• ×
الجمعة 29 مارس 2024 | 03-28-2024
السمؤل عبدالباقي

قطع شك

السمؤل عبدالباقي

 0  0  6656
السمؤل عبدالباقي
وهل اشترى ساكواها أتير ؟؟

× عجبا أمر إعلام الهلال هذا.. لا يعجبهم العجب .. ولا ساكواها.. قالوا المريخ اشترى الموردة في مباراة الخمسة.. يعني المغلوب دايما بايع..؟؟ ده بي فهمهم ده .. المخليهم لي هسي .. يفتشوا في الوكلا.. وبتاعين النظافة .. عشان يمسحوا ليهم صفرهم الكبير.

× المريخ ليس متذيل الترتيب .. ولا يحتاج الى مساعدة إي فريق في الممتاز.. بل يأكل بيده ولا ينتظر عطايا الآخرين.. عجزوا عن مقارعته في الملعب .. فلفقوا الأكاذيب في المريخ لتستأسد عليه الفرق الأخرى لتخدم مصالحهم.. ولكن المريخ هو المريخ.. لا يعرف كبير وصغير .. يضرب من طرف.. والصدراة بي جدارة واستحقاق.

× وعندما فاز المريخ على الموردة .. قالوا أن المريخ اشترى الموردة .. متناسين أن المريخ من قبل فاز عليهم في الدورة الأولى من الممتاز بهدف السكوهة الرهيب.

× ونحن بدورنا نسألهم.. هل اشترى المريخ .. الهلال .. وكم دفع ساكواها لأتير لكي يرجع له الكرة ويصنع له هدفا غال في شباك المعز.

× أعتقد ان ساكواها يكون اشترى من أتير المباراة بي عشرة ألف دولار.. قام دفع لي أتير ألف .. وقال ليهو الباقي تسعة ألف دولار بعد السكوهة ما تتم .. يمكن تنفصلوا وتشتت من الناس ديل مليان قروش.. عشان ما تضيعها ساااي.

× أتير المسكين كورة جاتو من الحضري .. هناااااااااااك من السوق الشعبي.. بدل يطفشها .. طوالي تكلها لي ساكواها.. المعز حسب ما قلبو فيهو الجهل.. ما عارف الحاصل شنو .. ضامن الكورة اتشتت من أتير.. أمبرش لما سف نجيلة الرد كاسل.. ما لحقها.

× ساكواها بقى مفتح كل مرة يقول لي أتير .. بعدين في الدورة التانية .. أتيريقول لي ساكواها : انت ما مضمون .. ساكواها يقول ليهو (على لسانو طبعاً الراجل جديد في البلد دي .. ويا دووووب أول حاجة عملها سكوهة الهلال) : ما تسهجل ياخ .. خليك زول سبور.. أنا (هامشري) اقصد هاشتري ليك رقشة.

× أتير قال ليهو : هوووي يا سكواها .. بطل حركاتك بتاعة (92) دي .. ساكواها يقول ليهو : 92 دي شنو يا زول..؟ أتير : شنو ..!!؟ بكسي دبل قبين.. يعني ما عارف 2_12.

× ساكواها : هووووي يا أتير كلمتي واحدة .. أنا في الحالتين ضاربك .. ضاربك ..ولو جيتنا هناااك بديك الباقي.. والتحويلة جاهزة .. بس مشغولين شوية اليومين ديل.. لأنو عندنا 11 مليار كده ..!! عاوزين نجهز بيها عدة (رمضان).. أتير .. رمضان بتاع قوون ولا شنو ..!! ورمضان قوون ما برضو عندو عدة.. المرة الفاتت قلنا ليهو ما تجيبها لينا في استادنا .. عشان نحن (ممثلين) إفريقيا..!! عليك الله رايك شنو في المخرج بتاعنا همشري..؟

× رايي إنو إعلام الهلال تاني ما يقدنا بي حكاية الشرف والأمانة .. وباع ما باع دي.. لأنو حصريا عليهم .. وهم ذاتهم بايعين لسكواها .. وراجي وهنو .. في آخر (صفقتين) لينا معاهم.

تأكيدات

× مباراة المريخ أمام حي العرب بورتسودان لن تكن سهلة على الإطلاق لكتائب الملك فيصل.. فمعركة الشرق غير المعركة التي كسبها الزعيم امام الموردة بخماسية نارية.

× وحذاري يا نجوم المريخ من التفريط في هذه المباراة .. فأعداء المريخ والنجاح يترصدون لأي تعثر قادم للمريخ .. خاصة في مباريات الولايات .. والشرق أهمها.

× نعم ان فريق حي العرب هو ليس بذلك الفريق المخيف فنتائجه في الدوري تؤكد على انه لن يستطيع الصمود أمام المريخ لدقائق معدودة.. فالزعيم الأفضل هجوماً وفي كل الخطوط .. والعرب الأسوأ في كل شيء.

× ولكن هذا لا يعني أن ينوم إخوان العجب على عسل الصدارة وضعف العرب.. فالعرب برغم ضعفه الكبير في الدوري الممتاز هذا الموسم وهو يحتل المؤخرة بجدارة.. إلا أنه في مباراة الغد سيكون غير .. وسيقاتل من أجل الحصول على النقاط .. أو على أقل تقدير الخروج متعادلا أمام متصدر الترتيب .

× وثقتنا كبيرة بنجومنا بأن يحققوا نصراً مؤزرا من الشرق يعزز به الزعيم حظه في الظفر بكأس الممتاز لهذا الموسم قبل عدة أسابيع من نهايته.

قفلة كلام

× هِمّوا يا صفوة .. وانفروا جميعكم لنصرة الزعيم في الشرق.

× وقطعا سنلتقي بإذن الله إن كان في العمر بقية.
امسح للحصول على الرابط
بواسطة : السمؤل عبدالباقي
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019