• ×
الخميس 28 مارس 2024 | 03-27-2024
محمد عبدالماجد

القِصّة الكاملة لقمرية إستاد الهلال

محمد عبدالماجد

 0  0  4659
محمد عبدالماجد
صابنّها

القِصّة الكاملة لقمرية إستاد الهلال

محمد عبد الماجد

· أفضل رَدٍّ للاتحاد الأفريقي والأهلي المصري، الذي كان وراء قرار حرمان الهلال من جماهيره، قدّمته قنوات "بي إن سبورت" عندما التقطت كاميراتها، (قمرية) في مقاعد مُدرّجات إستاد الهلال الخالية!!

· والقماري تظهر في الأماكن الخالية والهادئة والتي لا حركة وضجيج فيها.

· القمرية التي ظهرت على شاشات قنوات "بي إن سبورت" وهي حائرة في مُدرّجات الإستاد، ظهرت في الشوط الثاني في الدقيقة 52,42 - أي في الدقيقة (53) من عُمر المباراة وهو نفس التوقيت الذي سجّل فيه ليليبو (شمسون الجبّار) هدف (تعامد الشمس المداري) على عيون الشناوي.. وهو أيضاً التوقيت الذي سجّل فيه ليليبو هدف (الإعادة) في القطن الكاميروني من نفس الحِتّة وفي نفس التوقيت.. ولكن الهدف في القطن كان في غياب الشمس.

· الحياة دي مُرتّبة.. وأي حاجة ماشة بنظام دقيق.. ما في حاجة (صدفة) ولا في شيء بيحصل ساي.. لو بحثنا بين علاقات الأشياء ببعضها البعض سوف نكتشف الكثير.

· طبعاً أكيد ناس الهلال لم يتعاقدوا مع هذه (القمرية)، ولا هي جاءت إستاد الهلال في مهمة رسمية – لأن (القمرية) ما عندها أيِّ ذنب.

· ولا عندها علاقة بالموضوع.

· لكن هذه (القمرية) لو ظهرت في مباراة الهلال والأهلي المصري التي فاز فيها الهلال بهدف (شمسون الجبّار) كان الشناوي والإعلام المصري وجمهور الأهلي تركوا (الشمس) وحكاية (موية الصرف الصحي)، وقالوا إنّ الهدف كان بسبب هذه (القمرية).. وإنّ نادي الهلال يستعمل (السحر) في تسجيل الأهداف.. وإنّ (القمرية) تسبّبت في تشتيت فكر محمد الشناوي.. الذي ترك ليليبو (شمسون الجبّار) يُسجِّل في مرماه هدفاً من (حلايب)، واتّجه بعد المباراة إلى مُطاردة طبيب الهلال الدكتور عوض الجعلي!!

· القمرية في الشعر عند العرب وفي الأغاني السودانية لديها (رمزية) ودلالة عظيمة.

· في الشعر العربي والتراث، اُستعمل (الطير) كرمزية خاصّة في المسائل العاطفية.. وفي الأدب كانت (الطيور) دلالات لأفكار ورسائل - ابن سينا في (رسالة الطير) جعل من (الورقاء) وسيلة من وسائل التوصيل.. وأبو حامد الغزالي أحسن استخدامها في (العنقاء) وفي (كليلة ودمنة) أشهر قصص التراث العربي تأتي (الحمامة المطوقة) أو (طوق الحمامة).

· وبصُورةٍ عامةٍ تُعتبر (الحمامة) رمزاً من رموز السلام وهي تستعمل للدلالة على الحب والحنين ولتوصيل رسائله.. و(القمري) عند العرب نوعٌ من أنواع (الحمام).. كما يدل (الغراب) و(البوم) على الخراب وتظهر (الصقور) في دلالات الحرب وعندنا في التراث السوداني يغني خلف الله حمد من كلمات الشاعرة الفارسة الشاعرة زينب بابكر: (أنا ليهم بقول كلام دخلوها وصقيرها حام.. سم أب درق البصقِّع جدري القيح البفقِّع).. عارفين أب درق البصقِّع جدري القيح البفقِّع دا شنو؟ دا ليليبو.. والفقيع دا نحن حاجة بنشوفها في (البيض).. وزينب بابكر تقول عن أخوها إنّه بفقع أعداءه فهو (جدري القيح البفقِّع).

· شفتوا الكلام دا كيف؟!

· وفي الشجاعة والشهامة والكبرياء عندنا (خوجل يا صقر.. خلي الرخم قاعدين).

· ورقية بنت حبوبة رثت أخوها عبد القادر ود حبوبة في بتريد اللطام (الأسد النتر بي جيهة الأبقار.. لمولو الأورط شايلين سلاح النار.. ود حبوبة قام ورتّب الأنصار.. في كتفية ديك كم شَبّعِن صقار)... وكتفية قرية في منطقة الحلاوين الصقور فيها شبعت من ضحايا ود حبوبة!!

· دا كلام عجيب!!

· ما عاوزين نمرق كتير من القمري.

· خلُّونا مع (القمرية).

· في المدارس الابتدائية درسنا لأحمد شوقي (عصفورتان في الحجازِ حلتا على فنن.. في خامل من الرِياضِ لا ند ولا حسن). والحالة هنا أقرب لحال (القمرية) التي ظهرت في إستاد الهلال في الدقيقة (53) من عُمر المباراة والمدرجات خالية والجماهير غائبة!!

· ومن الطير فعلاً الفطن.. لأن عصفورتي الحجاز في القصيدة استغرب (الريح) من وجودهما في هذا المكان القحل.. طالباً منهما أن يركبا معهم ليذهبا صنعاء وعدن الأمكنة ذات الخمائل والرياض.. فردت عليه إحداهما (قالت له إِحداهما والطير منهن الفطن.. يا ريح أنت ابن السبيل ما عرفت ما السكن - هب جنة الخلد اليمن لا شيء يعدل الوطن).

· الريح لا وطن له.

· وقمرية إستاد الهلال والمدرجات خالية من الجمهور، قالت للاتحاد الأفريقي والأهلي المصري (لا شيءٌ يعدل الوطن)!!

· لا شيء يعدل إستاد الهلال.

· الشاعر والصحفي سليمان عبد الجليل عندما هاجر أهاليه من وادي حلفا إلى حلفا الجديدة بسبب إنشاء السد العالي.. وقد كانت تلك الهجرة التي ترك فيها الحلفاويون بلادهم وديارهم من أجل المصريين ولإنعاش حالهم الاقتصادي.. عندها كتب سليمان عبد الجليل أغنية (الرحيل) التي يتغنى بها الفنان حمد الريح.

· في هذه الأغنية، مقطع بكى فيه سليمان عبد الجليل، على حال الديار والأهل بعد الهجرة.. هذا المقطع كأنّه كتبه سليمان عبد الجليل في (قمرية) إستاد الهلال.

· نفس الشيء.. (والقمري فوق نخل الفريق فاقد الأهل.. يبكي ويحن) قمرية إستاد الهلال فوق المدرجات كانت فاقدة الجمهور.

· المشكلة (القمرية) التي ظهرت على قنوات "بي إن سبورت" في إستاد الهلال كانت في حيرة.. وكانت برضو بتبكي وتحن.. تقول مُوصِّنها.

· ما عاوز أحلف لكن (القمرية) دي تقول جايبها (العليقي) معاه.

· الرسالة وصلت.

· لكن هل يفهم الاتحاد الأفريقي؟

· ديل لا بعرفوا ليك قمري.. ولا بعرفوا (جداد).

· بس سؤال لكل الناس.. إستاد فيه (قمري) وبظهر على ذلك النحو أثناء المباراة في المُدرّجات - هل يمكن للقمري أن يأتي لمكان فيه شماريخ وجمهور متهور؟

· إنتو مالكم عاوزين تجننونا.

· أكيد (القمرية) دي ما أول مرة تأتي لإستاد الهلال.. القمرية دي ظاهر عليها مواليد (الجوهرة الزرقاء).

· قديماً قلت إنّ الفنان حمد الريح هو أكثر فنان استعمل رمزية (الطير) في أغنياته.. ربما كان ذلك بسبب البيئة الجميلة التي جاء منها حمد الريح.. فقد جاء حمد الريح من جزيرة توتي.

· بدأ حمد الريح مسيرته الفنية بالوزين في أغنية لبر محمد نور من شعراء جزيرة توتي نفسها وقال: (إنتِ كلك زينة وعائمة كالوزينة)، ثم غنى لعبد الواحد عبد الله لطير المشارق في أغنية أهل الهوى (أحبابنا أهل الهوى رحلوا وما تركوا خبر.. بالله يا طير المشارق هل عرفت لهم أثر).. وغنى للقمري فوق نخل الفريق فاقد الأهل يبكي ويحن في (الرحيل) وغنى للحمام في (حمام الوادي يا راحل) لإسحق الحلنقي وفي أغنية الوصية لسليمان عبد الجليل غنى حمد الريح (السواقي النايحة وسط الليل.. حنين الدنيا ممزوج في بكاها... زي طيوراً في الفروع محتارة بتفتش جناها).

· حمد الريح حتى (طير الرهو) غنى له وهو طير أخضر جميل يظهر في الخريف وقد استعمله الشاعر إسماعيل حسن في دلالة (سياسية) عميقة وهو يتحدث عن الشريف الهندي.

· يعني موضوع (الطيور) دا ما ساهل.

· وقمرية إستاد الهلال دا ما جات ساكت.

· ما طلعت من فراغ.

· نحن أيِّ حاجة عندنا بنظام.

· السنة كلها تغالطوا.. لو قعدتوا لينا بنوقع ليكم الكلام.

· محمد وردي غنى أشهر أغنيات الهجرة والوطن والحنين لصلاح أحمد إبراهيم في (الطير المهاجر) والقسم الشهير في الاغنية (بالله يا طير.. قبل ما تشرب.. تمر على بيت صغير.. من بابه ومن شباكه بلمع الف نور) وقبل ذلك كان قد غنى وردي أولى أغنياته الخاصة لإسماعيل حسن (يا طير يا طائر) الأغنية التي لحنها خليل أحمد والموسومة في الاذاعة السودانية باسم (الحب والورود)... والتي يقول فيها : (إن شاء الله تمشي وتمشي يا طير لي تعود .. لي حبيبي تحمل الحب والورود).

· نرجع للقمري.. وما نطلع من الموضوع – لمن اطلع عليكم الله ثبِّتوني.

· الراحل العاقب محمد الحسن غنى من كلمات إسماعيل خورشيد (غني يا قمري غني واسمعني في حبيب عمري وصفك المقري.. غني يا قمري وأشدو بالنجوى.. غني للدنيا للغرام غنوى.. غني قول لينا عن أمانينا.. قول أغانينا والنغم يسرى).

· القمرية في إستاد الهلال كانت فأل خير عليه وقد تغنينا بعدها بالانتصار.

· في هذه الأيام تنتشر أغنية يرددها الفنان الشاب علي الشيخ (يا القماري غنن).. تمشي أي حِتّة تلقى الأغنية دي شغّالة.

· مشيت إستاد الهلال.. لقيت (القمرية) قاعدة.

· لو غابت الجماهير.. القماري لن تغيب.

· عبد الباسط سبدرات الشاعر والسياسي المعروف غنت له البلابل (وكيف نرفض رجوع القمرة لي وطن القماري).

· قمر وقماري.. وإستاد الهلال.

· تتخيّلوا الاتحاد الأفريقي رفض ذلك لجمهور الهلال وحرمه من الحضور؟

· الله نصرنا بفضله.. سوف نشاهد جمهور الهلال يوم 13 مارس والهلال يلعب أمام المنامة البحريني وسوف يقدم جمهور الهلال والأولتراس على وجه التحديد أقوى رسالة للاتحاد الأفريقي وللعالم كله.

· 13 مارس.. يوم جمهور الهلال.. وهو يوم سوف يتم فيه الحشد وإبلاغ الرسالة حتى يكون حضورهم في ذلك اليوم دافعاً للهلال عندما يواجه صن داونز وينتصر عليه إن شاء لله.

· سيد خليفة غنى أغنية مليانة بالتفاؤل والحياة للشاعر عبد المنعم عبد الحي الأم درماني ابن الجنوب (ابني عشك يا قماري قشة قشة).. ونحن بنبي إستاد الهلال طوبة طوبة.. لامن يبقى أحسن إستاد في المنطقة العربية كلها.

· سيد خليفة يقول للقماري ويتعلّم منها (أبني عشك يا قماري.. قشة.. قشة.. وعلمينا كيف على الحب دارنا ينشأ.. رغم العواصف.. برضو واقف.. ما ليهو رعشة.. علمينا يا قماري سر المحنة.. وكيف بتبني يا قماري.. من قشة جنة.. وكيف تخلي الحب دوام فوق المظنة.. وكيف نهلنا على مهلنا.. حبنا الما فيهو غشة).

· ما في أجمل من كدا.. نحن عاوزين على الحب إستادنا ينشأ.. الموضوع ما (قمرية) والسلام.

· الموضوع دا فيه كلام كتير.

· ما تقعدوا تعملوا لي فيها ما عارفين حاجة.

· أي حاجة في الحياة دي عندها (دلالة).

· ولكن هل يتعلّم الاتحاد الأفريقي؟

· والله (القمرية) بتاعة إستاد الهلال دي قوّمت لي نفسي أكتر من هدف ليليبو في الأهلي المصري.

· محمود تاور عنده أغنية ظريفة للقمري (طيري يا قمرية وركي جنب الزنكي واتصنتي القضية.. الزول الساجننو.. ساجننو تحت الزنكي.. مسجون بلا جنية... أطير ليك حدية.. وأغير على الظابطية.. أبقى ليك محامي وأفشل القضية).

· والله أنا أمسك ليكم موضوع (القمري) دا للصباح ما أفكّكم.

· قمرية إستاد الهلال دي (ركت) لي في جرح.

· حمد البابلي غنى للحمام شتّت ليك سكر.

· وعند حميد (سـوقـنى مـعـاك يـا حـمـام سوقني محل ما الحبيبة..قـريـبـة تـراعـي الـغـرام غـريـبـة الأشـواق حبيبة..يجيبا منام فـي منام...سوقني مـحـل مـا الـمـحـنـة وأيـادي تقطـر سلام..سـمـاحـة الـحـيـاة فـوق أهـلـنا وبلادي تقرقر وئام).

· تاني في كلام اكتر من كدا؟

· في أغاني الحقيقة طبعاً في يلوحن لي حمامات وفي حمام الأيك وفي يا حمامة مع السلامة (لفاتن حمامة) ولمحمد عبد الله الامي (آن حِمامي ناح حمامي.. عشان يا حبيبي.. ما حفظت زمامي) إلى أن يقول: (يا حبيبي رحامي.. ما استطعت أجيب معاي محامي.. يحمي الفؤاد حامي.. الحمى المن نار هواك الحامي).

· تفتكروا الاتحاد الأفريقي يقدر يفهم لينا الكلام دا؟

· لكن كيتاً على (الكاف) نحن بنقول: (يا القماري غنن غنن يا قماري).

· ..............

متاريس

· إن شاء الله تنقط في بريتوريا.

· وتصب عديل كدا.

· السنة دي (قمريتنا) دي ما بتطلع ساكت من البطولة.

· وكيف نرفض رجوع القمرة لي وطن القماري؟

· يوم 13 مارس.. يوم جمهور الهلال.

· عاوزين نشوف 45 ألف مشجع في المباراة.

· وصِّلوا رسالتكم.

· الكورة في ملعبكم.

· اضربوا الاتحاد الأفريقي بحضوركم.

· الهلال الشغل الناس هلالو.

· الهلال روعة.

· الله يديم الأفراح.

· ويديم الانتصارات.

· نقول يا رب.

· يوم 13 مارس.. أم درمان كلها زرقاء.

· ما في منامة مع المنامة.

· مباراة بدون ضغوط.. وبدون خوف.. تعالوا للمُتعة.

· .........

· ترس أخير: القطن قام ليه شُوك.
#ريمونتادا
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019