• ×
الثلاثاء 19 مارس 2024 | 03-18-2024
محمد عبدالماجد

وليد طاشين كون بخير وعافية وصحة جيدة..انت كويس نحن كويسين

محمد عبدالماجد

 0  0  3396
محمد عبدالماجد
صابنها
محمد عبد الماجد
وليد طاشين كون بخير وعافية وصحة جيدة..انت كويس نحن كويسين

• أنا لا اعرف المرض الذي يجعل وليد طاشين يستشفى منه في القاهرة – اكتب بدون خلفية حتى لا ازيد مخاوف الناس على نجمها المحبوب وليد طاشين.
• اظن ان اللاعب اجرى عملية في القاهرة بسيطة وهو الآن بخير وصحة وعافية جيدة.
• كون بخير يا طاشين.
• انت كويس …نحن كويسين …ما عندنا أي عوجة.
• الدنيا كلها تبقى بخير لمن الهلال يقيفوا مع ولدهم وليد طاشين.
• هؤلاء العظماء لا تتخلوا عنهم – ادعموهم دائما بقدر الامكان.
• حب الهلال واخلاقه تتمثل في مثل هذه المواقف.
• دفعني للكتابة عن وليد طاشين اني قرأت خبر عن زيارة وفد من بعثة الهلال في القاهرة الى اللاعب وليد طاشين في احدى مستشفيات القاهرة. كما قرأت قبل ذلك خبر عن زيارة اخرى قام بها وفد من بعثة الهلال الى النجم عزالدين الدحيش الذي يرقد هو الاخر طريح الفراش في القاهرة.
• ونحن في هذه الايام المباركة – بقدرة العزيز الجبار – الواحد الاحد – بلطفه ورحمته نسأله وهو الكريم الغفار ان يشفي عزالدين الدحيش ووليد طاشين وان يبلغهما العافية وتمام الصحة.
• ادعوا لهم بالشفاء – ولا تبخلوا عليهم بالدعاء ونحن في افضل الايام وابرك الليالي.
• سوف اكتب لاحقا ان شاءالله عن الصاروخ عزالدين الدحيش – غير اني اكتب اليوم عن وليد طاشين.
• الدحي شدا قصة براهو – هو الذي وضع اسلوب جديد وطريقة مختلفة لرأس الحربة لم تكن معروفة قبله.
• الدحيش في اعتقادي هو المهاجم الذي ادخل اسلوب الهجوم (النفسي) على الخصم.
• العامل النفسي هو الذي تميز به الدحيش.
• سوف اعود لاحقا لاكتب عن هذه الظاهرة التى ادخلت اسلوب (معنوي) الى جانب الاسلوب (المادي) في الهجوم.
• الحاجات دي يا جماعة نحن مفروض نقيف عندها …ومفروض ما نخليها تمشي ساي.
• الحاجات دي جابها الهلال.
• طرق واساليب ..ابتكرها الهلال ..وصارت اسلوب عالمي.
• وما في زول بعد كدا بجيب سيرة الهلال او يحفظ للهلال حقه.
• ندخل على الفاصل التاني.
• ونجيكم من الاخر.
• نحن من جيل علاقته بالهلال اتبنت عن طريق (الراديو) – كان ليس لنا غير ذلك من سبيل.
• نقعد للراديو في الواطة.
• حتى (الصحف) كانت غير ممكنة – لذا بنيت علاقتنا مع الهلال عن طريق (الراديو).
• عشقنا خرج للهلال من هنا.
• والاذن تعشق قبل العين احيانا.
• اذكر اننا (دكينا) المذاكرة كمين مرة كدا – عشان نسمع مباراة الهلال في الراديو …وكم وكم (دكينا) الحصة الاخيرة عشان نلحق (عالم الرياضة) في السوق ونسمعه من (الراديو) الكبير.
• مرات الحصة الاخيرة بتجر وتفوتنا عالم الرياضة خاصة لمن تكون دبل علوم.
• ما في حصة علوم حصة واحدة.
• حصة العلوم في أي جدول دبل.
• قادر الله.
• هسع دا ما موضوعنا.
• ايام التسجيلات ما كنا بنفوت عالم الرياضة – اذ لم يكن لنا وسيلة او طريقة نعرف بيها تسجيلات الهلال او نتائج مبارياته غير (عالم الرياضة) او النشرات الرياضية.
• كم كنا نجلس لنشرة الساعة التاسعة في التلفزيون عشان نعرف نتيجة مباراة الهلال والاهلي الخرطوم او الهلال والعباسية او الهلال والتاج او الهلال والتحرير او الهلال والزهرة.
• ما كان في مواقع تواصل ولا كان في نت – بنعرف نتيجة المباراة من (بسمة) المذيع.
• ومرات ما تعرف النتيجة إلّا تاني يوم.
• تلفونات ساكت ما كان متوفرة.
• نتيجة المباراة كانت زي نتيجة الفحص ..ما بتعرفها إلّا تاني يوم.؟
• كنا بنتفائل بالأخبار عندما يكون المذيع اسحاق عثمان ..بنضمن الهلال فائز.
• وكان في بعض المذيعين بنخاف منهم – دائما كان بجيبوا لينا نتيجة ما حلوة.
• كنا بنطلّع الكراسي في النادي – نحضر الدعايات ..ونكمّل النشرة كلها عشان نشوف نتيجة مباراة الهلال.
• كان عندنا صبر – ما بنفوت دعاية.
• كانوا في النشرة بجيبوا لينا اهداف المباراة وبعد ذلك ما بتشوف هذه الاهداف إلّا في عالم الرياضة يوم الجمعة.
• ويوم الجمعة ذاتو يسلو روحك ..ما بخلوا ليهم سباق عجلات او سباق خيل او دورة روابط ثم يأتوا لك في النهاية باهداف مباراة الهلال.
• مع ذلك كنا مستمتعين بذلك …وفرحانين ..وعايشين حياتنا طول وعرض.
• الراديو كان مسرح اخر لنا …نحضر فيه مباريات الهلال بالوصف الحي.
• ناس الرشيد بدوي عبيد وعلي الحسن مالك بعملوا فينا عمائل.
• مباريات الهلال عادة كانت بتكون في الخامسة مساء عندما يلعب الهلال افريقيا خارج السودان.
• ولمن يلعب الهلال في السودان ويعلنوا عن تلفزة المباراة – كان هذا الامر بالنسبة لنا عيد.
• كنا ما بنوم.
• نطلع التلفزيون من قبل 72 ساعة.
• نفطوا.
• ونتمروا.
• ونرجعوا.
• لو ما جيت النادي من بدري ..ما بتلقى ليك كرسي ..ولو لقيت ليك كراسي ما بكون في حتة تقعد فيها وتشوف المباراة.
• في هذا التاريخ الذي احدثكم عنه – كان الهلال فيه طارق احمد آدم ووليد طاشين ومجدي مرجان ومنصور بشير تنقا والديبة وحمد دفع الله ومنقستو وصبحي.
• الناس ديل كنا بنشوفهم عديل في الراديو.
• وكان ما بنقبل فيهم كلمة ..صورهم في الادراج والدولايب.
• وليد طاشين الذي انتقل للهلال من نادي ابوكدوك في عام 1984 كان مجرد لاعب صغير …جاء من الدرجة الدنيا الى الهلال مباشرة.
• الغريبة ان كل الذين يأتوا من الدرجات الدنيا في ذلك الوقت كانوا يحققون نجاحا كبيرا مع الهلال.
• مثل طارق احمد آدم الذي جاء من نادي الديم وسط او وليد طاشين الذي جاء من ابوكدوك.
• وليد طاشين كان هيبة بالرقم (10)…صاحب قوام فارع …وضربات رأسية ما كان عندها أي فرق من تسديدات ربرتو كارولس.
• هسع في واحد ينط لي ويقول لي وليد ما كان بيلبس (10).
• في ناس حافظين أي شيء.
• ضربة وليد طاشين الرأسية – كان محلها طوالي في القون – فعلها في حامد بريمة في 1986 وفعلها في شوبير في 1987.
• وليد طاشين عندو حتة خاصة في القون.
• بخت الكورة بي رأسو.
• وليد طاشين مع موهبته ووجوده الذي يمنح الطمأنينة لكل الهلالاب عندما يكون في تشكيلة الهلال هو لاعب مهذب وهادي وبعيد عن الاضواء والاعلام.
• ما بتسمع ليه كلمة برة الملعب.
• وليد طاشين بعد الاعتزال – ابتعد من الاضواء – رأيته في اكثر من مرة وهو يسوق عربة (امجاد).
• كان يكافح بصمت ..وياكل من عمل يده ..وعرق جبينه.
• امثال وليد طاشين كانوا يتستحقون واقع افضل من هذا الذي هم فيه – لأن وليد طاشين نجم كبير قدم الكثير للهلال وللمنتخب.
• سعدت بزيارة وفد الهلال له في القاهرة واتمنى من السوباط والطاهر يونس والفاضل التوم ان يقدموا دعما ماديا كبيرا لوليد طاشين وللنجم عزالدين الدحيش.
• روابط الهلال وقروباته خاصة قروب اوفياء الهلال علمت انه قدم دعم للاعب وليد طاشين وهذا امر جميل – ارجو ان تحذو القروبات الاخرى حذو قروب اوفياء الهلال الذين كانوا عنوان للوفاء وان ويقدموا دعمهم المادي للاعب وليد طاشين الذي يحتاج للدعم المادي …وان كان الدعم يسير.
• جودوا بالموجود.
• وليد طاشين منحنا الكثير من الفرح …والهلال يبقى دائما وفيا لابنائه.
• في لاعب اخر ..ارجو ان يلتفت اليه الناس لاعب (راكز) وما بتكلم وبعيد عن الاعلام والاضواء.
• ابحثوا عن مجدي مرجان وكرموا هذا اللاعب وادعموه – فهو يستحق ذلك.
• خص بالحديث هنا رئيس الهلال هشام السوباط.
• مجدي مرجان يا هلالاب.
• وكفاية.
• ما عاوز اتكلم اكتر من كدا.
متاريس
• غياب الزميل عبدالرحمن عيدروس عن مرافقة الهلال في بعض سفيرات الهلال كان يترك فراغا اعلاميا كبيرا.
• وجود عيدروس كمنسق اعلامي مع الهلال امر مهم.
• عيدروس بوفر كل الاخبار والمعلومات والصور عن الهلال بالداخل والخارج.
• وهو متعاون مع الجميع.
• ومتوفر.
• ولا يبخل لأية جهة بمعلومة او خبر.
• كفي ان مواقع التواصل الاجتماعي تحتشد باخبار الهلال وصوره عندما يكون مرافقا للهلال.
• وكل سنة والجميع بخير.
• وعيد سعيد ان شاءالله.
• ونلاقيكم بعد العيد ان شاءالله.
• وقمة الهلال والمريخ.
• عيد مبارك عليكم.
• …….
• ترس اخير : رمضان القادم ما بعيد …اللهم بلغنا رمضان القادم.
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019