مفاجأة تاني نهي..!
الكلمة الحلوة تمسح الدمعة...
والهلال قدم لجماهيره الكلمة الحلوة فمسح دمعة الخذلان في التسجيلات وأرسل عتابا رقيقا لكل العشاق ( انحنا كده انتو كايسين شنو اكتر من كده)...؟
وهي رسالة ومعبرة...
والحمد لله ان منحنا نجوما بهذه القامة السامقة من الموهبة المتفردة...
والحمد لله ولقد انقذتنا العناية الالهية من السير في درب التخبط الوصيفي...
والحمد لله ان ثبّت قلوبنا ولم تزغ في الفتنة التى نسميها بالتسجيلات...
وياليت الارباب لم يصرح يومها..ياليته جعلنا على ثباتنا والهلال بمن حضر...واي مفاجأة هذه كانت تستحق الترقب او الاهتمام..؟ ودا فريق عايز مفاجأة..؟ دا فريق حيثما حل كان المفاجأة...حد يصرح بمفاجأة والمفاجأة عنده حاضرة عند كل لقاء..؟
وتاني لو عندك مفاجأة اديها الزاكي التيجاني محمد ابراهيم الخاتي ليه اربعة من الكلاب المتوحشة لي ناس برجاس وجلطة وحسن عبدالرحيم...
وتاني لو عندك مفاجأة خليها تخص علي احمد انشاء الله ينفقعوا بيها ناس محمدية..
وتاني لو عندك مفاجأة وديها الاتحاد العام انحنا متكفي وبالزيادة...
ولقد كانوا عند الموعد ...لذا جاء انهمار الفرح عندنا كبيرا...
وتلك هي الامارات تقف مشدوهة وتعرف طعم اللعب في الميدان وتفقه كنه الاثارة وتشاهد التشويق على عينك يا تاجر وعهدنا بالكرة العربية عموما انها تأثرت باللعب المصنوع وافتقدت اللمسة منذ ان غاب عن ملاعبها جيل عدنان الطلياني والاخوين فهد وناصر خميس ومهدي علي ودكتور حمدون بلوغا لعهد زهير بخيت وبخيت سعد ...
الامارات وقفت مشدوهة وعلولو آخر حلولو...قتال..فدائية..حرفنة...ذكاء...وان فتشوا جميع المحترفين لديهم لما وجدوا ربع ما قدمه اول امس علاء....
وواحد هلالابي هاتفني سعيدا باداء علولو (الجنا دا التقول كتبوا ليه الهلال باسمه وسلموه شهادة البحث)...
وسيدا آه من الفلتة العجيبة..نقول كبر خلاص وتقدمت به السن يقول لينا انا يا دوبك ابتديت وبكسر في سنون الرضاعة...بسم الله ما شاء الله ...حيوية...لمسات حنان آخر جنان...ولعبتين واحدة خلفية والتانية بالقدم التكالة ممكن ببساطة تدرس في الاكاديميات...دي ما شافا واحد من زمان زيدان سيد الاسم...من اعتزل الطاهر حسيب الناس بتفتش ليها في الميدان...كدي قولوا لي ميسي اعمل زيها لو ما اتفنقلت وجاك شلل اطفال...؟
وخليفة خالص هوت..مولع طبيعي...بيجضم وينجض ووقت الضرورة ممكن يشلخ...خليفة سهم نافذ وعقلية متوثبة للانطلاق...طرف يمين كامل الدسم ولسه القادم احلى...
الدعيع أمانا ما رجع الحارس الصنديد..أمانا ما ثبت الجنا وسطر عودته بتجديد العهد يقظة ومتابعة وثبات...امانا يا المعز لو ما خليت النزعة نحو الوصيفاب تعطش لمن حلقك يفوت الجفاف بي غادي وتلقى موية تشرب وتشرب وتشرب وما تروى يعني تمشي البحر وتجي راجع عطشان...
الدعيع اول امبارح قالها عديل للمعز لو عايز تمشي اعارة للدلاقين هسه تلحق ايفوسا...
وديمبا باري مرزبا في كل الاوقات...فدائية لي جعلي افريقي ناقصاه (تي) الشلوخ...
والمعلم الصغير مكرنة..دهاء...قردنة...ولعب بطريقة الكردنة..الله يطراك بالخير يا ود الكاردينال الكايسك الايام دي الهلال...
والقيصر اريتو يوم هوبتو ما يجي شكرها...هوبا بالامارات عذاب يا شمات...هوبا بالامارات دراهم ودولارات...هوبا بالامارات قالت دا الجنا الدخري عشا البايتات..
وكيف لا يتذوق اهل الامارات التشويق واللاعب السوداني مازال يتمتع بالمهارة الفردية التى قلما توجد عند الاخرين..وكما قال لي الحبيب ريكاردو من قبل لا يوجد فرق كبير ما بين البرازيل والسودان في المهارة الكروية ولكن اهل البرازيل يحترفون الكرة من اعلى المستويات لذا دولتهم تحرضهم على بذل المزيد منها اهتماما بالملاعب والناشئين والصقل الاحترافي ...
واضاف يومها انها نفس درجة العشق بين الجمهورين فهما يتعلقان بكرة القدم بجنون غير مسبوق وهو ما يحفز اللاعبين على تقديم ارقى المستويات من واقع التحفيز الجماهيري الضخم...
الهلال في الامارات غير..ولكن...
لا نعتقد باننا سنركن على ماقدمناه من لوحة بهيجة امام المحرق البحريني ...
ولا يعقل ان نسرح مع الفرحة حتى يداهمنا لقاء الغد فنمسح ذكريات المحرق السعيدة...
وهو تحد من نوع جديد بالنسبة لنجوم الهلال حتى يكسروا المقولة القديمة بان اللاعب السوداني لا يستطيع تقديم مباراتين بمستوى واحد خاصة اذا قدم واحدة بمستوى الحلاوة التى التهمناها اخيرا...
وحتى على صعيد الهلال نفسه فالاخ عبدالمنعم شجرابي مازال يذكرنا كل حين بالطرق على هذا الجانب ان الهلال عندما يقدم مستوى مبهرا فانه يعود ليمسحه سريعا...
اذن نريد ان نرد على المقولة ...
وهذا يعتبر تحديا كبيرا لاخوة سيدا ليؤكدوا بان الاداء امام المحرق لم يكن (خرمة) وعدت ، بل هو نتاج موهبة حقيقية يتمتع بها افراد الفريق...
وبن ياس فريق كبير وله قاعدة جماهيرية عريضة ولن يرضى نجومه وفي مثل هذه الاحتفائية ان يتنازلوا بسهولة عن البطولة...
يعني لابد ان يعرف كل نجومنا ان كل الفرق ليست الوصيفاب الذين يدفعون دم قلبهم (سوري يدفعون دم قروش شعبنا ) في سيكافا ويشيلوا منهم الكاس ...
بن ياس فريق محترم وله حافز كبير وشيد ملعبا ضخما رائعا مواكبا للحداثة الكروية ولن يفرط في هذا اللقاء وسيسعى بكل جهد خالص حتى لا يكتب التاريخ انه وعند افتتاح ملعب الشامخة تلقى الفريق هزيمة من الهلال...
وتخيلوا ان تكون لدينا منشآت بهذا الحجم ونلعب في احتفائية الافتتاح فهل نتنازل بسهولة عن نتيجة اللقاء...؟
اللقاء القادم جعله نجومنا على سطح صفيح ساخن ...وجمهور الهلال لن يرضى باقل مما قدموا...ويطالبون بالكاس المحمول جوا للمرة الثالثة فهل يستجيب الاسياد..؟
--------------------------------
كاربوني وسياسة زحلقوني..!
ميشو البلقاهو كله بينيشو...
ومزمز يكتب عن المدرب ميشو والجنرال حاحا شغال هناااك بالتفاح اللازم عشان ينيشو...
اصلو من زمان مزمز هو سيدا..والجنرال هو سادومبا..واحد يصنع والتاني توووف جوه القون...
تخيلوا حاحا المرة دي قلب كل التوقعات..لا اشتغل بي حكام..ولا نجوم من الفريق المنافس...ولا مراقب بيعرف كيف يظبط البيانات..المرة دي عديييييل قال عايز المدرب ...
شفتو ليكم نادي بيفاوض مدرب فريق خصم قبل الكورة...؟
القصة دي مع النجوم انحنا لي هسه ما قادرين نستوعبا ووفود المقدمة وذكريات الولايات يقوموا يقبلوا على المدربين..؟
قال ايه كاربوني ماسورة مدغلبة ولازم يمشي قبل الفاس ما تقع على الراس...
الدلاقين ما بقدروا يصبروا على زول والمسلسل راجع لانو التفكير الان في ميشو مدرب سان جورج ومزمز عمل اللازم وصرف الاوامر وقريبا التنفيذ...
الزول الوحيد الصبروا عليه الدلاقين هو جمال الوالي..ودا بي سببه..كدي خلي جمال يقول انا عندي مشاكل في السوق او فلست او تاني ما بديكم قروش...والله الشافو بي ليلته في فداسي ما كضب...
حد بستعرض سيرة مدرب منافس بالاهتمام دا لو مافي نية لزحقلة كاربوني...؟
قلت ليكم الوصيفاب من زماااان اكتشفوا انو كاربوني ماسورة وما بجيب تمن عجورة بس الخجل كاتلم...
طيب دا هلع شنو..؟ هو سان جورج الراقد مستشفى دا كايس ليه حركة واحدة من حاحا ولا قضمة من تفاحة...؟
زحلقوني وانا ما ذنبي...كاربوني بعد حين يشكو حاله البئيس الرماه عند اهل الوصيف...
هو أي فريق بينفع فيه مدرب برازيلي..؟ تحت تحت سمعنا انو الوصيفاب زعلانين لانو كاربوني بيقول للاولاد اعملوا كدا زي ما بعملوا اولاد الهلال...
يعني بالعربي كده كاربوني ودع قبل ما الموسم يبتدي..مش قلنا ليكم الناس ديل اينشتاينات...؟
------------------------
نفطينو ولعت..!
النفطي ولع..
النفطي للوصيفاب نجض وافزع...
وياااهلاااااوة مع المرتقب من الهلع...
واحد في التمرين واظنه الزومة ابو رجل معووجة عايز اديهو باص الظاهر اداها ليهو في ساقه...قام نفطينا زعل وعبر...والنفطي لمن يعبر بيعرف كيف يوصف الحصل وبوري جد ظرافة اخلاقه..
قالوا ليك استلم الباص بي جاي وتووووف شات الكورة بي زعل في المدرجات..يعني ما داير معاكم عديل كده...او لو دي كورتكم اخير امشي محل ما مشت الكورة لانو حرام اقعد معاكم في ملعب واحد...
وكاربوني اتحمق..كاربوني نطط عيونه وصر وشه وكلبظ جضومه وقال بالبرتقالية ولد دا ما يقعد معاي دقيقة ويرجع مع السبعة على الخرتوم وعلى توووول...
والمعسكر كله يحنس...المعسكر مسكته الهلا هلا...المعسكر عمل لجان للاجاويد...يا كاربوني كدي قول بسم الله الجنا صغير ويا دوب بيتعود على الاولاد..يا كاربوني خليك انت الكبير المو صغير...يا كاربوني النفطي دا لو رجع لو سلمنا من جمال الوالي نعمل شنو مع اعلام الاسياد...كدي روق المنقة وبلاش انفعال وبنجيبه ليك يبوس كرعيك بس كدي اعمل رايح وجيبا على البر قبل ما يسمعوا بيها الجماعة يخلوا ريحتنا طير في دقير...
وكاربوني حالف يمين الولد ما يبراهو اثيوبيا...
وعندما استفحلت الازمة تدخل ابّو كبير...وعندما يتدخل ابّو كبير بكون الكلام بالضورارات...ويا كاربوني انسى وشوف في البنك الحساب...
وقالوا كاربوني شاف الحساب لقاهو اتندل بي لفخة تقول يا ليل فجاهم راجع وقال ليهم (ايوه هو ولد عنيد بس برضو ممكن يرجى منه)...
فكان القرار يسافر النفطي مع الفريق والسبعة يرجعوا براهم لخرتوم كرش الفيل..!
إتكرشي..!