• ×
الجمعة 7 مايو 2021 | 05-06-2021
محمد الطيب الامين

التش خلوا امسكوا ود الرشيد !!

محمد الطيب الامين

 0  0  1443
محمد الطيب الامين
■ بالعربي الكسيح |
محمد الطيب الأمين |

التش خلوا امسكوا ود الرشيد !!

______________________

* مع الحظر من الصعب تفرز (السبت) من (الاربعاء) .
* ومن الأصعب أن تفرز يوم (١٢) من يوم (٢٣) .
* غايتو الحسنة الوحيدة العملها فينا الحظر إنو رجعنا (لحمام العصر) .
* فكرة إنك (تستحمى العصر) ما كان لها أن تكون لولاء كورونا .
* يجب أن نشكر دولة الصين على هذا الفايروس وعلى (حمام العصر) .
* وعلى فكرة .
* مع الحظر وعدم الموضوع اكتشفت إنو (الابريق المخطط) بشيل موية أكتر من الابريق السادة .
* وغايتو جنس غايتو .
* وزير الكهرباء طلب منا الصبر على (القطوعات) .
* واصلا نحن قبل ما يطلب مننا بقينا نغسل و(نشر) ملابسنا في اسلاك الكهرباء .
* وحكاية الكهرباء تستدعي النكتة القديمة.
* وفي النكتة الرجل(مقيل) في البيت وعندما لاحظ الكهرباء اليوم كلو شغالة اتصل على ناس الكهرباء وقال ليهم : (الليلة مالكم ما شغالين ولا شنو) .
* حاجة تكسف .
* لما كنا صغار كانت بتلعب معانا وبتعمل لينا ملاح (لعب لعب) في (علبة الصلصة) ، وكنا بناكل عشان خاطر عيونها (أبرياء وكده) .
* ولما بقينا كبار بقت تعمل لينا ملاح (جد جد) في الحلة ، وبقينا ما بناكل عشان (الكضب حرام) .
* كلو ما تكبر بتعقل .
* والبطن خط أحمر.
* يركز الهلالاب هذه الأيام كل جهدهم مع التش وضرورة تسجيل التش .
* الحقيقة إن عقد التش مع المريخ ساري حتى (٢٠٢١) .
* التركيز يجب أن يكون مع محمد الرشيد .
* (قلع) محمد الرشيد من المريخ سيكون بالنسبة لهم أصعب من (قلع) ضرس العقل.
* دي ح تكون ضربة موجعة أكثر من ضربة علاء الدين يوسف وما أدراك ما البصمة.
* عليكم بمحمد الرشيد .
* محمد الرشيد يا كاردينال.
* ود الرشيد لاعب جاهز وعندو شخصية في الملعب وبصراحة الهلال محتاج ليهو .
* وهو ذاتو محتاج للهلال .
* الراجل هلالابي جدا .
* غدا بإذن الله سأكتب رسالة خاصة للاخ محمد الرشيد عبر هذه المساحة (رسالة سرية) تحت عنوان : (سري للجميع فقط) .
* ومن هسه البعرف محمد الرشيد (يشير) ليهو عمود بكرة من الليلة.
* عندما صدح الفنانة القامة عثمان مصطفى (الله يشفيه) عندما صدح مغنيا : (والجرح لا نام لا استراح لكني متكتم عليه وكم من جراح احيت جراح) .
* المقطع ده بالذات خلانا (ننجرح عمدا) عشان نعيش الاحساس بتاع (متكتم عليه) .
* والصراحة (التكتم) على الجرح العاطفي هو مثل (النزيف الداخلي) .
* ونزيف المشاعر لا بيوقفو (شاش) ولا بيجففو (قطن) .
* حالة صعبة .
* قالوا ليهم البرتقال بعالج كورونا قاموا عملوا الدستة بي (٣٥٠) جنيه .
* غايتو الحمدلله (البطاطس) ما بعالج الإيدز.
* قصة وآخرها لسه .
* عدادات الفنانين قبل الحظر كانت تتراوح ما بين (٥٠ ، ٦٠ ، ٨٠ ، ١٠٠) ، وبعد الحظر ح تتراوح ما بين (١٠٠ ، ١٢٠ ، ١٤٠) .
* لزوم التعويض وكده .
* تعوضوا على حسابنا كورونا دي جبناها نحن ولا شنو ؟
* المهم .. الشعب يمكن أن يحدد سعر الفرح وسعر العداد .
* لا تدفع أكثر من (٥٠) ألف والعاجبو عاجبو والما عاجبو أولاد الحلة على قفا من يشيل .
* الأصداء الواسعة لزيارة الكاردينال لأستاذ الأجيال عبده قابل تؤكد عظمة الزيارة .
* عبده قابل يستاهل والكاردينال كريم .
* الجوانب الإنسانية التي يتمتع بها الكاردينال جعلته (أمل) لكل عيان .
* نسأل الله أن يزيده فمساعدة المحتاجين عمل غير ساهل.
* كل الوجع قاله الراحل حسن الزبير في أغنية (الصورة) : (هل صحيح راقي ومهندم؟ وهل ببكي الريد عيونو؟ وهل عرفتو ما بتندم؟
* اتخيل زول بيسأل (حبيبتو السابقة) عن مواصفات (حبيبها الجديد) الذي حل محله .
* افرض إنو (راقي ومهندم) أها ح تعمل شنو يعني ؟
* ونركب صافنات ونجيبة (رباطابية) واصلو الزول بيموت والذكرى تفضل حية .
* ويا أستاذة : ما داير احبطك لكن هل عندك فكرة إنو ادواتكم بتاعت المكياج بتجي من الصين منبع الكورونا ولا ما عندك فكرة ؟
* و..و..
* والله ما رضيناها ليك تغمر الدمعات عينيك ورغم كل خصام وجفا .......... تعال اشحن تلفونك عندنا .
امسح للحصول على الرابط
بواسطة : محمد الطيب الامين
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019