• ×
الجمعة 29 مارس 2024 | 03-28-2024
محمد عبدالماجد

النتيجه طلعت ( positive )!!

محمد عبدالماجد

 0  0  3606
محمد عبدالماجد
صابنها | محمد عبدالماجد | النتيجه طلعت ( positive )!!
______________________
# الحصة الصباحية /
بعد الحظر المنزلي – قال لاصحابه بعد (17) سنة زواج – اكتشفت اخيرا من هو (راجل البيت) الحقيقي!!.
لم يشفع له (شاربه) الكث – في أن لا يورق (الملوخية) او ان لا يفرك (البامية).
شنبو طلع أي كلام!!.
في واحد من الجماعة الكبار – قال اول مرة اعرف (المسح) حار كدا.
…………….
• زمان وقت كنا نمشي على المعمل لفحص الملاريا – كان الفحيص بقول لينا تعالوا بعد (25) دقيقة عشان اسلمكم (النتيجة).
• تقول عاوزين يسلمنا نتيجة امتحانات الشهادة السودانية!!.
• في الـ (25) دقيقة دي …الواحد فينا كان ما بعرف يعمل شنو؟.
• يدخل ويطلع.
• ويقيف في الباب.
• ما عارف العبقرية وين في (الوقوف في الباب).
• اعلموا شير.
• الواحد فينا كان بيحاول يعمل فيها حريف ويمشي يشرب ليه (شاي) او (قهوة) برة.
• عشان يكسر الوقت.
• مدة الـ (25) دقيقة بتكون اطول من الاجازة بدون مرتب.
• اعلموا شير.
• قدر ما تعاين للساعة تلقى باقى (10) دقائق عشان النتيجة تطلع.
• اسوأ اللحظات.
• اصعبها.
• كانت هي تلك اللحظات التى تنتظرها من اجل استلام نتيجة فحص الملاريا.
• الملاريا كانت مشكلة.
• كانت كارثة.
• والعجب وقت يقولوا ليك الملاريا طارت ليه في الرأس.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• النتيحة وقت تؤكد الاصابة بالملاريا – الواحد فينا الاكل يطلع من نفسو.
• ولا تضوق ليه طعم.
• ما عارف ليه وقت تطلع (ملاريا) – نفسك بتدخل في (الزبادي) ..تمشي اقرب بقالة ..وتشتري ليك (علبة زبادي) قبل ما تمشي البيت.
• العبقرية وين هنا؟.
• اول ما تصل البيت – تلقى الاسرة كلها واقفة ليك في الباب.
• وقت تقول ليهم طلعت ملاريا – أي واحد يجيك جاري بي (بطانية).
• منتهى العبقرية.
• ما عارف علاقة البطانية بالملاريا شنو؟.
• الواحد لو ما بردان – يشعر بالبرد.
• المهم….(ما عاوز ادخل ليكم في التفاصيل).
• واطول ليكم في الموضوع.
• هسع الموضوع بقى اخطر من (الملاريا).
• هسع الموضوع جاب ليه (كورونا)….حمانا الله واياكم.
• اتخيلوا احساس – الشعور بي اعراض كورونا…والدخول في عزل نفسي – الكلام دا طبعا قبل الدخول في الحظر الصحي.
• بتشعر بالعزلة – قبل ما تدخل العزل.
• تخاف على اسرتك.
• امك ..وابوك.
• اخوانك …واخواتك.
• زوجتك ..واولادك.
• عشان كدا بتبعد من المنطقة.
• الكلام دا ممكن تشعر به من مجرد (فتر).
• قد تشعر بهذه الاعراض دون الاصابة بالفيروس.
• وقت تمشي تعمل الفحص للكورونا – كمان دا بيبقى احساس براهو.
• شعور تاني.
• امتحان صعيب.
• الكثير من المصابين ..تابعت صفحاتهم …ونظرت لحالتهم.
• الواحد فيهم بشجاعة متناهية بكتب ليك : النتيجه طلعت ( positive ).
• نتيجة شنو؟.
• نتيجة الكورونا.
• لا حول ولا قوة إلّا بالله.
• الواحد فيهم يقول ليك نتيجة الفحص طلعت (ايجابية).
• المهم….(ما عاوز ادخل ليكم في التفاصيل).
• واطول ليكم في الموضوع.
• لمن قالوا لي الفنان ابوعركي البخيت دخل في حظر – قبل ظهور نتيجة الفحص بسبب (المخالطة) – غنيت في نفسي (بخاف).
• قلت عن ابوعركي البخيت (بخاف اسأل عليك الناس) – يقولوا لي النتيجه طلعت ( positive ).
• يا رب لطفك.
• يا رب سترك.
• لمن كمان قالوا لي النتيجه طلعت ( positive )….رجعت وغنيت لي ابوعركي البخيت (واحشني).
• غير اني متأكد ان ابوعركي البخيت وهو في تلك الحالة بغني في (اضحكي).
• ابوعركي زول ثابت ..قوي ..ظل شامخ وثابت لمدة (30) عاما …هل يمكن ان ينكسر الآن.
• ابوعركي البخيت (الكيزان) ما قدروا عليه بكل ملشياتهم .وجبروتهم وظلمهم وقمعهم – ان شاءالله فيروس كورونا ما يقدر عليه.
• بعدين (الايجابية) ما بعيدة عن ابوعركي البخيت.
• ابوعركي البخيت زول (ايجابي) في كل شيء.
• في كل شيء.
• حتى نتيجة فحصه للكورونا طلعت (ايجابية).
• ابوعركي هكذا.
• ابوعركي كدا – لمن لا يعرفوه.
• اكيد ابوعركي البخيت معنوياته في السماء الآن.
• قبل الاصابة بفيروس كورونا – كان ابوعركي البخيت في حالة نفسية سيئة جدا بسبب اصابة ابنته سماهر بالفيروس.
• ابوعركي كان في حالة صعبة.
• وحالته كانت سوف تتعقد اكتر عندما تأكد اصابة ابنه (يزن).
• لهذا كان ذلك (المكروه) – او ذلك (المرض) و (الابتلاء) برد على ابوعركي البخيت.
• ابوعركي البخيت ما كان بيستحمل يشوف (اولاده) بعد الاصابة بالفيروس.
• كان لا بد للفنان الكبير ابوعركي البخيت ان يشاركهم في هذا الوجع.
• مواقف ابوعركي البخيت كدا.
• ما عاوز ادعوا من خلال هذه الكلمات الى مشاركة الاباء والامهات لابنهائهم في المرض.
• لكن عاوز اقول (الاقدار) رتبت هذه الوضعية للفنان ابوعركي البخيت ولاسرته الصغيرة.
• نسأل الله الصحة والعافية والشفاء العاجل للفنان ابوعركي البخيت ولكل اسرته.
• شخص اخر تأثرت كثيرا لاصابته بالفيروس – وهو زول راقي وجميل ..ومهموم بالغير.
• الاعلامي محمد عثمان …زول فضّل ان يشارك مرضاه الذين ينقل اخبارهم (مرضهم).
• محمد عثمان ادي فريضة العمل الاعلامي بنكران كبير.
• دفع ثمن ملاحقاته للاخبار وللمرضي.
• وكذلك الحال بالنسبة للمذيعة والاعلامية سوزان سليمان – التى اصيبت بالفيروس بسبب (جرأتها) الزايدة.
• سوزان سليمان كانت تفتح عبر منصاتها البرامجية في التلفزيون ملفات حساسة وغامضة.
• ها هي سوزان سليمان بسبب جرأتها الزايدة تتعرض للاصابة بالفيروس المستجد.
• شخص اخر – تألمنا لاصابته بالفيروس – وهو مثال للصحافي الهادي والمهني والمتلزم.
• اخونا الاكبر صلاح الحويج – هو الاخر تعرض للاصابة بالفيروس – لتثبت لنا (كورونا) انها تختار من الناس افضلهم.
• ومن الاعلاميين ايضا اصاب فيروس كورونا الزميل مصعب محمد شريف واصيبت التلفزيونية مي علي بالخارج.
• كل هذه الاسماء – اسماء فاضلة …وجميلة …اختارها فيروس كورونا بعناية فائقة.
• نسأل الله لهم السلامة والشفاء العاجل.
• وربنا يحفظ البلاد والعباد ويرفع العباء.
• الاخ هيثم كابو ايضا في هذه الايام في حالة نفسية سيئة بسبب اصابة شقيقه مختار في السعودية.
• ومختار كل الذين تعاملوا معه – اكدوا اصالته وجماله …ومواقفه الجميلة مع اهله واصحابه وكل السودانيين في السعودية.
• قرأت بوستات كثيرة تتحدث عن مختار من شخصيات كبيرة مثل الاخ الدكتور مزمل ابوالقاسم والاخ ضياء الدين بلال وحسن بشير وعطاف – كل هؤلاء الشخصيات يعرفون فضل مختار ومعدنه النفيس.
• نسأل الله الشفاء العاجل لمختار …وكما قال هيثم كابو فعلا (سمحة القدلة في مختار).
• من بعد نتمنى لكل المصابين – الشفاء ..ليس في السودان فقط – بل في كل دول العالم.
• اللهم ارفع عن الارض هذا البلاء.
• ببركات هذا الشهر الفضيل وبخيراته ..ارفع عنّا هذا البلاء ..واحفظ السودان واهله ..بالداخل والخارج.
• ……………
متاريس
• الواحد قدر ما يقول يتكلم ليكم عن الكورة – في هذه الايام ما بقدر يكتب فيها.
• الكورونا ما خلت لينا شيء نكتب فيها.
• على كل حال ليكم ولي غيركم اعملوا فيها ما سمعتوا حاجة.
• ما تشتغلوا بي كلامي دا.
• احفروا ليه قبلو.
• وادفنوه.
• ناس (اغاني واغاني) شكلهم لغاية الآن ما سمعوا بي (كورونا).
• ………….
• الصبة الاخيرة / صالات الافراح في ولاية الخرطوم مفروض يتم تحويلها الى مقار عزل …بدل ما تقعد كدا – دون الاستفادة منها – خاصة اذا ارتفع عدد المصابين بالفيروس لا قدر الله.
نقلاً عن صحيفة ريمونتادا الرياضية
امسح للحصول على الرابط
بواسطة : محمد عبدالماجد
 0  0
التعليقات ( 0 )
أكثر

للمشاركة والمتابعة

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

جميع الحقوق محفوظة لـ "كفر و وتر" 2019