همس الهتاف
سولي ...ليكم
+ قبل ان تمضي العشر دقائق الاولى كان هدفين هلاليين ازرقين باهرين يسكنان شواطيء جزيرة الفيل ويقضيان على اية نزعة مغامرة في مهدها .
+ قلنا ونعيدها الدوري الممتاز في غالبه ضعيف فالهلال والمريخ لا يجدا من ينافسهما بقوة وتكافوء الا من بعض الفلتتات وضرب الحظ كا حدث للهلال امام اهلي شندي وللمريخ امام اهلي الخرطوم .
+ اخذ الهلال نصيبه من معاندة الحظ وقسمة القدر المخبأة في شندي وتاخرت لدغة المريخ الى موعد لقائه مع اهلي الخرطوم في وقت كان يعتقد المريخاب انهم فوق القدر والمقسوم ومعاندة الحظوظ حينما اطلق صحافييهم ابرتهم المخدرة المسماة بالعلامة الكاملة ارضاء للوالي الغالي البطايب طوالي .
+ كلو نصيب وقسمة...وكلو اهلي .
+ الهلال يمضي بثبات داخليا وخارجياً ...وظاهرة ضرب المنافسين من عصراً بدري تعزز الثقة والهدوء وتجعل الهلالاب الميامين في غاية الاطمئنان وهم يشاهدون هلالهم الغالي يسحق خصومه قبل ان يتوزعوا جيداً في ساحة الملعب .
+ تفاعل الرياضيين مع قضايا المجتمع اكبر دليل على عظمة الرياضة وامكانية مساهمة اهلها في الشان السوداني العام ، صور الطفلة المفقودة بانة التي تظهر دائماً في ملاعبنا تؤكد اهتمام الرياضيين بقضايا مجتمعهم واستعدادهم للدفع والمساندة والزود عن حياض هذا الوطن الغالي .
+ بشة واتير توماس يسيران في طريق التألق والاندماج الكامل في توليفة الازرق كعنصرين منتجين مفيدين ، شكرا بشة ، شكرا اتير .
+ العلامة الناقصة اعادت الامل لجمهور الهلال في التهام فرقتها للبطولة المحببة
+ الهدفين الذين احرزهما الهلال في الدقائق الاولى جعلا الاداء الازرق رتيباً مملاً في الدقائق التي تلت التسجيل من عمر الشوط الاول بدلاً من يكونا فاتحة شهية لنجوم الازرق للتسجيل في فرقة تراجع لاعبوها بغية ايقاف انهمار مهرجان من الاهداف الزرقاء ، وهي ظاهرة ظهرت في اكثر من لقاء للهلال امام اندية الممتاز
+ قبل الدقيقة السبعون كانت النتيجة خماسية زرقاء تنوع رماة الهلال في رجم مرمى بهاء الدين ضعيف الحيلة وسيطر لاعبو الازرق على اللقاء بشكل تام وتناقلوا الكرات برشاقة وجمال ، وحالتو الموسيقار الكبير وضابط الايقاع مافي .
+ الهلال يمضي داخلياً وخارجياً بكل ثبات وقوة اداء راقي ترتيب خططي موزون ومعتبر عناصر تختبر وتكتسب الخبرة شيئاً فشيئاً والتاج واتير وبكري على طريق الابداع والاندماج في التوليفة الاساسية .
+ هلال فنان...اهداف روعة بكل الالوان .
هتاف اخير
+ يا ماما ناس مزمز سولي ليهم .
+ قلتي شنو يا بت سولي دي شنو كمان .
+ يا حاجة البت قاصدا ليك سوري..ما تفهمي ياخ ..يمكن عشان اللسان فيهو لجنة..ويمكن حنكشة .
+ واقول يا حاجة مع ناس العلامة الناقصة كلو ماشي ...سولي...والا سوري .
+ الفرمالة الاخيرة انضربت...سقطت ورقة التوت...فماذا يستنجز مزمز ورفاقه من مسكوكات لغوية جديدة ثنائية الدفع..رضاء الوالي..والهاء الجمهور المريخي المسكين .
+ سولي ده صعب ياخ ...قاسوا وجاب مقاسو .
+ الحضري...انبرش يا البدري .
+ سوالينا وما علينا .
+ سولي ده اصلوا متعود على ضرب الجماعة .
+ مزمل قال كلو من ناس الغابة ...الشيء شنو...ابيي والا كيف .
+ التجي من سولي...يحملا موسى الزومة .
+ قلت لي يا طارق هربت بالماسورة .
+ ده جزاء الخيانة ونقض العهود...زاغ بالماسورة وطلعوهو ماسورة .
+ محلات سولي للتفصيل تقدم عروض الموسم...جلاليب من جميع المقاسات ...بالعلامة الكاملة...وبالناقصة كمان .
+ اهلي الخرطوم سواها...واهلي شندي راجيكم .
مسدار
ده هلال السرور.... يغلب ويقول عدولي
رقصنا الكفر...........غنينا عقد اللولي
انبرش الوصيف ..الضربة جات من سولي
خلت زول مصر.....بالحسرة قال آلو..لي