• ×
الجمعة 7 مايو 2021 | 05-06-2021
محمد الطيب الامين

يا أبو عشرين زمان كان البرتقال (تحلية) وهسه بقى علاج !!

محمد الطيب الامين

 0  0  897
محمد الطيب الامين
بالعربي الكسيح

محمد الطيب الأمين

يا أبو عشرين زمان كان البرتقال (تحلية) وهسه بقى علاج !!

* عندما كانت الظروف الإقتصادية (راضية) ، والنفوس (مرضية) ، والحياة (وردية) ، كانت (التحلية) ثقافة وعادة سودانية .
* لا تخلو (وجبة) من التحلية.
* ومرات تكلفة التحلية بتكون أغلى من تكلفة الوجبة نفسها .
* تكلفة ملاح (أم رقيقة) أقل من تكلفة (الكنافة) .
* كاستر ورز وبطيخ وبلح الشام ومديدة بلح وشعيرية ومُربى وطحنية وباسطة وبرتقال .
* زمان كان البرتقال تحلية وهسه بقى علاج .
* لما كنا (بِنحلي بالبرتقال ما كنا عارفين إنو فيهو فايتمين سِي) .
* شبعنا (سِي) دون أن نعرف (سِي) هي علاج .
* وبما أن كورونا تحتاج لمناعة .
* وبما أن المناعة في فايتمين سِي .
* وبما أن فايتمين سِي غالي .
* فإن إنتصار الهلال هو كل (الفايتمينات) .
* نصر الهلال (مناعة) .
* الحزن والخوف بيضعف المناعة هكذا أثبت الأطباء .
* ونصر الهلال يعني فرح وطمأنينة وهذه من (مقويات المناعة) .
* ولهذا كله نقول اليوم الهلال هو (التحلية) .
* تأهل المريخ (أم رقيقة) واليوم بإذن الله يتأهل الهلال (الكنافة) .
* وما بين هذا وذاك كان (الكبير العطبراوي) حاضراً .
* حقق الأمل عطبرة الفوز (رايح وجاي) وهو يستحق ذلك .
* الأمل عطبرة ورغم ضعف الإعداد ابهر الناس وانتزع بطاقة التأهل عن جدارة واستحقاق.
* عطبرة تستاهل الفرح والفرح بيشبه عطبرة .
* وسنعود لما حققه الأمل لاحقاً إن شاء الله.
* سنعود للحديث عن الأمل عطبرة لأن إعلام الهلال هو إعلام الأمل.
* الحالة واحدة .
* أقلامنا ليكم يا حبايب .
* المهم .
* الهلال عشان يكون (تحلية) لابد أن يتعامل مع مباراة اليوم بحذر .
* حققنا الفوز ذهاباً وهذا هو الأصعب ولكن من الجنون أن تظن أن الأزرق قد تأهل.
* تناسي نتيجة الذهاب واحترام الخصم سيكون مفتاح الفوز عليه .
* التواضع في حضرة الكرة والجدية في التعامل مع اللقاء مهم جداً .
* نحترم تطلعات وطموحات فايبرز فهو سيلعب من أجل أن يكسب .
* ما في فريق في الدنيا دي ب(يتلتل) ويجي من بلدو عشان يخسر .
* جاي يفوز ويتأهل.
* وهذا أمر يفهمه الجهاز الفني ويفهمه نجوم الهلال دون شك .
* نعزز فوز كمبالا ونزيد عدد الأهداف ونحسم التأهل مبكراً .
* والله كنت بتمنى الهلال يواجه فريق بضعف مستوى الفريق الذي واجهه المريخ .
* كنت بتمنى كده عشان وليد الشعلة وفيني والضي ينفردوا بصدارة الهدافين من مرحلة التمهيدي .
* لكن معليش (الحلق بمشي للما عندو اضأن) .
* أي تشكيلة تلعب اليوم هي جديرة بالمهمة.
* وغالباً لن يكون هنالك تغيير كبير في التشكيل .
* ربما يظهر جيسي أساسياً .
* جيسي يستطيع أن يحدث الفارق وكذلك روفا.
* نترك هذه الخيارات للجهاز الفني ونأمل أن يكون الهلال في الموعد .
* العندو أبو عشرين ما بخاف .
* بمناسبة أبو عشرين .. (كلب الليدو) السنة دي ما كتلو جمب بيتو يا بابكر سلك .
* طبعاً (كلب الليدو) هو لقب المريخ الجديد وقد أوحى به الأستاذ بابكر سلك .
* كلب الليدو لما يمشى نيجيريا بيعرف حاجة .
* في نيجيريا هناك لو قعدتو تعملوا حركات (السقوط على الأرض) على بالنعمة انيمبا يعمل فيكم عملية ما سبقه عليها إلا الوحدات الأردني.
* وما أظن في تمهيدابي بينسى الوحدات الأردني.
* ولا نسيتوا؟
* عموماً .. نحن في إنتظار الحلو .
* في إنتظار التحلية .
* نسأل الله أن ينصر الهلال لأن نصره هو مناعة وفايتمين سِي .
* (فايتمين سِي الغلابة) هو الهلال .
* ونركب صافنات ونجيبة (هلالابية) واصلو الزول بيموت والذكرى تفضل حية.
* و..و..
* وأنت افراحي البعيشا وغيرا مكتوب لي أشقى.
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019