• ×
الأربعاء 6 ديسمبر 2023 | 12-06-2023
محمد الطيب الامين

عاجل وخطير .. هذا هو مصدر أموال سوداكال!!

محمد الطيب الامين

 0  0  11670
محمد الطيب الامين
قزاز ورذاذ
محمد الطيب الأمين

عاجل وخطير .. هذا هو مصدر أموال سوداكال!!

* بعيداً عن عصبية (هلال مريخ) والمطاعنات والمناكفات تجدني معجب جداً برئيس نادي المريخ آدم سوداكال.
* وأعتقد أنه من أنجح الرؤساء الذين مروا على المريخ.
* على الأقل سوداكال (مريخابي) .
* وهو في هذا الجانب يتفوق على جمال الوالى وأبو العائلة.
* الوالي وأبو العائلة الاتنين هلالاب.
* سوداكال هو من المريخاب القلائل الذين حكموا المريخ وهذه ميزة كبيرة لو كنتم تعلمون.
* بخلاف أن سوداكال يتفوق على جمال الوالى كونه (مريخي) بينما الوالي (هلالي) زرعته الحكومة في الوسط الرياضي ، بخلاف هذا فإن سوداكال دخل نادي المريخ بالإنتخابات.
* جاء بالانتخابات ولا جابو البشير؟
* فاز بالتذكية ولا أنا خشمي ما بشوف؟
* جمال الوالى دخل بالتعيين وسوداكال جاء بالانتخاب.
* الكلام ده صاح؟
* طيب اوكي.
* أنت كمريخابي مشكلتك شنو مع زول فاز بالتذكية؟
* الزول ده لما نزل انتخابات عندك زول نزل معاهو؟ قال لا.
* عندك زول أعترض على ترشيحه؟ قال لا.
* مش كنت فرحان وقلت ده خليفة الوالي؟ قال أي.
* مش ناس ود الياس وجمال الوالي باركوا فوزه بالتذكية؟ قال أي.
* طيب مالك؟
* جمال الوالى حكمك ١٤ سنة.
* في ال١٤ سنة دي انت كنت بطير من التمهيدي ٩ مرات.
* وتعال اناقشك.
* ٩ مرات تمهيدي ومرة واحدة مجموعات ومرة عفوك من التمهيدي ومرة ما في زول جاب خبرك اصلا.
* في زمن جمال الوالى أنا شبكتك خمسة متواليات لما بقيت تهرب من استادك.
* في زمن جمال الوالى أنت جبت محترفين لا علاقة لهم بكرة القدم وعلى رأسهم (نجاد البوسني) وهو في العمر أصغر من جمال الوالى بشهرين.
* في زمن الوالي انت جبت لاعبين مسحوا بالمريخ الواطة.
* جبت الحضري الذي قال : جمال الوالى ما كان بيحلم يسلم على في يدي.
* قوم على حيلك.
* سوداكال عمل ليك شنو؟
* في وجود سوداكال انت شلت الدوري تلاتة مرات.
* واهو وصلت المجموعات وياريتك كان ما وصلت.
* داير شنو أكتر من كده.
* أنا لو في حاجة واحدة ما عاجباني في سوداكال هي قفل استاد المريخ.
* كونو تجي تلعب في استادنا دي والله ما عاجباني نهائي.
* غير كده سوداكال ما فيهو عيب.
* شخصية باردة وواثقة.
* عارف نفسو بعمل في شنو.
* كتبوا عنو في الجرايد لما الحبر انتهى.. وهو قااااعد.
* عملوا ليهم زي ١٧ مسيرة ... وهو قاعد.
* مشوا الفيفا .. وهو قاعد.
* عملوا اي حاجة ما اشتغل بيهم الشغلة.
* شغال في شغلو.
* والله مكيفني كيف.
* وحالياً رتب العضوية وح ينزل انتخابات.
* نحن في إعلام الهلال والله ندعم هذا الرجل.
* المريخ ما حق زول.
* والخيار والفقوس ممنوع.
* الراجل ده مريخابي وعندو قروش ومن حقو يحكم المريخ.
* وانت كان عشمان جمال الوالى يجيك راجع ويحكم المريخ ويصرف عليك زي زمان احسن تبطل احلام.
* اطرد الأحلام يا جميل واصحى.
* سوداكال ما فيهو كلام.
* لا بحب الإعلام ولا بحب الشو.
* زول شغل بس.
* واوع تقول لي (مصدر قروشو).
* انت كنت عارف مصدر قروش جمال الوالى؟
* ما تتكلم ساي.
* كلنا سوداكال.
* مصدر قروش سوداكال ما بهمني طالما قبلو كان في ناس ما في زول سأل من مصدر قروشهم.
* وتبكوا بس .. عين قطرة وعين مس.
* و.. و..
* و(نقطة) سطر جديد.
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019