• ×
الخميس 28 مارس 2024 | 03-27-2024
محمد عبدالماجد

كدا ما عصرتوا على برشلونة؟

محمد عبدالماجد

 0  0  2901
محمد عبدالماجد
صابنها
محمد عبد الماجد

كدا ما عصرتوا على برشلونة؟

تعاقد الهلال مع السنغالي دياغني الذي تقول سيرته انه لعب في اكاديمية برشلونة ولعب لفريق برشلونة (ب) وشارك في بعض مباريات الفريق الاول لبرشلونة كلاعب احتياطي.
غايتو حسب السيرة عندو صورة مع ميسي.
وعلاقتو سمنة على عسل مع ميسي.
ميسي مشى باريس سان جيرمان. ودياغني قام كتر خيرو زعل وانتقل من برشلونة وجاء للهلال.
قلت ليكم (المضمار) دا بجيب كتير.
احتمال بعد الاضاءة تشتغل في الجوهرة الزرقاء امبابي ذاتو نشوفو في الجوهرة الزرقاء.
المهم موضوع دياغني مشى زي الترتيب.
دياغني ايضا لعب للمنتخب الناشئين السنغالي ولعب لمنتخب الشباب ولعب كذلك مباراتين للمنتخب الاول.
يعني سيرتو ما كعبة.
وممكن يعمل نقلة.
خاصة ان لمساته بتكشف انه لاعب ممتاز.
نحن في انتظار التطبيق العملي في الميدان.
ناس الهلال لقوا الموضوع ظابط ..قام تاني قالوا في لاعب محترف قادم من فريق برشلونة.
من برشلونة ب.
نفس الشيء.
ولعب في الاكاديمية.
اصلو ما قصر معانا.
يعني مر بنفس المراحل التى مر بها دياغني الذي تعاقد معه الهلال.
برشلونة فتحت.
لكن انتوا يا ناس الهلال ما عصرتوا على برشلونة.
كدا ناس ريال مدريد بيزعلوا.
اللاعب الثاني الذي قالوا انه قادم من برشلونة ب ايضا هو كاميروني الجنسية واسمه ريتشاد الين.
مهاجم قاطع وسريع ولعاب.
الكلام دا حسب الفيديو.
طبعا أي لاعب نتعاقد معه بقولوا عنه نفس الكلام.
وبنقول خير.
ان شاءالله يحصل خير.
برشلونة بقت شغالة بالكسر.
وإلّا الحاصل شنو؟
معقولة خريجي اكاديمية برشلونة كلهم سوف يلعبوا في الهلال.
الملاحظة المهمة ان سيرة دياغني وسيرة ريتشارد الاتنين بتتحدث عن تألقهما في سنة 2015 ونحن هسع في 2022م.
ملاحظة مهمة.
والاتنين على ما اعتقد لعبوا في اكاديمية برشلونة في عام 2012.
يعني الموضوع دا قديم شوية.
نحن عاوزين لاعب قادم مباشرة من برشلونة ب.
لاعب لعب في اكاديمية برشلونة في عام 2019 او 2018.
كدا بتكون مبلوعة.
لكن لاعب لعب في اكاديمية برشلونة في 2012 فذلك يعني ان الموضوع قديم شوية.
على العموم نحن ما عاوزين نحكم عليهم من الآن – لأن اعمارهم صغيرة فهم لم يتجاوزا حتى الآن سن الـ 28 سنة ..علما اني افضل دائما التعاقد مع محترف عمره 21 سنة او بالكتير كدا عمره 23 سنة.
ناس الهلال بقولوا عاوزين يخفضوا معدل الاعمار ..واذا كان هم فعلا عاوزين يعملوا كدا ..مفروض يتعاقدوا مع محترفين اعمارهم لا تتجاوز الـ 23 سنة في كل الاحوال.
خاصة بالنسبة للاعب الاجنبي المحترف لأن فرصة الاختيار امامك كبيرة – كما ان المحترف كلما كان صغيرا في السن كانت فرصة تسويقه والاستفادة من بيعه لو تألق مع الهلال سوف تكون كبيرة.
ممكن يقولوا ليك المدرب عاوز ليه محترف عندو خبرة …ونحن بنقول ان هناك لاعبين اعمارهم دون الـ 23 سنة ..وعندهم خبرة.
ما شرط الخبرة تكون للاعب صاحب الـ 28 سنة او 30 سنة.
العالم بقت ضيّق.
والخبرة بقت متوفرة.
يعني ما شرط اللاعب يصل لسن الـ 28 سنة عشان يكون عندو خبرة.
خبرة نحن عاوزين نعمل بيه شنو؟
عاوزين نعمل بيه (نقابة)؟
وإلّا عاوزين ننزلو معاش؟
بعدين الخبرة البتكتسب من الهند دي اخير عدمها.
الشيء الغريب في التعاقد مع دياغني والكاميروني ريتشارد الذي قيل ان الهلال ينوى التعاقد معه ان اللاعبين الاتنين بدون اندية ..وهما احرار.
هذا امر سوف يقلل من كلفة التعاقد معهما وهو امر تعمل به كل الاندية لكن في نفس الوقت هو شيء يعني ان اللاعب كان لفترة بعيد عن اللعب.
او انه غير مرغوب فيه.
المحترف الذي يتم التعاقد معه ويأتي من نادي بعد اطلاق سراحه هو الذي يحقق النجاح وهو الذي يمتلك فورمة اللعب والتنافس.
انت متعاقد مع محترف عشان يلعب معك مرحلة المجموعات التى سوف تنطلق بعد اسبوعين.
يعني لازم تجيب لاعب (جاري).
لاعب من (الميدان) وليس من (البيت).
نحن أي محترف جاء للهلال في السنوات الاخيرة ..قالوا محتاج ليه فترة عشان يكسب الفورمة ..وقالوا لنا كذلك لا تحكموا عليه الآن عشان اللاعب دا كان بعيد عن اللعب لمدة 6 او 4 اشهر.
وعندما تمر هذه الفترة يتم الاستغناء عن المحترف.
واي محترف تعاقده مع الهلال قيل ان المدرب هو الذي اختاره وهو الذي طالب بالتعاقد معه.
في فترة الكاردينال ايضا كانوا يقولوا نفس الشيء.
الجديد في الامر ان التعاقد مع لاعب تدرج في المراحل السنية للمنتخبات ولعب في الاكاديميات لا بد ان يكون لاعب منظم وتكتيكي من الطراز الاول.
وهذا مكسب.
ودي حتة ايجابية.
نحن بنقول اللينا والعلينا.
قد يكون الجهاز الفني للهلال طالب بهذه النوعية مخصوص حتى يستفيد من القدرة التكتيكية العالية لهم.
لاعب الاكاديميات لاعب بكون مختلف في أي شيء.
دي وجهة نظر.
نحن سوف ننتظر ونحكم بعد ذلك.
نتمنى ان تكون العين التى رصدت هؤلاء المحترفين عين فاحصة وعندها قدرة على الاكتشاف وتمتلك رؤية فنية جيدة.
الهلال الآن يمتلك 5 محترفين ..وربما يرتفع العدد الى 6 محترفين..هذا العدد من المحترفين يمكن ان يحدث نقلة كبيرة في الهلال لو كان الاختيار للمحترفين تم بصورة علمية وفنية.
لا يعقل ان يمتلك الهلال كل هذا العدد من المحترفين ويدفع مقابل للتعاقد معهم عملة صعبة ومرتبات ويوفر سكن فخيم ولا يحقق نتائج ايجابية في البطولة الافريقية.
هذا العدد من المحترفين كفيل ان يجعل الهلال يفوز بالبطولة الافريقية لو كان المحترفين في المستوى الذي يمكن الهلال من ذلك.
ان شاءالله الامور تكون ظابطة.
كنت اتمنى ان يتعاقد الهلال مع لاعب معروف ..وسبق للناس ان شاهدوه …خاصة اذا كنا نتكلم عن عناصر الخبرة.
يعني لاعب زي النيجيري احمد موسي كان ممكن يعمل نقلة في الهلال.
لاعب زي عبدالله حمدنا الله.
لاعب زي جونير اجاي لاعب الاهلي المصري السابق.
على المستوى الشخصي اتوقع ان يحقق محترفي الهلال النجاح …نكتب بصورة مطلقة وبرؤية عامة.
الاسماء التى شاهدنها مع الهلال اسماء مبشرة ويمكن ان تعطي الهلال الكثير.
مرحلة المجموعات سوف تنطق مبارياتها بعد ايام قليلة.
علينا ان ننتظر ونشوف.
الصبر ما كعب.
……..
متاريس
طبعا أي لاعب اسمه يقترن بي برشلونة بكون ما فيه كلمة.
بس الكلام دا ما يكون زمان.
قالوا ناس المريخ بفتشوا في محترف من بلد الوليد.
ما عندهم اكتر من كدا.
الحالة صعبة.
قالوا ليك المريخ شطب الشايقي واوقف 10 من لاعبي الشباب عشان تواصلوا مع ادم سوداكال.
في نفس الوقت مجلس حازم قالوا بفاوض في سيف تيري.
سيف تيري باعكم عديل كدا ..وبتفاوضوا فيه ..بقت على لاعبي شباب المريخ.
نشوف.
ونحكم.
ونقول.
….
ترس اخير : وبس.
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019