يا ناس (الخرطوم )معاكم الله !!

من حق الهلال عشية اليوم ان اقف بجانبة مرغما باسم الوطن ومن حق الخرطوم علي ان اقف معها بكامل احساسي ودعواتي ان يوفقهم اليوم ايضا بنتيجة ايجابية تعينهم علي تكملة المشوار ومساكين ناس الخرطوم مباراتهم لم ولن تجد الاهتمام ما دام الهلال ينازل الافريقي في ذات اليوم والعتبي لهم حتي يرضوا ويجونا بالخبر اليقين وثقتي في اولاد النقر ان يسعدوا قاعدتهم القليلة من ابناء حي الخرطوم (3) رغم شمولية الاسم فمرض الانتماء لفريقي القمة ضرب حتي ادارات الاندية الصغيرة ناهيك عن مشجعيها .

الفاتح النقر مدرب شاطر ويعرف ما يريد حسب امكانياتة المتاحة اتمني ان يقفلها جيدا كما يفعل امام الكبار اليوم في المغرب امام فريق كبير اسمة المغرب الفاسي وبالخرطوم يحلها الف حلال باذن الله واتمني الا يكون الصعود لدور ال(16) مجرد خطوة للامام منحتها الظروف للاولاد وان يثبتوا انهم ابطال الدوري الفعليين لان القمة كالعادة بعيدة عن حسابات الدوري كعادتة منذ الانطلاقة وثالث الدوري هو بطل المنافسة الضعيفة فالمركز الثالث اصبح طموح كل اندية الممتاز عدا الكبيرين لانة لا يمكن الوصول الية وان طال التنافس.

مجلس جمهورية الهلال التنفيذي اصدر قرار بان التذاكر الاكرامية لقاء اليوم قيمتها (1000) جنية فقط للرموز والاقطاب واعتقد بان الفكرة جهنمية لاستقطاب الدعم لمحتاجية وماذا يضير الهلال ان ذهب هذا الدعم لعلاج ود الجنيد الذي اساء فية رئيس الهلال المستقيل للمريخ الكيان ولوالية لمجرد ان سارعوا في دعمة علي طريقتهم وصحيح الاختشوا ماتو فهل تعثر الهلال يوما عن السفر لاداء مباراة بسبب عدم وجود مال ؟ ونحن نعلم بانة يعاني لكنة لم يحدث لة ذلك مطلقا طوال تاريخة فمن هو اولي بهذا المال ؟ ود الجنيد المستعجل ام من يفكرون في الغد الذي يجهلونة ..زبيني بينكم ود الجنيد لو انتظر دعم الهلال دة (بلحق امات طه).

مباريات الهلال لن تتوقف واستعدادة كذلك والانتظار لمسألة ود الجنيد العاجلة يضر كثيرا ولكن هذا هو حال الهلال لابناءة الذين يتجاهلهم عمدا ويسيء لمن يريد مساعدتهم في الله ..عاوز احكي ليكم قصة نجم كبير في هلال الملايين تغنت الجماهير باسمة وطربت لة المساطب الشعبية وارتجت لة المقصورة في زمن كان فية العطاء لاجل الهلال وحب الهلال يعني الكورة بالمجان مش الملايين المتلتلة ،اعتزل اللعب وذهب للحياة العامة وقد شاهدتة قبل فترة ليست بالقصيرة يرتاد مباني الاتحاد العام للكرة يستجدي مالا لاجراء عملية بعد ان فقد بصرة تماما فلم يكترث بة اي هلال مما دعاة للالتجاء للاتحاد العام الذي ارتدي شعار منتخبة وهو اول هداف لدوري الخرطوم ..اتخايل لي ادوهو (20) جنية وبيني وبين نفسي قلت احسن من الجماعة ديلك !

من الطبيعي ان يخطيء بلة جابر ومن الطبيعي جدا ان يعاقب من قبل مدرب الفريق ولكن ما ليس طبيعيا هو تضخيم الموضوع اعلاميا خاصة من الذين (ما عندهم موضوع) والذين يشتغلون بسفاسف الامور بالرغم من اننا حتي الان لا ندري ما هو الخطأ الذي ارتكبة بلة جابر ودعاة لمغادرة المران ومهما حدث فمن الضروري الا تصل الامور لهذا الحد واظن بان ادارة الكرة قامت بواجبها تجاة الموضوع لكن الناس الماسكة (المسواك) ديل يعملومعاهم شنو؟

والامر الغريب الثاني هو ان المريخ اتفق مبدئيا مع داريو كان لاعب الخريطيات القطري يعني معقولة بس يكون داريو كان ضمن الكتيبة الحمراء ؟ الناس دي جنت والا شنو مع العلم بان داريو كان هو اكثر اللاعبين احرازا للاهداف في مرماة وعلي المستوي الدولي كمان مقارنة بعدد المباريات التي لعبها هو نحن ناقصين والا المدافعين ماتوا.ولا ادري من هو صاحب هذة الفكرة الجهنمية ومن هم هؤلاء النافذين في القيادة المريخية الذين قاموا بهذة الحركة والله نحن مساكين اعتزلنا ساكت كان هسة سجلنا في الانتقالات الصيفية اذا كان دة الفهم والسؤال الذي يفرض نفسة من الذي يختار اللاعبين ومن هو كشيف النادي الاحمر الخبير دة الذي يجلب لنا الكوامر لانو ما دافع ثمنها ما دام فية واحد اسمو جمال الوالي بعمل العاوزنو بدون ما يسأل واذا كان الكلام دة صاح تبقي بالجد مشكلة ومشكلة عويصة كمان .

احداث مهمة

شكرا للارباب زول النصيحة ولو اختلف معة الكثيرون وبيني وبينكم حمدت الله الف مرة انو الارباب ابتعد عن رئاسة الهلال كمريخابي لاني اعلم وادري ذكاء وحنكة الرجل في اقلاق مضاجعنا دوما عموما لة كل التقدير والاحترام وهو يقول الحقيقة دوما باشادتة بمبادرة قدامي لاعبي المريخ بدعم زميلهم الانسان ود الجنيد وليس كما فعل فلان (الهايج سااااكت).

اتعجب واستغرب للذين (يبارون) رئيس الهلال المستقيل في تصريحاتة الهوجاء ويقرعوا لة الطبول ويفرشون لة الارض بالورود وهو لم يفعل شيء سوي الاساءة للمريخ وطبعا الما بتلحقوا جدعو وهو الذي فشل في اول امتحان بالخسارة بدون جمهور وهذا ما جاء لاجلة وذهب ..كفيت ووفيت يا ريس .

واحد من المطبلاتية الكبار صار يمجد في اسرة البرير حتي خلتها ...والا خلوها ساكت ! ودعمهم للاقتصاد الوطني ولا ادري ان كان الاقتصاد الوطني شامبيون والا (تشيبس) والا عصير ام هو جامعة كان وقفت في خشم بابها لازم تدفع بالدولار .دة اقتصاد زاتي يا جماعة افتونا يا ناس الاقتصاد عشان ما نسرح ساكت .

حدث مهم

علي حامد الفادني وجية الكوارتة في زواج الوجية فادي اعطي الفنانة ندي القلعة مفتاح سيارتة الانفنتي عشان (اتكيف) منها ..اتخيلوا ود الجنيد فاس الهلال واسدة المقاتل طريح الفراش الابيض بلندن ينتظر دعم اولاد البلد الجدعان..دي يسموها شنو بس؟؟

وبكر اجمل