• ×

رحيق الختام

رحيق الختام --- محمد عثمان الجعلى
الهلال السودانى وشيلسى الغانى
هلال العشق الجميل يتعامل مع الأمور بواقعية وهو يطلب مباراة إعداد أفريقية مع فريق شيلسى الغانى الذى ينازل فريق ( أطلع برة ) بطل جنوب السودان بالخرطوم ، وقد فاز الفريق الغانى على بطل الجنوب بثنائية نظيفة فى غانا فى الدقيقة 56 من ضربة جزاء وفى الدقيقة 92 ، ومباراة الرد مع أطلع برة والغانى مساء الأحد بأستاد الخرطوم ، وربما تكون مباراة الهلال الودية مع شيلسى مساء الأثنين 16 فبراير ويقود الهجوم الغانى بسمارك إيدن وسالومو أشانتى ... والهلال لعب مع المهدية مباراة ودية غلب على تشكيلها عناصر الصف الثانى وكسبها بثنائية وارغو وجكسا وكان من ضمن التشكيلة سامى وعلى النور وسيمبو وفداسى والحارس الشاب يونس الطيب ، مع العلم أن جماهير سيد البلد كانت ساخطة على أداء الهلال فى مباراة النسور الدورية رغم أن سيد البلد كسب نقاط المباراة بهدف مهند الطاهر ، وهلال العام الجديد سوف يكون بإذن الله شامة فى خد الوطن وهو يلعب من دورى 32 مطلع مارس القادم ربما يلاقى الملعب المالى على أرجح الأقوال رغم أن الملعب خسر خارج أرضه بربع دستة مقابل هدفين من فريق سبورتينق المغمور ... ومباراة الهلال وشيلسى فرصة إعداد جيدة للفريق وفرصة إمتاع لجماهير الهلال الوفية التى يطربها العرض الجميل والعزف الأصيل على وتر الإبداع ، وكتيبة أبو الهل الإستراتيجية سوف تدك حصون العمالقة الأفارقة بإذن الله وشعارها المرفوع ( ورونى العدو وأقعدوا فراجة ) .. والهلال متعة وجمال فى سوح النزال .
*** الإسم فضل الله وإسم الدلع بقولوا لى العقرب
كنا نريد للوطن أن يطير بجناحى القمة فى مسابقة كبار أفريقيا ولكن ليس كل مايتمنى المرء يدركه ، فقد خذلنا المريخ كالعادة رغم فوزه خارج الديار على بلدية كمبالا بهدفين لهدف وأحرز ثنائية المريخ الباشا فى الدقيقة 37 من الشوط الأول وأحرز الثانى تراورى بعد أن أضاع ضربة جزاء وعادت له الكرة من تمريرة الحبشى شيم لص بعد أن صدها الحارس فى الدقيقة 80 ، مع العلم أن أصحاب البلدية أحرزوا هدفهم فى الدقيقة السادسة من إنطلاقة الشوط الأول بسبب خطأ مشترك من أكرم وعلى جعفر ... وطار المريخ رغم فوزه لأنه خسر فى الخرطوم بثنائية نظيفة ، وأسباب طيران المريخ متعددة منها إعلامه الذى يضع التشكيلة ويطلب من الجهاز الفنى تنفيذها ومجلس الإدارة يتأثر بما يكتبه الإعلام الأحمر فى هذا الخصوص ، والغريب فى الإعلام الأحمر تجد أحدهم يكتب ويقول إحنا ماقلنا يجب اللعب بإتنين رأس حربة بدل واحد !! طيب يا أخى أجدع القلم وأتعلم التدريب وتعال نفذ الخطة على أرض الواقع ... كما أن النفخ الإعلامى الكاذب صور الفريق بغير صورته الحقيقية ...لا أدرى لماذا تذكرت قصة ( الحنكوش ) الذى قابل أحد أعمامنا من ( ناس البادية ) وقال له ياعم ... أنا إسمى محمد وإسم الدلع حمادة !! إنت إسمك مين !! فقال له عمنا ( أنا إسمى فضل الله وإسم الدلع بقولوا لى العقرب !! ) نفس القصة دى حصلت على حبايبنا الحلوين الذين أطلقوا على فريقهم العالمى وهو يلعب فى التمهيدى !! بالله جيبوا لينا ناس البلدية ديل عشان نوريهم النجوم عز الضهر !! غايتو ربنا يكون فى عون الهلال أصبح كالسيف يقاتل فى الأبطال وحده ، بالمناسبة مفروض فى عملية التار الصعايدة يقطعوا لينا تعظيم !! لذا لزم التنويه .
*** رسائل رياضية من أغانى الطمبور للفنان محمد النصرى
نرسل تلاتة رسائل رياضية من أغانى الطمبور للفنان ود النصرى الرسالة الأولى من جماهير الصفوة وهى ترى فريقها يغادر من ( قولة تيت ) بعد أن كان قريباً من الوصول لدورى 32 بعد فوزه فى كمبالا بهدفين لهدف وتقول *** أرحل ياحمام وشيل أشواقى أوعك لاتغيب ...وصل كل مشاعرى وريدى لى دار الحبيب ... قولو قليبى يامحبوبى غيرك مابطيب ...أى ديار بلا عينيك فيها أكون غريب ...السبب المعذب قلبى وخلى الرأس يشيب ...فراقك يا أعز الناس بعد ماكت قريب ، والرسالة التانية من كروجر الذى ينوى تقديم إستقالته ويودع أرض النيلين ويقول *** أرحل ياحمام قول ليهو أصبر ياجميل ...ولو مالت على الدنيا عنك مابميل ...كيف أنسى البلد والخضرة والنيل والنخيل ... والوجه السحرنى جمالو والطرف الكحيل ، والرسالة الأخيرة من هيثم مصطفى الذى إشتاق لأيامه الخوالى مع الهلال وهو يرى أن اللعب فى التمهيدى بالنسبة له إشانة سمعة وتقول الرسالة *** مافارقنى طيفك لحظة فى ليلى البهيم ... وياما الشوق يرجع سيدو لى دارو القديم ... لابد الزمان يجمعنا والحال يستقيم .. وأنسى أيام شقاى وألقاك وأرتع فى النعيم .
*** همسة الوداع
الهلالاب ياداب يستعدوا للمشاركة فى أبطال أفريقيا فى مارس القادم وحبايبنا الحلوين غادروا المنافسة ( والله زى ما أقول لكم !! ) ياعالم أو ياعالمى حرام عليكم أحرجتونا !! معقول ندخل المنافسة ونلقاكم مافي !! يعنى نكتب ليكم حضرنا ولم نجدكم ولاّ شنو !! بصراحة عملية صعبة حكاية الخروج النهائى دى !! وبهذه المناسبة نهمس فى أذن صاحب القلم الأحمر إنتوا البلدية ليه خرجت ليكم !! عشان مانقلتوا الكفالة عليها ولاّ العملية فيها تصحيح أوضاع وكدة ؟ مجرد سؤال .
امسح للحصول على الرابط
بواسطة : محمد عثمان الجعلي
 11  0  1.5K
التعليقات ( 11 )
الترتيب بـ
الأحدث
الأقدم
الملائم
  • #1
    سامي 04-16-1435 10:0
    السلام عليكم ياجعلي هسع ملايين الدولارات الراحت للفرق الاوربية دي ممكن تجيب 7 من الفرق الافريقية القوية ويستفيدوا منها ويحفظوا ماء وجوههم وعلى الاقل لو اجتازوا التمهيدي دا يكون أحسن اها الان ارتحنا من الفشخارة والبوبار والايام الفاتت قبل مباراة البلدية في الخرطوم طايرين للناس في حلوقهم انا عالمي لاتكلمني انت محلي اسكت ساكت وهكذا لما البلدية خابت الخبر الاكيد قالوا البطانة اترشت
  • #2
    منعم ابوناصر 04-16-1435 10:0
    جعلى تحياتى ياخى ارحم شويه انت وفريق البلديه الضرب على الميت حرام نحن من الاول قلنا الابطال طريق صعب بعدين مافى جديد هم متعودين على الخروج من التمهيدى بس المره دى كان بحلموا يوصلوا 32 ولكن ايه يعملوا مع ليلة السبت 0 ويا حمام جيب السلام ودى الريده من كمبالا لناس الصفوه القالو عنيده حسب ماقال الاعلام السالب سبب كل بلاوى المريخ فريق محلى الدلع عالمى تمهيدى دلع عم فضل الله فى محلو لكن محلى عالمى ماتجى ياودبلل
  • #3
    أبيض ناصع 04-16-1435 10:0
    كنا نريد للوطن أن يطير بجناحى القمة فى مسابقة كبار أفريقيا ولكن ليس كل مايتمنى المرء يدركه ، يالجعلي الطيران ده حق الجماعة وحصري أما نحن بنحلق فوق في القمم. قالوا واحد طار قبضو أولاد حاج الماحي.
  • #4
    عبد الله بلل القرياتي 04-16-1435 10:0
    أول شيء يالجعلى سلام عليه ، ياخوى لا تسخر من الزعيم فالزعيم قدم مباراة جميلة جداً في كمبالا ستي وكل شيء قسمة ونصيب ، والسبب الذى أخرجه المريخ هو باسكال واوا الذي ضيع ضربة الجزاء في الخرطوم ، ونقووووووووولك هاردلك يازعيم أصلاً الكورة ما بتدى الحريف ، بتدي الكيشه ناس زعيط ومعيط الليلة فرحانين ومتكيفين وشمتانين ، أثبتوا أنو ليس لهم وطنيه وعلى الطلاق من أنتهت المباراة أم بارح تلفونات الهلالاب عملت لي وجع راس وخليك من رسائل الشماته ، وبقولكم لا تضحكوا كتير ، وعلى كل حال نتمنى لهلال السودان التقدم في الدوري الــ 32 على الطلاق يالجعلى لو شفت رسائل هلالابك أم بارح الا تعرف أنكم شمات ، ماعد رسالة ظريفة من الأستاذ / احمد الفكي ، ويقول فيها (هاردلكم وربنا يعوضكم خيراً منها )) ويالجعلى خلف الله بله قالك حمبر قابض الطير ،،،،
  • #5
    ابن الوهاج 04-16-1435 10:0
    قال نفخ اعلامي قال .. طيب يا جعلي الهنا انت هسع بتستنشق ؟ ما هو برضو بتنفخ زيهم؟ الله يدينا خيركم يا قبيلة بني الإعلام أحمرا" كان أم أزرق .. كلكم في الهوا سوا تصنعوا مما في و تمسحوا الفي و البعض يؤله و البعض الآخر يعبد .. مصيبتنا كبيرة و الله .. بس أكتر ما يزعجني ما يصدر من بعض أبناء العمومة من أمثالكم من شماتة علنية و كأنكم قد أحزتم الكأس طبعا" حا تقول لي نحن أحسن منكم بنطلع من بدري بل بنطلع في الآخر بس بيني و بينك الطلوع من قولة "تيت" أفضل من حرق الأعصاب و "الشرقطة" .. زعلتنا يا الجعلي عندما قلت أن المريخ خذلنا كالعادة .. يا راجل أوزن كلامك ... بس نحن ما بنشمت و بنقول الله ينصركم على "شيلسي" قاهر "أطلع برة" و كان تجيبوا لينا أول كاس جوية!!! أنا عارف طلامي دا سخن بس انت السبب ...
  • #6
    عثمان الحكيم 04-16-1435 11:0
    حبيبنا الجعلى مقال رائع والاروع فيه رائعة المبدع النصرى والجماعه يالجعلى خليهم يفكرو فى السنه الجايه لان الاتحاد الافريقى حايصنفهم مع ماقبل التمهيدى عشان نتائجهم الحلوه وقال العالمى قال
  • #7
    محمد علي ود الفاشر 04-16-1435 12:0
    تسلم ي الجعلي والله كيفتني بالنصري اكتر من طيران الحمام قالوا كلمة العالمي نزلوا الارشيف بعد المباره طوالي ؛؛ شكلهم حيشتاقوا لكلمة العالمي لكن ممكن ينظموا سيكافا يشارك فيها بايرميشن $ وبرشلونة بالاضافة الي كمبالا سسستي
  • #8
    هلالابى- أزرق دمو 04-16-1435 12:0
    مقال جميل ياصاحبى.. ديل ياخوى تصحيح الاوضاع زاتو مانفع فيهم.. أتاريهم مبلغين عنهم هروب.. هههههههه ههههههههه هههههههههههه ...( عالمى ولا تكلمنى )..هاك العالمية دى.. مريخ ناس جمال وصل المحطة الاولى.. من كمبالا طار خسر الرهان والجوله.. شوفو العالمى جاب الفضايح دوله.. شن فايدة فريق انجازو نقطة وشوله.. الخواجة حالف يستقيل من حالو.. قال مابدرب فريق احلامو مى زى حالو.. ناس بايرن ميونخ الليلة بسألو مالو..؟ تيم العالمى من كمبالا طار ..هن قالو.. ابراهومة عرف النومة قال مرضان.. هيثم سيبا عامل ليك كمان حردان.. لاعبين الوصيف فاضحننا العجزان.. فى التمهيدى مغلوب ديمة ياحبان.. هههههههههههه هههههههههه هههههههههههه تانى بتلعبو فى الابطال..هههههههه لا والله ياسيدى..التوبة لحبوبة...هههههههههههههههههه هههههههه.
  • #9
    ابوحسن 04-16-1435 05:0
    التحية لك اخةنة الجعلي نحنة طال ما المريخ بمثل السودان لكن نمن تجيب لها فضايح وكذب ما بينفعو معنا نخليهم عايشين وهم العالمي هم واعلاموم الفاشك يقيادة مذمل طبعايس نقول الله يكفينة شر عيونم الححححححححححححححححارةباي باي
  • #10
    الامين عبد القادر 04-16-1435 05:0
    التحية والسلام اخوى الجعلى الحال من بعضه فى الاعلام السالب طلع بجماعتنا فى العلالى وعالمى وبحثوا عن دور 64 ولم يجدوه وهاردلكم ياصفوة الجفوة ومارضيناهاليكم ابورونق ودبلل ونشوفكم العام القادم ارقى وانضر **** وياجعلى اعلامنا كمان مابقصر ونخشى ان توصلونا ذى اصحابنا للهاوية الله يكفينا شر اعلام التطبيل وين ياناس اعلام العين الحمراء وتلمسوا مع الادارة مواقع الخلل بدلا عن التطبيل *** فزنا بشق الانفس على النسور المغمور ولسه مادخلنا ادغال افريقيا *** الفشخرة عواقبها وخيمة والاعلام المريخى اصابه فى مقتل ولانريد ان ينطبق الحال معنا لهذا ندعوا للمنهجية والعقل والتروى فيما نكتب وجرح المريخ هو جرح الوطن ونختلف معهم محليا ونريدهم ان يهزموا من اصغر الاندية ونظل معهم خارجيا من اجل الوطن ****** ودمتم للوطن والهلال فى حفظ الرحمن
  • #11
    كتاااااااااحة 04-16-1435 06:0
    جعلينا نرجو السماح وبكده الرسالة وصلت الرسالة الثانية المريخ فرط واتمني ان يعى الهلال الدرس التحية لود بلل ود السيد وود عبدالقادر وشايف ود الوهاج ظهر جا من وين حبااااابو عشرة بلا كشرة والتحية موصولة لبقية الكوكبة التى تملأ ساحتكم الوارفة الظلال والله يديم المحبة بين اللونين وطبعا الكلام ده بزعل ودالسيد تعرف يا ود السيد القرياتى ده كان لقى فيك فرقة الا يلحسك المرقة اعمل حسابك شوية شوية عليه وحبه حبه زيد غرورك ومرة زيد الريده جبه
أكثر
لا توجد مباريات
لا توجد مباريات
لا توجد مباريات