• ×
السبت 15 مايو 2021 | 05-14-2021
محمد عبدالماجد

التش (مصباح) الكرة السودانية (السحري)

محمد عبدالماجد

 0  0  1224
محمد عبدالماجد
صااااابنها

محمد عبدالماجد

التش (مصباح) الكرة السودانية (السحري)

• في اعتقادي ان الراحل والي الدين محمد عبدالله ممكن من (القون) الذي يسجله يعمل ليك (لوحة تشكيلية).
• الباك خط سريالي في اللوحة.
• او في القون.
• عارفكم انتو بي فهمكم بتقولوا الباك صديق اللاين.
• والقون عند والي الدين بقع في زاوية الظل.
• ما عارف دا كلام ناس الفنون كدا.
• نحن والي الدين دا دخلنا كلية الفنون الجميلة – رحمة الله عليه.
• والي الدين دا من القون ممكن يعمل ليك علاقة مفاتيح.
• وممكن يعمل ليك (سبيل) بتاع موية.
• وممكن يعمل ليك (اغنية).
• وفي ظني ان منصور بشير تنقا كان (ملحنا) – الكرة يعكسها ليك بي (نغمتها).
• عكسيته منوتة.
• اجمل ما في تنقا انه كان لاعب طرف شمال او (باك) وهو بكل ذلك الابداع.
• الذين لم يشاهدوا طارق احمد ادم ما بعرفوا حاجة في (الفلسفة).
• لا تقول لي سقراط.
• ولا تقول لي بتهوفن.
• بتهوفن علاقته شنو بالفلسفة؟
• ما عارف …مرات طارق احمد آدم بيستخلص الكرة على طريقة بتهوفن.
• مرة سألت عصمت الامتداد ..قلت ليه انتوا لمن كنتوا في الموردة غلبتوا الهلال كم مرة ..عملتوها كيف؟
• عصمت الامتداد قال لي نحن وقت نكون عاوزين نغلب الهلال بنقفل طارق احمد آدم.
• قال لي لمن ننجح في ذلك بنغلب الهلال.
• استغربت في كلام عصمت الامتداد ..ووضعت ايدي في رأسي ..وقلت بيني وبين نفسي وعلاقة طارق احمد آدم بالموضوع دا شنو؟
• عصمت الامتداد ما انتظرني اوجه ليه سؤال قال لي : انت عارف هجمات الهلال الخطيرة بتبدأ من طارق احمد آدم.
• لمن تقفل طارق بتوقف أي هجمة خطيرة عليك.
• احترمت كلام عصمت الامتداد …وزادت قناعتي بي طارق.
• مرة في مناسبة مختلفة خالص ما عندها علاقة بالموضوع دا ..قابلت الرشيد المهدية ..قعدت اتكلمت معاه …. الرشيد المهدية اتكلم لي عن اولاد جيله في الهلال.
• الرشيد المهدية براهو قال نحن لمن كنا في الهلال كان أي مدرب بضع خطته على طارق احمد آدم ومنصور بشير تنقا.
• تحركات الهلال وهجماته كانت مبنية على طارق وتنقا.
• هذا الكلام اذكره جيدا – سمعته من الرشيد المهدية شخصيا في عزاء والد القطب الهلالي الزاكي التجاني في بحري.
• مناسبة هذا الكلام ، اني اريد ان اتحدث في هذه المناسبة عن اللاعب (التش) وهو لاعب لا يقل عن تلك الاسماء في شيء.
• لو انت ماشي في شاطئ على البحر ، قمت لقيت ليك (جرة) او(قلة) او (قارورة) زي ما بحصل في احاجي الحبوبات ، وطلع ليك من تلك (الجرة) مارد وقال ليك شبيك لبيك انا ملك ايديك اطلب أي حاجة احققها ليك ..قمت طلبت (قون) او طلبت (انتصار) او (بطولة) واتحققت ليك ، اعرف طوالي ان هذا (المارد) الذي خرج ليك من (الجرة) هو محمد حامد التش.
• ما في زول ممكن يلبي ليك هذه الطلبات غير محمد حامد التش – قون – ضربة جزاء – انتصار – بطولة ، كل هذه الطلبات يملك التش ان يحققها ليك في (رمشة عين).
• في لعبة.
• او تمريرة.
• من غير ما تشعر.
• الحاجات دي عند التش اسهل من (الرصيد).
• يرسلها ليك في لحظة.
• ولا بتلفت.
• ولا بتعب.
• ولا برهق نفسو.
• ولا بعرق.
• زمان ونحن (شفع) كان حسب عقلنا بنتمنى نلاقي هذا المارد الذي يملك ان يحقق لك كل ما تتطلبه.
• وكان حسب فهمنا ، بنتخيل اننا وقت نلاقي هذا المارد الذي يملك ان يحقق لك كل ما تطلبه ويقول ليك عاوز شنو؟ كنا بنقطع اننا ح نقول ليه : (بكرة ما يكون في مدرسة).
• هذا كان كل همنا.
• خاصة لو بكرة عندنا اختبار او تسميع.
• همنا كله يكون بكرة ما في مدرسة.
• ما علينا – هسع دا ما وقت الكلام دا – مارد الكرة السودانية الذي يملك ان يحقق لك كل ما تطلبه في المستطيل الاخضر هو محمد حامد التش.
• وخلونا نمشي اكتر من كدا في الحتة دي …ونقول عشان التش لاعب نحيف ورهيف وحريف وشفيف وخفيف ونظيف (شفتوا قافية جنس دي) ، خلونا نقول ان التش هو (المصباح السحري) للكرة السودانية.
• بالمناسبة نحن الهلالاب جبلنا على (المهارة) – بنحب (المهارات) أي لاعب صاحب مهارات عالية بنحبه حتى لو كان بيلعب في الفريق المنافس.
• ما عندنا (غتاتة) في الحتة دي.
• وحتى لو ظهرت لينا (غتاتة) بتكون في سياق المناكفات والمنافسات الشريفة.
• لذلك ازعجتنا اصابة (التش) – ربما اكتر من ناس المريخ ذاتهم – وغنينا للتش اغنية ابوعبيدة حسن (نحن ما رضيناها ليك) ، وتمنينا ان يكون الحديث الذي يدور عن اصابة التش بالرباط الصليبي الآن حديث (ساكت) وما عنده اساس.
• موسم بدون (التش) مفروض يعلقوه.
• مفروض يلغوه.
• بعدين المريخ بدون (التش) ذاتو يعمل شنو؟
• بدون التش …فريق المريخ جهازو الفني ما بتابع مبارياته.
• في كرة القدم ظهرت اصابات (سخيفة) – اصابات لم تأت إلّا من اجل ان تحرمنا من مواهب وتبعدنا منهم.
• لعن الله (الرباط الصليبي) الذي ظل يحصد ويقعد اللاعبين اصحاب المهارة ، ونحن اصلا ما عندنا زيهم كتير.
• لا اعرف مدى صحة هذا الخبر والذي اتمنى ان لا يكون صحيحا حيث (افادة متابعات سبورتاق بأن نتائج الفحوصات التي خضع لها نجم المريخ “أحمد حامد التش” والتي ظهرت نهار امس قد حملت نبأً سيئاً للطاقم الفني وأنصار النادي. إذ أكدت الفحوصات إصابة “التش” بقطع في الرباط الصليبي، إلى جانب “قضروف” على مستوى “الركبة” وهو ما يستدعي خضوعه إلى عملية جراحية ثم فترة تأهيل طويلة يتوقع أن تبعده عن الملاعب حتى نهاية الموسم. يذكر أن للاعب كان قد فشل في أكمال جولة الفريق الأخيرة أمام “أوتوهو” الكونغولي، إثر تدخل عنيف من لاعب الخصم).
• لغاية الآن عندي عشم الخبر ما يكون صحيح.
• والاصابة ما تصل مرحلة الرباط الصليبي.
• احسن للمريخاب ان يطلعوا من (التمهيدي) من ان يفقدوا اللاعب المهذب والخلوق والفنان (التش).
• اللاعب التش هو مع انه هو المصباح السحري للكرة السودانية وهو كذلك (مطرب) الملاعب الخضراء…إلّا انه لاعب متواضع لم تزيده النجومية إلّا تواضعا.
• التش ما لاعب…التش مطرب.
• التش بنافس ناس حسين الصادق وطه سليمان وجمال فرفور.
• عشان كدا (الرباط الصليبي) ، لعنة الله عليه حرمنا من (فنان) من (مطرب).
• كان الرباط الصليبي قبل ذلك قد حرمنا من نزار حامد وهو احرف لاعب وافضل من انجبت الملاعب السودانية في جيله.
• نزار حامد دا – مفروض يلعب في الدوري الانجليزي.
• اخلاق ..وفنون وانضباط.
• كذلك اللاعب (التش) والذي لا تقل مهاراته ومواهبه من أي الكبار في الدوريات الاوربية.
• التش لو كان لقى عناية وتدريب صاح …ممكن يلعب في اعظم اندية العالم.
• والله ما بيسأل فيهم.
• انا ما شايف التش بقل منهم في شيء.
• نتمنى ان يكون خبر اصابة التش بالرباط الصليبي ما صحيح ..وان لا تصل الاصابة الى هذه الدرجة حتى لا تحرمنا من التش فترة طويلة.
• وان كان الخبر صحيح ..نتمنى العودة السريعة للتش ..وان تكتمل مراحل علاجه بصورة علمية حتى لا يبتعد التش كثيرا من الملاعب.
• الابتلاءات واردة في أي مجال …وهي اختبارات وامتحانات ..والتش لها ان شاء الله …سوف تعود ان شاء الله سريعا للملاعب وسوف تجدها في انتظارك.
• الجماهير بما في ذلك جماهير الهلال التى تحترمك والتى تمنتك بين صفوف فريقها سوف تكون في الانتظار.
• الشباك ..والنجيلة ..والمدرجات …كلها في الانتظار.
• ان شاءالله فترة صغيرة ..ويرجع (التش) كما كان …وافضل من الاول.
• هذه فرصة للتش لتقوية عضلاته وللعمل على تأهيل نفسه بصورة علمية وطبية.
• التغذية السليمة والتدريبات العلمية سوف تضع التش في مكان اخر.
• التش لاعب صغير ..ولن يتأثر بالغياب هذه الفترة.
• ولا يهمك يا كابتن.
• بكرة ترجع افضل.
• ……………
متاريس
• التش يستحق الكتابة عنه.
• وهو اهل للفن والابداع والروعة.
• الغريبة اني اكتب اليوم عمودين مختلفين عن التش في (ريمونتادا) وفي (الانتباهة).
• ودي ما بتحصل مني كتير.
• لكن التش يستحق هذا.
• سوف نكون مع التش حتى يعود للملاعب سالما.
• فترة وبتعدي.
• ……….
• ترس اخير : ظروف بتعدي ..ما تهتموا للايام.
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019