جيبوا ليمونة..!
سا سا سان جورج...
ولن تتوقف العلاقة الكاثوليكية التى تجمعهم بالحظ...
وسيظل الحظ يترقبهم في كل خطوة ويشكل حضوره المعتاد...
وبمثلما يقتاتون من الحظ داخليا من ضهر الهلال وفي جاه الملوك يلوكون وآخرها مليار الرئيس البشير الهلالابي الانتماء فان الحظ سبقهم نحو اثيوبيا وسان جورج يعيش اسوأ الاوضاع زائدا انه اصلا فريق حمام وراقد مستشفى ...
وهلالابي مقيم باديس ابابا قال لي اقنعوا من (خيرن) فيها...سان جورج يعيش اوضاعا مأساوية واثيوبيا نفسها تشهد تدنيا في المستوى لازمها السنوات الاخيرة وباتت كرة القدم في المرتبة الشعبية الاقل كثيرا لان البلاد كلها تتوحد خلف العاب القوى...
ألعاب القوى هي اللعبة الشعبية الاولى ويتابعها الجمهور بشغف وباتت رياضة العدو التى يجني منها الاحباش الكثير من الحوافز الدولية وما جعلها دافعا مهولا لكل افراد الشعب...
وبات من المشاهد المألوفة في العاصمة الساحرة رؤية المواطنين من مختلف الاعمار يهرولون في الساحات صباحا وظهرا ومساء وهم يرتدون الزي الرياضي...
وما يساعد على الممارسة طيلة اليوم هو ذاك المناخ الدعاشي الذي يحرض على الابداع أي كان نوعه..واسالوا الجنرال صديق علي صالح المتواجد هنالك هذه الايام
واثيوبيا شهدت طفرة عالمية من خلال هذه الرياضة وما حفز الاسر على تحريض الابناء والبنات على ممارستها لان مصدر دخلها لمن يتفوقون فيها تجعل الاسرة تعيش في بحبوبة من الثراء...
اذن هو تمرين خفيف للدلاقين...
يرجع العجب للخرطوم او يحرز وارغو بتاع قون الشجرة ما فارق كتير لان الغريق قدام...والغريق ينبىء عن مواجهات حتما ستعيد الامور الى نصابها والطيش الى مطيشته والدراويش الى دروشتهم ...
يا وصيفنا قشة ما تعتر ليك بكرة بنستمتع وكتين تنطط عينيك..!
والداير يتابع كورة سان جورج بننصحه يجيب ليمونة..
اكيد ما قاصد المشجع..!
------------------------------------------
تبكو بس..!
عدنا..
ورجعنالك...يا سمح..يا زين..يا بعاتي الدلاقين..
والفلم دوّر والحبيب بعد غيبة هلاّ ونوّر...
و للموسم الجديد من قولة تيت للعقول فوّر...
ولفرحة الدلاقين بالنفطي والمواسير بوّر...
موسم اندروس تبكو بس...
سيد البلد زمجر هدر وبالامارات قال ليهم جاكم عنتر ..قلب الهوبا ...عزف الوتر ..نضم الكفر.. وللشمات هبر...
الاولاد خرمانين خرمة شديدة خلاص...
الجنيات ديل جحمانين كده ما لعبوا ليهم سبعة سنوات ولا دي زعلة من عدم لقيا الوحدات..؟
خرمة قدر دا...؟
المرة دي البداية من الاخر ولا شنو..؟
اكيد الارباب قال ليهم يا اولاد هاتوا من الاخر قاموا جابوا نهاية الفيلم لمن البطل يكتل الخاين ...
هوي اصبروا شوية انحنا عايزنها واااااحدة واااااحدة عشان نستوعب...
كده كتير علينا...بشويش بشويش وتاتي تااااااتي...تكملوا فرحتنا هسه اها بعدين نجيب ليكم فرحة من وين..؟
تدفقوا الروعة دي كلها في المحرق طيب خليتو شنو للدلاقين؟
قلتو شنو..؟ الاحلى لسه بعدين..؟ ياااامنت كريم يا رب العالمين...!
افتتاحية مباركة لكبير البلد الما متلو شي...العمل فيها اي شي وكل شي...ولي كشكشي...والدرب للكاس تقشي...وبداية اكثر من قوية ولقاء مباااااالغة كما يهتف حبيبنا كابتن طيار ابورداد الديمة مع الهلال متعشي...
انه الرعب بعينه...
يا دلقون كتلوك ولا جوك جوك و نحيرك لمن تكورك الحقوني يا ناس دا الارباب ولا الفريد هيتشكوك...؟
شفتو ليكم فلم رعب بيبدأ بمشهد مخيف يخلي الواحد يخش تحت السرير...لا تشويق..لا اثارة..لا سواقة مشاهد بس طوالي اخنق فطس في الوالي...؟
انه الارهاب الما بخلي وراه (عقاب)...
ليه يا كبير تعمل كده تعذب دلقانا بالشكل دا...؟ يعني في داعي تحبطوا الناس ديل بالعرض دا وقدامهم كورة جاية...؟
ناس الهلال ديل عجيبين خلاص..حد يبدأ لابس لبس خمسة ...؟
حد يا دوبك يدشن في الموسم الجديد يبدأ يعشق بنمرة خمسة..؟
وقبل ما نقول يا هادي طوالي كده تخلونا نخش في لمسات حنان تفرز الكيمان وتروع الدلقان وتخلي النواميس تهتف بملء الشدق اهلا هلال الفين وعشرة ساحر كل زمان...؟
طوفان من الابداع...سحر يناغم سحرا ..شدوا يناجي شدوا...فخامة تغازل القا..وفتية تسربلوا بلمسات الحنان دلقوا رونق العطاء فاستحقوا الثناء...
وقبل ان يهل علينا كركعوب ود العفاض تعالوا نقلب صفحات الحبيب الاصلي فتحي ود الجعلي وماذا جادت قريحته من معاني لحظية...
ونقول لحظية لان ود الجعلي عودنا ان قريحته تنطلق عقب صافرة خاتمة اي لقاء وبفطرة مسادير مغزولة بي الحرف الحرير...
الليلة الهلال في سمانا امسى يلالىء...
فيه اسود فيافي حالفين يجيبو الغالي..
حرقنا المحرق القالو فوق في العالي..
سادومبا وظهر وجفلت نجيمة الوالي...
ولاننا متعطشين منه للمزيد فلقد هاتفته (حرم يا جعلي أكان تعقب) فاذا به يدوبي بمسدار شفاهة ...
ما شفتو الهلال بهر الخليج بي حالو...
اتجلى وظهر بدرا يلالي كمالو...
بالراس ابتدأ ودبلهن بي شمالو...
قول لي اهل الوصيف ارجونا ما تتعالو..
ما هذا الذي فعله سيد البلد في الامارات..؟ وان كانت ضربة البداية تاتي على هذا الشاكلة امات طه اكيد راجية الوصيفاب..تقبلوا وين..؟ تسووا شنو..؟ تشتكوا لمنو..؟ هرد الهرد وكبس الكبس والوالي دقس سادوما كبس..
سادومبا براهو...؟ ديل كلهم بقوا سادومبات...سادومبات ايه ..؟ ديل امبارح عملوا لمسات حنان راجمات...ارجم ارجم يا قيصر..اردم اردم يا فييرا...ونط ومتع يا دعيع... و..و...هذي الصخرة...منير اسكودا انشاء الله يوم شكرك ما يجي...!
ناس الهلال ديل حقهم بعرفوه براهم..
قالوا ليهم دي الكورة الاولى عملوها نهائي مبكر..
اتنين بالمقاس ويا بن ياس بل الراس..حلاقة قص القص وبالمقص...
لمسة حنان قص...اتاريه مهند كان حلاق...؟
صالون القيصر للحلاقة سبعة نجوم...سخانة للبكوس الساونا....حلاقة زيرو لمنتسبي الوصيف الزيرو...حمام بخار بالصابون السادومبي الحار...حمام أردني بالمسبح الشلباوي والجلاكوزي مقسمة بالوحدات...ماء فاتر..ماء بارد..ماء دافي (حاليا ببح)..ماء نفطي (حاليا تحت التنقيب)..ماء متورغن (سم هاري فاحذروووه)..ماء زلالي..وماء يا عيني ازرق هلالي...وتدليك خاص للحراس...والكايس البطحات يقيف في صف السادومبات...!
والكايس أمولادي يتر بعيد لي غادي..أمادو جن مصرم كدي شوفوا ليه قنبلاية مزمزية عشان تغطس حجره..؟ ايميل ممسوح طاير...خطاب جاي بي دي اتش ال..فتشوا ادراج مكتب قرن شطة يمكن يكون وقع لغزل المحلة...اقول ليكم حاجة اتصلوا بابوبكر مصطفى والباقي بتمو براه...
يا والي لقيتنا كيف...؟ تجري ورا المعز جري الوحوش غير كرومي ما تحوش...!
ويا المعز الرسالة من الدعيع وصلت ولا نترجم ليك عشان اكان كست تعاين هناااك تغمض عينيك...؟
سيدا...؟ اقول ليك حاجة قشة ما تعتر ليك...ناس القمش ديل اشتغل معاهم شوت الشوت ...اتبلم وتاني لا تومىء لا تسلم...مد بوذك خمسين متر ...وكان زعلك بجيب الشغل دا الهلالاب كلهم حيغنوا ليك غضبك جميل زي لمستك...
ورامين قدام...ومن محرق البحرين لي كرفسة الدلاقين...نكوي وما نبخ عشان تبقى مكوه ناشفة نشاف الحطب اليابس...وحابس حابس هلال الفين وعشرة جاكم مولع وكابس..! ابقوا معي...!
و...للشريان ختام...!
والله بجد أنحنا اولا بنعتذر لكل الهلالاب ..ولكل لاعبي الهلال..وكمان للرئيس الارباب..اكان ما جن مننا دا فريق كايس ليه نجوم تسجيلات..؟
دا فريق بطولات وكايسلو درهم حظ وبس...قنطار شطارة الف الالف...
الله يخذيك يا شيطان الطمع فوق كم..؟
والله يا يوسف محمد لو شفت خليفة هوت وهو بجضم في الكورة تحلف تقول انك ماسورة...
الم نقل بان الهلال بمن حضر...؟
الطمع ودر ما جمع....يا أحباب الفريق مؤمن حافظوا على المكتسبات...
شيخ أمارة دبي قال للبرنس دايرك تبقى امير لدبي..فرد سيدا حد يكون امير للهلال يفارقو...؟
وكما يغني الصحاف البدق القراف ويخلي ابوسوط يتلبد ويخاف (يا هلال العين انت زيك ويييين وين)...!
اللوحة دي لو كملناها بالعضوية يبقى كلو في محلو..ويبقى كلو سادومبا..وخلف الله موسى ذاااتو ببقى سادومبا...
وعظمة جمهور الجالية في الامارات تجلت عندما هاتفت بفطانة طبع (دايرين ود شمس الدين) في اشارة ذكية انها تقف قلبا وقالبا مع مجموعة شداد والحملة الجائرة التى تشن ضدها من قبل الوصيفاب...فهم زي دا ما بجي الا من اهل الهلال الحلوين حلا وما شينين شنا..!
الامارات سهرت للصباح والاندية الخليجية الكبيرة تتهافت للتباري امام سيد البلد الهلال..الكبير دايما كبير تقولوا لينا ماثاري وقورماهيا وضهيراب كينيا...؟ كل واحد بياخد مقاسه...والكويسة في الدلاقين بمدوا كرعينهم قدر لحافم الممزق...
بشة أنحنا معاك حتة حتة وما مستعجلين وبكرة احلى يا فلته...
هذي الصخرة..الشكية شنو يا اسكودا قالوا ليك ركز على النخرة..؟
الشامخ جضم الكورة في ملعب الشامخة...
إتشمخي..!