الماسورة اتحلجت..!

· مزمز مش عاقل...

· مزمز دفق مويته على الرهاب...

· مزمز سرح ورا الماسورة الى ان اتحلجت وعملت ليه في الصدى نافورة...

· حد عاقل يتابع ليه ماسورة مدغلبة زي الاسمه عم امولادي..؟

· حد يأمن واحد ناس بوكو قالوا ما بفرز الكدارة اليمين من الشمال..؟

· قالوا ليك اولاد الهلال بينتظروا بفارغ الصبر اللبس في الغرفة عشان ينعنشوا بالماسورة وهو يتلخبط في اللبس...

· الكدارة اليمين تمشي القدم الشمال...

· الانكل بلبسوه فوق الشنكار...

· الرباط الضاغط لو لفوه حول رقبة بيوديها ود اللحد...

· الشراب بعد مرات بيلبسوه في اليدين ولو ما بوكو صرخ فيه ما بيعرف قدوم الشراب من آخرو...

· ومرة الرقم بي ورا وكتييييير بي قدام...

· دا واحد تمشي واره يا مزمز لمن يغطس حجرك وزي ما عمل في الحوار اللقطة...

· حوار لقطة مش لقيط عشان ما تتداخل الصفات وتقولوا امولادي هو النسخة السودانية من معتصم ...

· مزمز قال يصطاد عصفورين بحجر واحد قام اصطاد ماسورتين بحنفية محلوجة...

· يعني الحرج بتاع الماسورة المتورغنة لسه ما انتهى قام جابوا ليهم ماسورة امولادية...

· نادي المواسير ودهن الحوارات بالجير...يعني بوهية خديجة البتبص بالبلكونة على الجيران نهي...

· جابوه فزعة بقى اكبر لبعة...

· امولادي اكد بان ما يتحدث عنه مزمز عن كندشة اعارة وعن اتهام لمجدي شمس الدين بانه مهندس السمكرة الخاص بالهلال وان الاعارة كانت اكذوبة ما هي الا افتراءات لانه اعترف بصحة الاعارة الى نساروا وانه لعب 13 مباراة من اصل 15 وما يدحض انه قعد في بيته او غيرها مما كتب حول هذا الشأن...

· نعم الضربة موجعة لمزمل ابوالقاسم لانه حتى اللحظة يتلاعب بالحروف ويتهم بان الاعارات باطلة وينهال هو وكتائب الدلاقين على مجدي شمس الدين لتلطيخ سمعته حتى لا يستمر في الاتحاد العام لاجل مصالح حمراء لا تخفى على احد...

· مجدي شمس الدين يتعرض الى هجوم فتاك لانه اداري قوي ويرفض ان يستغل لاجل الانحياز الى الوصيف وكما يفعل غيره من حووصات الاتحاد لذا فان ما يشهده من حملات جائرة يعتبر وسام مطرز بابهى معاني الفخار...

· مجدي شمس الدين ترعرع في امدوم يعني فطم بالاسترليني وعرسوا ليهو بالين الياباني ولمن يتكرع ساكت في مكتبه بدش دولارات..متكفي من بيتو وكده..!

· بسافر من عمره خمسة سنوات...العربات بموديل السنة...مكتب محاماة آخر مرة زاره زمن السيول والامطار...بيت حدادي مدادي تعشق فيه العربية لي نمرة خمسة...يعني بالعربي كده طريقة اغراء ببح...وكان دايرين تنطوا فوق الحيطة وتدوه (مره) تانيه فبت عمر ابراهيم ما بتنوا فيها... أها تقبلوا وين..؟

· مجدي ابوالجيلاني ماشي صاح الا ولما بات هدفا للوصيفاب في الحملة التى يستخدمون فيها المنطق الفشنك...

· ابشر بطول سلامة يا مجدي...اهنأ يا مجدي فلقد سطر التاريخ انك كبير بمواقفك وكنت عصيا على المتاجرة بمنصبك وركلت مغرياتهم البئيسة وشرفت منصبك داخليا وخارجيا ...

· وليس مجدي وحده وحسب...فالدكتور لا يقل عنه ان لم يكن يفوقه مقاما..

· نعم دكتور شداد..نتشاحن معه ونغضب لتحينه الفرص بالانقضاض على الصحافة الرياضية ونمقت اسلوبه ولكن لا ننكر دوره الكبير وتمسكه بالقيم والمبادىء ونزاهته وامانته وعفة يده (اللسان نهي يا بروف) وتعامله بروح القانون وحضوره الخارجي الدامغ والذي جعله احد المفاخر التى تتزين بها المؤسسات الدولية الكروية...

· شداد غريمنا وليس بعدو لنا وهو من آل البيت انتماء وحضورا فاعلا ومن وضعوا بصمتهم على المسار العام...

· ومازلنا نجابهه في المعارك ولكنا في نفس الوقت نحترمه ونعلن على رؤوس الاشهاد تضامننا مع اي جهة تدافع عن استمراريته وتطالب له بالاستثناء...

· والاستثناء يستحقه لان الركيزة التى قام عليها هذا الوسط هي خصلة الوفاء...

· والوفاء دائما يقدم لاهل العطاء...

· وشداد اعطى الكثير من سنوات عمره خصما على اسرته وعمله واجتماعياته...

· قال ايه معتصم رئيس اتحاد قال..؟

· -------------------------------------

هجين تكعيب..!

· خبر ولذيذ ومشوق...بس غير قابل للنفي...زي اخبار الكاهن..نفي نهي يعني نهي..

· العمدة مكتول في حوش الرئاسة..

· العمدة ود سعد (هولنا)..

· وبلغة ناس زين (هيلنا)..

· وبلغة اهل الهجين (مهولنا)...

· وبلغة جماهير الهلال ( هو منو دا)..؟ والاخيرة ربما يشاركون فيها ولدهم عنترة بن شداد سيما وانهم لا يرتضون له ان يساء ممن لا يعرفون قدره في الهلال...

· يبدو ان العمدة سعد راقت ليهو الحكاية مؤخرا ومسالة قيادته البعثة للامارات نفخت كثيرا في بالون رغباته ، والحوار الفلتة مع ابوظبي الرياضية قد جعل اوداجه تتكلبظ نشوة ، فاحس في لحظة انه قد يكون الارباب سيد الاسم وما دعاه ان يبهل رغباته الدفينة عند أول منعرج...

· قطعا هنالك من يضحك ويعتبرها نوع من انواع العكننة الدقاقة..او هو ضرب من ضروب تزويق العمود ببعض الفكاهة...ولكن حقيقة (لا هذا ولا ذاك)...والله يطراك بالخير يا استاذه منى محمود (فرسان في الميدان) وكم كنا نتمتع وانت تجدعين الجملة بتلك الطريقة التى تجعلنا نساهر الليل كله ومخيلتنا تقلد ايماءاتك ونبراتك ونحلف نقول وقتها ولن تكوني آخر المبدعات فخسرنا الرهان لولا بعض الاشراقات من نسرين سوركتي وتسابيح مبارك ورشا الرشيد...

· العمدة ود سعد ابلغ امانيه لبعض المسؤولين الكبار في امانة المؤتمر الوطني الرياضية وبطريقته المعهودة (ها ناس عمنا الارباب دا ما بدور يواصل حرم كان تدوني الهلال وكمان تدعموني لانو ما في زولن غيري بقدر يمسك قرون التور الهايج دا)...

· العمدة كان امين خزينة بلا خزينة وكان راضي...

· العمدة كان بيمشي مع معلا شيكان للتجنيس والشغل بيعمله التاني وكان راضي..

· العمدة من استقال عماد وقعد الطاش في استراحة محارب ونقز الشاذلي جابوه مساعد للرئيس قام فتح وشاف الما كان شايفه قبل كده وبقى بالارباب ذاااتو ما راضي...

· وبعيدا عن مطلب العمدة والذي لن يكون باية حال من الاحوال وان ولج الجمل سم الخياط وعليه ان يفيق ويشوف ميقات سباق الهجين القادم نقول بان الخطوة لها ما بعدها..

· وما بعدها يؤكد ان الارباب( قنع من خيرن فيها )وان مسالة رحيله اصبحت تتعلق بالوقت ليس الا وانه كان صادقا عندما قال ان استقالات الثلاثي كانت السبب الرئيسي في عدم تقديمه استقالته...

· اذن يتاكد لنا بان الارباب قد حسم امره حتى وان لم يغادر الى الاتحاد العام لانه ايضا وفي هذه النقطة تحديدا قد اعلن مساندته ترشيح شداد وهذا لا يعني بالطبع انه ارتضى لنفسه مقعد السكرتير لان منافسة شداد ضرب من ضروب المستحيل لهذه الدورة تحديدا...

· هذه التداعيات تسير على هذا الخط واهل الهلال في بياتهم الشتوي...

· وهو ما يعني اننا مقبلون على فراغ اداري كبير سيخلف مهالكا بعينها ان لم نتعظ منذ الان وعرفنا لمن تسند مقاليد الامور...

· ولن نمل تكرار المناشدة بان على جميع العشاق التسابق لاجل نيل العضوية والاقتراب من ساحة الهلال حتى لا يات علينا يوما ونقرقش بناننا ندما ونقول يا ليت اللي جرى ما كان...! ابقوا معي...!

· و...للشريان ختام...!

· الهلالاب يحبون المشجع الاحمر السر كارلوس لانه قومي بمعنى الكلمة عندما يلعب الهلال خارجيا ولا يتردد في مساندته وعلى المدرجات...

· والسر كارلوس تربطه علاقات طيبة بمعظم اهل الهلال وبحبيب البلد تحديدا بخلاف بقية الصحف...

· ونادرة فكاهية للسر كارلوس العفوي جدا في ترجمة مشاعره عندما قال (الهلال يغلبنا ويشيل بطولة ويسكتونا بطابق تاني..ويغلبنا ويشيل البطولة التانية ويسكتونا بطابق تالت...وفي وجود ناس سادومبا ديل الظاهر جمال الوالي حيبنى لينا ناطحة سحاب ) ..!

· واحد شمباتي متعصب هاتفني مغتاظا هانت يا استاذ وطه سليمان يقول داير يبقى رئيس لنادي شمبات...ويردف شمبات التى قادها من دفة الرئاسة العمالقة حسن عبدالقادر وابراهيم احمد الطيب ومحجوب الزبير يجيها الوصيفابي طه سليمان بتاع المهزلة الاسمها قنبلة...

· ووجدني اشاركه الامتعاض وربما اكثر منه...يا جنا شوف ليك اغنية هابطة جديدة تعمل بيها البوم وخلي شمبات لاهلها الذين يعرفون قامتها...

· يعني قبل ما نخلص من حنان لندن يطلع لينا كمان طه قنبلة...!

· استغربي..!