ولم نجد مايؤكد إنك كنت بتشجع المريخ !! فقلت له مادام كدى إنت زعلان مالك عشان أنا خليت المريخ !! يا أخى إمكن أنا سبب الكج ليكم ... وسألت الأخ عثمان محجوب عن أفضل لعيبة كان يحبهم بالهلال فقال ...هيثم مصطفى ومهند وكاريكا ... وأضاف بالله فى زول بيعرف كورة مايحب مهند الطاهر !! وسألت عثمان سؤال أخير عن قاصمة الظهر فى ترك المريخ وتشجيع هلال الملايين فقال بصراحة ... كمبالا سيتى !! وختم محادثته بعبارة زهجنا كل مرة ننتظر وننتظر ونطلع من التمهيدى وردد مسدار شعر ظريف يقول فيه :
وداعاً يازعيم .. والقلب زائد حرقة
وحباب سيد البلد أب فنيلتاً زرقة
موسم الخبت راح شمار فى مرقة
وجانا العالمى وفررر طرنا زى الورقة ...
ونقول للأخ عثمان محجوب بالخليجى ( صح الله لسانك ) ومناسبة زى كدة تستاهل ( عشاء بيك ) بالمدينة من حسن محجوب وفيصل عبدالمنعم وغيرهم من الهلالاب وبعد كدة من حقك تخلف كراعك وتستمع بى هوبة الغزال ، وربنا شافك من التمهيدى وناس البلدية وواوا وشيم لص وضفر والزومة ... وكما قال نصر الدين الشغيل الهلال عالم جميل ...ومرحباً بك فى صفوف هلال الساجدين والناس الصالحين ...وإنت ذاتك زول صالح ياشيخنا .
*** رسائل غنائية رياضية من الفنان صلاح بن البادية ** الرسالة الأولى من جماهير الهلال وهى تستقبل سيد البلد فى كادوقلى وتشجعه بكل حماس وتردد :
غار المساء والكون صبح ... عشان جمال إتأملوا
كل الحروف الفى الخيال بى لهفة جادو وماغلو...
قالوا الجمال ياغالى بيك كانت نهايتو وأولو ...
ونحن فى هواك ياغالى ..لا بنطيق بعاد لا بنحملوا ...
والرسالة الثانية من جماهير الصفوة الوفية لقائدها السابق الملك فيصل العجب وهو يحرز هدفاً فى شباك أكرم وتذكرت خروجها على يد كمبالا سيتى فى غياب العجب فأصبحت تردد :
نحن سافرنا وبعدنا وماعرفنا هواك بعدنا
كل مالاقتنا فتنة الفؤاد حنً ولفتنا
جينا بى لهفة مشاعر ليه تزحمنا الخواطر ...
والرسالة الأخيرة من إبن الهلال الجديد عثمان محجوب السيد بعد أن تحسر على ضياع سنينه بالمريخ ورفض مطالبة الصفوة له بأن يعود للمريخ بعد أن أنجاه الله منه وأصبح يردد *** فات الأوان والإنكتب على جبينّا الليلة بان ...وقال مخاطباً الهلال ...عشت من قبلك غريب ماعرفت تقدير الزمن ...أحبابى من قبلك دموع ...وأصحابى من بعدك شجن ...الله ...على القلب الإتحرق يوم إنفتح للجنة باب .
*** همسة الوداع
الكلام ده كيف ياشباب !! معقول حبايبنا الحلوين أصبحوا حبايبنا المحليين ... طيب البص الجديد ده يعملوا بيهو شنو !! الناس ديل بقوا عطالة بس يشربوا فنجان القهوة فى ضل الضحى ...وحتى فى المحلى داخل عطبرة هيثم مع كروجر عامل مشكلة !! وكشف ذلك جمال الوالى فى حواره مع الإذاعة الرياضية 104 وقال مشكلة هيثم مع كروجر ماصيام ولاحاجة !! وإنما هيثم عايز يتدخل ويفرض على المدرب تشكيلة 4/4/2 !! طيب ياجماعة ماهى نفس مشكلة هيثم مع غارزيتو !! وبهذه المناسبة نهمس فى أذن صاحب القلم الأحمر .. نديكم الأمين البرير سحبة لمدة إسبوع ليحسم لكم بعض القضايا العالقة .. رأيكم شنو ؟ مجرد سؤال .
امسح للحصول على الرابط
بواسطة : محمد عثمان الجعلي
 12  0  1.7K
التعليقات ( 12 )
الترتيب بـ
الأحدث
الأقدم
الملائم
  • #1
    كتاااااااااحة 04-22-1435 08:0
    عثمان محجوب السيد بطل من ابطال القرارات الشجاعة والطريف فى الامر ان الاسم عثمان محجوب السيد قريب من اسم اخونا علي السيد فهل يفعلها علي السيد كما فعلها عثمان السيد ليدخل كل منهما من باب الاسياد نرحب بالاخ عثمان السيد فى بيته الازرق الجديد وهو موشح بالازرق وعقبال القرياتى
  • #2
    كتاااااااااحة 04-22-1435 08:0
    رأيك شنو يا سمكمكونة نحذو حذو عثمان محجوب السيد ونسلخ جلدنا الاحمر ونتوشح بالازرق قبل ماياكلنا



    image
    الهلال
  • #3
    عبد الله بلل القرياتي 04-22-1435 08:0
    أولا لك التحية ياجعلينا ، وياشباب اليوم تستقبل مدينة الرياض عاصمة المملكة العربية السعودية أخونا وحبيبنا محمد عثمان الجعلى ، الذى أنتقل للظروف عمله في الرياضة ومن نقولك يأبا عثمان حاتوحشنا أووي ، نرجع لموضوع الكورة ، أول حاجة على الطلاق المدعو / محجوب دا ما مريخابي أصلي ونحنا كامريخاب حا نعمل لجنة تحقيق لتقصي لهذا الموضوع أذا أثبتته اللجنة صحة الكلام يعتبر أرتداد عن شعاره ، لكن أنا شاكي في هذا الموضوع بقول دي زوبعة من الجعلى ، ومن هنا يالجعلى اعتباراً من هذه اللحظة سوف نرسل مندوبنا للمدينة المنورة ، وهو سعادة الأستاذ / خلف الله بله ويأخذ هذا الرجل ويعرضه على طبيب متخصص في علم النفس ويشخص حالة النفسية والمالية واذا ثبت صحة هذا الكلام سوف يكون لنا كلام تأني ، معقول من الجامعة يرجع تاااني للسنه أولى ، ونتمنى لكم التوفيق في مشواركم الأفريقي ،
  • #4
    الامين عبد القادر 04-22-1435 09:0
    التحية والسلام اخوى الجعلى والتحية والسلام لاخونا الجديد عثمان محجوب السيد ونحن فخورين به وسعداء جدا ونطلب من اخواننافى رابطة الهلال بالمدينة المنورة عمل احتفالية باخونا عثمان ويستحق ان يتوشح بالازرق ترحيبا حار به وذكرتنى هذه باستاذه معنا فى منتديات ودمدنى من كم عام تحولت من المريخ للهلال وغضبوا اخوتنا شديد عليها وهاجموها ونحن وقفنا لهم بالمرصاد وقتها وهلال الساجدين يجبرك للانتماء اليه وادبنا فى الخلاف والعكنة دائما لايخرج من روح المودة والمحبة وادب الرياضة واخلاقها السمحة والسودان كله هلالاب ونفتخر *** ونتظر هلال الساجدين ان يظهر ويبان فى مالى ويحجز البطاقة من هناك ان شاء الله ولابديل غير ذلك *** ودمتم للوطن والهلال فى حفظ الرحمن والدعوة نوجها لاخونا عبدالله بلل ان يتوشح معنا بالازرق ويرتاح من على السيد فمارايك ودبلل ؟
  • #5
    سامي 04-22-1435 09:0
    السلام عليكم ياجعلي واقول لك وبكل الصدق مشجعي المريخ في قريتنا بالجزيرة هم2 فقط من الاف وال2 ذاتم نشاذ في القرية وهل تصدق الكلام دا ينسحب على معظم القرى المجاورة عشان كدا كل زول بشجع الهلال هو زول متوازن والجماعة الايام دي مصابين بدوار الكمبلا وربنا يشفيهم
  • #6
    السنجك 04-22-1435 10:0
    نديكم الأمين البرير سحبة لمدة إسبوع ليحسم لكم بعض القضايا العالقة...بدون تعليق
  • #7
    ابو عمار 04-22-1435 10:0
    انا كنت اتوقع ان سبب تركه المريخ وذهابه الى الهلال هو البحث عن البطولات الجوية الكبرى عند الهلال !!! لكن عندما علمت ان سبب تركه المريخ وذهابه للهلال هو هزيمته من كمبالا اطمأنيت كثير بل بقيت متاكد بانه سيترك هلالكم وتشجيع الكورة نهائيا في وقت قريب. ان لم يكن بعد مباراة الملعب المالي مباشرة !!! والله يا خونا عثمان في المريخ ممكن تعيش بحبوب الضغط والسكري وممكن تلقاها كان رخيصة ولّ غالية لكن مع الهلال خايف عليك تكوس حبوبا تانية وما تلقاها والله بنخاف عليك من روحك ذاتها يا عثمان وكتيرين الماتو من الهلال بي وجعتن . نحن صفوة والصفوة ما بسيبو المريخ لهزيمة عابرة وبعدين نحن كتار والخفة لينا مي كعبة !! اعرف مريخابي صميم يعشق المريخ بجنون وما بحب الكترة ودايما بقول انا ما بحب أي واحد يقول انا مريخابي انا داير مريخاب معينيين يشبهو المريخ شنو أي واحد يقول مريخابي !! عموما مبروك عليكم يا الجعلي الهلالابي الجديد اخونا (عثمان) القادم من مريخ البطولات الجوية المعجزة الى هلال البطولات المحلية . زول كان بحلق في الجو وساكن قلعة البطولات الجوية مع خمسة بطولات تاريخية ويرضى ان ينزل الى الارض القيعة بطوعه واختياره نقولو شنو يا الجعلي ؟!!!! الزول البنزل من جو المريخ لارض الهلال دة بنزل بي شنو يا الجعلي بي طيارة ولّ بي برشوت ولّ بقع وقعة لب وبالمناسبة مشجعكم الشهير لب بطرفنا ؟!!! مبروك صديقي الحبيب الجعلي بالهلالابي الجديد اخونا الحبيب عثمان وربنا يجعلو ليكم فاتحة خير للفوز بسيكافا بعد 84 سنة.
  • #8
    سيف الدين خواجة 04-22-1435 10:0
    اخب الحبيب كتاحة تعليقاته بالرسومات ساحره وساخرة وماكرة كرب الدخان يا ابو سرا باتع ولا تخافوا علي مستوي الهلال سيتحسن ربما هناك حمل لياقه زيادة وكثرة المباريات مع اجسامنا التي لا تحتمل ذلك كذلك للتغذية دورعلي اي حال فرق الاهداف بيكون فرق نقاط لصالحنا محليا ما تخافوعلينا ان نتعلم الصبر وما نستعجل فالمستقبل امامنا المهم المضي قدما خارجيا
  • #9
    منعم ابوناصر 04-22-1435 11:0
    اخينا الجعلى تحباتنا اليك ونتمنى ان توصل بسلامه الى مدينة الرياض وكما يقول اهلنا الكبار انشاء الله الدمام توصى عليك والرياض ترحب بيك 0 امابخصوص اخونا ودبلل اقول قبل ماتشكل لجنه لاخوناعثمان اتمنى ان تكون لجنه لعرض الكل على طبيب نفسى من اللاعبين والمدرب العنيد وحتى الجمهور المغلوب على امره والسبب منكم ياناس العالمى بعدين سلامة طلاقك يااخوى ماتفلح فى عثمان الرجع الصواب خلوا عثمان مسك الربح من تجروا الباقى انتوا صنقعوا للسماء بطيروا وال بتجروا شكلكم بتجروا والجرى حارسكم من زيكو 0 يااخى ودبلل انصحك طالما عندك نفوز وعندك طلاق قوى انتشكل لجنه الى مجلس الاداره ومحاسبة اللاعبين 0 وبعدين نحن نشوف لوانت رجعت الى الهلال هل نقبل بيك حاننظر فى الامر بعد ما نعرضه على السيد كتاحه الذى دعاكم للتدخلوا من باب الاسياد
  • #10
    ابوحسن 04-22-1435 11:0
    التحيةاخوانةالجعلي ونبارك لااخونا عثمان محجوب السيد الانضماممع القاعدة الزرقاء والتخلص من مسبب الامراض المستعصية وتشجيع هلال الساجدين وشوف الفرق بعدين حيث الراحة النفسية والجدية في كل شي من الانضباط والفرق الكبير من الصفوةوالتحية اخونا القرياتي ونقول ليك عقبالك وحصل القطار ذي اخوك عثمان اتخز القرارالصائب وهو فخور بهذة الخطوة نتمنة من خونا عثمان التواصل معنا عبر رحيق الختام حتي نتعرف علية من قرب
  • #11
    أوياط ناويلا 04-22-1435 03:0
    صدقني يا جعلتي مافي حاجة ضيعت الهلال والمريخ غيرأمثالك . ما دام كل من هب ودب صار يكتب حتى أصبحت الأعمدة زي ونسة قعدة الجبنة . الله يكون في العون.
أكثر
لا توجد مباريات
لا توجد مباريات
لا توجد مباريات