الوكيل زعلان مني !



× كل عام والأسرة الرياضية في السودان بألف عافية وخير ورمضان كريم .. اللهم أعنا على صيامه وقيامه وتجاوز عن سيئاتنا فيه وأرحمنا وأغفر لنا وأعتقنا فيه من النار.. اللهم آميين يا رب العالمين.

× مع استقبالنا للشهر الكريم .. استقبلنا أمس زعيم الأندية السودانية العائد من الثقر الحبيب بإنتصار أكثر من رائع.. بقدم الزامبي ساكواها بهدفين كل يحكي عن روعته وجماله.

× أكثر ما كان مميزا في المريخ في مباراة أمس الأول أمام حي العرب .. تلك الروح القتالية التي شاهدناها في الشوط الثاني من المباراة .. والتي قدم الزعيم فيها محاضرة كروية قيمة لكل من توقع تعثر الزعيم في الشرق.

× فكان الأداء جميلاً في كل خطوط المريخ .. إبتداء بالدفاع وإنتهاء بالهجوم.. أما الحضري فلم نشاهده كثيراً في الشوط الثاني حتى نقيم أداءه.. اللهم إلا عند إرجاع الكرة له من أحد المدافعين لبناء الهجمة المريخية.

× سألت أحد الزملاء الذين كانوا بجواري أمس .. عند تكريم كابتن السودان والمريخ السابق زيكو.. عن تلك الإمرأء التي تحدثت في التكريم.. فقال لي : أنها والدة النجم الخلوق زيكو.. فوردت في زاوتي بالأمس على أنها والدة زيكو.. عفواً زيكو.. لكن هذه المرأة المريخية الأصيلة أمك وأمنا جميعا في المريخ.

× كتبت أمس صحيفة حبيب البلد في ماشتها الأول بالخط الأحمر ( الشريف مبسوط مني) في إشارة واضحة منها على أن حارس حي العرب (فك) الكورة للمريخ.. أو أعطى المريخ فوزاً سهلاً.

× وفي إعتقادي أن هذا الصحيفة لا تحتاج إلى رد منا.. فيما تذهب إليه من خطوط ومانشيتات (عرجاء).. فالجميع يدرك تماماً أنها أنشأت لتشويه سمعة المريخ الشريفة النزيهة والتشكيك في إنتصاراته المستحقة التي يحققها.

× إذا كان الشريف مبسوط أمس..! فمن كان مبسوط يا ترى في مباراة الأسبوع الثاني من الدوري الممتاز..؟

× ومن كان مبسوط ..! حينما فاز المريخ بذات الثناية التي فاز بها أمس الأول .. في لقاء كأس السودان الأخير منْ ..؟؟

× سؤالين ننتظر أن تجيب عليه هذه الصحيفة أو أحد كتابها.. الذين ظلوا يسيئون لكل ما ارتبط اسمه بالجمال.. ومريخ الجمال.

× عجباً ..عجباً ..!! رئيس الهلال.. يهدد المريخاب من اللعب بالنار..! أي نار تلك التي يهدد يها برير الهلال الزعيم وإعلام الزعيم من التلاعب بها.. عرفنا أن النار تشتعل في الأمكنة اليابسة.. وعرفنا الأزهار تحت الأمطار .. لكن النار تحت الأمطار ..!! يا الله يا ستار.. دي ما عرفناها إلا في نيجيريا.

× موسم الخريف موسم امطار.. فأي نار تلك التي اشتعلت في نيجيريا ..؟ يا ربي يكون من (الطرفة.. ولا النترة .. ولا الضراع .. ولا ...الخ) ..؟ أي عينة من العينات في الخريف.. تشتعل النيران عز الأمطار..؟

× اللهم إلا يكون فيها (صبنة) في الجيب.. والصبنة : هي فترة جفاف قصيرة أثناء الخريف .. ومعدل إصابتها للاعبين ما بين ثلاثة وحارس من كل فريق .. لكن في (أبا) شكها أصابت الجيوب ..!! جيوب شنو ..؟ يعني ما عارفنها .. الجيوب (الألفية) أقصد الأنفية.. أصلوا الحساسية لافة اليومين ديل.. والأستناتين في صيدلية الوكيل بي (ألف) .. فيهو تسعة ألاف جرام.. !! تقولي لي ليه ..؟ أقوليكم طوالي: لأنو الشريط بي عشرة.. لما تبلع واحدة .. بي ومية طبعاً ما ساااي .. أنشاء الله موية مطرة.. المهم (نقطة) والسلام.

× الباقي يكون تسعة .. التسعة دي .. لما تجي مطرة تانية وتحس.. إنك عاوز تطفش.. أقصد تعطس.. طوالي (همشرليك) أقصد قرمش ليك واحدة .. المرة دي لو ملاحظين ما فيها (مطرة) أقصد موية.. لأنو القرمشة بعد النقطة ساهلة .. لأنو بيجي ليك (الحكام) أقصد الزكام.. وهنا بيكون في (رجاء) خارجي !! (الأمل) المحلي .. ترفع (الراية) أقصد المرايا.. طوالي (يحسبها)الظمآن ماء.. فتبتل العروق .. وينطفي المحروق..ما برضو لعب بالنار.. والحبوب بالدولار.. والمرة دي راجمااات عديل ..ما ثلاثة نقاط ولا شنو!!؟

× على كده تكون مبسوط .. بس ما زي الوكيل اللي هسي بفتش لي باقي إنبساطوا ومالاقيها.

× والله ديل حيرونا .. مشو يبسطوا محل الشريف الأصلي.. الببسط الناس .. خولو الشريف والوكيل زعلانين لي يوم الليلة.

× هسي الجماعة الما بخلجوا ديل .. خارين أغنية البت دي مالها.. ما كويسة وتمام.. يعني تاني .. تغني بأي طريقة ..؟؟ وتقول شنو يعني..؟.

× أنا بقترح ليها تغني يوم القطن..( الوكيل زعلان مني)

× على الأقل تضمن (خمستها) أقصد خمشتها.

× ما الدفع دولار .. الحصاد أصفار.

× غنوا ساااااي الحبة دي ما بتجيبوها!!

× شفتوا كيف نحن بنعلب بالنار..!!؟

قفلة كلام

× لو كان نيل المطالب بالتمني.. لكان الوكيل مبسوط مني.