• ×
الجمعة 19 أبريل 2024 | 04-18-2024
محمد عبدالماجد

لسان حال المريخاب يقول : (يا حليل سوداكال)

محمد عبدالماجد

 0  0  1932
محمد عبدالماجد
صابنها
محمد عبدالماجد

لسان حال المريخاب يقول : (يا حليل سوداكال)

• لسان حال المريخاب بعد تسجيل مبارك عبدالله (سيل الوادي المنحدر) في كشوفات الهلال اكيد بقول : (يا حليل سوداكال).
• انتوا غرفة التسجيلات ما قادرين تحرسوها ح تحرسوا الاستاد والنادي كيف؟
• الجاكومي طلع أي كلام.
• طلع (فلول) ساكت.
• عليك الله يا الجاكومي الحركات البتعملها في المريخ ما تعملها لينا في الحرية والتغيير.
• كفاية علينا الجبهة الثورية.
• البلد ما ناقصة شعارات.
• ولايفات.
• طبعا في مريخاب ح يكابروا ويقولوا ليك والله لو بقينا على طبنجة ومرفعين وتمبش ما نقول يا حليل سوداكال.
• لو بقينا على الحديدة لن نتذكر سوداكال او نبكي عليه.
• واقع الحال الآن في المريخ يؤكد ان المريخ افتقد سوداكال.
• الزول الما قادر على (التنظير) دا ما تنتظروا منو حاجة.
• حازم (التنظير) لم يحتمله ..هل يمكن ان يحتمل الدفع؟
• وين الرئيس المناوب؟
• انت يا الجاكومي ما قلت انت الرئيس المناوب.
• مبارك عبدالله دا يمشي فيكم كدا كيف؟
• مرة مشى في امير كمال وضياءالدين وطبنجة وحمزة داؤود.
• ومرة مشى في الجاكومي وكابو وود الجزيرة.
• بمشي عادي.
• سيل الوادي المنحدر.
• اصلا السيل بعمل كدا.
• سوداكال لو كان الى وقتنا هذا مسيطر على الاوضاع والسيستم كانت صوره سوف تشعل مواقع التواصل الاجتماعي وهو يعلن بين الفينة والأخرى عن توقيع احد اللاعبين في كشوفات المريخ.
• الصور كانت دورت.
• لغاية الآن ما شفنا لينا صورة واحدة للقنصل حازم.
• حازم شكى من الضغوط وطالب من جماهير المريخ عدم (التنظير).
• يا راجل.
• القنصل ما عارف لولا هذا (التنظير) الذي فعلوه مع آدم سوداكال لما جاء للمريخ رئيسا او مرشحا لأن امر رئاسة حازم لم تحسم بعد.
• حازم قال المريخاب عذبوه بالرسائل والطلبات والتنظير – حدث ذلك بعد اول (48) ساعة لحازم في رئاسة المريخ.
• الصفوة مفروض ما يعملوا كدا.
• انت يا حازم الجماعة المعترض على تنظيرهم هذا – عملوا ليكم مسيرة واستردوا ليك استاد المريخ.
• عملوا وقفة احتجاجية اكثر من مرة امام مكاتب الاتحاد العام وإمام المكتب التنفيذي للمريخ.
• قفلوا الشوارع وحرقوا اللساتك.
• دخلوا الحراسات…وتعرضوا للاتهامات والحبس بما في ذلك اعضاء مجلسك.
• بعد كل هذا الذي قدموه من اجل ان تصبح رئيسا للمريخ تأتي وترفض منهم (التنظير).
• والله انت لو ما (التنظير) دا – مشجع مريخي لا يقبل بك.
• قال تنظير قال.
• سوداكال احتمل التنظير.
• والطعون.
• والاساءات.
• والهتافات.
• والضرب.
• ودخل السجن.
• ودفع دفع من لا يخشى الفقر.
• وبعد دا كلو ما سمعناه يشكي من جمهور المريخ او يعترض على التنظير.
• اساءات.
• وحملات صحفية.
• وهجوم.
• وانتقادات.
• واتهامات.
• وطعون وصلت المحكمة الادارية وبلغت الفيفا.
• وسوداكال يحتمل كل ذلك.
• لا كل ولا مل.
• ولا قال حاجة.
• انت يا حازم بعد اول 48 ساعة في المريخ عاوز تشكي من (التنظير).
• هى الكورة فيها شنو غير (التنظير)؟
• يعني انت تفتكر جابوك يا حازم للمريخ اختصاصي لجراحة المخ والأعصاب.
• يا حازم انت جابوك للتنظير دا.
• استحمل الكلام دا.
• وابقى زول ثابت.
• الهلال شال لاعب من معسكر المريخ وهو اللاعب حمودة بشير.
• الهلال من المريخ شال لاعب من (الكشف)..وهو اللاعب شيبوب.
• وشال الهلال من المريخ لاعب من (التشكيلة) الاساسية وهو اللاعب علاءالدين يوسف واللاعب ابوعشرين بعد ذلك.
• لكن اللاعب الشالو الهلال من غرفة تسجيلات المريخ وهو اللاعب مبارك عبدالله يبدو ان ضربته كانت قاضية.
• الناس ديل عملوا جنس جرسة.
• وبكاء.
• وعويل.
• يا جماعة ما كدا.
• الموضوع عادي.
• الهضربة لغاية الآن شغالة.
• بقوا يتكلموا برة من رأسهم.
• يمكن عشان ناس المريخ عارفين قيمة مبارك عبدالله والذي جلد دفاع المريخ وحارسه مرتين عندما سجل فيهم مرتين.
• لهذا انتقال مبارك عبدالله للهلال باقى ليهم صعب.
• مبارك عبدالله ..عندو في لقب الممتاز بتاع الهلال مثل ما لياسر مزمل والغربال تماما.
• الزول دا في حي الوادي حسم لينا الدوري وقت ينتقل للهلال ح يعمل شنو؟
• الحمدلله سوداكال اخلى مسؤوليته.
• المسؤولية كاملة لمجلس جمعية حديقة الموردة.
• السيستم على مسؤولية مجلس (قنصل حديقة الموردة).
• الاتحاد العام لو لم يحسم هذا الامر كان سوف ينزل هجوم وانتقاد في سوداكال.
• كان سوف يقولوا ان سوداكال هو الذي اضاع اللاعب مبارك عبدالله من المريخ.
• هسع ما في أي زول قادر يقول ليه حاجة عن مجلس جمعية حديقة الموردة.
• حازم ثبتهم من البداية وقال ليهم ما عاوز تنظير.
• حازم حاسم.
• لكن حاسم لجمهور المريخ وإعلامه.
• ما اكتر من كدا.
• على العموم نهاية مجلس تأتي بيه حديقة الموردة من الطبيعي ان تكون على هذا الشكل.
• غرفة التسجيلات فاتحة بحري.
• قاعدة في الصقيعة.
• في ناس اعتبروا ان الهلال سجل مبارك عبدالله لأن المريخ خطف اللاعب واتصل به وادخله غرفة تسجيلاته.
• هذا الكلام غير صحيح.
• الهلال هو اول من فاوض اللاعب واتفق مع ادارة حي الوادي وراعي الفريق اسامة عطا المنان قبل ان يسمع المريخ باللاعب.
• المريخ دخل في الموضوع وعاوز يوجه ضربة قاضية للمريخ.
• حتى اعلام المريخ كان يتحدث عن ان المريخ وجه ضربة قاضية للهلال وخطف اللاعب مبارك الذي كانوا يقولوا عنه انه نجم التسجيلات الاول.
• كانوا عاملينها فلاحة.
• لمن جاء الهلال وخلاهم يفهموا حاجة.
• هسع الموضوع بقى ليهم صعب.
• شلناه من الغرفة.
• من العضم.
• من عيونهم.
• مبارك عبدالله عمل فيهم كدا.
• طيب وقت موضوع سيف تيري يكتمل الناس ديل ح يعملوا شنو؟
• والله يا حازم ح تسمع جنس (تنظير).
• ح تشبع تنظير.
• بس خلى سيف تيري يظهر.
• يا تيري اظهر عليك الامان.
• الجماعة انتهوا.
• خلاص سلموا.
• رفعوا ايديهم فوق.
• ……..
متاريس
• عبدالصمد منن يجب ان يستمر مع الهلال.
• اللاعب عندما يكون في الهلال سوف تتوفر له الرعاية الكافية.
• منن يجب ان ينضج فنيا وهو في نادي الهلال.
• الهلال محتاج لمثل هذا اللاعب الفنان.
• كذلك عودة الشيخ محمد امر لا بد منه.
• الشيخ اختصاصي الضربات الثابتة..والهلال عندو مشكلة كبيرة في الضربات الثابتة.
• الدوري سوف يتوقف طويلا.
• المنتخب سوف يشارك عربيا في اواخر نوفمبر.
• وسوف يشارك المنتخب افريقيا في فبرائر القادم.
• وهذا يعني ان النشاط سوف يكون شبه متوقف في الاندية – عدا المنتخب والأندية التى تشارك في البطولة الافريقية.
• لذلك من الاصلح ان يكون منن والشيخ في الهلال حتى يستفيدوا من الجهاز الفني الموجود في الهلال.
• سوف تكون هناك معسكرات مغلقة ومباريات ودية عندما يشارك المنتخب الوطني خارجيا.
• الفائدة الاكبر عندما تكون هذه المواهب في حضن الهلال حتى تكتمل بدرا.
• هناك زحمة في خط هجوم الهلال ..ولا اظن ان الهلال يمكن ان يستفيد من اسكندر.
• اسكندر لم يقدم أي اضافة في الاهلي شندي.
• من الافضل للهلال ان يمدد اعارة اسكندر.
• في ناس اتذكروا سوداكال.
• في ناس ح يندموا عليه.
• وح يقولوا يا حليل ايام سوداكال.
• كنتوا عايشين في نعيم.
• قنصل حديقة الموردة دا (التنظير) ما انستر معاه.
• ….
• ترس اخير : ونحن منتظرين.
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019