• ×
الخميس 4 مارس 2021 | 03-02-2021
الرشيد علي عمر

شريان رياضي

الرشيد علي عمر

 8  1  14501
الرشيد علي عمر
زغني سااااكت...!
ابتهجي أيتها الدنيا السعيدة وهلال السماء قد فرد اجنحة الهناء ونثر دعاش المتعة الزرقاء ...
اقفزي يا نواميس الكون فرحا فالسماوي قد ظلل العشاق بسحائب الانتشاء وأمطرهم غيثا يسقون به أودية الجفاف ووهبهم مواعين الارتواء ليرتووا من فيض الدهشة وكما يشاءون حد الاكتفاء...
وكما أطلت حبيبتكم وحبيبة الشعب الازرق ووزارة الدفاع عن المكتسبات الهلالية بالمانشيت الذهبي (بدينا الموسم جوي... يا وصيف شن بتسوي)....؟
فاذا بالمغني يطلق حنجرته مخاطبا للمفتحين اضنينم (يا وصيف سيب الجوجوه وكل الدلاقين قلبم انكوى..يبهدلوك ويكرفسوك ويشرطوك والترجي راجيك عشان يفكك عكس الهوا...)
شن بتسو يا جنا انت فاكر الزغني دا بشبع...؟
وجبة الزغني دي ما بدبلا الا واحد بطنه خرسانة مسلحة..او النزلة المعوية ما تديك الدرب....(فلاجيل تكعيب كل ساعة)..
هللوا للتعادل مع سان جورج...تخيلوا الابواق الحمراء تكاد ان تنشطر نصفين من الفرحة بالتعادل مع سان جورج...حقا انهم ضعاف مرتبة...وضعاف منزلة...وضعاف طموح...وضعاف حضور...ويمتلئون وهما يكفي افريقيا برمتها...
سان جورج...؟ يا للمأساة...يا للجمهور المسكين المخدوع كل موسم جديد...يا للأقلام الكذوبة التى اودت بهذا الكيان الى الهوة التى ليس لها غرار وانزلته منزلة السحيق الممحوق المسحوق بالساحق والماحق حيث ركام البلا المتلاحق...
وحقا شن جاب لي جاب...
شن جاب الاسد للسنجاب...
شن جاب الاسياد للوصيفاب...
الاسياد وقبل ان يكتمل اعدادهم نادي المنادي بوجوب مشاركة اخوة لهم في نادي بن ياس يزمعون افتتاح منشآتهم الجديدة الممثلة في ملعب سمّوه الشامخة...
الشامخ للشامخة والزغني للدلاقين...وابطحني على بطحة ونص يا كرمرم...
وبرغم صعوبة القرار الا ان محبة اهل الهلال لاهل هذا النادي تحديدا تجعلهم يطوعون الظرف الاهوج ويروضونه لاجل عدم الكسر بخاطرهم...
كمبسة تردد والارباب عزم وتوكل...
وإن تردد او تلكأ او حتى رفض فالقرار قرار الارباب أليس هو المدرب ومدير الكرة ورئيس النادي والامين العام والعاشق الولهان...؟
كانت الاجابة بنعم...لان بن ياس لا يستحق الاجابة بلأ...
فكانت المشاركة خصما على الاعداد العام...
ولعبنا..وامتعنا...واشرأبت الاعناق تجاهنا لتشاهد السحرة الزرق وهم يعزفون نغم الهلال سيد البلد الما متلو شي...رقصت ابوظبي..انتشت الفجيرة...طربت دبي...زهت راس الخيمة...شرقت الشارقة...هللت عجمان...وغمزت العين...
وككيف ما تغمز العين والدلال بريقها...
وككيف ما تغمز العين والهلال قد كحلها بظلاله فارتمت على بساط الاجفان تسدل رموشها كفراشة حائرة تبحث عن المستقر وسط الاذهار ..اليس الحاجب بهلال...؟
وغمزة العين لها نشوتها...
وغمزة العين لها طعمها..
وغمزة العين لها سحرها..
ومن تذوق غمزة من حسناء يعرف ذاك الاحساس الذي يسري في المفاصل بالخدر الانتشائي اللذيذ..غمزة تريح حالي...غمزة تكيف بالي..لو عايز انت تحن ولا ترحم حالي جيب الزغني لجمال الوالي غاااااامزة...!
في الامارات الهلال سوى العجب...
في الامارات سطع الهلال كبريق الدهب...
في الامارات انتزع الهلال اللقب الصعب...
واضاف الكاس الرابع المحمول جوا...كنغو...صداقة قطرية..بني ياس ون وتو..وسو يا سو وصيفنا احبطو...وسو يا سو دلقانا عذبو...وسو يا سو ضلنا نجضو...
اذن في الامارات كانت المعركة الرقم وفي الحبشة الزغني ما يديك الدرب...
كاربوني دفع بكل المحترفين في الكشف الا لاسانا البراهو ابانا...
والنتيجة تعادل...وفرحوا....
فرح الغلابة وفرح اليابا والتابا...فرح مخستك الصيع فرتقو حفلته ...
لقاء باهت...مسيخ...وزاده المعلق المهووس بشاعة...
يوسف محمد يوسف دا ما معلق دا مشجع ترسو ..وترسو كتيرة عليه...
معلق جاء موفدا من اذاعة قومية انقلب الى مريخي سافر ولم نعرف من يعلق على اللقاء هل هو الحاج ابوسوط ولا خالد ليمونة ولا الشاكوش...؟
وعندما احرز ميدو هدفه الاكيد صدفه قام يكورك باسم عبدالحميد مطلقا حنجرته بكل قوة فتخيلنا ان عبدالحميد المقصود حتما كان ماشي مغمض العينين وقدامه حفرة مولعه فيها نار والشرار بيطاير حولها...ومعلقنا المفتون به بيكورك وكمن يحذره من مغبة وقوعه فيها...
معقول دا تعليق على زول جاب قون..؟ طيب لو كان ميدو دا سايق عربية وقدامه شاحنة وما شافا انت كنت ثكلت ولا حنجرتك طارت لي رُكبك...؟
يا عالم اختشوا..يا عالم عيب عليكم كده...يا عالم احترموا عقل المستمع...
طيب خلاص نقول انت فرحان بي قون ميدو ...طيب ما بتخجل القون دا دخل في شباك فريق زي حمام جورج دا..؟
طيب لو ميدو دخل القون بتاعه دا مثلا في بني ياس العذب الناس وجبنا منه الكاس ، كنت يعني بلعت المايكرفون ولا شنو...؟
اكيد تلميذ عبدالرحمن عبدالرسول ممكن نشوف منه اكتر من كده...
انتو قلتو ابوجريشة جا راجع بالتهاب...؟
يا والي المجرشة دخل الغاب اها بعد كده كيفن الفكاك...؟
--------------------------------------------
اماراتنا الحبيبة...!
شعب وسيم المحيا...خلقة واخلاق وفخامة حضور يشع بهاء..
امة الطيبة في دواخلها ساكنة مقيمة...
كريم...مجواد..مضياف...محب لغيره...وقمة النبل وفضائل الاخلاق...
انه شعب الامارات...هذا الشعب الراقي الجميل الحبوب الرزين المتعلم الواعي الفخيم الحركة والسكنة...
شعب الامارات مثال للنخوة العربية التى اتت في كتاب محاسن العرب...
شعب الامارات ابن مدينة فاضلة عجز عن وصفها افلاطون لانهم يعيشون على ارض الواقع ويكتب ذاك من وحي خياله الخصب
الامارات دولة جديرة بما يحدث فيها من نماء ومواكبة وحداثة ونهضة لان من خلفها شعب يعرف قيمة الانسان..يحترم الغريب ويعامله بحب وود وحكمة ورقي...
واهل السودان في الامارات غير...
لهم وضعهم ومكانتهم وحضورهم ويجدون ما لا يجده احد غيرهم لانهم اخلصوا للامارات العطاء فوجدوهم وقد بادلوهم الوفاء ...
وما يحدث اليوم ابان تواجد الهلال في ابوظبي ليس بالحدث العادي وليست مجرد دورة كرة قدم وليست فترة اعداد للهلال بل بات عيدا ينبغي ان يحتفى به موسميا..
عيد التآخي...عيد الوفاء...عيد التؤامة...عيد المحبة النقية..عيد الحب..الفالنتاين الحقيقي...
الضيف يحتفي بمضيفه..والمضيف سعيد بالاحتفاء به...والحميمية ثمار علاقة راسخة غرسها جيل المرحوم الفذ عبدالفتاح حمد ومازالت ناضجة وقابلة للالتهام في اي زمان واي مكان ...
قارنوا علاقتنا ببقية الدول العربية عندما نزورهم بغرض التنافس او الاعداد وما بين ما نجده في الامارات...؟
فرق كبير وهائل..أقله ان شعب الامارات يحترمنا ويسهر على استضافتنا وغيره يزرع في طريقنا الاشواك...ربما تعنصرا ضدنا او نظرة فوقية او غيرة غير مرئية..
ولكن في الامارات نشعر بالاحترام لانهم عرب بمعنى الكلمة...
يفوقون الاخرين ثراء ويفوقونهم ايضا تواضعا لذا رفعهم الله وباذنه تعالى يرفعهم حيث اوج المراتب ومراتع السمو ووسط اجواء الطهر والعفاف والنبل الملائكي...
شكرا امارات الخير..
شكرا بني ياس...
شكرا السبعة امارات بدون فرز...
وشكرا جمهورنا الحبيب هنالك...
جالية عظيمة تستحق ان تلتهب لها الاكف بالتصفيق حد الادماء ولقد قدمت ولم تستبق شيئا لاجل هلالها الكبير...
وانشاء الله يوم شكركم ما يجي..
وانشاء الله هديتكم بطولة الابطال ..آآآآميييين...! ابقوا معي...!
و...للشريان ختام...!
الخبير معتصم ابوجميل افتى بان الوصيف تعبان وان مستواه لا ينبىء عن نجاح معسكر الاعداد وانه وان لعب بهذه الطريقة في الخرطوم لهزم...
وابوجميل من يومه لا بعرف ينافق ولا بعرف درب الجماعة البحوموا في حي الصفا لانصاص الليالي...
وعشان يتخارجوا منه بكرة يطلعوه لينا بلف صينية زي وارغو....
يا ابوشيبة ان كنت آخر من يعلم فهذه ليست قضيتنا ..كاربوني ماشي ماشي وبيشو جاي جاي وخلينا من نظرياتك المفخخة شاكلة الاستقرار وغيرها من الفرمالات...
اذا كنت انا اسامة انور عكاشة فانت فرج فودة صاحب الحقيقة الغائبة...
الزعله شنو..؟
الرجعو سريع كده شنو...؟
مشينا طقسنا وسالنا..قالوا الزول زعلان وداير ينفقع من الغيظ ..طيب السبب شنو...؟
الزول مشى لابّو كبير قال ليه نثرية الرحلة وينا...؟
ابّو كبير قال ليه النثرية اديناها لحاحا علي فالح بتسال لييه...؟
الزول قال ليه مفروض النثرية اكون مسؤول منها انا...؟
ابّو كبير قال ليه لو طالعة من الخزنة ممكن تسال منها بس دي من جيبي انا بس برضو لو مسافر امشي لحاحا هناك وبيقوم معاك بالواجب...
الزول قالوا سافر ومشى لحاحا وقال ليه انا داير النثرية عشان داير امشي السوق اشتري حاجات للفريق..
حاحا ما خلاهو يتم كلامه قال ليه انا بمشي معاك السوق والدايره بشتريه ليك...
زولنا زعل وقال ليهم انتو بتتعاملوا معاي زي الشفع يوم العيد انا راجع...
وكان التبرير الرسمي زولنا الاوكسجين ما نفع معاهو...
اوكسجين...؟ دا شربوا شراب لمن جاب من ضهره جنيات..
إتمرّضي..!
امسح للحصول على الرابط
بواسطة : الرشيد علي عمر
 8  1
التعليقات ( 8 )
الترتيب بـ
الأحدث
الأقدم
الملائم
  • #1
    الدبلوماسي 02-17-2010 11:0
    الاخ الرشيد
    تحية واحرام
    عايزك تحسب معاي حسبة بسيطة بني ياس هزم الوحدات بفارق هدف وسيد البلد شال الكاس من بني ياس بفارق هدفين والجماعة خسرو من الوحدات بالسبعة ومن الهلال في اخر مباريتين بخمسة اهداف
    كم يساوي الناتج النهايئ وفرق الاهداف معليش ساعدوني اصله المسالة معقدة شوية
    الدبلوماسي
  • #2
    الكناري 02-16-2010 10:0
    زملن كان شريانك ملي بالدماء الطاهره الزكيه ولكنه الان اصبح ملي بالصديد عافاك الله
  • #4
    هلالابي موت 02-16-2010 05:0
    والحق يالرشيد اللعيبة فيهم من قال الا روتانا
    وفيه من قال الا شقة لوحدي والنار مولعة

    نحن حملناهم هم جوا بالوالي وزاهر

    نحن معاك يالرشيد
    ننتظر عمودك بفارغ الصبر ونستمتع باقي اليوم بتعليقات الجماعة اكثر واكثر

    وهم زعلانبن من دلاقين دلاقين دي اطلقها عليهم كبيرهم مزمز والكل عارف كدا
  • #5
    ود القرير 02-16-2010 04:0
    ياأخوى انت مالك بتكتب بالمتر ؟ أعمل لينا علامه فى الكلام المهم 00000
  • #6
    ودالمكوك الجد 02-16-2010 03:0
    إفتقدناك يااستاذ الرشيد وإفتقدنا شجاعتك المعهودة لايام ....
    نتمناك دائماً كما أنت ضارباً بقلمك كل من تسول له نفسه المساس بالهلال ومكتسبات الهلال ...
    وفقك الله وواصل في ضرب الوصفاء الدلاقين ...
  • #7
    مصطفى علي محمد 02-16-2010 01:0
    واضح أن صحيفة كفر ووتر يقوم عليها أناس لا يفقهون في اللغة الانجليزية شئ. أما اذا كان كلامي هذا خطأ فمعنى هذا أنهم يحذفون بذئ الكلام اذا كان باللغة العربية فقط..
    ما أقرأه للرشيد يدل على أن الزول يقلي حقدا وغيظا على المريخ ليس لسبب سوى أنه سبقه على كل انجاز يفتخر به أهل الرياضة. حبيبنا الرشيد والله فعلا غلبان ومقهور من المريخ وما شدة الفرح بكأس فهيمة الا ظاهرة من فرح الغلابا.
  • #8
    أبو مازن 02-16-2010 01:0
    هلا هلا والله عفارم عليك يا كايدهم يا منجضهم يا مجضمهم ، مش عاوزين أسلوب مزمز بتاعكم ده؟ بقى ليكم حار؟ ما قلنا ليكم كلكم عورات وللناس ألسن . عالم ما ينفع معاها الا أسلوب الرشيد ده أديهم في التنك ولا تأخذك بهم رحمة انهم فعلاً دلاقين (وهذا الاسم أطلقه عليهم بوقهم الكبير مزمز شكاوي) يعني يا جماعة الراجل لما يقوليكم دلاقين ما جابها من عنده بل من عنديكم من مزاميزو رائد صحافة الاسفاف والسقوط المريع ،،،، اتمزمزي
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019